Истори страницисене уҫсан...

Ульяновск облаҫӗн пирӗнпе кӳршӗллӗ Сӑр (Сурский) районӗнче «Кезьмин замокӗ» текен авалхи кермен — туристсене хӑй патне илӗртекен вырӑн пур. 12 метр ҫӳллӗш, архитектура тӗлӗшӗнчен питӗ илемлӗ ҫак усадьбӑра 1830-1890 ҫулсенче пуян купса В.П.Крылов пурӑнни паллӑ.

Кам-ха вӑл Крылов тата Шӑмӑршӑпа хӑш енчен ҫыхӑннӑ? Хамӑр тӑрӑха туристсене чӗнетпӗр пулсан, пирӗн Крылов купса ҫинчен те каласа пама пӗлмелле.

Василий Петрович Крылов хӑй вӑхӑтӗнче питӗ паллӑ та пуян ҫын пулнӑ, II Александр патшан арӑмӗ Екатерина Долгорукова ҫумӗнче службӑра тӑнӑ. Паллӑ мар сӑлтавсене пула Крылов службӑна пӑрахса Чӗмпӗр кӗпернине пурӑнма куҫать. Кунта вӑл поместье туянать те тӳрех строительство ӗҫӗсене пуҫӑнать: малтанах кирпӗчрен тунӑ чиркӗве юсаса ҫӗнетет, унтан «викторианский» стильпе замок ҫӗклет. Хӑйӗн ӗмӗчӗсене пурнӑҫа кӗртме Чӗмпӗр кӗпернинчи паллӑ сӑрт-ту инженерне Владимир Брюхатыя чӗнсе илет, замок тӑвас ӗҫе ертсе пынӑшӑн ӑна 100 пин тенкӗ тӳлет.

Икӗ хутлӑ кермене пилӗк ҫул хушшинче кӗпернери чи чаплӑ ӑстаҫӑсем туса лартнӑ.

Малалла...

Чӑвашстат сӑнӳкерчӗкӗ

Чӑвашстат пӗлтӗр юпа уйӑхӗнче иртнӗ халӑх ҫыравӗн пӗтӗмлетӗвӗпе паллаштарнӑ. Халӑх йышӗ чакнӑ. Ку кӑтарту иртнӗ ӗмӗрӗн 60-мӗш ҫулӗсен вӗҫӗнчи кӑтарту патне ҫывхарнӑ.

1960-мӗш ҫулсен вӗҫӗнче республикӑра 1 миллион та 229 пин ҫын пурӑннӑ. 2020 ҫулта халӑх йышӗ 1 миллион та 187 пин ҫынпа танлашнӑ.

Юлашки ҫырав кӑтартнӑ тӑрӑх, халӑхӑн 64 проценчӗ хулара пурӑнать, ыттисем - ялта. Кӑҫал кӑрлач-авӑн уйӑхӗсенче халӑх йышӗ 6,9 пин ҫын чакнӑ.

Александр Рыбаков. cap.ru сӑнӳкерчӗкӗ

Чӑваш Енре Усламҫӑсен правине хӳтӗлес енӗпе ӗҫлекен уполномоченнӑя Александр Рыбакова тухӑҫлӑ тӑрӑшнӑшӑн Чӑваш Республикин Патшалӑх Канашӗн Хисеп грамотипе чыслама йышӑннӑ. Парламент президиумӗ ун пек йышӑнӑва чӳк уйӑхӗн 28-мӗшӗнче ҫирӗплетнӗ.

Аса илтерер: кӑҫалхи ҫурла уйӑхӗн 3-мӗшӗнче Александр Рыбаковӑн ӗҫ вӑхӑчӗ тухнӑччӗ. Ӑна ҫав кунах ӗҫре тепӗр хутчен ҫирӗплетнӗччӗ. Бизнес-омбудсмен пулса ҫав ҫын 2017 ҫултанпа тӑрӑшать.

cap.ru порталтан илнӗ сӑнӳкерчӗк

Чӑваш Ене Владимир Глазунов телеертӳҫӗ тата сӑвӑ илемлӗ вулакан килӗ. Унӑн пултарулӑхӗпе Чӑваш патшалӑх филармонийӗнче раштав уйӑхӗн 1-мӗшӗнче 19 сехетре паллашма май килӗ.

Владимир Глазунов «Ностальгия» телеканалпа «Рожденные в СССР» программӑна тӳрӗ эфирта ертсе пырать. Вӑл — продюсер, режиссер.

Журналист тӗрлӗ артистпа, политикпа, писательпе, художникпа, спортсменпа тата музыкантпа интервью хатӗрленӗ. Ҫавӑн пекех вӑл Мускаври патшалӑх университечӗ ҫумӗнчи Телевиденин аслӑ шкулӗн преподавателӗ те. Арбатри Журналистсен ҫуртӗнче «Один на один» ярӑмпа тӗлпулусем йӗркелет.

Филармонире вӑл хальхи вӑхӑтри поэтсен сӑввисене вуласа парӗ.

cap.ru сӑнӳкерчӗкӗ

Шупашкарти "Университет" микрорайонта ыран ҫӗнӗ ача пахчи уҫӑлӗ. Вӑл "Маленькие академики" /чӑв. "Пӗчӗк академиксем"/ ятлӑ. Вӑл Кураков бульварӗнчи 1-мӗш ҫуртра вырнаҫӗ.

