Мускаври артист Сӑр тата Хусан хӳтӗлев чиккисене чавнисене хисеплесе опера хатӗрлес шухӑшлӑ. Кун пирки ӑна Чӑваш Республикинчи симфони капеллин илемлӗх ертӳҫи Морис Яклашкин сӗннӗ иккен. Ҫапла пӗлтернӗ Раҫҫей халӑх артисчӗ, П.И. Чайковский ячӗллӗ Мускаври патшалӑх консерваторийӗн кафедрин заведующийӗ, Мускаври патшалӑх филармонийӗн илемлӗх ертӳҫи Александр Чайковский паян, ака уйӑхӗн 27-мӗшӗнче, Чӑваш Ен Элтеперӗпе Олег Николаевпа ЧР Правительство ҫуртӗнче тӗл пулсан.

Енсем Сӑр тата Хусан хӳтӗлев чиккисене тунисене хисеплесе опера хатӗрлес ыйтӑва сӳтсе явнӑ. «Чӑваш Енре эпӗ иккӗмӗш кун. Ҫак вӑхӑтра нумай ҫынпа тӗл пулса калаҫма, кирлӗ информацие пӗлме ма килчӗ. Хӳтӗлев чиккисене чавма хутшӑннӑ ҫынсем пирӗн хушӑмӑрта пурри уйрӑмах аван. Вӑл спектакль еплерех пуласине эпӗ ӑнланма пуҫларӑм. Унта нумай пӗчӗк эпизод, тӗрлӗ истори пултарас килет», — тенӗ вӑл.

Композитор спектакле чӑваш юррисене те кӗртме палӑртать.

togliatti24.ru сайтри сӑн

Пандеми пуҫланнӑранпа пирӗн республикӑра 1357 пациент кӑшӑлвируса пула ҫут тӗнчерен уйрӑлнӑ. Юлашки талӑкра 5 ҫыннӑн пурнӑҫӗ татӑлнӑ. Кун пирки федераци информаци центрӗ пӗлтерет.

Паянхи кун тӗлне Чӑваш Енре 24055 ҫын каварлӑ вируса ҫаклатнӑ. Вӗсенчен 21906-шӗ сывалнӑ. Юлашки талӑкра сывалакансем, чирленисемпе танлаштарсан, нумайрах пулнӑ: 55-ӗн инфекциленнӗ, 58-ӑн чире парӑнтарнӑ. Сӑмах май, ӗнер те ҫавӑн чухлех ҫын чирленине палӑртнӑ.

Хальхи вӑхӑтра республикӑри стационарсенче тата килте амбулатори мелӗпе 792 ҫын кӑшӑлвирусран сипленет.

gorodche.ru сайтри сӑн

Ака уйӑхӗн 26-мӗшӗнче Шупашкарти Гагарин урамӗнчи 22-мӗш ҫурт ҫывӑхӗнче «Киа Рио» машина 11 ҫулти хӗрачана ҫапса хӑварнӑ. Водитель вырӑнтан тарнӑ.

Хӗрача «зебра» патӗнче ҫул урлӑ каҫнӑ. Ҫав вӑхӑтра ун ҫине машина пырса кӗнӗ. Водитель ачан сывлӑхӗ пирки ыйтса пӗлес тесе самантлӑха чарӑннӑ. Кайран малалла кайнӑ.

Каярахпа ашшӗ-амӑшӗ хӗрачана пульницӑна илсе кайнӑ. Унӑн чӗркуҫҫи кӑштах аманнӑ. Инкек хыҫҫӑн темиҫе сехетренех ҪҪХПИ инспекторӗсем руль умӗнче ларнӑ хӗрарӑма шыраса тупнӑ. 32 ҫултискер тӗлӗшпе административлӑ протокол ҫырнӑ.

stihi.ru сайтри сӑн

Ҫу уйӑхӗн 1-10-мӗшӗсенче шкул ачисем те, студентсем те каникула кайӗҫ. Кун пирки РФ вӗренӳ министрӗн ҫумӗ Дмитрий Афанасьев тата ҫутӗҫ министрӗ Сергей Кравцов пӗлтернӗ.

Аслӑ шкулсенче каникул пирки хушу хатӗрлеҫҫӗ. Ҫапах канасси пирки аслӑ шкул ертӳлӗхӗ татӑклӑн калӗ.

