forum.zarulem.ws порталтан илнӗ сӑнӳкерчӗк

Ҫӗмӗрле хулинчен инҫех мар вырӑнта «Ларгус» автомобиль инкеке лекнӗ.

Ҫул ҫинчи авари паян, кӑрлач уйӑхӗн 22-мӗшӗнче, 9 сехет те 20 минутра пулса иртнӗ.

«Шупашкар-Сурски» ҫулпа пыракан водитель Ҫӗмӗрлерен Пӑрачкав енне пӑрӑннӑ. Малтанласа палӑртнӑ тӑрӑх,

«Шеви-Нива» водителӗ руле тытса ӗлкӗрейменрен хирӗҫ пыракан ҫул ҫине тухса кайса «Ларгус» машина айккине пырса ҫапӑннӑ.

«Ларгусри» 45 ҫулти пассажир вилнӗ. Ҫӑмӑл машинӑсен водителӗсем аманнӑ.

«Лиза Алерт» сӑнӳкерчӗкӗ

Вӑрнар тӑрӑхӗнчи Катӑш ялӗнче пурӑнакан хӗрарӑм ҫухалнӑ. Халӗ ӑна «Лиза Алерт» шырав отрячӗн хастарӗсем шыраҫҫӗ.

50 ҫулти Елена Мекурьевна Захарова ӑҫтине кӑрлач уйӑхӗн 19-мӗшӗнченпе пӗлмеҫҫӗ.

Хӗрарӑм 165 сантиметр ҫӳллӗш, вӑтам пӳ-силлӗ, симӗс куҫлӑ, ҫутӑ ҫӳҫлӗ. Тӗрлӗ тӗслӗ куткӑпа пулнӑ, урине угги тӑхӑннӑ.

Ҫухалнӑ хӗраӑма курнисене 8(800)700-54-52 е 112 тетелфонӗсемпе шӑнкӑравласа пӗлерме ыйтаҫҫӗ.

culture.cap.ru сӑнӳкерчӗкӗ

Чӑваш патшалӑх академи драма театрӗнче «Театр – ман ӑраскал» ятпа иртекен моноспектакльсем малалла пыраҫҫӗ. Сцена ҫине хальхинче Любовь Фёдорова тухӗ.

Аса илтерер: моноспектакль формачӗпе йӗркелекен тӗлпулусенче артистсем хӑйсен кун-ҫулӗпе паллаштараҫҫӗ, куракансен ыйтӑвӗсене хуравлаҫҫӗ, театрӑн Кӗҫӗн залӗнче пухӑннисене спектакльсенчи сыпӑксене кӑтартаҫҫӗ.

Шупашкар районӗнче ҫуралнӑ Любовь Федорова – Раҫҫей Федерацийӗн тава тивӗҫлӗ артистки, чӑваш халӑх артистки.

Ленинградри музыкӑпа кинематографи институтӗнчен 1972 ҫулта вӗренсе тухнӑ хыҫҫӑн ентешӗмӗр Чӑваш академи драма театрӗнче ӗҫлеме тытӑннӑ. 50 ҫул ытла вӑл сцена ҫинче.

«Пултарулӑх ҫулӗсенче темӗн те пулнӑ. Анчах кашни сӑнара эпӗ хам витӗр кӑларнӑ. Урӑх пурнӑҫ мана кирлӗ пулман», – тет артистка.

Любовь Фёдорова «Театр — ман ӑраскал» моноспектакльпе кӑрлач уйӑхӗн 26-мӗшӗнче сцена ҫине тухӗ.

gramotadel.ru сӑнӳкерчӗкӗ

Пирӗн тӑрӑхри тата тепӗр икӗ ҫынна Чӑваш Республикин Хисеп грамотипе чыслама йышӑннӑ. Хушӑва республика Элтеперӗ Олег Николаев иртнӗ вӗҫӗнче алӑ пуснӑ.

Чӑваш Республикин Хисеп грамотипе «Отделфинстройпроект» проект институчӗн директорне Евгений Арсентьева тата РФ Граждан оборонин, инкеклӗ лару-тӑрусен тата ҫутҫанталӑк инкекне сирес енӗпе ӗҫлекен министерствӑн Чӑваш Енри Тӗп управленийӗн пай пуҫлӑхне Павел Сотников полковника пама йышӑннӑ.

Паянхи кун тӗлне Шупашкарта юр хулӑнӑшӗ 50 сантиметра ҫитнӗ. Кунашкалли юлашки хутчен 2010 ҫулта пулнӑ. Ҫил-тӑман кӑшт канма май парӗ. Синоптиксем пӗлтернӗ тӑрӑх, паян-ыран уяр та сивӗ ҫанталӑк тӑрассине пӗлтереҫҫӗ. Сывлӑш температури 15-20 градус сивӗ пулӗ.

Кӑрлачӑн 24-15-мӗшӗсенче ҫил вӑйланӗ, юнкун ҫил-тӑман тухӗ, кӑштах юр ҫӑвӗ. Кӗҫнерникун ҫил лӑпланӗ, эрне вӗҫӗчченех ҫапла пулӗ. Термометр 3-8 градус сивӗ кӑтартӗ.

