culture.cap.ru сӑнӳкерчӗкӗ

Ҫу уйӑхӗн 16-мӗшӗнче Чӑваш патшалӑх филармонийӗн сцени ҫине Китайпа Японире пулнӑ пултарулӑх коллективӗ тухӗ. Ун чухне пирӗн пата Чӗмпӗрти патшалӑх академи симфони оркестрӗ килсе ҫитӗ.

2023-2024 сезонта ҫав оркестр 55 ҫулхине уявлӗ. Юбилей умӗн коллектив гастрольпе пирӗн республикӑна килес тенӗ.

Программӑра вырӑс музыкин классики янӑрӗ. Концерта кайсан Сергей Танеевӑн «Иоанн Дамаскин» кантатипе, Александр Бородинӑн «Князь Игорь» оперин сыпӑкӗпе тата ытти илемлӗ номерпе киленме май килӗ.

55 ҫулта Чӗмпӗрти симфони оркестрӗ 16 ҫӗршывра тата Совет Союзӗпе Раҫҫейӗн 90 хулинче пулнӑ. Юлашки ҫулсенче пысӑк гастрольсемпе Китайпа Японие ҫитнӗ, Мускаври академи филармонийӗн П.И. Чайковский ячӗллӗ концерт сцени ҫине тухнӑ.

graycell.ru ӳкерчӗкӗ

Ӗҫне кура хисепӗ теҫҫӗ те вӑл пур чухне те тӳрре килесси иккӗленӳллӗ. Хура ӗҫре тар тӑкакансене асӑрхани, вӗсене сума суни вара чӑннипех те савӑнтарать.

Ҫак кунсенче Йӗпреҫ тӑрӑхӗнчи харӑсах икӗ дояркӑна хисеплӗ ят пама йышӑннӑ. Ят-сума тивӗҫнисем — асӑннӑ тӑрӑхри «Красный партизан» коллективлӑ хуҫалӑх тата «Агрофирма Империя» тулли мар яваплӑ обществӑн ӗҫченӗсем.

«Красный партизан» колхозри Татьяна Васильева тата «Империя» агрофирмӑри Марина Степанова дояркӑсем «Чӑваш Республикин ял хуҫалӑхӗн тава тивӗҫлӗ ӗҫченӗ» хисеплӗ ята тивӗҫнӗ.

t.me/kanashen_gazeta каналти сӑн

Канаш хулинче пӗртен-пӗр ветеран Владимир Рожков юлнӑ. Ӑна вырӑнти культура ҫурчӗн «Фронт бригади» ушкӑн тата хӑнасем саламлама ятарлӑ грузовикпа пынӑ. Ун валли ҫурт картишӗнчех концерт лартнӑ.

Кӑҫал ветеран раштав уйӑхӗнче 100 ҫул тултарать. Вӑл концерт лартакансене Тӑван ҫӗршывӑн Аслӑ вӑрҫи пирки каласа кӑтартнӑ, хӑйне тимлӗх уйӑрнӑшӑн тав тунӑ.

Пирӗн ентеш, Олимп резервӗсен Ҫӗнӗ Шупашкарти 3-мӗш спорт шкулӗн йывӑр атлечӗ Полина Андреева, ылтӑн медаль ҫӗнсе илнӗ. Вӑл Беларуҫре иртнӗ тупӑшура икӗ енлӗ кӗрешӳре 165 килограмм йӑтнӑ.

Ӑмӑрту Могилев хулинче иртнӗ. Унта йывӑр атлетикӑпа кӑсӑкланакан хӗрарӑмсем тата арҫынсем хутшӑннӑ. Пирӗн Полина Андреева 49 килограмм тайман спортсменсен ушкӑнӗнче чи маттурри пулса ылтӑн медале тивӗҫнӗ.

vladtime.ru сайтри сӑн

Шупашкарти ҫынсене ултавҫӑсем шӑнман пӑр ҫине лартса яраҫҫӗ кӑна. Кӑҫал 4 уйӑхра полицие унашкал 620 яхӑн заявлени панӑ.

Ҫак тапхӑрта Шупашкар ҫыннисем ултавҫӑсене 170 миллион тенкӗ куҫарса панӑ. Шар курнисен йышӗнче – 126 пенсионер, 49 студент, декрет отпускӗнче ларакан 9 хӗрарӑм.

Палӑртмалла: 2021 ҫулта Шупашкар ҫыннисем палламан ҫынсене 300 ытла пин тенкӗ куҫарса панӑ. Пӗлтӗр вара – 327 миллион тенкӗ.

"Чеб.ру" сайтри сӑн

Кӗҫех Шупашкарти 3 пульницӑна пӗрлештерӗҫ. Кун пирки ЧР сывлӑх сыхлавӗн министерстви пӗлтерет.

