2022 ҫул вӗҫӗнче Раҫҫейре ҫӗнӗ 100 тенкӗлӗх укҫа ҫаврӑнӑша тухӗ. Ун ҫинче пысӑк хисепсем, куҫ курманнисем валли рельефсем /миҫе тенкӗллӗхине алӑпа хыпашласа пӗлме май пур/ пулӗҫ.

Кредит организацийӗсене шутламалли-сортировка тумалли машинӑсене ҫак купюрӑна йышӑнмашкӑн куҫарма вӑхӑт панӑ. Ҫавна май хальлӗхе ҫӗнӗ 100 тенкӗлӗх укҫа ҫаврӑнӑша тухман.

Ҫӗнӗ укҫа тӗсӗпе, калӑпӑшӗпе хальхи пекрех пулӗ. Тепӗр енче Тӗп федераци округӗнчи паллӑ вырӑнсем пулӗҫ.

Чӑваш патшалӑх юрӑпа ташӑ ансамблӗ 98-мӗш сезона юпа уйӑхӗн 14-мӗшӗнче уҫма палӑртнӑ. Мероприятие Александр Ангаров ҫуралнӑранпа 75 ҫул ҫитнине халаллӗҫ. Вӑл 1976 ҫултанпа ансамблӗн тӗп балетмейстерӗ пулса ӗҫленӗ. Кӑҫалхи юпа уйӑхӗн 1-мӗшӗнче 75 ҫул тултарнӑ. Хӑй вӑл Украинӑри Ужгород хулинче ҫуралнӑ. Мускаври культура институтӗнче вӗреннӗ. Чӑваш патшалӑх юрӑпа ташӑ ансамблӗнче 30 ҫул тӑрӑшнӑ.

«Мелодии родного края» (чӑв. Тӑван тӑрӑх ҫеммисем) концерт программине маэстрӑн лайӑх постановкисем: «Тӑван Чӑваш Ен», «Лармара», «Вӑйӑра» вокалпа хореографи сюитисем, «Урам савӑнать», «Тӑхӑрпӳ», «Кӑкшимке» хореографи номерӗсем — кӗрӗҫ. Вӗсем ансамблӗн ылтӑн фончӗ шутланаҫҫӗ.

Куракансем валли ҫӗнӗ ӗҫсем те хатӗрленӗ. Лолита Чекушкина музыкипе «Чуна уҫма юрла, тӑван» сюита, Анатолий Шалаевӑн ӗҫӗ тӑрӑх — инструментсен номерӗ.

Концерт курма Шупашкарти Трактор тӑвакансен культура керменне каймалла. Мероприяти юпа уйӑхӗн 14-мӗшӗнче 18 сехет те 30 минутра пуҫланӗ.

«Доктрина Cоздателя» кӗнеке кун ҫути курнӑ.

Нумай пулмасть ҫӗртме уйӑхӗнче вулакансем валли ҫӗнӗ кӗнеке пичетленсе тухнӑ. «Доктрина создателя» (чӑв. Пултаракан доктрини; Тӑвавҫӑ доктрини) ят панӑскерте автор эпир курма хӑнӑхнӑ тӗнче курӑмне ҫӗнӗлле пӑхма вӗрентет. Унӑн иккӗмӗшле ячӗ — «Этемлӗхӗн Чун Интернационалӗ е пирӗн цивилизацине ыран мӗн кӗтет».

Кӗнеке авторӗ — техника ӑслӑлӑхӗсен докторӗ, профессор, РФ АТН, РАЕН академикӗ, ОАЕГН президенчӗ Маслов Леонид Иванович Аслӑ Тӗнче уҫлӑхӗн Ӑс-тӑнӗ тивӗҫтернӗ информацие кӗскен каласа панӑ. «Доктрина Создателя» кӗнекере халӑх пӗрлӗхӗн аталану ҫулӗн ҫӗнӗ модельне сӗннӗ. Кунта ӑнланмалла чӗлхепе ҫынпа Уҫлӑх хушшинчи ҫыхӑну епле йӗркеленни пирки каласа панӑ. Тӗнче уҫлӑхӗ мӗнле йӗркепе — Канонсемпе — аталанса пынине уҫса панӑ, кӗнекери шухӑшпа этемлӗх вӗсене тӗпе хурса аталанма.

Ҫамрӑксемшӗн кӗнекери «Ҫӗнӗ ӑру валли ҫырнӑ халал» юлашки сыпӑк кӑсӑклӑ пулӗ. Пултаракан паракан пӗлӳ ҫын кам иккенне тӗпренех улӑштарать.

Кӗнеке кӑҫал ҫӗртме уйӑхӗнче 5 пин тиражпа тухнӑ пулнӑ, анчах вулакансем ӑна пит хӑвӑрт туянса пӗтернӗ.

