"Про Город" сайтран илнӗ сӑн

Шупашкарта арҫын пысӑк вольтлӑ юпа ҫине хӑпарса ларнӑ та тем пек ӳкӗтлесен те анма килӗшмен. Вырӑна ҫӑлавҫӑсен ҫитме тивнӗ.

Ку паян, ака уйӑхӗн 15-мӗшӗнче, пулнӑ. Трактор тӑвакансен проспектӗнчи ҫул ҫавринчен инҫех мар вырнаҫнӑ пысӑк вольтлӑ юпа ҫине арҫын хӑпарса кайнӑ.

Ҫакна курнӑ ҫынсем кун пирки «Про Город» хаҫата пӗлтернӗ. Халӑх корреспонденчӗ пӗлтернӗ тӑрӑх, арҫын 60 ҫулсенчи пек курӑннӑ. Вырӑна ҫӑлавҫӑсем, васкавлӑ медпулӑшу, полици ҫитнӗ. Арҫыннӑн пӗлӗшӗсем ӑна анма ӳкӗтленӗ. Анчах лешӗ хӑнк та туман. Ҫӑлавҫӑсем ӑна антарса полицие панӑ.

Эльвира Петрова архивӗнчи сӑн

Шупашкарта пурӑнакан 34 ҫулти хӗрарӑм ӗҫе тухса кайнӑ та киле таврӑнман. Кун пирки ШӖМ пӗлтерет. Ӑна шыраҫҫӗ.

Петрова Эльвира Владимировна ака уйӑхӗн 9-мӗшӗнче ирхине ӗҫе тухса кайнӑ. Ака уйӑхӗн 14-мӗшӗнче унӑн упӑшки пулнӑ арҫын вӑл ҫухални пирки полицие пӗлтернӗ. Хӗрарӑма Соловьева тата Щукина хушаматсемпе те пӗлеҫҫӗ.

Эльвира 162 сантиметр ҫӳллӗш, вӑтам кӗлеткеллӗ. Куҫӗ хӑмӑр, ҫӳҫӗ хура, мелировани тунӑ. Килтен кайнӑ чухне хура куртка, сӑрӑ е хура шӑлавар, шурӑ кроссовка тӑхӑннӑ пулнӑ. Ун пирки мӗн те пулин пӗлекенсене полицие шӑнкӑравласа пӗлтерме ыйтаҫҫӗ.

Питӗр хулинчи Национальноҫсен ҫуртӗнче Чӑваш эстрада юррин «Кӗмӗл сасӑ» пӗтӗм Раҫҫейри ХХII конкурсӗн регионсем хушшинчи тапхӑрӗ иртнӗ. «Невари кӗмӗл сасӑ — 2021» фестиваль-конкурса Питӗр тӑрӑхӗнчи «Юрату» тата «Парне» чӑваш ансамблӗсем те хутшӑннӑ.

Пултарулӑх ӑмӑртӑвне Чӑваш Енри Дарья Моранькова та пырса ҫитнӗ. Конкурсра вӑл 1 степеньлӗ лауреат ятне тивӗҫнӗ. «Кӗмӗл сасӑ — 2021» пӗтӗм Раҫҫейри конкурсра пике Ленинград облаҫӗн чысне хӳтӗлӗ.

Дарья 2008 ҫулта Куславккара ҫуралнӑ. Унти ӳнер шкулӗнчи эстрада тата хор уйрӑмӗсенче вӗренет. Хӗрачан педагогӗ — Чӑваш Республикин культура тава тивӗҫлӗ ӗҫченӗ Диляра Стулова. Музыка шкулне ачана аслисем 3 ҫултах илсе ҫӳреме тытӑннӑ. Солист евӗр хӗрача сцена ҫине 4 ҫулта тухнӑ. Дарья Моранькова тӗрлӗ конкурса хастар хутшӑнать.

ШӖМ тунӑ сӑн

Ҫӗнтерӳ уявӗ ячӗпе Чӑваш Енри ветерансене те укҫа парӗҫ. Палӑртмалла: ку хавхалантарӑва 2019 ҫултанпа Раҫҫейри мӗнпур ветерана параҫҫӗ. Вӑл 10 пин тенкӗпе танлашать. Ку укҫана республикӑри 254 ветеран тивӗҫӗ.

