Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Хĕвелпе тăван пуль эс,

Ăшшăн куçусем пăхаççĕ.

Куçусем — пăлхантараççĕ

Чунăма илем кӳртсе.

Лапкăлăх. Ултав та çук,

Суяна хальччен курман-тăр

Çакă çепĕç-çепĕç çут,

Пурнăç авăрне путман-тăр.

Уйăхпа тăван-ши эс,

Яшлăха пĕр çутататăн.

Сан çинчен ӳнер тĕрлес

Тен, кайран хăвах куратăн

Чăвашри Джокандăна.

Илĕн, чунăма, тăна

Çăлтăрпа тăванлăран

Маншăн эс çапла инçе-тĕр.

Эсĕ — манăн пурнăçра

Эпĕ тупнă çăлтăр-тĕрĕ.

Аран-аран кукăрткаласа, ликпунктра вĕренекен çынла çырнă хут.

Конверчĕ çинче: «Ку çырăва ман йыснана — шĕвĕр сăмсаллă сыснана памалла», — тесе, сысна сăмсипе пичет пуснă.

Халĕ, конвертне хăйпăтса, ăшĕнчи хутне вуласа пăхар.

«Йыснаçăм сысна!

Сана пĕтĕм хырăмран, чунтан, пыршăран, пĕтĕм ӳпке-пĕвертен салам яратăп. Курнăçса калаçманни пит нумай пулать-çке пирĕн иксĕмĕрĕн. Мĕнле пурăнатăн-ха, тусăм? Нăриклетсе çӳретĕн-и е нăрăхлатса выртса вăхăта ирттеретĕн, е вилсе пасарсенче йӳнĕ хакпа сутакан супăньсем тунă çĕре кайрĕ санăн çĕрми ӳтӳ?

Эпĕ халĕ нăрăх-нăрăх тесе савăнса çеç пурăнатăп. Санпа нăриклетсе çухăрса уйрăлнă хыççăн мана вагон çине, пĕрремĕш сыснасен класне лартса, пит инçете илсе кайрĕç. Вагонĕ эпĕ çывăрнă вăхăтра та каять, ура çинче тăнă вăхăтра та каять. Çĕрле те кайрăмăр, сысна кăнтăрлинче те кайрăмăр. Вă-ă-рăм, пит нумай кайсассăн, мана Свинводтрест совхозне ярса хăварчĕç. Халĕ те унтах пурăнатăп-ха.

Ну вара, кунти пурнăç çинчен каласассăн, санăн туту çинчи 5 пуслăх пăхăр укçу тăрăх сĕлехӳ юхса анĕ!

Пирĕн совхоз кĕтĕвĕнчи сыснасен хисепĕ, пуçран шутласассăн, 20 пин пуç, ураран шутласассăн 80 пин ура пулать.

Малалла

Шарламанни — йăлтах...

Александр Блок

Ăçта халь тин ман сăмахсен уссийĕ,

Мĕне вĕсем эс çуннă чух сана?

Чун-чĕрери çут туйăм сийĕн-сийĕн

Пухать сукмак çинчи вĕт тусана —

Ӳкет куççуль.

Сăмахсăр шăплăх сивĕ.

Эс вăхăтсăр пăрахрăн савăнма.

Ăнман шăпа, сана сăмахăм тивĕ:

Пире валли ăшшу сахал мĕн-ма?

1961, çу, 11

Эп йăпăлтисене пачах та кураймастăп.

Вĕсем ăсĕпе мар, йăпăлтатса,

Влаç картлашки çине пуса-пуса,

Çӳле çитеççĕ иртĕхме. Пуçа таймастăп.

Элекçĕ çынсене пачах та кураймастăп.

Элек сарса, хирĕçтерсе, урса,

Кашни çынна усал сăрпа сарса

Çӳле çитеççĕ иртĕхсе. Пуçа таймастăп.

Эп сутăнчăксене пачах та кураймастăп.

Тус-юлташне сутса, улталаса,

Мĕнпур сăваплăха йăлт таптаса,

Çӳле çитеççĕ иртĕхме. Пуçа таймастăп.

Ĕçчен, маттур этемсене эп юрататăп.

Вĕсем хăй ĕçĕпе, тăрăшнипе,

Хăй ăсĕпе, сăваплă пулнипе

Çĕклеççе халăхăн ятне. Пуçа таятăп.

Ирпе ирех юрлать садри саркайăк

Ун чĕпписем савнаççĕ çак юрра илтсе.

Çакăн пек чух ман кăмăл та пит лайăх,

Чĕре юрлать çут çăлтăрсем патне çитсе.