Малалла...

opera21.ru сӑнӳкерчӗксемпе усӑ курса хатӗрленӗ коллаж

Ҫак кунсенче Чӑваш патшалӑх оперӑпа балет театрӗнче сумлӑ ҫынсен паллӑ кунӗсене уявлаҫҫӗ.

Раҫҫей тава тивӗҫлӗ артистки, Чӑваш халӑх артистки Валентина Смирнова-Геворкян театр труппинче ӗҫлеме пуҫланӑранпа 30 ҫул ҫитнӗ. Вӑл 1959 ҫулхи юпа уйӑхӗн 8-мӗшӗнче Вӑрнар районӗнчи Кӳлхӗрринче ҫуралнӑ. Шупашкарти Ф.П. Павлов ячӗллӗ музыка училищинчи вокал уйрӑмӗнчен, Сартури В. Собинов ячӗллӗ патшалӑх консерваторийӗнчен вӗренсе тухнӑ. 2000 ҫултанпа вӑл Чӑваш патшалӑх культурӑпа ӳнер институтӗнче вӗрентет, профессор.

Ӗнер, юпа уйӑхӗн 10-мӗшӗнче вара, оперӑпа балет театрӗн балет труппин илемлӗх ертӳҫи Данил Салимбаев 50 ҫул тултарнӑ.

drama21.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗ куракансене ҫак эрнере премьерӑна йыхравлать. Марина Карягина пьеси тӑрӑх лартнӑ «Телей кайӑкӗ» спектакль пӗтсе пыракан чӑваш (тепӗр тесен, ун пекки Чӑвашра ҫеҫ-и?!) ялӗ ҫинчен. Трагикомедие курма театра юпа уйӑхӗн 14-мӗшӗнче каймалла.

«Телей кайӑкӗ» спектакль пирки ticketform.ru билет операторӗ ҫапларах ӑнлантарса панӑ: «Арҫынсӑр юлнӑ пӗтсе пыракан ялта пурте хӑй пек телейсӗр, анчах кашнин нуши пӗрлехи инкек пулса тӑрать те, ял-йыш ырлӑхӗпе харпӑр хӑй телейӗшӗн мӗнпурӗ хӑй пӗлнӗ пек тапаҫланма тытӑнать…

Ялта хӗрарӑмсем те ачасем кӑна, колхоз юхӑннӑ, культура вучахӗ сӳннӗ, ӗҫ ҫуккипе арҫынсем инҫете тухса кайнӑ, вӗренекенсем сахаллипе шкула хупасшӑн — ку паянхи Раҫҫейре пурте палласа илекен ӳкерчӗк. Ӑҫта ҫӑлӑнӑҫ, мӗн тумалла шкула сыхласа хӑварас тесен? Паллах, ача шутне ӳстермелле. Анчах… таврара та пӗр арҫын ҫеҫ. Пуҫланать ялта хирӗҫтӑруллӑ пӑтӑрмах! Хветура, ҫӗр ҫултан иртнӗ аптраман кинеми, «килтен писнӗ Куйкӑрӑш кайӑка каялла тавӑрмасӑр ман вилме ирӗк ҫук» тесе шутлаканскер, ялта йӗрке тума пикенет: никам сисиччен мӑнукӗн «алӑран вӗҫерӗннӗ» мӑнукне, Саньккӑна та, хӗрарӑмсене те «вырӑнӗ ҫинчен тӑмасӑрах», соцсетьсем урлӑ, «тӑна кӗртсе» пурӑнать.

Малалла...

Чӑваш наци конгресӗн Фейсбукри сӑнӳкерчӗкӗ

Чӑваш Енре «Хӗрарӑм, сан умӑнта таятӑп пуҫӑма» регионсем хушшинчи конкурса пӗтӗмлетнӗ.

«Ылтӑн алӑ» номинацире Етӗрне районӗнчи Наталия Иванова ҫӗнтернӗ, «Тӗпел хуҫи» номинацире — Ӗренпур облаҫӗнчи Надежда Сафронова, «Пултарулӑх ҫӑлкуҫӗнче» — Муркаш районӗнчи Светлана Иванова-Мерчен, «Эткер пирӗштийӗнче» — Ҫӗрпӳ районӗнчи Людмила Герасимова, «Ӑс-хакӑл арчинче» — Красноармейски районӗнчи Любовь Платонова.

Гран-прие Патӑрьел районӗнчи Вероника Кузнецова ҫӗнсе илнӗ. Ӑна Чӑваш Енри санаторисенчен пӗринче канма путёвка панӑ. Унта вӑл мӑшӑрӗпе кайӗ.

