culture.cap.ru сӑнӳкерчӗкӗ

Ҫӗнӗ ҫулпа ҫыхӑннӑ мероприятисене ирттерессипе ирттермессине, ирттерсен вӗсем епле шайра пулмаллине маларах ҫӗршыв шайӗнчи экспертсем те сӳтсе яврӗҫ. Ҫынсен яланах савӑнас килет. Сӑлтав пултӑр.

Республикӑри тата муниципалитетсенчи культура учрежденийӗсенче Ҫӗнӗ ҫулпа тата Сурхурипе ҫыхӑннӑ 1142 мероприяти ирттерме палӑртса хунӑ. Ку цифрӑна республикӑн культура министрӗ Светлана Каликова нумаях пулмасть пӗлтернӗ. Вӑл каланӑ тӑрӑх, мероприятисене 85 пине яхӑн ҫын хутшӑнмалла.

Республика Элтеперӗ Олег Николаев вара халӑх йышлӑ пухӑнакан уявсенче пушар хӑрушсӑрлӑхне ҫирӗп пӑхӑнма чӗнсе каланӑ.

ШӖМ тунӑ сӑн

Ҫамрӑк хӗрарӑм кӑкӑр ачипе Ҫӗмӗрлерен Шупашкара кайма тухнӑ. Анчах ҫул ҫинче унӑн машинин урапи шӑтнӑ. Ӑна ЧР ШӖМӗн ӗҫченӗсем пулӑшнӑ.

Путруле тухсан инспекторсем Элӗк районӗнче, «Шупашкар – Сӑр» автоҫул ҫинче, ҫул хӗрринче ларакан «Грантӑна» асӑрханӑ, унӑн урапи шӑтнӑ.

Полици лейтенанчӗ Александр Рыбаков тата полицин кӗҫӗн лейтенанчӗ Александр Краснов хӗрарӑма урапа улӑштарма пулӑшнӑ. Ӗҫне пӗтерсен вӗсем ӑна телейлӗ ҫул сунса ӑсатнӑ.

cap.ru сайтри сӑн

Паян Чӑваш Ене 12 васкавлӑ медпулӑшу машини ҫитнӗ. Уҫҫисене савӑнӑҫлӑ лару-тӑрура панӑ.

5 «ГАЗель Next» и 7 «Соболь-Бизнес» автомобильсем ял тӑрӑхӗсенче тата пӗчӗк хуласенче ӗҫлӗҫ. Вӗсене Етӗрнене, Канаша, Патӑрьеле, Ҫӗрпӳне, Ҫӗнӗ Шупашкара тата Шупашкара ярӗҫ.

Машинӑсене Раҫҫей правительствин хушӑвӗпе килӗшӳллӗн туяннӑ. Кашнин ҫинче реанимаци, интенсивлӑ терапи валли хатӗр-хӗтӗр пур.

culture.cap.ru сӑнӳкерчӗкӗ

Чӑваш наци музейӗн Чӑваш наци тӗррин шкулӗнче пӗрлехи ӑслӑлӑхпа методика центрӗ йӗркелеме йышӑннӑ. Вӑл хальхи вӑхӑтри ӑстасене тата чӑваш тӗррин йӑли-йӗркине упраса хӑварма тӑрӑшакансене тӗрӗ ӑсталӑхне вӗрентӗ, хальхи вӑхӑтри ҫипуҫра тата капӑрлӑхсенче тӗрӗпе усӑ курас модӑна йӗркелессипе ҫине тӑрӗ.

Чӑваш наци тӗррин шкулне преподаватель пулма халӑх ӳнерӗн ӑстисене, тӗрӗ художникӗсене, модельерсене йыхравласшӑн. Ҫав йышра ҫаксене асӑнса хӑварнӑ: Геннадий Иванов-Орков, Мария Готлиб, Николай Балтаев, Раиса Васильева, Светлана Константинова, Рина Ежергина, Ольга Голованева, Татьяна Петрова, Людмила Шуркина, Зинаида Маштанова, Любовь Вазюкова.

ptoday.ru сайтри сӑн

Чӑваш Енре инкеклӗ лару-тӑрура шар курнӑ ҫынсене памалли тӳлеве ҫирӗплетнӗ. Вӑл 10 пин тенкӗрен пуҫласа 1 миллион тенкӗ таран пулӗ.

Шар курнисем пӗр хутчен 10 пин тенкӗ илме пултараҫҫӗ. Усӑ курма кирлӗ пурлӑхӑн пӗр пайне ҫухатсан 50 пин тенкӗ тӳлеҫҫӗ, йӑлтах ҫухатсан – 100 пин тенкӗ.

Инкекре ҫын вилсен ҫемьене 1 миллион тенкӗ парӗҫ. Енчен те ҫын инкеклӗ лару-тӑрура сывлӑхне йывӑр сиен кӳрет тӗк 400 пин тенкӗ тӳлӗҫ, вӑйлах сиенленмесен – 200 пин тенкӗ.

r21.fssp.gov.ru сӑнӳкерчӗкӗ

Чӑваш Енри суд приставӗсем икӗ ҫул каяллах леш тӗнчене ӑсаннӑ ҫынтан парӑм шыраса илме ӗмӗтленнӗ. Тӗрӗсрех каласан, исполнительнӑй производствӑна чарса лартман.

