Светлана Белова. ch-ansamble21.ru сӑнӳкерчӗкӗ

Чӑваш патшалӑх юрӑпа ташӑ ансамбльне ҫӗнӗ илемлӗх ертӳҫи ертсе пыма тытӑннӑ. Ҫав тивӗҫе Чӑваш Республикин культурӑн тава тивӗҫлӗ ӗҫченӗ Светлана Белова пурнӑҫлама тытӑннӑ.

Светлана Николаевна 2003 ҫулта Чӑваш Республикин культура училищинчен, 2018 ҫулта Раҫҫейӗн халӑх хуҫалӑхӗн тата патшалӑх службин академийӗнчен, 2022 ҫулта Питӗрти профсоюзсен гуманитари университетӗнчи хореографи уйрӑмӗнчен вӗренсе тухнӑ.

1995 ҫулта вӑл Чӑваш патшалӑх юрӑпа ташӑ ансамблӗнче балет артистӗнче ӗҫлеме пуҫланӑ. 2018–2023 ҫулсенче балет репетиторӗнче тӑрӑшнӑ. Пӗлтӗр ӑна Чӑваш Республикин культурӑн тава тивӗҫлӗ ӗҫченӗ ят панӑ.

t.me/nikamran каналтан илнӗ сӑнӳкерчӗк

Чӑваш патшалӑх академи драма театрӗ ыркӑмӑллӑх тӗллевӗпе спектакль кӑтартассине пӗлтерет. Пуш уйӑхӗн 11-мӗшӗнче «Инкеклӗ телей» спектакль кӑтартӗҫ.

Асӑннӑ спектакль Сӑр тата Хусан хӳтӗлев чиккисене тӑвакансен ӗҫӗ-хӗлӗпе, Тӑван ҫӗршывӑн аслӑ вӑрҫи вӑхӑтӗнче чӑвашсен паттӑрлӑхӗпе паллаштарать.

Спектакль режиссерӗ тата художникӗ – СССР халӑх артисчӗ Валерий Яковлев. Инсценировкине Сергей Павлов ҫырнӑ.

Билет сутса тунӑ укҫана театр ятарлӑ ҫар операцине хутшӑнакансене пулӑшма уйӑрӗ. Спектакль 18 сехетре пуҫланӗ.

"Ҫыхӑнура" форумран илнӗ сӑнӳкерчӗк

Паян Шупашкарта троллейбус хыпса илнӗ. «Ҫыхӑнура» форумра пӗлтернӗ тӑрӑх, транспортра вут-ҫулӑм 15 сехет тӗлӗнче хыпса илнӗ.

Троллейбус хулари Иван Яковлев проспекчӗпе пынӑ. Чукун ҫул вокзалӗпе Пичет ҫурчӗ хушшинче троллейбус водитель кабининче ҫунма пуҫланӑ. Унтан пушар кабинӑран салона хӑвӑрт куҫнӑ.

https://vk.com/wall-54381767_228133 сӑнӳкерчӗкӗ

Шупашкар районӗнчи Апашра хир сысни ӗрчетеҫҫӗ.

Хӑй вӑхӑтӗнче Шупашкар районӗнчи Апаш ял тӑрӑхне, каярах ҫав районти администрацие ертсе пынӑ Анатолий Князев тата унӑн тусӗсем хир сыснисен фермине уҫнӑ. Анатолий Пантелеймонович, сӑмах май, Коми Республикинче ял хуҫалӑх министрӗ те пулнӑччӗ.

Асӑннӑ чӗрчунсене вӗсем сутса укҫа тӑвассишӗн самӑртмаҫҫӗ. Ҫурасем ӳссе вӑй илсен тискер чӗрчунсене ирӗке кӑларса яраҫҫӗ. Ҫапла вӗсем асӑннӑ чӗрчунсен шутне ҫутҫанталӑкра йышлантарас тӗллевпе тӑрӑшаҫҫӗ.

https://vk.com/wall-54381767_228239 сӑнӳкерчӗкӗ

Шупашкарта упана калпак тӑхӑнтартнӑ.

Хулари «Элара» завод умӗнчи упана (унта ҫавӑн пек кӳлепе ларать) ҫак кунсенче хӑлхаллӑ ҫӗлӗк тӑхӑнтартнӑ. Ахаль ҫӗлӗк те мар, мулаххайӗ салтакри пек, ҫитменнине вӑл тата – хӗрлӗ ҫӑлтӑрлӑ..

Упана унччен те тем тӗрлӗ тӑхӑнтартса пӑхнӑ. Халӑх тетелӗнчи «Новостная барахолка» пабликра пӗлтернӗ тӑрӑх, унӑн гардеробӗнче унччен Раҫҫей ялавӗ те, лӗпӗш евӗр кӑвак галстук та тата ытти те пулнӑ.

Упа кӳлепи айне «Рядовой медвежьей сотни» тесе ҫырса хунӑ.

https://vk.com/wall-54381767_228250 страницӑран илнӗ сӑнӳкерчӗк

Елчӗк районӗнчи арҫын ача Мускавран чемпион пулса таврӑннӑ.

Миша Миллин вырӑнти «Улӑп» спорт шкулӗнчи ирӗклӗ мелпе кӗрешекенсен секкцине ҫӳрет. Ачана ӑсталӑха Сергей Александров тренер хӑнӑхтарать. Ҫамрӑк спортсмена вӑл Спорт (ирӗклӗ) кӗрешӳ енӗпе иртекен регионсем хушшинчи турнира кайма сӗннӗ.

