drama21.ru сӑнӳкерчӗкӗ

Чӑваш патшалӑх академи драма театрӗн артисчӗсем ҫак кунсенче Тӗменпе Ижевск хулисенчи куракансене спектакльсем кӑтартӗҫ.

Чӳк уйӑхӗн 29 тата 30-мӗшӗсенче Тӗменти Пысӑк драма театрӗн сцени ҫине тухӗҫ, раштавӑн 2-мӗшӗнче — Ижевскра, унти Патшалӑх наци театрӗн сцени ҫине.

Гастроль программинче — Федор Павловӑн «Ялта» спектаклӗ, Игорь Муренкон «Ай мӑнтарӑн ҫил-тӑманӗ» камичӗ тата Юлий Кимӑн «Кто принцессу поцелует?» (чӑв. Принцессӑна кам чуптӑвӗ?) музыкӑллӑ юмахӗ.

Чӑвашла спектакльсене синхрон мелӗпе вырӑсла куҫараҫҫӗ.

nasledie.nbchr.ru сӑнӳкерчӗкӗ

Ӗнер, чӳк уйӑхӗн 28-мӗшӗнче, «Тинӗсре», «Тинӗс хумханать», «Тинӗс хуралҫисем», «Адмирал мундирӗ», «Хӑнтӑрча таврашӗнче», «Ҫунатлӑ эскадрон», «Чапаев летчикӗсем», «Чапаев тӑванӗсем» тата ытти кӗнеке авторӗ Валентин Бурнаевский ҫуралнӑранпа 95 ҫул ҫитнӗ.

Пулас ҫыравҫӑ Самар облаҫӗнчи Кушка районне кӗрекен Ваҫлавкка ялӗнче ҫуралнӑ. М. Горький ячӗллӗ Литература институтӗнчен вӗренсе тухнӑ. Малтан вӑл Шупашкарти электроаппаратура заводӗнче рабочи пулса ӗҫленӗ. 1952-1961 ҫулсенче Чӑваш кӗнеке издательствинче корректорта, 1961-1988 ҫулсенче «Ялав» журналта литература ӗҫченӗнче тӑрӑшнӑ.

Писатель тинӗс ҫинчен ҫырма юратнӑ. Ун пек кӗнекесем унӑн — 11. Василий Чапаев ҫинчен 7 кӗнеке кун ҫути кӑтартнӑ.

Василий Бурнаевский 2007 ҫулхи ҫу уйӑхӗн 21-мӗшӗнче пурнӑҫран уйрӑлса кайнӑ.

vk.com/varkashklub сӑнӳкерчӗкӗ

Чӑваш кӗнекине юратакан, Чӑваш наци вулавӑшӗнчи «Варкӑш» клуба ҫӳрекен хастарсем паян Николай Ларионов ҫыравҫӑн «Анне пилӗ» кӗнекине хаклама пуҫтарӑнӗҫ.

Аса илтерер: «Анне пилӗ» кӗнеке Чӑваш кӗнеке издательствинче кӑҫал ҫулла пичетленсе тухнӑччӗ.

Кӗнекене «Анне пилӗ» повесть тата калавсем кӗнӗ. Повесть пултаруллӑ тата мал ӗмӗтлӗ чӑваш хӗрӗ Эрнеби Сетнерова пурнӑҫӗ ҫинчен каласа кӑтартать. Хӗр – марафонҫӑ-спортсменка. Кашни ӑмӑрту хыҫҫӑн вӑл тӑван амӑшӗ патне васкать, мӗншӗн тесен ӑна тек курас мартан хӑрать. Повеҫре амӑшӗн пилӗпе малалла талпӑнакан хӗрӗн пирвайхи юратӑвӗ, тренерӗ ҫинчен те каласа кӑтартнӑ.

vk.com/club211725618 сӑнӳкерчӗкӗ

Чӑваш Республикин Наци библиотеки «Петӗр Хусанкай. Эпир пулнӑ, пур, пулатпӑр!» аудиокӗнеке хатӗрленӗ. Кун пирки вулавӑш тӗнче тетелӗнчи хӑйӗн страницинче пӗлтернӗ.