Укҫана илес тесен нимӗн те ҫырмалла мар. Ветерансене ӑна ака уйӑхӗнче пенси укҫипе парӗҫ. Республикӑра пурӑнакан 254 ветеранран 52-шӗ – сусӑр, 202-шӗ вӑрҫа хутшӑннӑ.

Сӑмах май, пӗлтӗр 10 пин тенке республикӑра 404 ветеран тивӗҫнӗ. Шел те, вӗсен йышӗ кашни ҫулах сахалланса пырать.

Росгварди тата полици ӗҫченӗсем секспритон ӗҫӗ-хӗлне чарса лартнӑ. Организаци «Спа-отель» тесе ӗҫленӗ. Чӑннипе вара унта арҫынсем хӗрарӑмпа киленме килнӗ.

47 ҫулти хӗрарӑм бизнеса унчченхи хуҫисенчен туяннӑ. Лешсене виҫӗ ҫул каялла йӗрке хуралҫисем тытнӑ. Ҫӗнӗ хуҫа Шупашкарӑн тӗп урамӗнчех 2019 ҫулхи авӑн уйӑхӗнче клиентсене йышӑнма тытӑннӑ. Салонра 7 хӗр ӗҫленӗ. Йӗрке хуралҫисем килнӗ чухне унта 5 хӗр пулнӑ.

Арҫынсем салона малтан ҫырӑнсан ҫеҫ лекейнӗ. Спа-отель хӑйне халӑх тетелӗсенче рекламӑланӑ, визиткӑсем пулнӑ, хӑйӗн сайчӗ ӗҫленӗ. Отельте управляющи пулнӑ, вӑл хӗрсене ӗҫе илӗртнӗ, вырнаҫтарнӑ.

Халӗ отель хуҫине килти ареста лартнӑ. Унӑн виҫӗ пулӑшуҫи те явап тытӗ.

sovetguru.ru сайтри сӑн

Ӗнер Канаш районӗнче ҫӳп-ҫап ҫунтарнӑ чухне тивӗҫлӗ канури хӗрарӑмӑн пурнӑҫӗ татӑлнӑ. Вӑл ҫунса кайнӑ.

«Провинцивиль» телеграм-канал пӗлтернӗ тӑрӑх, 1935 ҫулта ҫуралнӑ хӗрарӑм анкартинче ҫӳп-ҫап ҫунтарнӑ. Хайхискер сарӑмсӑр вилнӗ: ӑнсӑртран такӑннӑ та кӑвайт ҫине ӳкнӗ.

Халӗ РФ Следстви комитечӗн Чӑваш Енри следстви органӗсем ку ӗҫ-пуҫа тӗпчеҫҫӗ, следстви умӗнхи тӗрӗслев ирттереҫҫӗ.

Тутарстанра пӗчӗк карапсен патшалӑх инспекцийӗн ӗҫченӗсем Чӑваш Енри катер Атӑл тӑрӑх юхса пынине асӑрхаса тӑраҫҫӗ.

Асӑннӑ хатӗр хӗлле шӑнса ларнӑ та халӗ пӑр ирӗлнӗ май шывпа юхса кайнӑ. Пӑр вӑйлӑ юхнӑан ун патне пырса кӗме хальлӗхе май ҫук.

«Ярославец» катерта ҫынсем пулман. Вӑл Сӗнтӗрвӑрри районӗнчи Кушник ялӗ ҫывӑхӗнчи причалта ларнӑ.

Халӗ катер Тутарстанри Зеленодольск хули тӗлне пырса ҫитнӗ. Вӑл унти Атӑл улӑ сарнӑ чукун ҫул кӗперӗ тӗлӗнче.

Катер ҫыран хӗрне пырса чарӑнсан ӑна хуҫи пырса илсе килӗ.

Чӑваш халӑх поэчӗ Валери Туркай, кӑҫалхи ака уйӑхӗн 17-мӗшӗнче 60 ҫул тултараканскер, хӑйӗн черетлӗ юбилейне сумлӑ та пархатарлӑ ӗҫӗ-хӗлӗпе кӗтсе илет — ырми-канми сӑвӑ хыҫҫӑн сӑвӑ ҫырать, тӗрлӗ халӑхсен паллӑ поэчӗсен хайлавӗсене чӑвашла куҫарать, вулакана ҫине-ҫинех ҫӗнӗ паха кӗнеке парнелет.

