"Контактри" сӑн

Улатӑр округӗнче пурӑнакан Борис Никоновичпа Анастасия Петровна Сюзюкинсем пӗрлешнӗренпе 60 ҫул ҫитнӗ. Мӑшӑр пилӗк ачана кун ҫути парнелесе ура ҫине тӑратнӑ: Василий, Владислав, Наталья, Сергей тата Ирина. Халӗ вӗсем 11 мӑнукпа, 2 кӗҫӗн мӑнукпа савӑнса пурӑнаҫҫӗ.

Борис Никоновичпа Анастасия Петровна Патӑрьел районӗнче паллашнӑ. Настя пӗчӗк чухне вӗсене ҫемйипе ҫак района эвакуациленӗ. Сюзюкинсем лесокомбинатра ӗҫленӗ. Вӗсем – вӑрҫӑ ачисем, ӗҫ ветеранӗсем.

cap.ru сӑнӳкерчӗкӗ

Чӑваш Ен Патшалӑх Канашӗн Председателӗ Леонид Черкесов ҫынсене хӑйсен ыйтӑвӗсемпе йышӑннӑ. Ун патне тава тивӗҫлӗ канури Нина Гречко пынӑ.

Нина Мануиловна хӑй вӑхӑтӗнче кире спорчӗпе тӗнчери пӗртен-пӗр хӗрарӑм судья пулнӑ. Вӑл ҫак дисциплинӑра тӗнче шайӗнчи тӗнчери арбитр пулнӑ.

Хӗрарӑм яланах хастар пулнӑ. Ватӑлнӑ пулин те сӑвӑсемпе юрӑсем ҫырать.

«Ҫамрӑксене хӑйсен тӗслӗхӗпе хавхалантаракан хастар ҫынсене пирӗн пулӑшмалла», — тенӗ Леонид Черкесов.

cap.ru сӑнӳкерчӗкӗ

2025 ҫулта Чӑваш Енри икӗ яла комплексла аталантарӗҫ. Ятарла программана Красноамрейски тата Патӑрьел ялӗсем кӗнӗ.

Красноармейскине комплекслӑ аталантарма 204,9 млн тенкӗ уйӑрма пӑхса хӑварнӑ. Унта, сӑмахран, Ленин урамӗнче культура ҫурчӗ тӑвӗҫ. блокпа модульлӗ котельнӑйсем тума палӑртнӑ. Кӑнтӑр-ӗвелтухӑҫ микрорайонт шыв башни туса лартмалла. Вырӑнти спортшкол валли воспитанниксене ӑмӑртӑва турттарма микроавтобус туянӗҫ.

Патӑрьел ялне комплекслӑ аталантармалли проект тӑрӑх 202,3 млн тенкӗ пӑхса хӑварнӑ. Укҫа-тенкӗ культурӑпа кану центрӗн ҫуртне тӗпрен юсама, ун валли оборудовани туянма палӑртнӑ тата паркра интернет ҫыхӑнӑвӗпе тивӗҫтерӗҫ.

cap.ru сӑнӳкерчӗкӗ

«Россеть Атӑл» – «Чӑвашэнерго» 35 кВ-ран пысӑкранх подстанцисен ӗҫне тишкернӗ. Предприятин Кӑнтӑр производство уйрӑмӗн Тӑвайри подстанцийӗ мала тухнӑ. Иккӗмӗш тата виҫҫӗмӗш вырӑнсене «Первомайская» тата Улатарти подстанцисем йышӑннӑ.

Тӑвайри подстанци 4,3 пине яхӑн ҫынна ҫутӑпа тивӗҫтерсе тӑрать.

cap.ru сӑнӳкерчӗкӗ

Чӑваш Енре сӗтел-пукан туса кӑларакан виҫӗ предприяти Мускаври сумлӑ курава хутшанать.

«Сӗтел-пукан-2024» чӳк уйӑхен 18-мӗшӗнчен пуҫласа 22-мӗшӗччен ӗҫлет. Кун пек курава Экспоцентрта тӗнчери брендсемпе производительсен, дизайнерсемпе специалистсен ҫӗнӗ коллекцийӗсемпе паллаштарас тӗллевпе йӗркелеҫҫӗ.

«Чӑваш Республики» коллективлӑ стендра хӑйсен продукцийӗпе Павел Скокин («Мягкая посадка» бренд), «Вега-Трейд» («Вега» бренд) тата «Информатика М» («Биомебель» бренд) паллаштараҫҫӗ.