Кӑлтӑка Етӗрне районӗнчи прокуратура тупса палӑртнӑ. Надзор органӗнче тӑрӑшакансем вилнӗ ҫынпа ҫыхӑннӑ ӗҫ районти суд приставӗсем патӗнче пулнине тупса палӑртнӑ. Куҫне икӗ ҫул каяллах хупнӑ ҫыннӑн парӑмне татма тивӗҫ ҫывӑх ҫыннисем пулман.

Ҫавӑн хыҫҫӑн прокуратура Федерацин айӑплава пурнӑҫа кӗртессипе ӗҫлекен службин Чӑваш Енри управленийӗн ертӳҫи ячӗпе асӑрхаттару хучӗ шӑрҫаланӑ.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен центра ҫӳрекен кинемейсем вӑхӑта питех те кӑсӑклӑ ирттереҫҫӗ. Унта Пукане театрӗ ӗҫленӗ май уйрӑмах ӳрӗк ватӑсем ҫав пултарулӑх ушкӑнӗнче юмахсем лартаҫҫӗ. Халӗ тата вӗсем юмахсенчи сӑнарсене хатӗрлеме тытӑннӑ.

Центр специалисчӗсенчен пӗри, Светлана Кириллова, ылтӑн алӑллӑ ӑста. Унӑн сӑнарӗсем кӑра та ҫепӗҫ кӑмӑллӑ, кулӑшла та тӗплӗ сӑн-питлӗ пулса тухаҫҫӗ. Унӑн ҫеҫ-и, вӑл ертсе пынипе тӑрмашакан кинемейсем те ҫавӑн пек пуканесем ӑсталаҫҫӗ.

Центра ҫулталӑк каялла ҫӳреме тытӑннӑ 63 ҫулти Шупашкар хӗрарӑмӗ Татьяна Шевнина каланӑ тӑрӑх, социаллӑ учреждение пӗрре пынӑ та, килӗшсе кайнӑ. Вӑл паян хӑйӗн пек хастарсемпе ал ӗҫӗпе те аппаланать, Пукане театрӗнче те вылять, пуканесем те ӑсталать.

Виктор Чугаров сӑнӳкерчӗкӗ

Шупашкарта чӑвашла калаҫакансен «Чӑн Чӑваш» клубӗн черетлӗ 34-мӗш тӗлпулӑвӗ иртнӗ.

Хальхинче чӑваш хастарӗсемпе Чӑваш Республикин ал ӗҫ ӑстисен гильдийӗн пайташӗ, чӑваш халӑх академикӗ Любовь Вазюкова тӗл пулнӑ.

Любовь Степановна хӑй тӗрлекен чӑваш тӗррин уйрӑмлӑхӗ ҫинчен каласа кӑтартнӑ. Светлана Храмова кӑсӑклӑ вӑйӑ-конкурс ирттернӗ.

Тӗлпулу вӗҫӗнче хастарсем «12 УЙӐХ» премьерине курнӑ.

Клубӑн ҫитес тӗлпулӑвне ҫитес ҫулхи кӑрлач уйӑхӗн 16-мӗшӗнче пуҫтарӑнӗҫ.

"Чӑваш чӗлхи - чӗкеҫ чӗлхи" страницӑран илнӗ сӑнӳкерчӗк

Тутарстанри Олимпиада центрӗнче тӑван чӗлхесен олимпиади иртнӗ. Ӑна раштав уйӑхӗн 19-21-мӗшӗсенче йӗркеленӗ.

Ӑс-тӑнпа пултарулӑха, тавҫӑрулӑхпа мал ӗмӗтлӗхе кӑтартса пама май паракан ӑмӑртӑва Тутарстанра пурӑнакан тӗрлӗ халӑх ачисем хутшӑннӑ. Ҫавсен йышӗнче мордвасем, удмуртсем, марисем пулнӑ. Чӑваш ачисем те тантӑшӗсенчен кая юлас темен — олимпиадӑна ҫунатлансах хутшӑннӑ.

Чи пултаруллисене ӑшӑ сӑмахпа ҫеҫ мар, тав хучӗсемпе те хавхалантарнӑ.

Чӑваш Енре гриппа чирлекен йышлӑ. Роспотребнадзор пӗлтернӗ тӑрӑх, кӑҫалхи сезонра халӑхӑн 46,1 проценчӗ грипран прививка тутарнӑ. Ку, ытти регионпа танлаштарсан, сахал. Танлаштарӑмра ку енӗпе пирӗн регион хыҫалтан 8-мӗш вырӑн йышӑнать.

Пӗтӗмӗшле илсен, Раҫҫейре 76 ытла миллион ҫын грипран прививка тутарнӑ. Ку 52,2 процентпа танлашать. Республикӑра пӗтӗмпе 13,6 пин ҫын ОРВИпе тата гриппа чирленине палӑртнӑ. Вӗсен 48,6 проценчӗ – 17 ҫула ҫитмен ачасем.