Унччен республикӑри икӗ ҫамрӑк икӗ ППЭре 200 балл пухни пирки пӗлтернӗччӗ. Ҫак список тата пуянланнӑ: унта тепӗр икӗ ҫамрӑк хушӑннӑ.

Малтан 200 балл пухнисен йышӗнче Ҫӗнӗ Шупашкарти 18-мӗш лицейра вӗреннӗ Екатерина Селезнева, Шупашкрти 5-мӗш гимназири Илья Капралов пулнӑ. Ку йыша Патӑрьелти 1-мӗш шкулти Юлиана Паймуллина (химипе тата биологипе 100-шер балл пухнӑ) тата Шупашкарти 5-мӗш гимназири Виктория Жирнова (вырӑс чӗлхипе тата историпе 100-шер балл илнӗ) хушӑннӑ.

Инкеклӗ лару-тӑру министерстви тунӑ сӑн

Комсомольски округӗнчи Асанкасси ялӗнче арҫын путса вилнӗ. Ку инкек иртнӗ эрнере пулнӑ.

Эрнекун, ҫӗртме уйӑхӗн 21-мӗшӗнче, 52 ҫулти арҫын пӗвере шыва кӗнӗ те путнӑ. Унӑн виллине ҫӑлав службин ӗҫченӗсем кӑларнӑ. Палӑртмалла: арҫын ятарласа хатӗрлемен выранта шыва кӗнӗ.

Сӑмах май, ҫулталӑк пуҫланнӑранпа республикӑра 14 ҫын путса вилнӗ. Ҫав йышра – 3 ача. Чылай чухне ҫынсем юраман вырӑнта тата ӳсӗрле шыва кӗрсе путнӑ.

Оксана Балденкова архивӗнчи илнӗ сӑнӳкерчӗк

Шупашкар хулинчи халӑхӑн социаллӑ ыйтӑвӗсене твиӗҫтерекен комплекслӑ центрӗнчи Оксана Балденкова «Эпӗ — хӗрарӑм» регионсем хушшинчи конкурса хутшӑнса топ-100 списока лекнӗ.

Ҫамрӑк хӗрарӑм мӗн ачаран психолог пулма ӗмӗтленнӗ. Ятарлӑ пӗлӳ илнӗ хыҫҫӑн вӑл 10 ҫул Шупашкарти вӗренӳ учрежденийӗсенчен пӗринче психологра ӗҫленӗ, халӗ социаллӑ центрта тӑрӑшать.

«Чунӑма эпӗ ачасене паратӑп, вӗсем те манпа ҫавӑн пекех», — тет ӑшӑ кӑмӑллӑ ҫамрӑк хӗрарӑм. Специалист ачасене психологи пулӑшӑвӗ кӳнӗ май кашнинпе уйрӑммӑн ӗҫлет. «Ача-пӑча ҫулӗнчи нейропсихологи» курсра илнӗ пӗлӳпе те вӑл нумай усӑ курать.

Оксана Владимировна хӑйӗн 6 ҫулти хӗрӗпе Марийӑпа театрсене, куравсене, тӗрлӗ ӑсталӑх лаҫҫисене ҫӳрет. Ҫемьери тепӗр ырӑ йӑла — кӗнеке вуласси. Амӑшӗпе пӗчӗк хӗрӗ спортпа та туслӑ, вӗсем уҫӑ сывлӑшра фитнеспа аппаланма юратаҫҫӗ.

cap.ru сайтри сӑн

Хӗрлӗ Чутай округӗнчи «Коминтерн» хуҫалӑха нумай ҫул ертсе пыракан Альбина Новиковӑна «Чӑваш Енӗн хисеплӗ ҫынни» ята панӑ.

Вӑл 46 ҫул каялла ӗҫ стажне тӗп агрономран пуҫланӑ. 29 ҫул каялла организацирен «Коминтерн» ял хуҫалӑх коопертивӗ туса хунӑ, ӑна Альбина Новикова ертсе пыма тытӑннӑ.

Хальхи вӑхӑтра хуҫалӑхра 95 ҫын ӗҫлет. Юлашки ҫулсенче вӗсен кӑтартӑвӗсем ӳснӗ: сӗт туса илессипе те, тырӑ пухса кӗртессипе те. Кооператив кунсерен предприятисене 25 тонна ытла пахалӑхлӑ сӗт ӑсатать.

Сӑмах май, «Чӑваш Республикин хисеплӗ ҫынни» ята 1996 ҫултанпа параҫҫӗ. Ӑна Андриян Николаев космонавт, республикӑн пӗрремӗш Президенчӗ Николай Федоров, Варнава митрополит, Патшалӑх Думин депутачӗ Анатолия Аксаков, «Элара» савутӑн директорсен канашӗн председателӗ Владимир Сорокин тивӗҫнӗ. Ҫак йышра пӗтӗмпе – 17 ҫын.

Legion-Media сӑнӳкерчӗкӗ

Мускавра пурӑнакан Тепляковсен тата тепӗр ачи сакӑр ҫулта Мускаври патшалӑх университетне вӗренме кӗресшӗн. Лейя Теплякова патшалӑхӑн пӗрлехи экзаменне тытнӑ. Хӗрӗн малашлӑх ӗмӗт-шухӑшӗ пирки ачан ашшӗ Евгений Тепляковхӑйӗн «Учимся с Алисой» каналӗнче пӗлтернӗ.

