"Про Город" сайтран илнӗ сӑн

Паян, ҫурла уйӑхӗн 4-мӗшӗнче, республикӑра кӑнтӑрлаччен ҫумӑр ҫурӗ. Шупашкарта урамсене шыв илнӗ. Сӑнӳкерчӗксене, видеосенче ҫынсем тӗнче тетелне вырнаҫтарнӑ.

Урамсем Венецири урамсене аса илтернӗ, шӑв шӑнкӑртатса юхнӑ. Тӗп хулари Суту-илӳпе курав центрӗн чи аялти, путвалти, хутне шыв кӗнӗ. Урамри ливневка ҫавӑн чухлӗ шыв ҫӑтса ӗлкӗреймен – суту-илӳ центрне те лекнӗ.

«Мадагаскар» суту-илӳ центрӗ патӗнче те урам юханшыва ҫаврӑннӑ.

Инкеклӗ лару-тӑру министерстви тунӑ сӑн

Ҫурла уйӑхӗн 3-мӗшӗнче Чӑваш Енре аҫа ҫапнине пула 5 пушар пулнӑ. Вӗсенчен иккӗшӗ – нумай хваттерлӗ ҫуртра.

Шупашкарти Ленин Комсомолӗн урамӗнчи 30-мӗш тата 32-мӗш ҫуртсенче ҫиҫӗме пула тӗпелти техника сиенленнӗ.

Шупашкар районӗнчи Вӑрӑмту ялӗнче ҫурта аҫа ҫапнӑ. Пӳрт тӑрри тата шалти отделка сиенленнӗ. Красноармейски районӗнчи Дворик ялӗнче те ҫурта аҫа ҫапнӑ. Йывӑҫ пӳрт кӗле ҫаврӑннӑ. Ҫӗрпӳ районӗнчи Вӗрмер ялӗнче 1 тонна утӑ хунӑ сарай ҫунса кайнӑ.

Кушакпа упа

Якутире Ваҫка ятлӑ хура кушак аҫи тискер упана хирӗҫ тӑрса тискер кайӑка хуҫисем йӗркеленӗ лагерьтен хӑваласа янӑ. Чӗрчуна хирӗҫ тӑнине ӳкернӗ видеопа Life Shot Telegram-канал паллаштарать.

Кадрта хӑмӑр упа ҫынсен канмалли вырӑнне пырса тухни курӑнать. Тискер кайӑка кӑвайт ҫинче хатӗрлекен апат шӑрши илӗртнӗ пулас. Апла пулин те тискер кайӑкӑн апат патне те, канакансем патне те ҫитме май килмен — ун ҫулӗ ҫине Ваҫка кушак аҫи тухса тӑнӑ.

Хӑйӗн тӑшманӗ кӳлепипе темиҫе хут пысӑкрах пулнӑ пулин те, Ваҫка каялла чакман, ҫурӑмне авса, упа ҫине ҫилӗллӗн чашкӑрса тӑнӑ. «Ваҫка, лӑплан! Пире ун чухлӗ аш кирлӗ мар!» — шӳт туса илнӗ кушак аҫине ӳкерекен хуҫи. Раҫҫей ҫынни хӑйӗн кушакне чӗнсе илме хӑтланнӑ, анчах лешӗ вырӑнтан та тапранман.

Упа темиҫе хут та кушака хирӗҫ урипе хӑмсарса илнӗ, хыҫалти урисем ҫине хаяррӑн тӑнӑ, ҫапах та юлашкинчен харсӑр кушакпа тытӑҫас мар тенӗ пулас та, каялла, вӑрманалла кӗрсе кайнӑ. Кушак хуҫине самай тӗлӗнтернӗ, вара вӑл ӑна «чи пысӑк аш татӑкӗпе» хӑналама сӑмах панӑ.

Пӑтӑрмах вырӑнӗ. Чехи Республикин полицийӗ тивӗҫтернӗ сӑн

Чехин кӑнтӑр-хӗвеланӑҫ енче, Домаждице хулинчен инҫех мар, икӗ пассажир пуйӑсӗ ҫапӑннӑ, вуншар ҫын шар курнӑ. Кун пирки Чехи полицийӗ хӑйӗн Twitter-ти страницинче пӗлтернӗ.

Инкеке пула икӗ ҫын вилнӗ, тата 38–шӗ аманнӑ. Шар курнисенчен ҫиччӗшӗ реанимацире питӗ йывӑррӑн выртаҫҫӗ. Поездсем пырса ҫапӑннӑ вырӑна тӑватӑ вертолет — сывлӑх сыхлавӗнчен виҫҫӗ тата пӗрре полицирен — ҫитнӗ.

Минпромторгпа Транспорт министерствин Пуҫлӑхӗ Карел Гавличек каланӑ тӑрӑх пӑтӑрмаха пулнӑ сиене пӗтерес тӗлӗшпе ятарлӑ службӑсен ӗҫне хӑй тӗрӗслесе тӑрӗ.