Нумаях пулмасть Шупашкарта вырӑссен ку чухнехи паллӑ поэчӗн Юрий Щербаковӑн (Аҫтӑрхан хули) В.Туркай чӑвашла куҫарнӑ сӑввисен «Казаксен юрри» тата Валери Туркайӑн Раҫҫейри паллӑ сӑвӑҫсем тӗрлӗ ҫулсенче вырӑсла куҫарнӑ сӑввисен «Навсегда я выбрал этот путь» пуххи вулакан патне ҫитрӗҫ. Кӗҫех поэзие юратакансем Тутарстан халӑх поэчӗн, Раҫҫей Патшалӑх премийӗн лауреачӗн Ренат Харисӑн В.Туркай чӑвашла куҫарнӑ сӑввисен «Кӗрхи чечексем» пуххипе паллашма пултарӗҫ.

Тин кӑна Шупашкарта паллӑ сӑвӑҫӑн юлашки вӑхӑтра ҫырнӑ сӑввисемпе Гавриил Державинӑн, Михаил Лермонтовӑн, Анна Ахматован, Иван Бунинӑн, Николай Гумилевӑн, Марина Цветаеван, Борис Пастернакӑн тата Евгений Евтушенкон В.Туркай чӑвашла куҫарнӑ сӑввисен «Ҫунать-ха вучахӑм, ҫунать!...» ятлӑ пуххи кун ҫути курнӑ. Ку ретре вырӑссен аслӑ поэчӗн Гавриил Державинӑн В.

Малалла...

Вырӑс Улхашӗнчи пушара сӳнтернӗ самант

Ҫуркунне ҫитсен типӗ курӑка ҫунтарнипе те пушар тухать. Рязань облаҫӗнчи Марьино ялӗнче, ав, темиҫе ҫурт ҫеҫ тӑрса юлнӑ.

Йӗпреҫ районӗнчи Туҫара ака уйӑхӗн 13-мӗшӗнче кӑнтӑла иртсен типӗ курӑк ҫунма тытӑннӑ. Инкек ял пуҫӗнче тухнӑ. Вут-ҫулӑм усӑ курман хуралтӑна ҫеҫ сиенленӗ. Пушара сӳнтерме виҫӗ автоцистернӑпа пырса ҫитнӗ.

Ӗнер, ака уйӑхӗн 14-мӗшӗнче, Ҫӗмӗрле районӗнчи Вырӑс Улхаш ялӗнче тӑватӑ ҫурт тата сарай ҫуннӑ. Вӗсенчен иккӗшӗнче ҫынсем пурӑннӑ. Вутра кӗлленнӗ ҫуртсемпе хуралтӑ йывӑҫран купаланӑскер пулнӑ. Вут-ҫулӑм уй енчен сарӑлса пынӑ.

Иртсе кайнӑ талӑкра типӗ курӑк ҫуннине ултӑ тӗслӗх шута илнӗ. Куславкка районӗнче — иккӗ, Улатӑр, Хӗрлӗ Чутай, Ҫӗмӗрле районӗсенче тата Ҫӗнӗ Шупашкарта — пӗрер.

Чӑваш Енре пушара хирӗҫле ятарлӑ режим туса хурасшӑн. Кун пек йышӑнӑва ӗнер республикӑн Министрсен Кабинечӗн ларӑвӗнче тишкернӗ. Документӑн проектне унта ыралнӑ.

Ятарлӑ режим вӑхӑтӗнче кӑвайт чӗртме, кӑмрӑк ҫинче апат хатӗрлеме, вӑрманта тата ун ҫывӑхӗнче ҫӳп-ҫап ҫунтарма юрамӗ. Вӑрман тата ял хуҫалӑх тӗлевӗллӗ ҫӗрсем ҫывӑхӗсенчи ҫӗр лаптӑкӗсенче те типӗ курӑка ҫунтарма чарӗҫ.

Пушар хӑрушлӑхӗ IV и V класа ҫитсен вӑрмансене кӗме те юрамӗ.

Йӗркене епле пӑхӑннине тӗрӗслесе тӑрӗҫ. Каланине итлеменнисене явап тыттарӗҫ.