Аудиокӗнекене Мухтавлӑ ентешсен ҫулталӑкне тата чӑваш халӑх поэчӗ, куҫаруҫӑ, Чӑваш АССР К.В. Иванов ячӗллӗ патшалӑх премийӗн лауреачӗ П.П. Хусанкай ҫуралнӑранпа 115 ҫул ҫитнине халалланӑ. Кӗнекери хайлавсене Чӑваш Республикин тава тивӗҫлӗ артисчӗ Владимир Григорьев вулать.

Аудиокӗнекене Наци вулавӑшӗн сайтӗнче вырнаҫтарнӑ.

Людмила Сачкова. cap.ru сӑнӳкерчӗкӗ

Ӗнер, чӳк уйӑхӗн 28-мӗшӗнче, чӑваш ҫыравҫи, публицист, Раҫҫейри писательсен союзӗн членӗ, Раҫҫейри пултарулӑх ӗҫченӗсен союзӗн членӗ Людмила Сачкова 65 ҫул тултарнӑ.

Вӑл Патӑрьел районӗнчи Ҫӗнӗ Ахпӳрт ялӗнче ҫуралса ӳснӗ. Чӑваш патшалӑх университечӗн чӑваш чӗлхипе литератури уйрӑмӗнчен вӗренсе тухнӑ хыҫҫӑн пӗр вӑхӑт шкулта ӗҫленӗ. Унтан «Коммунизм ялавӗ», «Хыпар» хаҫатсенче, «Пике» журналта, Чӑвашрадиора тата ытти ҫӗрте вӑй хунӑ.

Людмила Сачкова пьесисемпе Чӑваш театрӗсем спектакльсем сцена ҫине кӑларнӑ.

Чӑваш Енре «Ӑшӑпа тивӗҫтерессин диспетчер служби» информаци тытӑмӗ ӗҫлесе кайнӑ. Асӑннӑ программа сетьсенче тата объектсенче сиксе тухакан инкеклӗ лару-тӑрӑва сӑнаса тата тӗрӗслесе тӑма май парать.

Республика Элтеперӗн Администрацийӗн пресс-служби пӗлтернӗ тӑрӑх, ҫӗнӗ служба ресурссемпе тивӗҫтернин тухӑҫлӑхне ӳстерме пулӑшӗ.

2023 ҫулӑн иккӗмӗш ҫур ҫулӗнче диспетчер тытӑмӗпе ӑшӑ энергийӗн 520 ҫӑлкуҫне тата потребительне ҫыхӑнтарса пӗтересшӗн. Паянхи куна диспетчер служби 130 объекта тӗрӗслесе тӑрать.

Яндекс.дзен сайтри сӑн

Кӑҫал ҫу уйӑхӗнче Шупашкарта пурӑнакан 26 ҫулти арҫын вӑхӑтлӑх киленӳ шыраса ултавҫӑсен аллине лекнӗ. Вӑл киленӳ кӳрекен хӗре чӗнсе 26 пин тенкӗ куҫарса панӑ. Анчах тӗлпулӑва лешӗ килмен. Кун хыҫҫӑн арҫын хӑйне улталанине ӑнланнӑ.

Чӑваш Енри полицейскисем ҫав ултавҫа тупнӑ. Вӑхӑтлӑх киленӳ сӗнсе укҫа сӑптӑракан ҫын хӗрарӑм та мар, арҫын иккен. Хайхискер Пермь крайӗнче пурӑнакан 34 ҫулти арҫын. Вӑл айӑпне йышӑннӑ, ӑна укҫа-тенкӗ ставкӑсен вӑййине выляма кирлӗ пулнӑ.

