rg.ru сайтри сӑн

Чӑваш Енре пурӑнакан тепӗр ҫын миллионера тухнӑ. «Столото» пӗлтернӗ тӑрӑх, вӑл 5 миллион ытла тенкӗ выляса илнӗ. Анчах хальлӗхе укҫана илес ыйтупа килмен-ха.

Паян «Спортлотора» пирӗн ентеше ӑннӑ. Вӑл 28, 8, 21, 13, 34, 4 хисепсене пӗлсе суперпарнене, 5030476 тенкӗ, выляса илнӗ. «Столото» пресс-служби пӗлтернӗ тӑрӑх, ҫав ҫын укҫа патне килмен. Ҫакӑ ҫеҫ паллӑ: вӑл билета киоскра 400 тенкӗпе туяннӑ.

Сӑмах май, кӑҫал нарӑс уйӑхӗнче Шупашкарта пурӑнакан ҫын лотерейӑра 4,2 миллион ытла тенкӗ выляса илнӗ.

Чӑваш Енре виҫӗ кун ҫуллахи пек шӑрӑх ҫанталӑк тӑчӗ. Кӑнтӑрти районсенче сывлӑш 24 градус таранах ӑшӑннӑ, 30 градус ӑшӑ пек туйӑннӑ. Кунашкалли республикӑра 50 ҫула яхӑн пулман.

Паян вара кӑштах сивӗрех. Канмалли кунсенче 12-17 градус ӑшӑ тӑрӗ-ха, ҫил лӑпланӗ. Ыран хӗвел пӑхӗ, вырсарникун вара пӗлӗтленӗ. Тунтикун татах сиветӗ. Ҫӗрле «минус» пулӗ, кӑнтӑрла хӗвел пӑхать пулин те 6-11 градус ӑшӑ тӑрӗ. Ҫил те вӑйланӗ, ҫеккунтра 18 метр хӑвӑртлӑхпа вӗрӗ.

Эрне варринче те сивӗ пулӗ, ҫумӑр ҫӑвӗ. Малтанлӑха пӗлтернӗ тӑрӑх, ака уйӑхӗн 22-мӗшӗнчен ӑшӑтма тытӑнӗ, 12-17 градус пулӗ.

Ӗнер Шупашкарта тата тепӗр ача инкеке лекнӗ. 2016 ҫулта ҫуралнӑ арҫын ача Мир проспектӗнчи 6-мӗш ҫуртри 5-мӗш хутран персе анма тӑнӑ. Ача пулӑшма чӗннине Вениамин Егоров ятлӑ ҫын илтнӗ. Турра шӗкӗр, вӑл инкек ҫывӑхӗнче пулнӑ.

«Йӑлтах темиҫе ҫеккунтра пулса иртрӗ. Эпӗ чӳрече патне чупса пынӑ чухне арҫын ача пиллӗкмӗш хутӑн карнизӗнчен ҫакӑнса тӑратчӗ. Эпӗ аялтан алӑпа тытрӑм, вӑл ман алӑ ҫине, унтан курӑк ҫине персе анчӗ», — каласа кӑтартнӑ арҫын журналистсене. Вениамин Егоров ҫийӗнчех 112 номерпе шӑнкӑравласа янӑ.

Халӗ арҫын ачан сывлӑхӗ аптӑрасах каймасть. Ӑна реанимаци уйрӑмӗнчен ахаль палатӑна куҫарнӑ.

Чӑваш Енри санавиаци пӗрремӗш хут республика тулашне тухнӑ. Кун пирки Кардиологи диспансерӗн пресс-служби пӗлтерет.

Пӗр хӗрарӑмӑн сывлӑхӗ япӑхланнӑ. Ӑна васкавлӑ майпа пульницӑна илсе ҫитермелле пулнӑ. Акан 14-мӗшӗнче хӗрарӑма Ҫӗмӗрлери медицина центрӗнчен Шупашкара илсе ҫитернӗ.