Гавличек пӗлтернӗ тӑрӑх, пӑтӑрмах пӗр поездӑн машинисчӗ йӑнӑшнине пула сиксе тухнӑ. Семафорӑн ҫути хӗрлӗпе ҫутатнӑ пулин те вӑл пуйӑса чарман. Авари хыҫҫӑн пӑтӑрмах вырӑнне ҫитнӗ ҫӑлавҫӑсем пассажирсене пурне те чукун ҫул ҫинчен тата вакунсенчен эвакуациленӗ.

Ӗнер, ҫурла уйӑхӗн 3-мӗшӗнче, вӑйлӑ ҫил Етӗрнери Красноармейски урамӗнчи 5-мӗш ҫурт адреспа вырнаҫнӑ коммерци банкӗн ҫивиттине сӳсе кайнӑ. Пӑтӑрмах 16 сехет тӗлӗнче пулнӑ. Ҫил ҫав вӑхӑтра ҫеккунтра 17 метр хӑвӑртлӑхпа вӗрнӗ.

Кредит учрежденийӗн ҫивиттийӗ Етӗрнери пуҫламӑш шкулӑн территорине пырса выртнӑ.

Етӗрне район администрацийӗнче ӗнентернӗ тӑрӑх, вӗренӳ учрежденийӗ хытах сиенленмен, мӗншӗн тесен ҫивитти тимӗр карта ҫине ӳкнӗ. Халӗ яваплисем пӑтӑрмаха сирессипе ӗҫлеҫҫӗ.

porezk.cap.ru сӑнӳкерчӗкӗ.

Ӗнер пирӗн республикӑра аслатиллӗ ҫумӑр ҫуса иртнӗ, вӑйлӑ ҫил тухса кайнӑ хыҫҫӑн 11 районти 33 ял ҫутӑсӑр юлнӑ. Ҫутҫанталӑка пула 2763 ҫуртра ҫутӑ сӳнсе ларнӑ.

Пӑрачкав салинче, тӗслӗхрен, Сад урамӗнче йывӑҫ ӳксе ҫутӑ пӑралукне татса пӑрахнӑ, Яшин урамӗнче трансформатор подстанцине аҫа ҫапнӑ. Ҫавӑн хыҫҫӑн унти 12 урам ҫутӑсӑр юлнӑ.

Паянхи, ҫурла уйӑхӗн 4-мӗшӗнчи, ир тӗлне Йӗпреҫ, Пӑрачкав, Шупашкар, Ҫӗмӗрле районӗсенчи 14 ялта ҫутӑ пулман. Вӗсенчи 1244 ҫуртра ҫынсем электричествӑсӑр лараҫҫӗ. Ҫутӑ парассине кӑнтӑрла тӗлне вӗҫлеме палӑртнӑ.

Ҫӗртме уйӑхӗн вӗҫӗнче те аслатиллӗ ҫумӑр, вӑйлӑ ҫил хыҫҫӑн республикӑри хӑш-пӗр вырӑнта ҫутӑ сӳнсе ларнӑччӗ. Ун чухне 17 пин ҫын ҫутӑсӑр тӑрса юлнӑ.

Сӑн: Winfried Rothermel/imago stock&people/Global Look Press

Кӑнтӑр Корейӑри разведка служби Сеулти правительствӑна Ҫурҫӗр Корейӑн ертӳҫисем инкек тӳсекен халӑх хушшинче сых ятне упранӑ риса валеҫме пуҫлани пирки пӗлтернӗ. Кун ҫинчен NRК кӑларӑм пӗлтернӗ.

Кӑнтӑр Корейӑри разведка пӗлтернӗ тӑрӑх, ДКХРти хӑрушла шӑрӑх ҫанталӑк тата тыр-пул ӑнманни ҫӗршыва выҫлӑх патне ҫитернӗ. Типӗ ҫанталӑка пула рисӑн пысӑк лаптӑкӗсем пӗтнӗ. Апат-ҫимӗҫ тӗлӗшпе ҫурҫӗрте кӗркунне лару-тӑру тата та япӑхланӗ.

Маларах пӗлтернӗ тӑрӑх ДКХР ертӳҫи Ким Чен Ын ҫӗршыври хальхи лару-тӑрӑва вӑрҫӑри нушапа танлаштарнӑ. Политик пӗлтернӗ тӑрӑх ҫӗршыв хальхи вӑхӑтра хӑйӗн историнчи чи йывӑр тапхӑра тӳссе ирттерет. Ҫӗртмен 16-мӗшӗнче республикӑра выҫлӑх хӑрушлӑхӗ пирки пӗлтернӗ, ун сӑлтавне ака планне пурнӑҫлама чӑрмантарнӑ 2020 ҫулхи тайфунпа ҫыхӑнтарнӑ. Унсӑр пуҫне апат-ҫимӗҫ тӗлӗшӗнчен лару-тӑрӑва кӑшӑлвирус та йывӑрлатнӑ. Ким Чен Ын халӑхпа партие ҫӗнӗ «йывӑр похода» тухма чӗннӗ.

