vk.com/cheb121 страницӑран илнӗ сӑнӳкерчӗк

Шупашкарти сысна ҫури вӑййа лекнӗ. Кунта сӑмах резина урапаран ӑсталанӑ персонаж пирки пырать-ха. Ӑна Шупашкарти Добролюбов урамӗнчи 2-мӗш ҫурт умне вырнаҫтарнӑ.Хӑй тӗллӗн ӑсталанӑ чӗрчун халӗ унта ҫук ӗнтӗ, анчах вӑл «Atomic Heart» кмпьютервӑййине кӗрсе юлма ӗлкӗрнӗ.

Асӑннӑ вӑййа хамӑр ҫӗршыври «Mundfish» студи ӑстисем шухӑшласа кӑларнӑ. Тӗлӗнтермӗш скульптурӑсене вӗсем ҫӗршывӗпех шыранӑ. Шупашкарти сысна ҫури вӗсене килӗшнӗ.

minpriroda.cap.ru сӑнӳкерчӗкӗ

Чӑваш Енре экологие халӑх инспекторӗсем тӗрӗслесе тӑрӗҫ.

Республикӑн Ҫутҫанталӑк ресурсӗсен тата экологи министерстви тавралӑха сыхлас ӗҫе хастар ҫынсене те явӑҫтарма йышӑннӑ.

«Ҫакӑ пире вырӑнти ҫынсенчен вӑрманти пушарсем, саккуна пӑсса йывӑҫ касакансем, пулӑ тытакансем, шыв-шура варалакансем, тискер чӗрчунсемпе кайӑк-кӗшӗк вилни ҫинчен васкавлӑн пӗлсе тӑма май парӗ», — тенӗ министр тивӗҫне пурнӑҫласа пыракан Елена Дымза.

Общество инспекторӗ пулма 40 ҫын кӑмӑл тунӑ, паянхи ларура вӗсенчен 24-шне суйласа илнӗ.

2022 ҫулта пирӗн республикӑра 166 халӑх инспекторӗ пулнӑ.

https://vk.com/gov_cap_ru?w=wall-142632677_68176 страницӑран илнӗ скриншот

Паян, нарӑс уйӑхӗн 27-мӗшӗнче, Чӑваш Ен Элтеперӗ Олег Николаев пресс-конференци ирттерчӗ. Ҫак йӗркесен авторне ӑна пуҫламӑшӗнчен пуҫласа вӗҫне ҫитиех итлеме май килмерӗ-ха. Икӗ журналист чӑвашла ыйтнине илтме май килчӗ, вӗсене республика ертӳҫи вырӑсла хуравларӗ.

Пресс-конференцие итлекенсенчен пӗри: «Мероприяти мӗншӗн вырӑсла иртет?» — тесе ҫырнӑччӗ-ха. Ыйтӑва курнисенчен пӗри, Людмила Бардасова, ун пек мероприятисем патшалӑх чӗлхипе иртеҫҫӗ, пирӗн ҫӗршывра патшалӑх чӗлхи — вырӑс чӗлхи тесе ҫавӑрттарса хунӑччӗ. Екатерина Арбатова шучӗпе вара «пурте чӑвашла пӗлмеҫҫӗ», «чӑваш чӗлхи пурне те кирлӗ мар-тӑр» тесе хӑй шухӑшне палӑртнӑччӗ.

cheb-centr.soc.cap.ru сӑнӳкерчӗкӗ

Шупашкарта пурӑнакан Галина Николаева нарӑс уйӑхӗн 23-мӗшӗнче 80 ҫул тултарнӑ.

Галина Григорьевна Хӗрлӗ Чутай районӗнчи Туканаш ялӗнче, фельдшер ҫемйинче, ҫуралнӑ. Шкултан вӗренсе тухнӑ хыҫҫӑн вӑл Мускаври энергетика институчӗн Шупашкарти филиалне вӗренме кӗнӗ. ВНИИР предприятире хӗрарӑм 50 ҫул тӑрӑшнӑ.

Паян вӑл Шупашкар хулинчи халӑхӑн социаллӑ ыйтӑвӗсене тивӗҫтерекен центра ҫӳрет, унти тӗрлӗ клубра спорт занятийӗсене ҫӳрет, ал ӗҫӗпе аппаланать, театр-музея ҫӳреме кӑмӑллать.