Шкул ачисем те каникула кайма пултараҫҫӗ. Ҫутӗҫ министерстви ҫапла сӗннӗ. Ача пахчисенче дежурнӑй ушкӑнсем ҫеҫ ӗҫлӗҫ.

Аса илтерер: Владимир Путин президент ҫу уйӑхӗн 1-10-мӗшӗсенче канасси пирки хушу кӑларнӑ.

"Про Город" сайтӗнчи сӑн

Иртнӗ канмалли кунсенче Ҫӗрпӳ районӗнче ҫӗр ишӗлсе аннӑ. Ку Туҫи ялӗ ҫывӑхӗнче пулнӑ. Хыпара «Про Город» хаҫата халӑх корреспонденчӗ пӗлтернӗ.

Унччен ҫак вырӑн питӗ хитре курӑннӑ, вӑл ҫынсене илӗртнӗ. Ҫӳллӗ вырӑнтан ялсем алӑ тупанӗ ҫинчи пек курӑннӑ. Ҫав вырӑнта саксем те лартнӑ. Халӗ вӗсем ҫӗр айне пулнӑ.

Юрать-ха, никам та шар курман. Туҫи ял тӑрӑхӗн администрацийӗн ӗҫченӗсем вырӑна ҫитнӗ. Тӳре-шара пӗлтернӗ тӑрӑх, халӗ сӑрт 20-25 метр ҫӳллӗш. Администраци пуҫлӑхӗ Людмила Атманова ҫав вырӑнта ҫитес вӑхӑтра асӑрхаттару паллисем лартассине пӗлтернӗ.

Хула администрацийӗ тунӑ сӑн

Шупашкарта 5-мӗш хутран ӳкнӗ арҫын ачана тытса ӗлкӗрнӗ Вениамин Егорова Шупашкар хула администрацийӗ чысланӑ. Аса илтерер: ака уйӑхӗн 15-мӗшӗнче Мир проспектӗнче чӳречерен ӳкнӗ 5 ҫулти арҫын ача ӑна пула чӗрӗ юлнӑ, вӑйлах суранланман.

Хула администрацийӗн пуҫлӑхӗ Алексей Ладыков тата хула пуҫлӑхӗ Алексей Кортунов арҫын паттӑр пулнине палӑртнӑ. Ӑна тав ҫырӑвӗпе, парнесемпе чысланӑ. Ҫав йышра – хула сӑнне ӳкернӗ картина.

Вениамин Егоров хӑй те ача ашшӗ, унӑн ывӑл ӳсет. Вӑл ашшӗ-амӑшне тимлӗрех пулма сӗннӗ, пӗччен хӑвармалла марри пирки асӑрхаттарнӑ.

nekrasovka.mos.ru сайтри сӑн

Шупашкарти килсӗр-ҫуртсӑр арҫын, 57 ҫултискер, ача кӳмине вӑрланӑ та унпа усӑ курнӑ. Ҫук, унӑн ача пулман. Вӑл унпа ӑпӑр-тапӑр турттарнӑ.

Суд ҫак арҫын айӑплӑ тесе йышӑннӑ. Следстви уҫӑмлатнӑ, суд палӑртнӑ тӑрӑх, вӑл ӑна ҫурла уйӑхӗн 19-мӗшӗнче Сапожников урамӗнчи пӗр ҫурт тамбурӗнчен вӑрланӑ. Кӳме 20 пин тенкӗ тӑнӑскер пулнӑ.

Темиҫе кунран вӑрра тытса чарнӑ, анчах кӳмене тупайман. Арҫын йӑлтах каласа кӑтартнӑ: вӑл унпа урапа евӗр усӑ курнӑ, ҫӳп-ҫап контейнерӗнче тимӗр-тӑмӑр тупнӑ та кӳме ҫине хурса килнӗ.

Арҫыннӑн 1 ҫул патшалӑхшӑн ӗҫлеме тивӗ. Ӗҫ укҫин 10 процентне тытса юлӗҫ.