Вертолет Кардиологи диспансерӗнчен 200 метрта анса ларнӑ. Тепӗр минутранах пациента раенимобильпе тухтӑрсем патне илсе ҫитернӗ. Шурӑ халатлтисем хӗрарӑмӑн пурнӑҫӗшӗн пӗр талӑк кӗрешнӗ. Ҫав вӑхӑтрах федерци клиникин тухтӑрӗсемпе телемедицина ҫыхӑнӑвӗпе консилиум ирттернӗ. Пациента федераци клиникине илсе кайма йышӑннӑ.

Ӗнер вертолет Мускавра анса ларнӑ. Пациентпа пӗрле опытлӑ реаниматологсем пулнӑ. Хӗрарӑма йӗркеллех илсе ҫитернӗ. Халӗ вӑл Мускаври тухтӑрсен аллинче.

Паян ирхине 7 сехетре Красноармейски районӗнчи Карайра шыв башни йӑтӑнса аннӑ. Тӳрех каламалла: ӑна пӗлтӗр ҫеҫ республика хыснинчи укҫапа лартнӑ.

ЧР Строительство министерстви пӗлтернӗ тӑрӑх, подряд организацийӗ башньӑна лайӑх ҫирӗплетмен, япӑх ҫанталӑкра ӗҫленӗ. Подрядчик ҫӗнӗ башня туяннӑ вӑхӑтра ял ҫыннисем шывсӑр ан ларччӑр тесе вӑхӑтлӑха киввине вырнаҫтарӗҫ. Подрядчик ҫӗнӗ башня саккас панӑ ӗнтӗ, ӑна гаранти срокӗпе тӳлевсӗрех лартса парӗҫ.

Палӑртмалла: кӑҫал республикӑра 99 башньӑна юсама укҫа уйӑрӗҫ.

Чӑваш Ен строительство, архитектура тата ҫурт-йӗрпе коммуналлӑ хуҫалӑх министрӗн ҫумӗ пулса ӗҫленӗ Александр Башлаева паян ӗҫрен хӑтарнӑ.

Асӑннӑ ҫын министр ҫумӗнче пӗлтӗрхи ака уйӑхӗнченпе тӑрӑшнӑ. Вӑл 1978 ҫулта Шупашкарта ҫуралнӑ. И.Н. Ульянов ячӗллӗ Чӑваш патшалӑх унивеситетӗнчен 2000 ҫулта вӗренсе тухнӑ, унта вӑл «Промышленность тата граждан строительстви» специальноҫа алла илнӗ.

«Регионстрой», «Промжилстрой» предприятисенче тӗрлӗ должноҫе ӗҫленӗ, каярах вӑл республикӑри тӗрлӗ проект организацийӗнче, Чӑваш Ен Строминӗнче тӑрӑшнӑ.

«Чӑвашкино» патшалӑх киностудийӗ тата электрон докуменчӗсен архивӗ Чӑваш автономийӗн 100 ҫулхи юбилейӗ тӗлне «Чӑвашкино» патшалӑх киностуди саккасӗпе хатӗрленӗ Юрий Юман режжисёрӗн «Тайна Дрейней Волги» (чӑв. «Авалхи Атӑл вӑрттӑнлӑхӗ») илемлӗ фильмӑн премьерине курма йыхравлаҫҫӗ. Сценарине ҫыракансем: Юрий Щербаковпа Евгений Соколовский.

Авалхи Атӑл ыр-усала сахал мар курнӑ…

Фильмра XV ӗмӗр варринчи тапхӑра сӑнланӑ, юхӑнса та ҫаралса юлнӑ атӑлҫи пӑлхарсен ҫӗрӗ мирлӗ те ырӑ пурнӑҫ пирки ӗмӗтленет. Пӑлхарсен ертӳҫисем, Шӑптакпа Хусанпай, ӗлӗкхи мӑнаҫлӑ Аслӑ Пӑлхар Патшалӑхне ҫӗклентерес шухӑшпа Ылтӑн Уртан шанчӑкран тухнӑ Улу-Мухамед хан ҫарӗнчен пулӑшу тупать. Анчах, ҫамрӑк Махмутек чингизидӑн, хан ывӑлӗн, амбицийӗсем ытла та пысӑк иккен, хӑй тӗллӗн ҫеҫ хуҫаланма май шыраса вӑл ултавлӑ ӗҫе пуҫӑнать.

