catherineasquithgallery.com сайтри сӑн

Россельхознадзорӑн Чӑваш Енри управленийӗн пуҫлӑхӗ Алексей Палькин Ҫӗнӗ Шупашкарта 1,4 тонна кӑлпасси тӗп тӑвассине пӗлтернӗ. Аса илтерер: нумаях пулмасть, чӳк уйӑхӗн 9-мӗшӗнче, ҫак хулар кӑлпассире Африка мурӗн вирусӗн ДНКне тупнӑ.

Алексей Палькин пӗлтернӗ тӑрӑх, ҫак вирус ҫыншӑн хӑрушӑ мар. Анчах вӑл экономикӑшӑн хӑрушӑ, мӗншӗн тесен тӑкак кӳрет. Патшалӑх ветеринари служби пӗлтернӗ тӑрӑх, сысна ашне урӑх регионтан илсе килнӗ, унран кӑлпасси хатӗрленӗ. ЧР Элтеперӗ Олег Николаев хушнипе аш-какай комбиначӗн хӑш-пӗр объектӗнче карантин тесе палӑртнӑ.

mosk.cap.ru сӑнӳкерчӗкӗ

Чӑваш Ен Элтеперӗ Олег Николаев пуҫарнипе пӗлтӗтенпе пирӗ республикӑра ҫӗнӗ уяв туса хунӑ. Чӑваш тӗррин кунне ҫулсерен чӳк уйӑхӗн 26-мӗшӗнче ирттерӗҫ. Ку куна чӑваш халӑхӗн культурипе йӑли-йӗркине упраса хӑварас тӗллевпе йышӑннӑ.

Чӑваш тӗррин кунне халалласа Шупашкар хулин библиотекисен пӗрлешӗвӗн К. Чуковский ячӗллӗ вулавӑшӗ «Многоцветие чувашской вышивки» (чӑв. Чӑваш тӗррин нумай тӗсӗ) онлайн-акци ирттерессине пӗлтернӗ. Унта хутшӑнас тесен асӑннӑ вулавӑшӑн тата Шупашкар хулин библиотекисен пӗрлешӗвӗн «Контактри» страницисене ҫырӑнмалла. Ун хыҫҫӑн вӗсенчи ятарлӑ фотоальбома сӑнӳкерчӗксем вырнаҫтармалла. Вӗсене #МногоцветиеЧувашскойВышивкиЧуковкаЧебоксары #Библ21 хештегсемпе палӑртмалла.

Чӑваш Енпе Чулхула облаҫне пуйӑспа ҫыхӑнтарасшӑн. Ҫапла пӗлтерет Ҫӗмӗрле администрацийӗ.

Хальлӗхе ку ыйтӑва «Содружество» АО пӑхса тухать. Чукун ҫул маршрутне «Сергач – Ҫӗмӗрле – Канаш» ҫулпа хывасшӑн. Ҫавна май Ҫӗмӗрле ҫыннисене ыйтӑма хутшӑнма сӗнеҫҫӗ. «Контактра» халӑх тетелӗнче ирттерекен ыйтӑмра вӗсемшӗн мӗнле график меллӗ пулнине палӑртмалла.

Сӑмах май, унччен ҫак маршуртпа ҫӳрекен пуйӑс пулнӑ. Анчах ӑна 2013 ҫулта хупса лартнӑ.

Раҫҫей правительствинче халӑхӑн 90-95 процентне вакцинацилесси пирки калаҫма тытӑннӑ. Ҫапла пӗлтернӗ Татьяна Голикова ӗнер.

Вӑл каланӑ тарӑх, коллективлӑ иммунитет пултӑр тесе ҫӗршывра тепӗр 22 миллион ҫынна вакцинацилемелле, 9 миллион ҫыннӑн ревакцинациленмелле.

Хальлӗхе Раҫҫейре коллективлӑ иммунитет 48,4 процентпа танлашать, Чӑваш Енре – 36,5 процентпа. Татьяна Голикова коллективлӑ иммунитет 80 процентпа танлашни те ҫителӗксер пулнине каланӑ. Ҫакна экспертсем палӑртнӑ-мӗн.

forum.na-svyazi.ru сайтри сӑн

Шупашкара раштавӑн 10-мӗшӗччен Ҫӗнӗ ҫул валли капӑрлатса пӗтермелле. «Горсвет» ку ӗҫе тума тытӑннӑ ӗнтӗ, тӗп урамсенче йывӑҫсене хитрелетеҫҫӗ, кӗперсем ҫинче ҫутӑ конструкцисем ӗҫленипе ӗҫлеменнине тӗрӗслеҫҫӗ.

Тӗп чӑрӑша, Республика лапамӗнчине, раштав уйӑхӗн пуҫламӑшӗнче вырнаҫтарӗҫ. «Овас» скверӗнче тата Кадет паркӗнче светодиодлӑ 16 «Сакура» йывӑҫӗ пулӗ. 9-мӗш Пилӗкҫуллӑх, Вӑрнар ҫулӗ тата Гладков урамӗ патӗнчи ҫул ҫаврӑнӑшӗсенче искуственнӑй чӑрӑш лартӗҫ.

Мускав проспектӗнче тата Студентсен скверӗнче йывӑҫсем те ҫуталӗҫ. «Мир Луксор» кинотеатр, Правительство ҫурчӗ, «Дорисс-парк» патӗнче, «Садовый» микрорайонта та искусственнӑй чӑрӑшсем пулӗҫ.

cheb-gkb1.med.cap.ru сайтри сӑн

Хулари 1-мӗш клиника пульницине васкавлӑ медпулӑшупа арҫынна илсе килнӗ. Пӗлӗшӗсем каланӑ тӑрӑх, вӑл хутаҫ тата ручка стерженьне ҫӑтса янӑ.