«Унпа тем ҫинчен те калаҫма пулать: ядерлӑ медицинӑран пуҫласа квант физики таранах», — теҫҫӗ хастар хӗрарӑмӑн тусӗсем.

"Про Город" сайтӗнчи сӑн

Йӗпреҫ районӗнчи Хурамал ялӗнче пурӑнакансем ача пахчишӗн кулянаҫҫӗ. Шӑпӑрлансем унта килеҫҫӗ - ушкӑнра вара тумлакан шыва тултармалли савӑтсем лараҫҫӗ. Канмалли кунсем хыҫҫӑн, паян, ача пахчинче ҫавнашкал лару-тӑру пулнӑ.

Унта ӗҫлекен хӗрарӑм каланӑ тӑрӑх, ҫурт тӑрринчен тахҫанах шыв анать. 2021 ҫулта унта юсав ӗҫӗсем тунӑ, анчах ҫавах ку ҫивӗч ыйту сирӗлмен.

Раштав уйӑхӗнче район пуҫлӑхӗ патне те, ЧР Вӗренӳ министерствине те пулӑшу ыйтса ҫырнӑ. Анчах нимӗнле улшӑну та пулман. Район администрацийӗ ҫапла ӑнлантарнӑ: ку лару-тӑрӑва шута илнӗ, ҫуркунне юсав ӗҫӗсем тума палӑртнӑ.

Юлашки кунсенчи пек юр ҫулталӑк пуҫланнӑранпа ҫуманччӗ. Метеостанци пӗлтернӗ тарӑх, Шупашкарта 8 мм ытла нӳрӗк ӳкнӗ. Ку – уйӑхри нормӑн 34 проценчӗ.

Ку эрнере тӑрук пӗлӗтсен хыҫӗнчен хӗвел тухӗ, тӑрук ҫил-тӑман вӗҫтерме пуҫлӗ. Сывлӑш температури 0-6 градус сивӗ тӑрӗ.

Эрне вӗҫнелле ҫынсем вӑй ҫуккине, кӑмӑл пӑсӑлнине туйма пултараҫҫӗ. Мӗншӗн тесен атмосфера пусӑмӗ 735 мм таран анӗ. Канмалли кунсем тӗлне ҫанталӑк лӑпланӗ.

Малтанлӑха пӗлтернӗ тӑрӑх, пушӑн иккӗмӗш декади тӗлне хӗлле татах хӑйне кӑтартӗ. Ун чухне сывлӑш температури пӗлӗтсен шайӗнче 20 градус таран сивӗнӗ.

Педагогика ӗҫченӗсен професси ӑсталӑхне тӑтӑш ӳстерекен «Ашмарин-центрта» паян тӑван чӗлхене вӗрентес ыйтусене пӑхса тухнӑ. Инҫет мелпе унта «Тӑван чӗлхене вӗрентес тӗлӗшпе чи лайӑх практикӑсем» иртнӗ. Иккӗмӗш хут иртекен фестивале «Ашмарин-центр» тата Вӗренӳ институчӗн чӑваш чӗлхипе литература кафедри йӗркеленӗ.

Тухса калаҫакансен йышӗнче Чӑваш Республикинчи вӗрентекенсем кӑна мар, ытти тӑрӑхсенчисем те пулнӑ. Лилия Мусина, сӑмахран, тӑван чӗлхепе литература урокӗнче (вӑл тутар чӗлхине вӗрентет) проект ӗҫне мӗнле йӗркелемелли ҫинчен каласа панӑ. Калмыкири Нина Коксунова УДЕ технологипе усӑ курса вӗрентӳ ӗҫне мӗнле пахарах ирттересси пирки чарӑнса тӑнӑ. Ҫавӑн пекех тухса калаҫакансем Ҫӗнҫӗпӗр, Самар, Чӗмпӗр облаҫӗсенчен, Перӗм крейӗнчен, Карачаево-Черкесси Республикинчен пулнӑ. Педагогсен самай пысӑк йышӗ Чӑваш Республикинчен пулнӑ.

