stav-reporter.ru сайтри сӑн

Ҫӗрпӳ районӗнче икӗ ҫын Ҫӗпӗр язвипе чирлесе кайни пирки пӗлтернӗччӗ. Аса илтерер: упӑшкипе арӑмӗ вӑкӑр пуснӑ чухне суранланнӑ. Хӑйсене япӑх туйма тытӑнсан пульницӑна кайса пулӑшу ыйтнӑ. Малтанлӑха пӗлтернӗ тӑрӑх, вӑкӑр лавккаран туяннӑ апата пула чирлеме пултарнӑ.

Вӑкӑр ашӗ вара ӑҫта кайнӑ? Mash Телеграм-канал пӗлтернӗ тӑрӑх, арҫын 500 килограмм аша сутма ӗлкӗрнӗ. Ӑна трасса ҫинче чикансем туяннӑ-мӗн. Халӗ вӗсем ӑҫти паллӑ мар.

gshum.cap.ru страницӑран илнӗ сӑнӳкерчӗк

Пуш уйӑхӗн 15-мӗшӗнче Ҫӗмӗрле хулин администрацине Эдуард Васильев ертсе пыма тытӑннӑ. Эдуард Михайлович кун пирки халӑх тетелӗнчи хӑйӗн страницинче пӗлтернӗ.

Эдуард Васильев 1980 ҫулта Муркаш районӗнчи Купӑрля ялӗнче ҫуралнӑ. Ӗҫ биографине вӑл уголовлӑ исполнительнӑй тытӑмра пуҫӑннӑ, уйрӑм ҫыннӑн хурал предприятийӗнче те, суту-илӳ сферинче те тӑрӑшнӑ.

2011 ҫулта Эдурад Васильев Мускаври управлени институтӗнчен вӗренсе тухнӑ, унта «Патшалӑх тата муниципалитет управленийӗ» специальноҫа алла илнӗ.

2016-2017 ҫулсенче Ҫӗнӗ Шупашкар хулин администрацийӗнче общественноҫпа ҫыхӑну тытакан спецалистра ӗҫленӗ, 2018 ҫултанпа Чӑваш Енӗн ӗҫ тӑвакан тата муниципалитет органӗсенче тӗрлӗ должноҫре тӑрӑшнӑ.

Чӑваш наци радиовӗн архивӗнчи сӑнӳкерчӗк

Шупашкар районӗнчи тӑватӑ ялта кӑҫал фельдшерпа акушер пункчӗсем тӑвассине эпир унчечн пӗлтернӗччӗ-ха. Етӗрне тӑрӑхӗнчи Вӑрманкас Асламасра та фельдшерпа акушер пункчӗ хӑпартма тытӑннӑ.

Чӑваш наци радиовӗ пӗлтернӗ тӑрӑх, строительсем никӗс хывнӑ. Вӑрманкас Асламас ялне хальхи вӑхӑтра «автобус ҫинчи медпункт килсе ҫӳрет, тухтӑрсене ял-йыша тӗрӗслеме май парать».

Ҫӗнӗ фельдшерпа акушер пунктне ҫӑва тухсан хута ярӗҫ.

Маларах асӑннӑ ҫӑлкуҫ пӗлтернӗ тӑрӑх, ҫӗнӗ медпункт Ҫӗрпӳ тӑрӑхӗнчи Рынкӑ салинче пулӗ.

https://vk.com/wall-10638896?offset=80 страницӑран илнӗ сӑнӳкерчӗк

Чӑваш Ен тата Иван Яковлева сума сӑвакан ытти хӑш-пӗр регион та паллӑ вӗрентекен ҫуралнӑранпа кӑҫалхи ака уйӑхӗн 25-мӗшӗнче 175 ҫул ҫитнине уявлама хатӗрленет.

Пирӗн республикӑра ҫавна май логотиппа брендбук хатӗрлеме йышӑннӑ. Чи лайӑх ӗҫе суйласа илме ятарлӑ конкурс ирттереҫҫӗ.

Конкурс ҫӗнтерӳҫине логотипа хатӗрлеме 90 пин тенкӗ парӗҫ, унсӑр пуҫне автора тепӗр 10 пин тенкӗ тӳлӗҫ.

Конкурса ирттерессишӗн Чӑваш Енӗн Вӗренӳ тата ҫамрӑксен политикин министерстви яваплӑ.

vk.com/nacradio страницӑран илнӗ сӑнӳкерчӗк

Елчӗк тӑрӑхӗнчи Лащ Таяпа ялӗнчи шкулта Чӗмпӗр облаҫӗнчи чӑваш автономийӗн пуҫлӑхӗнче ӗҫленӗ Олег Мустаева асра тытса асӑну хӑми вырнаҫтарнӑ. Аса илтерер: маттур чӑваш арӗ пӗлтӗрхи пуш уйӑхӗн 14-мӗшӗнче пурнӑҫран уйрӑлса кайнӑ.

Олег Мустаев — Чӑваш Республикин культурӑн тава тивӗҫлӗ ӗҫченӗ, Елчӗк районӗн хисеплӗ ҫынни пулнӑ.

