ШӖМ тунӑ сӑн

Муркаш округӗнчи Нискасси ялӗ ҫывӑхӗнче тӑракан инспекторсем патӗнче водитель чарӑннӑ. Вӑл Етӗрне округӗнче ҫул хӗррипе утакан арҫын ачана курнӑ та ӑна лартнӑ. Ача Шупашкара кайма тухнине пӗлтернӗ.

Аслӑ инспектор Алексей Илларионов напарникӗпе Алексей Филимоновпа пӗрле арҫын ачана полици уйрӑмне илсе ҫитернӗ. Ҫав вӑхӑт тӗлне ӑна опекӑна илнӗ ҫынсем те ҫухални пирки йӗрке хуралне пӗлтернӗ.

10 ҫулти арҫын ача никама каламасӑр Хӗрлӗ Чутай округӗнчен Шупашкара аппӑшӗ патне кайма тухнӑ иккен, 10 ҫухрӑм утнӑ.

Халӗ кун тӗлӗшпе тӗрӗслев иртет.

"Контактри" сӑн

Элӗк округӗнчи Вӑрманкас ялӗнче пурӑнакан Лаврентьевсем туй тунӑранпа 55 ҫул ҫитнине паллӑ тунӑ. Вӗсен юратӑвӗ ҫемьери ҫамрӑк ӑру валли ырӑ тӗслӗх пулса тӑнӑ.

Вениамин Федоровичпа Ольга Дмитриевна виҫӗ ывӑлпа пӗр хӗр ӳстернӗ. Халӗ сакӑр мӑнукпа, икӗ кӗҫӗн мӑнукпа савӑнса пурӑнаҫҫӗ. Ҫемьери килӗшӳ вӑрттӑнлӑхӗ мӗнре-ха? Пӗр-пӗрне килӗштернинче, хисепленинче.

Паян юр ҫӑвать, ҫил-тӑман вӗҫтерме те пултарать. Каҫхине ҫил вӑйланӗ, ҫеккунтра 19-21 метр хӑвӑртлӑхпа вӗрӗ.

Ыран та ҫил лӑпланмӗ, 8-13 градус таран сивӗтӗ. Чӑннипе вара 23-27 градус сивӗ пек туйӑнӗ.

Ытларикун ҫӗрле ҫил лӑпланӗ. Юнкун ирхине термометр 17-22 градус кӑтартӗ. Пӗлӗтсем сирӗлӗҫ, хӗвел тухӗ.

Кӗҫнерникун вара каллех пӗлӗтленӗ, ҫил вӑйланӗ. Кӑнтӑрла 7-8 градус сивӗ пулӗ. Канмалли кунсенче юр ҫӑвӗ, ҫил-тӑман вӗҫтеркелӗ, кӑштах ӑшӑтӗ, Анчах сивӗ кӑштахран каллех таврӑнӗ.

https://vk.com/wall-62965884_453086 сӑнӳкерчӗкӗ

Чӑваш Енри паллӑ юрӑҫа, илемле сасӑллӑ Алина Фёдоровӑна «Чӑваш Республикин культурӑн тава тивӗҫлӗ ӗҫченӗ» хисеплӗ ят панӑ.

Алина Никифоровна – 2007 ҫултанпа Эстрада артисчӗсен союзӗн президенчӗ. Элӗк районӗнчи Исванкӑ ялӗнче ҫуралнӑ. Шупашкарпти Фёдор Павлов ячӗллӗ музыка училищинче вокал енӗпе вӗренне. Унӑн вӗрентекенӗ Станислав Кондратьев профессор пулнӑ. Кайран вӑл И.Н. Ульянов ячӗллӗ Чӑваш патшалӑх университетӗнче культуролога вӗренсе тухнӑ.

chgign.ru сӑнӳкерчӗкӗ

Чӑваш Республикин патшалӑх истори архивӗн директорне Галина Ертмаковӑна «Чӑваш Республики умӗнчи тава тивӗҫлӗ ӗҫсемшӗн» орден медалӗпе чыслама йышӑннӑ.

Галина Васильевна архив сферинче 1985 ҫултанпа тӑрӑшать. Ун чухне вӑл Елчӗк районӗнчи патшалӑх архивӗн заведующийӗнче ӗҫлеме пуҫланӑ. 1998 ҫулта Архив фончӗн Республикӑри служине ертсе пыма тытӑннӑ. 2002 ҫулта Чӑваш Республикин патшалӑхӑн тӗп архивне (халӗ Истори архивӗ) ертсе пырать.

culture.cap.ru сӑнӳкерчӗкӗ

Нарӑс уйӑхӗн 8-28-мӗшӗсенче «Атӑл Опера» театрта Чӑваш музыкин фестивалӗ иртӗ.

Фестиваль А. Галкинӑн «Хуркайӑк ҫулӗ» балетпа уҫӑлӗ. Унӑн либреттине чӑваш эпосӗ, юмахӗсем, авалхи легендӑсем тӑрӑх хатӗрленӗ.

Г. Хирпӳн «Нарспи» опери композитор пурӑннӑ чухнех чӑваш опера ӳнерӗн классики пулса тӑнӑ. Ӑна К. Иванов поэми тӑрӑх хатӗрленӗ.