Чӑннипе, ача пахчи ҫулталӑк кая юлса уҫӑлать. Унӑн пӗлтӗр кӗркуннех ачасене йышӑнмалла пулнӑ. Анчах подрядчик объекта вӑхӑтра туса пӗтермен.

Виҫӗ хутлӑ ача пахчине ҫулталӑк ҫурӑран аслӑрах 250 шӑпӑрлан ҫӳрӗ. Унта 14 ушкӑн йӗркелӗҫ. Ачасен бассейнра чӑмпӑлтатма та май пулӗ.

Следстви комитечӗ

Мари Элте инкек пулнӑ. Унта Чӑваш Енри арҫын сарӑмсӑр вилнӗ. Кун пирки Следстви комитечӗн регионти управленийӗ пӗлтерет.

Инкек Козмодемьянск хулинче нумай хутлӑ ҫурт тунӑ ҫӗрте пулнӑ. Чӑваш Енри 49 ҫулти арҫын ӗҫе пӗрремӗш кун тухнӑ. Вӑл кранпа ӗҫленӗ. Тӑрук кран персе аннӑ.

Шел те, крановщик вилнӗ. Халӗ Следстви комитечӗ ӗҫ-пуҫа уҫӑмлатать. Кун тӗлӗшпе пуҫиле ӗҫ пуҫарнӑ.

cap.ru сӑнӳкерчӗкӗ

Чӳк уйӑхӗн 26-мӗшӗнче ҫуралнисене тӗрленӗ кипке парнелесси йӑлана кӗнӗ. Ку акци пирӗн республикӑра виҫҫӗмӗш хут иртнӗ. Ҫак кун ҫуралнисем "Тӗрӗре ҫуралнисем" акцие хутшӑнакансем пулса тӑраҫҫӗ.

Кӑҫал чӳкӗн 26-мӗшӗнче пепкелӗх центрӗнче 10 ача ҫуралнӑ: 6 арҫын ачапа 4 хӗрача.

Ҫӗнӗ Шупашкарти перинаталь центрӗнче 5 пепке кун ҫути курнӑ. Чӑваш тӗррин кунӗнче ҫуралнисене пурне те чӑваш тӗрриллӗ кипке парнеленӗ.

cap.ru сӑнӳкерчӗкӗ

Мускавра Тӑван чӗлхе вӗрентекенсен пӗтӗм Раҫҫейри ӑсталӑх сехечӗ иртнӗ. Ӑмӑртӑвӑн куҫӑн тапхӑрне Раҫҫей Президенчӗ ҫумӗнчи Халӑх хуҫалӑхӗн тата патшалӑх службин академийӗнче пухӑннӑ.

Чӑваш Енрен ӑсталӑх лаҫҫине Надежда Андреева хутшӑннӑ. Вӑл Канаш районӗнчи Анаткас Уҫырма ялӗнчи «Солнышко» ача пахчинче ӗҫлет.

«Тӑван чӗлхепе кӑсӑклантаракан воспитатель» номинацире Канаш хӗрарӑмӗ иккӗмӗш вырӑн йышӑннӑ.

Сӑмах май ҫакна та палӑртмалла: тӑван чӗлхене вӗрентекенсен ҫӗршыв шайӗнчи ӑсталӑх класне 2007 ҫултанпа ирттереҫҫӗ.

ЧР цифра министрӗ Кристина Майнина ӗҫрен кайни пирки сайтра хыпарланӑччӗ. Олег Николаев Элтепер ун вырӑнне хальлӗхе урӑх ҫынна палӑртнӑ. Министр тивӗҫӗсене Екатерина Грабко пурнӑҫлӗ.

Вӑл 2019 ҫулхи пуш уйӑхӗнченпе министр ҫумӗ пулнӑ. Унччен И.Н.Ульянов ячӗллӗ Чӑваш патшалӑх университетӗнче ӗҫленӗ.

Аса илтерер: Кристина Майнина министрта 2021 ҫулхи кӑрлач уйӑхӗнченпе ӗҫленӗ. Кӑҫал чӳк уйӑхӗн 24-мӗшӗнче хӑйӗн ирӗкӗпе ӗҫрен кайнӑ.

"Грани" архивӗнчи сӑнӳкерчӗк

Василий Чапаевӑн мӑнукӗн ачи вилнӗ. Чӑваш наци музейӗ пӗлтернӗ тӑрӑх, Евгения Чапаевӑн чӗри чӳк уйӑхӗн 26-мӗшӗнче тапма чарӑннӑ.

Евгения Артуровна 62 ҫулта пулнӑ. Вӑл Мускавра пурӑннӑ пулсан та Чӑваш Енпе тачӑ ҫыхӑну тытнӑ. Шупашкартах унӑн хӗрӗ Василиса ҫуралнӑ, кунтах мӑнукӗ Андрей кун ҫути курнӑ, ачана пирӗн хулара тӗне кӗртнӗ.

Евгения Артуровна Чӑваш Ене тӑтӑшах килнӗ. Вӑл «Василек» калавсен пуххине кӑларнӑ, «Мой неизвестный Чапаев» кӗнекене кун ҫути кӑтартнӑ.

Евгения Артуровна юлашки хутчен Шупашкарта ҫу уйӑхӗн 28-мӗшӗнче пулнӑ, В.И.Чапаев ячӗллӗ музея ҫитнӗ. Ӑна ҫӗнетнине курса ӑшӑ сӑмахсем ҫырса хӑварнӑ.