Паян, ака уйӑхӗн 27-мӗшӗнче, Питӗрте чӑвашсене ҫутта кӑларнӑ Иван Яковлев ҫуралнӑранпа 173 ҫул ҫитнине тата Чӑваш чӗлхи кунне халалласа литература каҫӗ иртӗ. Мероприяти вырӑнти Халӑхсен туслӑхӗн ҫурчӗн «Язык – средство межнационального общения» (чӑв. Чӗлхе – нацисен хушшинчи хутшӑнӑвӗн хатӗрӗ) проектпа килӗшӳллӗн иртӗ. Ӑна хутӑш форматпа: онлайн тата оффлайн – йӗркелӗҫ. Вӑл 16 сехетре пуҫланӗ.

Мероприятие Ленинград облаҫӗнчи чӑвашсен культура обществи, облаҫри Халӑхсен туслӑхӗн ҫурчӗ, Чӑваш Республикин Наци вулавӑшӗ, Питӗр хулинчи тата Ленинград облаҫӗнчи чӑваш ҫамрӑкӗсен обществи йӗркелӗҫ. Литература каҫне Чӑваш халӑх поэчӗ Валерий Туркай та хутшӑнӗ.

Питӗр хулинчи Пески районӗнчи Христос чӗрӗлӗвӗн чиркӗвӗнче ӗнер РФ Патшалӑх Думин депутачӗ Анатолий Аксаков пулнӑ. Вӑл пӗлтернӗ тӑрӑх, ҫӗнӗрен чӗртсе тӑратнӑ ҫав чиркӳ патӗнчи сквер Чӑвашран тухнӑ Пётр Егоров зодчи ячӗпе кӗҫех хисепленсе тӑма тытӑнӗ. Сӑмах май каласан, Турра ӗненекенсен ҫав чиркӗвӗн никӗсне шӑпах вӑл, пирӗн ентешӗмӗр, 18 ӗмӗрте хывнӑ.

Аса илтерер: кӑҫалхи кӑрлач уйӑхӗн 21-мӗшӗнче Питӗрти Топоним комиссийӗн ларӑвӗ иртнӗччӗ. Унта Чӑвашра ҫуралса ӳснӗ, Питӗрте ӗҫлесе ят-сум илнӗ Петр Егоров ятне хулари пӗр-пӗр вырӑна парас ыйтӑва тишкернӗччӗ. Ҫапла тума ыйтса Чӑваш Ен Элтеперӗ Олег Николаев хула кӗпӗрнаттӑрӗ Александр Беглов патне Культурӑпа истори эткерлӗхӗн «Ӑрусен астӑвӑмӗ» П.Е. Егоров ячӗллӗ фончӗ сӗннипе ҫыру янӑччӗ.

Чӑваш Енре ҫынсене хула ҫумӗнчи дачӑсене турттаракан маршрутсем уҫӑлнӑ. Республикӑн Транспорт тата ҫул-йӗр хуҫалӑхӗн министерстви пӗлтернӗ тӑрӑх, 107-мӗш «Шупашкар (Хулаҫум автовокзал) – Шемшер (Шупашкар районӗ)» тата 117-мӗш «Шупашкар (Хулаҫум автовокзал) – Тутаркасси (Шупашкар районӗ)» маршрутсем ака уйӑхӗн 1-мӗшӗнчен уҫӑлнӑ. Вӑл маршутсемпе 1-ер пӗчӗк автобус ҫӳрет, кунне вӑл иккӗ хутлать.

108э-мӗш «Ҫӗнӗ Шупашкар – Кукашни пахчисем (Сӗнтӗрвӑрри районӗ)» маршрут ака уйӑхӗн 22-мӗшӗнчен уҫӑлнӑ. Вӑл маршрутпа 1 автобус ҫӳрет, кунне 4 рейс тӑвать.

193-мӗш «Шупашкар (Хулаҫум автовокзал) – Шоркка (Шупашкар районӗ)» маршрута ака уйӑхӗн 23-мӗшӗнче уҫнӑ. Вӑл маршрутпа 15 рейс пӑхса хӑварнӑ.

249-мӗш «Шупашкар (Хулаҫум автовокзал) – Явӑш (Хула масарӗ)», 2706-мӗш «Ҫӗнӗ Шупашкар – «Чӑваш Ен» санатори («Заволжъе» коллективлӑ пахчана ҫити) маршрутсем те пахчаҫӑсем валли уҫӑлнӑ.