А. Галкинӑн «Аттила. Рождение легенды» балечӗ те кӑсӑклӑ пулмалла.

Фестиваль «Тӗнчен наци музыки» гала-концертпа вӗҫленӗ. Ӑна Питӗрти ACID HASID ансамбль тата театрӑн симфони оркестрӗ лартса парӗҫ.

"Чеб.ру" сайтри сӑн

Раҫҫейри 20 хулара прокуратурӑсене пӗтерӗҫ. Ҫав шутра Шупашкар та пур. Хушӑва кӑрлачӑн 17-мӗшӗнче Раҫҫей тӗп прокурорӗ Игорь Краснов алӑ пуснӑ.

Ҫавӑн пекех Барнаулта, Астраханьте, Брянскра, Иркутскра, Калининградра, Кемеровӑра, Новокузнецкра, Кировра, Курскра, Оренбургра, Владивостокра, Тольяттире, Саратовра, Ставропольте, Томскра, Тулӑра, Тюменьте, Хабаровскра, Ярославльте хула прокуратурисем пулмӗҫ. Пӗтӗмпе 327 ҫынна чакарӗҫ, вӗсене прокуратурӑн ытти органне ӗҫлеме ярӗҫ.

«Ъ» пӗлтернӗ тӑрӑх, прокуратурӑсене штат расписанине оптимизаци тума пӗтереҫҫӗ.

chuvbook.ru сӑнӳкерчӗкӗ

Чӑваш кӗнеке издательстви «Чӑваш романӗ» литература конкурсне кӑҫал та ирттерет.

Конкурса тӑратнӑ ӗҫсем чӑвашла пулмалла, урӑх чӗлхерен чӑвашла куҫарнӑ хайлавсене пӑхса тухмӗҫ. Конкурса халиччен пичетленмен хайлавпа хутшӑнмалла.

Конкурса тӑратакан хайлавсен тематики ирӗклӗ, калӑпӑшӗ – А4 форматпа 700 страницӑран ытла мар.

Конкурс ӗҫӗсене кӑҫалхи юпа уйӑхӗн 1-мӗшӗччен (авӑн уйӑхӗн 30-мӗшӗнче юлашки кун йышӑнаҫҫӗ) fed_ol@mail.ru электрон адреспа е почтӑпа ҫак адреспа ярса памалла: 428019, Шупашкар хули, Иван Яковлев проспекчӗ, 13-мӗш ҫурт, Чӑваш кӗнеке издательстви, «Чӑваш романӗ» конкурса».

chuvbook.ru сӑнӳкерчӗкӗ

Чӑваш кӗнеке издательствинче «Асамлӑ ачалӑх» кӑларӑм пичетленсе тухнӑ. Кӑларӑмра XXI ӗмӗр пуҫламӑшӗнчи чӑваш литературинче ырми-канми тӑрӑшакан ҫыравҫӑсем ачалӑхне, асра юлнӑ вӗрентекенӗсене, пӗрремӗш хайлав ҫырнине, вӑл хӑҫан кун ҫути курнине аса илнине пичетленӗ иккен.

Кӗнекене пурӗ 37 автор кӗнӗ. Кун пирки Чӑваш кӗнеке издательствин сайтӗнче пӗлтернӗ.

«Ҫыравҫӑсене ҫуралнӑ ҫулӗсене кура вырнаҫтарса тухнӑ. Темиҫе автор пӗр ҫултах ҫуралнӑ пулсан – уйӑхне кура. Ҫапла майпа вӗсем ӳснӗ вӑхӑт уҫҫӑн курӑнать. Чылайӑшӗн пирвайхи хайлавне илсе панӑ. Вӗсене е автор аса илсе ҫырнӑ, е хаҫат-журналта пичетленнине тӗпе хунӑ. Пичетленнӗ хайлавсене улӑштармасӑрах кӗртнӗ, ҫавӑнпа та аслӑ ҫулти ҫыравҫӑсен сӑвви-калавне вӑл вӑхӑтри пекех хӑварнӑ.

Кӗнекере ҫыравҫӑсен биографийӗсем пур. Кӑларӑма Чӑваш, Тутар, Пушкӑрт республикисенчи, Чӗмпӗрпе Самар облаҫӗсенчи чӑваш ҫыравҫисен асаилӗвӗсене кӗртнӗ», – пӗлтернӗ умсӑмахра кӗнеке издательствин тӗп редакторӑн ҫумӗ Ольга Федорова.

vk.com/gov_cap_ru сӑнӳкерчӗкӗ

Ҫак уйӑхӑн виҫҫӗмӗш вырсарникунӗнче пирӗн республикӑра Чӑваш пичечӗн кунне уявлаҫҫӗ. Ӑна тӑван халӑхӑмӑрӑн пӗрремӗш хаҫачӗ, «Хыпар», тухма пуҫланипе сӑлтавланӑ.

Чӑваш журналисчӗсем професси уявне хальхинче «Роланд» ресторанта уявланӑ.

Чӑваш Енӗн Роскомнадзорӗ пӗлтернӗ тӑрӑх, пирӗн республикӑра 142 массӑлла минформаци хатӗрӗ, вӗсенчен 81-шӗ — пичет кӑлӑрӑмӗсем.