Сценарипе ӗҫленӗ май фильм ӳкерекенсем чӑваш халӑхӗн историне нумай ҫул тӗпчекен опытлӑ экспертсене явӑҫтарнӑ. Курӑмлӑ сценӑсене, ҫав шутра ҫапӑҫу саманчӗсене те, ӳкернӗ чухне профессиллӗ актерсене явӑҫтарнӑ, компьютер графикипе усӑ курнӑ.

Фильма 12 ҫултан аслӑраххисем валли хатӗрленӗ.

Малалла...

Чӑваш наци музейне Чӑваш Республикин Хисеп грамотипе чыслама йышӑннӑ. Ку хушӑва республика Элтеперӗ, Олег Николаев ӗнер, ака уйӑхӗн 15-мӗшӗнче, алӑ пуснӑ.

Хисеп грамотипе культура учрежденине музей ӗҫне аталантарма пысӑк тӳпе хывнӑшӑн, чӑваш хаӑхӗн культура эткерлӗхне упраса хӑварассипе тата сарассипе ҫине тӑнӑшӑн хавхалантрас тенӗ.

Аса илтерер: нарӑс уйӑхӗн 12-мӗшӗнче наци музейӗ 100 ҫулхине савӑнӑҫлӑ мероприятипе уявларӗ. Юбилей ҫулталӑкӗ унпах вӗҫленмен-ха. Паллӑ пулӑма асра тытса ҫулталӑкӗпех тӗрлӗ мероприяти иртӗ.

Сӑмах май каласан, музея 100 ҫулхипе саламласа ҫӗршыв Президенчӗ Владимир Путин нарӑс уйӑхӗнче саламлӑ телеграмма янӑччӗ.

Ҫӗнӗ Шупашкарти «Химпром» предприятире ҫӗнӗ производство уҫӗҫ. Ҫакӑн пирки ӗнер республика Элтеперӗ Олег Николаев асӑннӑ обществӑн директорсен канашӗн председателӗпе Ярослав Кузнецовпа, Евразин аталану банкӗн промышленность дирекцийӗн управляющи директорӗпе Сергей Игнатовпа тӗл пулсан сӳтсе явнӑ.

Предприятире водород перекиҫӗ туса кӑларакан производство туса хурасшӑн.

Проекта пурнӑҫа кӗртме эпир маларах асӑннӑ кредит учрежденийӗ укҫа-тенкӗ уйӑрса пулӑшӗ. Енсем тивӗҫлӗ килӗшӗве ҫирӗплетнӗ ӗнтӗ. Документа Питӗрти экономика форумӗнче алӑ пуснӑ.

Ярослав Кузнецов каланӑ тӑрӑх, предприятире биологи мелӗпе ирӗлекен пластик та кӑларма тытӑнасшӑн.

Чӑваш Енӗн Инфомполитика министерствинчен Цифра министерстви туса хурӗҫ. Ҫакӑн пек йышӑну проектне республикӑн Министрсен Кабинечӗн ларӑвӗнче ырланӑ. Улшӑнусемпе цифра аталанӑвӗн, информаци политикин тата массӑллӑ коммуникацисен министрӗ Кристина Майнина паллаштарнӑ.

Вӑл ӑнлантарнӑ тӑрӑх, министерство ҫинчен калакан положенире улшӑнусем пулӗҫ. Федераци шайӗнчи евӗрех пирӗн регионта та Информполитика министерстви вырӑнне Цифра министерстви туса хурӗҫ.

Министерство цифра аталанӑвӗпе ҫине тӑнипе пӗрлех патшалӑх вӑрттӑнлӑхне тата ӗҫри информацие хӳтӗлессипе те ӗҫлеме пуҫлӗ.