Юлашки вӑхӑтра пирӗн ҫыравҫӑсем хайлакан произведенисенче ытларах енӗпе малашлӑх курӑнманни вӑйлӑ сисӗнни пирки эп кӑна мар, ыттисем те асӑрханӑ. Пӗрине пӑхатӑн, теприне — таҫта та нушапа терт, пуласлӑхра ним ыррине те курманни. Геннадий Дегтярёв пӗррехинче Борис Чиндыковӑн хайлавне хакланӑ чухне ҫапла сӑмах каланӑччӗ: «йытти те пулин ҫакӑнса вилет». Тӗрӗссипе калас пулсан, хам эп вӑл хайлава вуламан, паллашман, ҫавӑнпа та ҫын сӑмаххи ҫине таянса калама кӑна пултаратӑп.

Хам та, пушӑ вӑхӑт тупӑнкаласан, калавсем ҫыркалатӑп. Нумаях мар ман вӗсем, ҫавах пур. Апла-и, капла-и, хамра та ҫав туртӑмах асӑрхатӑп: хамӑн хайлаври сӑнарсене яланах нушапа терт урлӑ кӑларас килет. Те ҫапла туни кӑна ман шухӑшпа калаври сӑнара мӗне те пулин вӗрентӗ тесе шутлатӑп, те ку вӑл — чӑвашӑн менталитечӗ. Пурте ҫапла май калӑплаҫҫӗ пулсан — тен, вӑл чӑн та, мана кӑна пырса тивмест, мӗнпур чӑвашӑн вӑл ҫапла?

Чӑвашӑн ӗлӗкхи пурнӑҫне сӑнарлакан хайлавсене шута илмелле мар пуль. Вӗсенче кашнинче чӑваш нушапа терт хушшинче ҫӳрет. Илпек Микулайӑн «Хура ҫӑкӑрӗнче» те, Хӗветӗр Уярӑн «Танатипе» «Таркӑнӗнче» те, Куҫма Турханӑн «Сӗве Атӑла юхса кӗрет» романӗнче те.

Малалла...

ШӖМ тунӑ сӑн

Чӳк уйӑхӗн 27-мӗшӗнче ҫул-йӗрпе патруль службин ӗҫченӗсем М-7 ҫул ҫинче "Лада Приора" машинӑна чарнӑ. Руль умӗнче Етӗрне районӗн арҫынни, 26 ҫултискер, пулнӑ.

Хайхискерӗн прави суя пулни тӑрӑ шыв ҫине тухнӑ. Инспекторсем документ ҫинчи сӑнӳкерчӗке ҪҪХПИн даннӑйсен базипе танлаштарнӑ та вӗсем урӑхларах пулни палӑрнӑ. Кун хыҫҫӑн водитель хӑй те тунман: вӑл правана тӗнче тетелӗнче укҫалла туяннӑ иккен.

Ку ыйтӑва малалла уҫӑмлатма арҫынна полици уйрӑмне илсе ҫитернӗ.

forum.zarulem.ws сӑнӳкерчӗкӗ

Паян, чӳк уйӑхӗн 28-мӗшӗнче, Шупашкарта автобуспа троллейбус инкеке лекнӗ.

Пӑтӑрмах пирки «Руль умӗнче» форумра пӗлтернӗ.

Инкеке куракансем каланӑ тӑрӑх, 45-ӗш маршрутпа ҫӳрекен автобус 20-мӗш маршрутпа хутлакан троллейбуспа ҫапӑннӑ. Инкек хулари Чапаев поселокӗнче пулса иртнӗ.

Пӑтӑрмахра ҫынсем аманни пирки шарламан.

Чӳк уйӑхӗн 25-мӗшӗнче Шупашкарти «Ромашка» лавкка патӗнчи ҫул ҫаврӑмӗнче троллейбуспа маршрутка ҫапӑнни пирки эпир пӗлтернӗччӗ.