Саркайăкăн юрри — анне юррийĕ евĕр

Чăнах та чунăма çĕклет çӳл тӳпене.

Анне юррисене аса илмесĕр

Пĕр кун иртмест килтен инçе чухне.

Ачалăха час-час аса илетĕп:

Ытла тискер пыратчĕ вăрçă ун чухне.

Эп вăрçăпа асапланса йĕреттĕм,

Анне юр юрласа лăпкатчĕ ачине.

Анне юррипеле ыйха путаттăм,

Хам выçă пулнине йăлтах манса...

Саркайăк юррине илтсе умра кураттăм

Юратнă аннене, вăл çуккине манса.

Урса çĕкленчĕ тинĕс — ватă урхамах,

Шап-шурă çилхипе ватса ман çырана.

Ун хумĕсем паян ту тăррипе танах,

Кама çилленнĕ, тинĕс, каласам мана.

Мĕн-ма çапла кĕтсе илетĕн, каласам.

Тен, эс аса илетĕн пулĕ Çеçпĕле.

Тăван Чăваш çĕршывĕ уншăн ют пулсан,

Эс, тинĕс, тарăхрăн çапла унпа пĕрде.

Аса илетĕп ватă аннене кучух.

«Ачам, кĕтет-шим Çеçпĕлĕн шăпи сана?»

Тесе ăсатнăччĕ тăшман пит урнă чух

Куççульпеле йĕрсе ют çĕрсене мана.

Кӳрентернĕ Кампура

Кушак çури Шурура.

Хăйĕн çивĕч чĕрнипе

Чĕрмеленĕ сăмсине.

«Эс чирленĕ куçкĕрет», —

Йытта Маша хĕрхенет.

Хăй хушать кушаккине:

— Эй, выля чипертерех!

Чăна кĕтсе пуль чăтăм пĕтрĕ…

Çӳрерĕм çутă тĕнчере.

Халь ăрскалăм чĕм-и кĕртрĕ,

Калав хывап тĕрленчĕкрен.

Эп пĕчĕк-пĕчĕк ванчăкран

Кун-çул валли парне пухасшăн.

Ан тĕлĕнех йăпанчăкран,

Хавхалану, асам тупасшăн.

Пăртан эп тумăп кĕлетке,

Поэзире пур ырă чăнлăх.

Ăна шырать-и Теветкел…

Асап валли пур канăç — чунлăх.

Кăра мухтавăн чыссăр чапĕ

Антăхтарсассăн хăш-пĕрне,

Кун-çул яваплăн тĕртсе çапĕ

Тыт, урхамахăн чĕлпĕрне.

Хастарлăн, Çеçпĕлле, вут чунлăн,

Хисепĕ пур-и шурă чулăн?

Несĕлĕмсен халал-пилне

Упранă чăнлăх чунсăр мар-и?

Ман сăввăмсем çитсен пине —

Çитет пуль чăнлăхăн саманчĕ…

Антун илчĕ Йăнтăрчран,

Эпир илес пулсассăн,

Хамăр ялтан тухас çук.

Пирĕн арăм пуласси, —

Тĕпĕ-йĕрĕпе каласан, —

Тăвăрлăкри¹ урамра.

Унта пырас тесессĕн,

Кай енчен пырсассăн,

Шурă пӳрчĕ Урамра.

Ытах тĕлне пĕлмесен, —

Мал енчи урамра.

Шурă пӳртĕн пуçĕнче

Вĕтлĕх улма пахчи пур.

Шурă пӳрчĕ — çăкалăх,

Çавăнпа шурă курăнать.

Унăн хĕрĕ — хăналах

Ашшĕ-амăшĕ умĕнче,

Çавăнпа çынна курăнать.

Хĕрне курма пырсассăн,

Çăка пӳртĕн ăшĕнче

Ярăнса кăна çӳрейрет, —

Пирĕн арăм пулас пек,

Ун çинчен асăнсан —

Йăлтăр кăна кулас пек.

Ун çине пăхсассăн —

Тумланнă иккен пĕлнĕ пек,

Малалла каласа çырнă пек:

Пирĕн арăм пулассин

Çутă мăйçыххи — мăйĕнче,

Пурçăн тутри — пуçĕнче,

Кĕмĕл çĕрри — пӳрнинче,

Ылтăн сулли — аллинче,

Мерчен шăрçи — умĕнче,

Ахах алка — хăлхинче,

Сăран пушмак — уринче,

Тĕрлĕ тĕслĕ ярапа —

Çивĕт туни вĕçĕнче,

Çутă пиçихи — пилĕкре,

Пурçăн кĕпи — айĕнче,

Малалла