Паян, нарӑсӑн 27-мӗшӗнче, Шотландири Сент-Эндрюс университечӗ хӑйӗн ҫуралнӑ кунне паллӑ тӑвать. Ӑна 612 ҫул каялла, 1411 ҫулта никӗсленӗ иккен. Акӑлчанла калаҫакан тӗнчене илес пулсан чи ватӑ университетсенчен вӑл виҫҫӗмӗш. Оксфордпа Кембридж университечӗсем кӑна ватӑрах. Акӑ мӗн каласа парать кун пирки Calend.ru ресурс:

Сент-Эндрюс хули (акӑлч. St Andrews) ятне Шотландин хӳтӗлевҫи ячӗпе, сӑваплӑ Андрее чысласа панӑ. 1410 ҫулта Сент-Эндрюс хулинче ахаль шкул уҫнӑ. Ӑна Сорбоннӑра пӗлӳ илнӗ ҫынсем никӗсленӗ. 1411 ҫулхи нарӑсӑн 27-мӗшӗнче Генри Вордло Епископ ҫак шкул никӗсӗ ҫинче Шотландири пӗрремӗш университета йӗркелесси ҫинчен хушу кӑларнӑ.

Парижри альма-матерти пекех, университетра тӑватӑ факультет пулнӑ. Вӗсем — теологи, право, ӳнер тата медицина факультечӗсем. Ӳнер шутне вӑл вӑхӑтра тӗрӗс ӑслӑлӑх кӗнӗ.

1413 ҫулхи авӑн уйӑхӗнче Бенедикт ХIII антипапа Вордло указне ҫирӗплетнӗ. Антипапа панӑ буллапа (пичет) хыпарҫӑсем 1414 ҫулхи нарӑсӑн 4-мӗшӗнче ҫитнӗ. Ҫак кунах университета чаплӑ уяв ирттерсе уҫнӑ.

Сент-Эндрюс университечӗ (акӑлч.

Малалла...

ЧР патшалӑх ветеринари службин ертӳҫи Константин Викторов ӗҫрен хӑйӗн ирӗкӗпе кайнӑ. Ку должноҫре вӑл шӑп та лӑп 3 ҫул ӗҫленӗ.

Константин Викторов ку пукана 2020 ҫулхи нарӑс уй ӑхӗнче йышӑннӑ. Унччен вӑл Шупашкарти кайӑк-кӗшӗк хапрӑкӗнче, ветеринари тата фитосанитари тӗрӗслевӗн федераци службин управленийӗнче ӗҫленӗ.

Константин Викторов ӗҫрен каясси пирки паян влаҫ органӗсен порталӗнче хушу тухнӑ.

cap.ru сӑнӳкерчӗкӗ. Михаил Наташкин мӑшӑрӗпе.

Патӑрьел районӗнчи Куславкка ялӗнче пурӑнакан ветеран Михаил Наташкин ҫак кунсенче 102-мӗш ҫуралнӑ кунне паллӑ тунӑ.

Михаил Тимофеевич ҫак районтах, Ҫӗнӗ Ахпӳрт ялӗнче, 1921 ҫулхи нарӑсӑн 25-мӗшӗнче ҫуралнӑ. 1942 ҫулхи ака уйӑхӗн 17-мӗшӗнче ун патне вӑрҫа кайма повестка килнӗ. Ленинград ҫывӑхӗнчи ҫапӑҫура вӑл аманнӑ. Госпитальте сипленсен каллех фронта таврӑннӑ.

Михаил Наташкин Украина тата Хӗвеланӑҫ фрончӗсенче ҫапӑҫнӑ, икӗ хутчен аманнӑ, пӗр хутчен контузи пулнӑ. Вӑрҫӑ пӗтсен тӑван ялне таврӑннӑ, колхозра ӗҫлеме пуҫланӑ, депутат та пулнӑ. Михаил Тимофеевич кун кӗнекине ҫырса пынӑ. Унта хӑйӗн кӑна мар, фронтри тусӗсен историйӗсем те вырӑн тупнӑ. Ветеран сӑвӑсем те ҫырнӑ.

Нарӑсӑн 25-мӗшӗнче ветеран мӑшӑрӗпе Зинаида Петровнӑпа пӗрлешнине те паллӑ тунӑ. Вӗсен кевер туй пулнӑ.