Аса илтерер: Тепляковсен пӗр хӗрӗ, Алиса, 2021 ҫулта патшалӑхӑн пӗрлехи экзаменне вырӑс чӗлхипе, математикӑпа, биологипе тата информатикӑпа тытнӑччӗ. Ун хыҫҫӑн ачан ашшӗ-амӑшӗ МПУн психологи факультетне вӗренме заявлени панӑ, анчах пӗчӗкскере бюджет уйрӑмне илмен. Ун хыҫҫӑн аслисем ачана унта укҫалла вӗрентсе кӑларма йышӑннӑ. Алиса пӗрремӗш сессире экзамен тытайман иккен, преподавательсем ача занятисене сиктернӗшӗн кӑмӑлсӑрланнӑ.

Ҫулталӑк каялла ачасен ашшӗ 10 ҫулти Алиса Теплякова тата унӑн 8 ҫулти шӑллӗ Хеймдалль ҫуллахи каникулта репетитор пулса ӗҫлес ӗмӗтлине пӗлтернӗ.

Тепляковсен ҫемйинче сакӑр ача — Алиса, Хеймдалль, Лейя, Терра, Айлунг, Фейлунг, Тесей и Сулейман. Вӗсен ашшӗ ҫемье ача пахчине йӗркеленӗ, унта пӗчӗккисене хӑй хатӗрленӗ меслетпе вӗрентет-мӗн.

Кандинский нейросеть сӑнӳкерчӗкӗ

Шупашкарта пурӑнакан 36 ҫулти хӑйӗн кушакне Архангельск облаҫне ӑсатасшӑн пулнӑ. Ун пек пулӑшма килӗшекене вӑл халӑх тетелӗсенчен пӗринче тупнӑ.

Кушак аҫине ӑсатма килӗшекене вӑл 5 пин тенке яхӑн укҫа куҫарса панӑ. Ҫавӑн хыҫҫӑн тӗнче тетелӗнчи ҫав ҫын ҫухалнӑ.

Пӑтӑрмах хыҫҫӑн кушак аҫин хуҫи пакунлисенчен пулӑшу ыйтнӑ. Улталаканни Ставрополь крайӗнчи 25 ҫулти ҫамрӑк пулнӑ. Ӑна пирӗн патри йӗрке хуралҫисем вырӑна тухса кайса тытса чарнӑ. Анчах ӑна хупса хуман. Следстви пынӑ вӑхӑтра хайне йӗркеллӗ тытмалли, таҫта тухса кайма юраманни ҫинчен асӑрхаттарнӑ.

visitvolga.ru сайтри сӑн

Пукане театрӗн спектаклӗ Раҫсейри наци театрӗсен «Ылтӑн маска» премине тивӗҫнӗ. Сӑмах - «Король Лир» постановка пирки. Ӑна Санкт-Петербургри ӳнерҫӗ Юрий Сучков илемлетнӗ. Спектакль «Ӳнерҫӗн чи лайӑх ӗҫӗ» номинацире ҫӗнтернӗ.

Премишӗн 40 спектакль, 184 театр ӗҫченӗ кӗрешнӗ.

cap.ru сӑнӳкерчӗкӗ

Паян, Республика кунӗнче, Шупашкартан Ҫӗнӗ Шупашкара ҫӳрекен пӗрремӗш троллейбус маршрут ҫине тухнӑ. Вӑл - 62-мӗш троллейбус.

Ҫак транспорт Ҫӗнӗ Шупашкарти «Иваново» микрорайонтан Шупашкарти Чапаев савучӗ таран ҫӳрӗ.

Троллейбуса ҫул ҫине кӑларнӑ чухне ЧР Элтеперӗ Олег Николаев та пулнӑ. Вӑл валидатора укҫа ярса билет туяннӑ.

Паян ҫанталӑк сивӗ пулчӗ, климат норминчен сахалрах. Синоптиксем кун пек ҫанталӑк эрнекунччен тӑрассине пӗлтереҫҫӗ. Кӑнтӑрласерен - 20, ҫӗрлесерен 10 градус ӑшӑ пулӗ. Ҫил ҫурҫӗр енчен вӗрӗ, хӑш чухне - ҫеккунтра 15 метр хӑвӑртлӑхпа.

Чи сивви кӗҫнерникун пулӗ: ҫумӑр ҫӑвӗ. Эрнекун та ҫумӑр ҫукалӗ.

Канмалли кунсенче ӑшӑтма тытӑнӗ, уяртӗ, 22-24 градус ӑшӑ пулӗ.

Малтанлӑха пӗлтернӗ тӑрӑх, ҫуллахи ӑшӑ ҫанталӑк утӑ уйӑхӗн пуҫламӑшӗнче таврӑнӗ.

dailyevent.ru/rossiya/den-respubliki-chuvashiya сӑнӳкерчӗкӗ

Чӑваш Ен Элтеперӗ Олег Николаев Республика кунӗпе саламланӑ.

«Вӑл пирӗншӗн пурсӑмӑршӑн та, хӑйсен шӑпине ҫӗр пин юрӑ, ҫӗр пин тӗрӗ, ҫӗр пин сӑмах ҫӗршывӗпе ҫыхӑнтарнӑ ҫынсемшӗн, уйрӑмах паллӑ кун. Паян эпир хамӑрӑн республикӑна, унӑн кун-ҫулне, хальхи пурнӑҫӗпе пуласлӑхне чыслатпӑр. Чӑваш Енӗн хӑйне евӗрлӗхне па-лӑртакан культура еткерлӗхӗпе тӑван чӗлхене, йӑла-йӗркене сыхласа упрани тата аталантарни чӑннипех те пысӑк пӗлтерӗшлӗ», – тенӗ Элтепер.