Тухтӑрсем рентген тунӑ та хырӑмлӑхра чӑнах та темле япаласем пуррине асӑрханӑ. Дежурнӑй хирург тата эндоскопи уйрӑмӗн заведующийӗ пӗр тӑхтамасӑр операци ирттерме йышӑннӑ. Арҫынна вырӑнти наркоз туса операци тунӑ, хырӑмлӑхӗнчен хутаҫ тата стержень кӑларнӑ.

Операци хыҫҫӑн пациента кӑшт сӑнаса тӑнӑ хыҫҫӑн киле янӑ.

Николай (Аҫтахар) Плотников Чӑваш Ен Наци вулавӑшӗн ӗҫченӗн Ольга Тимофееван архивӗнчи сӑнӳкерчӗк

Чӑваш халӑх сайчӗн редакторне Аҫтахар (Николай) Плотникова Чӑваш Ен Элтеперӗн Олег Николаевӑн Тав хучӗпе чысланӑ.

Аҫтахар Плотниковӑн чӑваш халӑхӗшӗн туса ирттерекен капашсӑр пӗлтерӗшлӗ те ырми-канми ӗҫӗ-хӗлӗ пирки пурте пӗлмесен те пултараҫҫӗ. Пӗр пуслӑх ӗҫе хӑшӗсем пек ҫӗр тенкӗлле сутакан ҫын мар вӑл. Апла пулин те унӑн кулленхи тӑрӑшулӑхне асӑрхакансем те пур. Чӑваш Ен Элтеперӗ Олег Николаев чӑваш чӗлхине цифровизацилессинче «Яндекс.Куҫаруҫӑна» 2020 ҫул пуҫламӑшӗнче чӑваш чӗлхи лекни пӗлтерӗшлине палӑртса хӑварнӑ. Кун пирки вӑл Инстаграмри хӑйӗн страницинче ҫырнӑ. Чӑн та, Николай Плотников ертсе пыракан ушкӑн малтанласа 250 пин ытларах мӑшӑр пухма пултарнӑ пулсан, паян ҫав цифра 1 миллионран иртнӗ.

Сӑмах май каласан, хастар чӑваш арӗ Тимӗр Тяпкин Аҫтахара «чӑвашсен Билл Гейтсӗ вӑл» тесе хаклать.

Эпир пӗлнӗ тӑрӑх, Николай Плотниковӑн тӑрӑшӑвне тивӗҫлипе палӑртмалла тесе ҫӳллӗ шайра сӑмах хускатакансем те пулнӑ.

minprom.cap.ru сайтран илнӗ скриншот

Ӗнер, чӳк уйӑхӗн 10-мӗшӗнче, Чӑваш Енӗн Промышленность тата энергетика министерствинче кадр улшӑнӑвӗ пулса иртнӗ. Министр ҫумӗ пулма Борис Марковцова шаннӑ. Ӗҫлӗ хута республикӑн влаҫ органӗсен официаллӑ порталне вырнаҫтарнӑ.

ЧР промышленность тата энергетика министрӗн тивӗҫӗсене хальхи вӑхӑтра Александр Кондартьев пурнӑҫлать. Министр ҫумӗсем иккӗн. Вӗсем — Ольга Чилибина тата маларах эпир асӑннӑ Борис Марковцов. Кунсӑр пуҫне министрӑн пулӑшуҫи пур. Вӑл — Светлана Кузьмина.

politsib.ru сӑнӳкерчӗкӗ

Раҫҫей политикӗсем хушшинче трансгендер пур. Алтай крайӗнче Юлия Алешина хӗрарӑм-трансгендер «Гражданская инициатива» (чӑв. Граждан пуҫарӑвӗ) партин регионти уйрӑмне ертсе пырать. Раҫҫейри политикӑна трансгендер лекнине «МК на Алтае» кӑларӑм хыпарлани тӑрӑх «Рамблер» пӗлтернӗ.

«Манӑн пурнӑҫ — хампа, патшалӑхпа, обществӑпа кӗрешӳ. Мӗншӗн хӑвна ҫавӑн пек тытатӑн? Мӗншӗн манерленетӗн? Мӗншӗн хӗрарӑм пек? Ҫакӑн пек ыйтусем час-часах пулнӑ. Ҫапла, эпӗ улакурак пек пулнӑ», — тенӗ Алешина «Московский комсомолец» хаҫат журналистне.

Арлӑха ылмаштариччен Алёшина Роман ятлӑ пулнӑ. Политикӑпа вӑл 2004 ҫта кӑсӑкланма тытӑннӑ.

cap.ru сӑнӳкерчӗкӗ

Чӑваш Енре усӑ курман ял хуҫалӑх тӗллевӗллӗ ҫӗрсем сахалланса пыраҫҫӗ. Кун пирки республикӑн влаҫ органӗсен официаллӑ порталӗ тӗнче тетелӗнчи хӑйӗн ушкӑнӗсенче пӗлтернӗ.

Ҫулталӑк пуҫланнӑ тӗле илсен, усӑ курман ҫӗрсен лаптӑкӗ 28 пин гектар пулнӑ, кӑҫал вӗсенчен 10 пин гектарне пусӑ ҫаврӑнӑшне кӗртнӗ.

Канаш, Комсомольски Красноармейски Шӑмӑршӑ тата Елчӗк районӗсенче усӑ курман ҫӗрсем ҫук.

Усӑ курман ҫӗрсене пусӑ ҫаврӑнӑшне кӗртес плана пурнӑҫланӑ районсен шутӗнче — Улатӑр, Патӑрьел, Куславкка, Хӗрлӗ Чутай, Муркаш, Пӑрачкав, Вӑрмар, Шупашкар, Етӗрне тата Тӑвай.