Асӑннӑ терминпа пӗрремӗш хут 1990-мӗш ҫулсенче, ДКХР-та экономика кризисӗ йывӑрланнипе ҫыхӑннӑ выҫлӑх алхаснӑ чухне усӑ курнӑ. Чи ансат мелпе шутланӑ тӑрӑх, ун чухне ҫӗршыври йывӑр лару-тӑрӑва пула ДКХР-та пурӑнакан халӑхӑн 15% таран пурнӑҫӗ татӑлнӑ.

Малалла...

Эльвира Хмелёва журналистӑн Фейсбукри страницинчи сӑнӳкерчӗк

Юлашки вӑхӑтра ҫутҫанталӑк хӑйӗн вӑйне хытах кӑтартма пуҫларӗ. Ҫил-тӑвӑл, шыв-шур, вут-кӑвар этеме — пуян-и вӑл е чухӑн-и, ӑслӑ-и е айван-и, пысӑк вырӑн йышӑнать е хура ӗҫе пурнӑҫлать-и — никама та уяса-суйласа тӑмасть. Алхасса кайсан пурин пурлӑхне те пӗр пек ишет-ватать, ҫӗмӗрет-ҫӗрпе танлаштарать.

Ҫутҫанталӑк тата технологи лару-тӑрӑвӗ ҫурт-йӗре, хваттере, ытти пурлӑха сиен кӳнине саплаштарассипе пирӗн республикӑра ятарлӑ программа йышӑнма палӑртнӑ. Ҫурла уйӑхн 2-мӗшӗнче ку ыйтупа Чӑваш Ен Правительствин ҫуртӗнче тӳре-шара канашлӑва пухӑннӑ. Сергей Артамонов вице-премьер ертсе пыракан мероприятие страхлакан компанисенче ӗҫлекенсем те хутшӑннӑ.

Сӑмах май каласан, ӗнер те пирӗн тӑрӑхра вӑйлӑ ҫил алхасрӗ. Шупашкарта, ав, «Пичет ҫурчӗ» чарӑнӑва тӳнтерсе янӑ.

Васкакан вакка сикнӗ тенӗ ваттисем. Пӑрачкавра пурӑнакан 39 ҫулти арҫын ӑҫта васканӑ-ши ҫав кун? Инкеке вӑл ҫурла уйӑхӗн 2-мӗшӗнче 15 сехет те 40 минут тӗлӗнче лекнӗ.

«Фольксваген-Пассат» автомобиле тытса пыраканскер «Шупашкар-Сурски» ҫулпа Ҫӗмӗрле районӗпе иртнӗ чухне машинӑсем хирӗҫ килекен ҫул ҫине тухса кайнӑ. Унта вӑл «Шахман» груз турттаракан автомобильпе пырса ҫапӑннӑ. Асӑннӑ машинӑн 55 ҫулти водительне нимӗн те пулман. Вӑл урӑ пулнӑ. Ҫӑмӑл автомобиль водителӗ вара инкек вырӑнӗнчех вилсе кайнӑ. Унӑн машинин спидометрӗ ҫинчи йӗп хӑвӑртлӑха пӗр сехетре 180 километр тесе кӑтартнӑ...

Валерий Шигашев

Ҫӗмӗрле хула администрацийӗн пуҫлӑхӗ Валерий Шигашев (вӑл хӑй вӑхӑтӗнче Чӑваш Ен Патшалӑх Канашӗн депутачӗ те пулнӑччӗ) кӑшӑлвирус ҫакланни пирки Фейсбукра пӗлтернӗ. Вӑл унта ӗнер хыпарланӑ тӑрӑх, «канма, пурнӑҫ пирки шухӑшлама, хӑйӗнпе хӑй пулма» сӑлтав тупӑннӑ.

Валерий Шигашев пӗлтернӗ тӑрӑх, унччен больница хучӗпе нихӑҫан та ларман. Хальхи пирки вӑл «сиплев вӑхӑтӗнчен ытла ҫынран уйрӑм пулни» тесе хаклать.

Тӳре-шара хӑйне япӑхрах туйнӑран (ӳт температури 37,5 градуса ҫитнӗ, сунас ернӗ, шӑрша туйми пулнӑ) кӑшӑлвирусран ПЦР-тест тутарнӑ. COVID лекнине пӗлсен хула администрацийӗн пуҫлӑхӗ питӗ тӗлӗннӗ, мӗншӗн тесен ҫирӗп иммунитет тата вакцинаци тутарни вирусран хӳтӗлессе шаннӑ.

Валерий Шигашев шухӑшланӑ тӑрӑх, психика енчен ывӑнни, ревакцинаци курсне вӗҫлеменни вируса организмра тӗпленме май панӑ. Ҫапах та прививка тутарнӑшӑн ӳкӗнмест, хӑйне аван туйнӑран (ахаль чухне пулсан чир пирки шухӑшламан та пулӑттӑм тесе палӑртнӑ) вакцинацие пула организм вируспа кӗрешме хатӗртен чире ҫӑмӑллӑн тӳссе ирттерессе шанать.