Малтанлӑха пӗлтернӗ тӑрӑх, кӑштах сивӗ, лӑпкӑ ҫиллӗ ҫанталӑк кӑрлач вӗҫӗччен тӑрӗ. Нарӑс пуҫламӑшӗнче ҫанталӑк самаях сивӗтмелле.

smartik.ru сайтри сӑн

Паян Шупашкар муниципаллӑ округӗнчи шкулсене ҫӳрекен ачасем дистанци мелӗпе вӗренӗҫ. Шкул автобусӗсем ҫула тухмӗҫ. Ку йышӑнӑва ҫанталӑк условийӗсем лайӑхланиччен тунӑ.

Ача шкула кайӗ-и е ҫук-и - ашшӗ-амӑшӗ йышӑну тӑвӗ. Пурпӗрех шкула пынӑ ачасем валли вӗренӳ занятийӗсем иртӗҫ.

Сӑмах май, Шупашкарта сивӗ ҫанталӑка пула кӗҫӗн класс ачисем килтен вӗренӗҫ.

cap.ru сӑнӳкерчӗкӗ

Республикӑн кардиологи диспансерӗнче Чӑваш Ен ҫыннисем ҫеҫ мар, урӑх регионсемпе ют ҫӗршыв ҫыннисем те сипленеҫҫӗ.

Больницӑра пӗлтернӗ тӑрӑх, асӑннӑ учрежденире ҫулсерен 8 пин ытла ҫын сипленет, 40 пин ытла пациента тӗрлӗ консультаципе пулӑшаҫҫӗ.

Кардиодиспансера хальхи вӑхӑтри диагностика тата сиплев оборудованийӗпе пуянлатнӑ. 2023 ҫулта унти специалистсем урӑх регионсенчи 200 ытла ҫынна пулӑшнӑ. Вӗсен йышӗнче Мари Элти 4 ҫын, Тутарстанран — 18, Чулхула облаҫӗнчен — 24, Чӗмпӗр облаҫӗнчен — 11, Мускавпа Мускав облаҫӗнчен — 38. Камчаткӑпа Крым, Чукоткӑпа Ямал тӑрӑхӗнчен те кунта килнӗ.

Унсӑр пуҫне ют ҫӗршыри 200 ытла ҫынна пулӑшнӑ: вӗсенчен 150-шне — амбулатори мелӗпе, 50 ытларах ҫынна — стационарта.

m.sibkray.ru сӑнӳкерчӗкӗ

Пирӗн ҫӗршывра ҫитес ултӑ ҫулта 600 ытла самолёт туса кӑларма ӗмӗтленеҫҫӗ. Раҫҫей Правительстви самолётсем, двигательем тата приборсем туса кӑларас программӑна анлӑлатнӑ.

Раҫҫей авиапаркӗнче, тӗпрен илсен, «Суперджетсем» тата «МС-21» маркӑллисем пулӗҫ.

Авиаперевозчиксене «SSJ-New» маркӑллӑ самолёта 142 единица пама палӑртаҫҫӗ, «МС-21-310» — 270, «Ил-114-300» — 70, «Ту-214» — 115, «Ил-96-300» — 12.

Хамӑр ҫӗршывра туса кӑларакан авиатехникӑна туса кӑларма патшалӑх пулӑшса пырӗ.

Unsplash.com сӑнӳкерчӗкӗ

Раҫҫейре плацкарт вакунсене сарлакарах туса кӑларма тытӑнасшӑн. Ҫӗнӗ состав 2024 ҫул вӗҫӗнче ҫула тухӗ.

Плацкарт вакунсене анлӑлатсан пассажирсене ҫул ҫӳреме тата меллӗрех пулӗ. Кун пирки «ТМХ Пассажирский транспорт» компанин гендиректорӗн ҫумӗ Валерия Шарафутдинова пӗлтернӗ.

«Вакунти ҫывӑрмалли вырӑн 28 сантиметр сарлакарах пулӗ. Инҫе ҫула тухакансемшӗн ҫывӑрмалли вырӑн питӗ пӗлтерӗшлӗ», — тенӗ Шарафутдинова.

Вакуна кӗмелли алӑк 5 сантиметр сарлакарах пулӗ. Вӑл пысӑк чӑматанлисемшӗн меллӗ пулӗ.

Раҫҫейри туроператорсен ассоциацийӗн вице-президенчӗ Тарас Кобищанов шухӑшланӑ тӑрӑх, Раҫсей ҫыннисем кӑҫал ют ҫӗршывсене сахалрах кайӗҫ. Ку вӑл, сӑмахран, халӑх йышлӑ ҫӳрекен Египета пырса тивӗ. Хак пысӑк пулни тата сервис питех марри Раҫҫей ҫыннисене ҫӗнӗ вырӑнсене суйлама хистӗ.

Ют ҫӗршывсенчен Раҫҫей ҫыннисем малтанхиллех ҫапах та Турцие, Таиланде, Арабсен Пӗрлештернӗ Эмиратне, ҫавӑн пекех Египета суйлаҫҫӗ.

Ют ҫӗршыври отельсен хуҫисем хаксене йӳнетме тӑрӑшнине те палӑртса хӑварнӑ маларах асӑннӑ эксперт.