Фейсбукри Lida Filippova страницинчи сӑнӳкерчӗк

Юпа уйӑхӗн 9-мӗшӗнче Чӑваш Ен Наци вулавӑшӗнче ҫамрӑк авторсемпе опытлӑ калем ӑстисем тӗл пулассине эпир унччен хыпарланӑччӗ.

Чӑваш Енри Профессионал ҫыравҫӑсен союзӗн правленийӗн председателӗ Лидия Филиппова Фейсбукра пӗлтернӗ тӑрӑх, семинар-тӗлпулу «Современная чувашская литература: связь поколений» (чӑв. Хальхи чӑваш литератури: ӑрусен ҫыхӑнӑвӗ) ятпа иртнӗ.

Ҫамрӑк ҫыравҫӑсем чӑваш халӑх ҫыравҫисемпе тата поэчӗсемпе: Юрий Сементерпе, Анатолий Кипечпе, Светланой Асаматпа, Раиса Сарпипе — тӗл пулнӑ, вӗсен паха опычӗпе паллашнӑ. Чӑваш Республикин культурӑн тава тивӗҫлӗ ӗҫченӗсем: Лидия Филиппова, Улькка Эльмен, Светлана Гордеева, Василий Кервен, Ара Мишши, Галина Кӗмӗл, Анатолий Хмыт, Иван Чураль; Александр Шпаннагель, Александр Сасакин, Елена Светлая, Мальвина Петрова, Инесса Шашкина тата ыттисем те — семинара хутшӑннӑ.

novostivoronezha.ru сайтри сӑн

Шупашкарта пурӑнакан 23 ҫулти каччӑ асламӑшӗ /е кукамӑшӗ/ патӗнче хӑнара пулнӑ чухне амӑшӗпе унӑн телефонӗпе калаҫнӑ. Ҫав вӑхӑтра вӑл ватӑ ҫыннӑн счечӗ ҫинчи 4 пин тенке пӗлӗшӗн счечӗ ҫине куҫарса ӗлкӗрнӗ.

Хӗрарӑм ытти укҫана куҫарасран карточкӑна блокировка тутарнӑ. Вӑл кун пирки полицие кайса каласа кӑтартнӑ. Ку ӗҫе тума пултарнӑ ҫынна та асӑннӑ: унччен судпа айӑпланнӑ, ниҫта та ӗҫлемен, наркотикпа айкашакан мӑнукӗ.

Каччӑ вӑрланӑ укҫана тата телефона тавӑрса панӑ. Ҫапах ку явапран хӑтарман. Пуҫиле ӗҫе суд пӑхса тухнӑ та ӑна тӗрмене хупмасӑр айӑплама йышӑннӑ.

Паян Тутарстанра 9 сехет те 23 минутра самолет ҫӗр ҫине йывӑррӑн анса ларнӑ. Малтанлӑха пӗлтернӗ тӑрӑх, авиаварире 16 ҫын вилнӗ, 6 ҫын сывӑ юлнӑ. Анчах пӗрин сывлӑхӗ питӗ начар.

Икӗ пилочӗ те вилнӗ. ТАСС пӗлтернӗ тӑрӑх, самолета ытла нумай ҫын ларнӑ, ахӑртнех, авари ҫавӑнпа пулнӑ. Ҫавӑн пекех самолет юсавсӑр пулма пултарнине пӑхса тухаҫҫӗ.

Тӗрлӗ ҫӑлкуҫ пӗлтернӗ тӑрӑх, самолетри чылай парашютист пӗрремӗш хутчен сикме хатӗрленнӗ.

riavrn.ru сайтри сӑн

Шупашкарта пурӑнакан хӗрарӑм криптовалютӑпа ӗҫлесе илес тенӗ. Анчах пачах тепӗр май пулса тухнӑ: вӑл укҫасӑр юлнӑ.

37 ҫулти хӗрарӑм каласа кӑтартнӑ тӑрӑх, ун патне палламан ҫын шӑнкӑравланӑ та укҫа ӗҫлесе илме сӗннӗ. Ку килӗшнӗ, лешӗ телефон ҫине ярса панӑ каҫӑпа кайса регистрациленнӗ, хӑйӗн даннӑйӗсене ҫырнӑ. Вӑл «консультант» сӗннӗ счетсем ҫине темиҫе хутчен укҫа куҫарнӑ. Хӗрарӑм харпӑр кабинетне тӗрӗсленӗ, унта укҫа хушӑнсах пынӑ.

Хӗрарӑм укҫана кӑларма шутланӑ. Ӑна каллех укҫа хума ыйтнӑ. Ҫавӑн чухне тин вӑл ултавҫӑсемпе калаҫнине ӑнланнӑ. Вӗсене вӑл пӗтӗмпе 110 пин тенкӗ куҫарса панӑ. Кун тӗлӗшпе пуҫиле ӗҫ пуҫарнӑ.