Олег Мустаев 1965 ҫулхи раштавӑн 4-мӗшӗнче Елчӗк районӗнчи Ҫӗнӗ Эйпеҫ ялӗнче ҫуралнӑ. И.Н.Ульянов ячӗллӗ ЧПУна пӗтерсен вӑл Чӗмпӗре куҫса кайнӑ. 1992 ҫулта ӑна «Еткер» чӑваш фончӗн президентне суйланӑ. 2016 ҫултанпа Чӗмпӗр облаҫӗнчи чӑваш наци культурин автономин председателӗ пулнӑ, 2017 ҫулта ӑна Чӑваш наци конгресӗн вице-президенчӗ пулма шаннӑ.

cap.ru страницӑран илнӗ скриншот

Чӑваш Енӗн влаҫ органӗсен официаллӑ прорталӗнче республикӑри управлени кадрӗсен резервне ҫирӗплетни ҫинчен калакан йышӑнӑва вырнаҫтарнӑ.

Унта республикӑн ӗҫ тӑвакан влаҫ органӗсене ертсе пыма, муниципалитет районӗсемпе хула округӗсен ертӳҫисем пулма тата республикӑн влаҫ органӗсене пӑхӑнса тӑракан ведомство учрежеднийӗсен тилхепине тытса пыма тивӗҫ кандидатурӑсене ҫирӗплетнӗ.

Республикӑн влаҫ органӗсене ертсе пымалли резерва тивӗҫлӗ канури Сергей Гордеев ҫар пенсионерӗпе вӑхӑтлӑх ниҫта та ӗҫлемен Андрей Семёнов та пур.

vk.com/alexei_alexandrov страницинчен илнӗ сӑнӳкерчӗк

Чӑваш наци телерадиокомпанийӗн ӗҫченӗ Элтияр Александров Яндекс.Дзента чӑвашсемпе паллаштаракан статьясем вырнаҫтарма тытӑннӑ. Кун пирки вӑл халӑх тетелӗнчи хӑйӗн страницинче ӗнер пӗлтернӗ.

«Салам! Дзента йӑлана кӗнӗ чӑваш культурине халалланӑ статьясен ярӑмне пуҫарса ятӑм. Вырӑсла, мӗншӗн тесен Дзен чӑваш чӗлхине ют чӗлхе тесе йышӑнать те ӑна аталантарма май памасть», — хыпарланӑ Элтияр.

Вӑл хӑйӗн каналне ҫырӑнма ыйтнӑ, хӑй вара кашни кунах мӗн те пулин ҫӗннипе савӑнтарса пыма шантарнӑ.

Инкелӗ лару-тӑру министерстви тунӑ сӑн

Ӗнер, пушӑн 15-мӗшӗнче, Шупашкарти "Мега Молл" суту-илӳ центрӗнчи халӑха эвакуациленӗ. Хальхинче - мину хунӑ тесе пӗлтерни пирки мар. Унта пушар тухнӑ.

Суту-илӳ центрӗнчен 1,2 пин ҫынна урама кӑларнӑ. Пӗр хӗрарӑма пулӑшу кирлӗ пулнӑ: ӑна кислород памалли хатӗр тӑхӑнтартнӑ.

Пушарнӑйсем ҫитнӗ тӗле 1-мӗшпе 2-мӗш хутра тӗтӗм сарӑлнӑ. Ҫулӑм 1-мӗш хутри склад пӳлӗмӗнче тухнӑ, 20 тӑваткал метр сиенленнӗ. Халӗ прокуратура тӗрӗслев ирттерет.

in.pinterest.com сайтри сӑн

Пуш уйӑхӗн 20-мӗшӗнче "Шупашкар-Арена" пӑр керменӗнче Чӑваш Енри Телейлӗ ачалӑх ҫулталӑкне официаллӑ майпа уҫаҫҫӗ. Ҫавна май 11 аукцион ирттернӗ, организацисемпе килӗшӳсем тунӑ.

Телейлӗ ачалӑха уҫма 11 миллион та 227 пин те 800 тенкӗ тӑкаклӗҫ. Тӗслӗхрен, пӑр керменне тара илме 727,2 пин тенкӗ кайӗ, 1 миллион та 200 пин тенкӗ - сцена хатӗрлеме, 2 миллион та 800 пин тенкӗ - майпингпа видеопроекци валли.

ЦСКА сӑнӳкерчӗкӗ

Шупашкарта пурӑнакан Марат Шарипов Египетри Шарм-эль-Шейхра иртнӗ теннис турнирӗнче выляса илнӗ.

20 ҫулти Марат Латви спортсменне Роберт Стромбаха выляса илнӗ. Каччӑ турнирта ҫӗнтернӗ хыҫҫӑн АТР рейтингӗнче 122 йӗрке хӑпарса 674-мӗш вырӑна йышӑннӑ.

Марат хулари 1-мӗш шкулта вӗреннӗ, Шупашкарти теннис академийӗнче ӑсталӑхне туптанӑ. 2020 ҫулта вӑл тӗнчери 19 ҫул тултарман топ-50 спортсменсен йышне кӗнӗ.