"Про Город" архивӗнчи сӑн

Ҫӗмӗрлере чӳк уйӑхӗн 15-мӗшӗнче йытӑ икӗ хӗрачана тапӑннӑ. Пӗрине вӑл ҫыртнӑ, тумне ҫӗтнӗ. Тепринне кутамккине ҫурса тӑкнӑ. Юрать, хӗрарӑм пулӑшнӑ. Вӑл ачасем кӑшкӑрнине илтсе пулӑшма васканӑ. Вӑлах васкавлӑ медпулӑшу чӗннӗ. Вӑл ҫапкаланчӑк йытӑ пулман. Ӑна хуҫи урама уҫӑлма кӑларнӑ-мӗн.

Ку кӑнтӑрла 12 сехет иртсен Банк тӑкӑрлӑкӗнчи 6-мӗш ҫурт ҫывӑхӗнче пулнӑ. 12-ри хӗрачасем шкултан таврӑннӑ. Пӗрне пульницӑна илсе кайнӑ, йытӑ ӑна пӗҫҫинчен ҫыртнӑ.

Ачасен амӑшӗсем прокуратурӑран пулӑшу ыйтасшӑн.

"Контактри" сӑн

Регионсен хушшинчи «Танцы с ДЕТKIDS» ача-пӑча конкурс фестивалӗнче Етӗрнери «Жемчужинка» ушкӑн 1-мӗш вырӑн йышӑннӑ. Вӗсем хӑйсен ӳсӗм категорийӗнче ҫӗнтернӗ.

Пирӗн ентешсем «Халӑх ташши» номинацире тупӑшнӑ, куракансене «Раҫҫей – Ҫӗр-аннемӗр» номерпе паллаштарнӑ. Палӑртмалла: ушкӑн ертӳҫи – Ирина Богданова. Ушкӑн 10 ҫул ытла каялла Етӗрнери ача-пӑча пултарулӑхӗн ҫуртӗнче йӗркеленнӗ.

Ҫак кунсенче «Культура» телеканалпа «Неизвестные маршруты России» кӑларӑм тухнӑ. Хальхинче вӑл «Чувашия. Из Чебоксар в Алатырь» ятлӑ пулнӑ.

Максим Кардозу телеертӳҫӗ Ҫӗнтерӳ паркӗнче пулнӑ, Чапаев палӑкӗ патне ҫитнӗ, тӑм чашӑк-тирӗк туса пӑхнӑ, карҫынкка ҫыхнӑ…Кунсӑр пуҫне оперӑпа балет театрне, Сӗнтӗрвӑрри хулине ҫитнӗ, чӑваш наци музыка инструменчӗсемпе паллашнӑ. Хӑйӗн ҫулҫӳревне вӑл Улатӑрта вӗҫленӗ.

39 минута тӑсӑлакан кӑларӑма «Смотрим» сайтра курма пулать. Кӑларӑма пӗлтӗр хӗлле ӳкернӗ.

mustay-karim.ru сайтри сӑн

Чӳкӗн 20 тата 23-мӗшӗсенче Шупашкарти Юханшыв портӗнче паллӑ круиз теплохочӗ «Мустай Карим» чарӑнӗ. Ку Раҫҫейре транспорт ӗҫченӗсен кунне халалланӑ уяв пулӗ.

Чӳкӗн 23-мӗшӗнче Шупашкарта чарӑннӑ хыҫҫӑн теплоход Чулхулана хӗл каҫма кайӗ.

Палӑртмалла: «Мустай Карима» 2019 ҫулта шыв ҫине антарнӑ. Карап тӑвакансем ӑна мӑнаҫлӑн «хедлайнер» теҫҫӗ.

Улатӑр округӗнчи Кивӗ Эйпеҫ ялӗнче культура ҫурчӗ тӑвасшӑн. Ҫавна май аукцион ирттереҫҫӗ.

Аукционра ҫӗнтернӗ организацин культура ҫуртне ҫитес ҫулхи чӳк уйӑхӗн 1-мӗшӗччен туса пӗтермелле. Кун валли 71 миллион ытла тенкӗ уйӑрӗҫ.

Проектпа килӗшӳллӗн, культура ҫурчӗ 150 ҫын вырнаҫмалӑх пулмалла. Унта вестюбель, пӳлӗмсем, гардероб пулӗҫ. Умӗнче вара ача-пӑча лапамӗ, стоянка, спорт лапамӗ вырнаҫӗҫ.