2013–2015 ҫулсенче ҫуралнӑ, 25 килограмран ҫӑмӑлтарах таякан арҫын ачасемпе кӗрешсе Елчӗк арҫын ача ыттисене ҫӗнтерме пултарнӑ.

cap.ru сӑнӳкерчӗкӗ

Шупашкарта "Ҫӗрулми" курав ӗҫлени пирки эпир сайтра пӗлтернӗччӗ. Унта ЧР Элтеперӗ Олег Николаев пулса курнӑ.

Аса илтерер: курав "Каскад" суту-илӳ центрӗнче ӗҫлет. Унта тӗрлӗ сортлӑ ҫӗрулми туянма пулать.

Олег Николаев куравра каланӑ тӑрӑх, пирӗн республикӑра чипс кӑларма тытӑнасшӑн. Ку проектпа Патӑрьел районӗнчи "Лук-Агро" предприяти ӗҫлет. Унта ҫӗрулмине чипс валли хатӗрлекен цех хута каймалла.

Хугербитс блогӗнчи видео скринӗ

Турцире инкек тухасси пирки малтанах пӗлтернӗ Голланди ӑсчахӗ Ф. Хугербитс хӑйӗн YouTube каналти прогнозӗнче ҫуркунне пуҫламӑшӗнче (пуш уйӑхӗн 3–4-мӗшӗ тата 6–7-мӗшӗҫӗр чӗтренӗвӗ) Раҫҫейри Инҫет Хӗвелтухӑҫне ҫӗр чӗтренӗвӗ пулма пултарни пирки пӗлтернӗ.

Вӑл ӑнлантарса панӑ тӑрӑх, хальхи ҫичӗ кун хушшинче 8,5 магнитудӑпа ҫӗр чӗтренме пултарать. Хугербитс шухӑшӗпе ҫӗр чӗтренес пулсан ӑна кӗтсе илме план кирлӗ. Ҫӗр чӗтренме тытӑнсан ҫынсен кил-ҫурчӗсенчен хӑвӑрт кӑна тухма май пулмалла.

Анчах та Раҫҫей ӑсчахӗсем нидерланд тӗпчевҫи тунӑ пӗтӗмлетӳсене тиркесе пӗтернӗ. Пӗрисем ӑна тиркесе малашнехи пирки каласа паракан тенӗ, теприсем вара ҫӗр чӗтренӗвӗ пулассине ҫирӗплетекен фактсем пулманни пирки пӗлтернӗ.

Кам-ха вӑл Хугербитс? МИХсем пӗлтернӗ тӑрӑх, Франк Хугербитс — Нидерландри паллӑ тӗпчевҫӗ, пулас сейсмика пулӑмӗсем тӗлӗшпе вӑл планетӑсем тата Хӗвелпе Уйӑх вырнаҫӑвне кура пӗлтерет. Пӗлӗвне ӑҫта илни пирки нимӗнле уҫӑ информаци те ҫук. Нарӑсӑн 3-мӗшӗнче Хугербитс хӑйӗн блогӗнче Турцире 7,5 магнитудӑпа ҫӗр чӗтренме пултарасси пирки пӗлтернӗ, инкек сиксе тухнӑ хыҫҫӑн вара вӑл систерни вируслӑ майпа сарӑлма пуҫланӑ.

Малалла...

Хӑҫан ӑшӑтать? Синоптиксем мӗн калаҫҫӗ? Хальлӗхе ҫӗрлесерен самай сивӗ, кӑнтӑрла вара кӑшт ӑшӑтать.

Ыран 2 градус сивӗрен пуҫласа 3 градус таран ӑшӑ пулӗ. Вырсарникун та ҫаплах пулӗ, анчах ҫил вӑйланӗ. Пӗр талӑкра 5-7 сантиметр хулӑнӑш юр ҫума пултарать.

Тунтикун ытлах юр ҫумӗ, кӑштах сивӗтӗ. Вӑйлӑрах ҫиле пула та сивӗ пек туйӑнӗ. Пушӑн 7-8-мӗшӗсенче те сивӗрех пулӗ, юр ҫумӗ.

Эрнен иккӗмӗш ҫурринче ҫил вӑйланӗ, пушӑн 9-мӗшӗнче кӑна юр ҫӑвӗ. Кӑнтӑрласерен ӑшӑтӗ, ҫӗрлесерен вара сивӗрех пулӗ.

Малтанлӑха пӗлтернӗ тӑрӑх, уйӑх варринче кӑна ӑшӑтӗ. Пушӑн 15-мӗшӗнче 10 градус таран ӑшӑтма пултарать.

«Дорисс» тӗп директорӗн пуканне ҫӗнӗ ҫын йышӑннӑ. Ку пукана Люция Сафина шанса панӑ. Унччен вара вӑл Алексей Ладыковӑн ҫумӗ пулнӑ.

Сафина – 49 ҫулта. Хӑй Казахстанра ҫуралнӑ, И.Н.Ульянов ячӗллӗ ЧПУн экономика факультетне пӗтернӗ. 1993 ҫулта «Дорисра» ӗҫлеме пуҫланӑ. Аудит, бухгалтери тата налук учетӗнче 25 ҫул ытла ӗҫленӗ. 2021 ҫулхи ҫу уйӑхӗнче вӑл Шупашкар хула администрацийӗн пуҫлӑхӗн ҫумӗ пулса тӑнӑ, экономика аталанӑвӗ тата финанс енӗпе вӑй хунӑ. Ҫулталӑк каялла «Дорисс» директорӗн ҫумӗ тивӗҫне пурнӑҫлама тытӑннӑ.