Ку улшӑну Шупашкарти Осипов ячӗллӗ пӗрремӗш хула пульницине, Иккӗмӗш хула пульницине пырса тивет. Вӗсем Хулан 1-мӗш клиника пульниципе пӗрлешӗҫ. Ведомство улшӑнӑвӑн лайӑх енӗсене палӑртнӑ. Пациентсем унччен хӑйсем патӗнче пулман специалистсенчен пулӑшу ыйтма пултарӗҫ.

Пульницӑсене пӗрлештересси пирки ҫу уйӑхӗн 12-мӗшӗнче 11-13 сехетсенче халӑх итлевӗ пулӗ.

forum.zarulem.ws порталти видеоран илнӗ сӑнӳкерчӗк

Шупашкарта пӗр водитель ҫуран ҫӳрекенсене каҫмалли яарлӑ вырӑнта арҫын ҫине пырса кӗнӗ.

Пӑтӑрмах ӗнер, ҫу уйӑхӗн 3-мӗшӗнче пулса иртнӗ. Ҫынсене каҫса ҫӳреме уйӑрнӑ вырӑнпа пӗр арҫын ҫул урлӑ каҫнӑ. Ӑна ирттерсе яма машинӑсем чарӑннӑ. Анчах хамӑр ҫӗршывра туса кӑларнӑ машина рулӗ умӗнчи водитель ним пулман пекех малалла вӗҫтернӗ, арҫын ҫине пырса кӗнӗ.

Пӑтӑрмаха ӳкерсе илнӗ видео тӑрӑх хакласан, арҫын малтан машина капочӗ ҫине пырса ӳкнӗ, унтан ҫӗре персе аннӑ. Ҫавӑн чухне ҫеҫ машина чарӑнса ларнӑ.

epp.genproc.gov.ru сӑнӳкерчӗкӗ

Воронежра прокурор пулса тӑрӑшнӑ ҫынна Шупашкара ӗҫлеме куҫарнӑ.

Раҫҫейӗн генпрокурорӗн приказӗпе Шупашкар хулинчи Калинин районӗн прокурорӗ пулма юстицин аслӑ советникне Роман Лаща ҫирӗплетнӗ.

Роман Сергеевич 1987 ҫулта Карачай-Черкесск Республикинчи Черкесск хулинче ҫуралнӑ. Раҫҫейӗн Шалти ӗҫсен министерствин Волгоградри академийӗнче вӗреннӗ хыҫҫӑн хӑйӗн тӑван республикинчи прокуратура тытӑмне ӗҫе вырнаҫнӑ. Кайран вӑл Мускав облаҫӗнчи прокуратурӑра тӗрлӗ должноҫе тӑрӑшнӑ. 2022 ҫултанпа Воронежра прокурорта тимленӗ.

Кӑҫалхи нарӑс уйӑхӗнче республикӑри ҫынсем илнӗ вӑтам шалу виҫипе Атӑлҫи тӑрӑхӗнчи 5 региона хӑваласа иртсе кайнӑ: Мӑкшӑ Республикине, Пенза облаҫне, Мари Эле, Киров облаҫне Чӗмпӗр облаҫне хыҫа хӑварнӑ.

Росстат пӗлтернӗ тӑрӑх, кӑҫал пирӗн регионти вӑтам шалу 42870 тенкӗпе танлашнӑ. Ку, ҫулталӑк каяллахипе танлаштарсан, 21 процент нумайрах.

Сӑмах май, пӗлтӗр раштав уйӑхӗнче пирӗн патри шалу виҫи рекорд лартнӑ: 56 пин ытла тенкӗ пулнӑ.

Марина Тумаланован халӑх тетелӗнчи страницинчен илнӗ сӑнӳкерчӗк

«Хыпар» хаҫатӑн хыпарсен службин тишкерӳҫинче тӑрӑшакан Марина Тумалановӑна «Чӑваш Республикин культурӑн тава тивӗҫлӗ ӗҫченӗ» ят панӑ. Хушӑва Чӑваш Ен Элтеперӗ Олег Николаев ҫу уйӑхӗн 2-мӗшӗнче алӑ пуснӑ.

«Хыпар» издательство ҫуртӗнче пӗлтернӗ тӑрӑх, Марина журналистикӑра 23 ҫул ӗҫлет. Асӑннӑ издательство ҫурчӗн «Чӑваш хӗрарӑмӗ», «Ҫамрӑксен хаҫачӗ» хаҫатсенче корреспондентра тӑрӑшнӑ. Марина Тумаланова Чӑваш Енри Журналистсен союзӗн, Чӑваш Енӗн Ял хуҫалӑх, Чӑваш Енӗн Информаци политикипе массӑллӑ коммуникацисен, Раҫҫейӗн Цифра аталанӑвӗн, ҫыхӑнупа массӑллӑ коммуникацисен министерствисен Хисеп хучӗсене тивӗҫнӗ.