http://worldaroundme.canalblog.com сайтран илнӗ сӑн

Париж мэрийӗ Эйфель башнине ҫутатмалли сехете кӗскетмелли план хатӗрленӗ. Кун пирки Le Journal du Dimanche тата Franceinfo пӗлтереҫҫӗ. Халӗ башня ҫинчи юлашки ҫутта 01:00 (02:00 мск) хыҫҫӑн сӳнтереҫҫӗ. Мэри планӗпе вара 23:45 (00:45 мск) вӑхӑт ҫитсенех ҫутатнине сӳнтерӗҫ. Ку вӑхӑтра башньӑран чи кая юлнӑ хӑнасем таврӑнаҫҫӗ.

Эйфель башнин эксплуатаци обществин (Socit d’exploitation de la tour Eiffel) пуҫлӑхӗ Жан-Франсуа Мартен пӗлтернӗ тӑрӑх, ҫак утӑм ытларах енӗпе «ячӗшӗн» ҫеҫ пулать. Вӑл каланӑ тӑрӑх, ҫӗрлехи вӑхӑтра башньӑна ҫутатма усӑ куракан энерги ҫулталӑкри пӗтӗмӗшле тӑкакран 4% ҫеҫ йышӑнать.

Утӑ уйӑхӗнче Франци президенчӗ Эмманюэль Макрон Раҫҫей газпа тивӗҫтерессине чакарнине пула, тата Electricite de France франци компанийӗ ҫӗршыври АЭС реакторӗсен ҫуррине юсав тата тӗрӗслев тӗллевӗпе чарма шутланине пула энергие яваплӑ усӑ курас плана хатӗрлеме шутлани пирки пӗлтернӗ. Макрон господин сӗннипе килӗшӳллӗн, чи малтанах хуласенчи объектсене «усӑсӑр ҫутатнине» чакармалла.

Малалла...

Видеори скриншот

Хулан 108-мӗш ҫуралнӑ кунне уявланӑ май янӑ салют вӑхӑтӗнче Кызылра пӗр пайӗ тӳпенелле мар, хула ҫыннисен ушкӑнне вӗҫсе килнӗ. Пӑтӑрмаха курнӑ ҫынсем хӑйсен видеосене авӑнӑн 10-мӗшӗнче халӑх тетелӗсене вырнаҫтарнӑ. Вӗсем ҫинче фейерверксем тӳрех асфальт ҫине ӳкнине асӑрхама пулать.

Тыва Республикин Пуҫлӑхӗ Владислав Ховалыг палӑртнӑ тӑрӑх, яваплӑ службӑсем пурте пӑтӑрмах мӗнле сӑлтавсене пула тухнине тишкереҫҫӗ. «Лару-тӑрӑва хам тӗрӗслесе тӑратӑп. Подрядчик хӑрушсӑрлӑх техникине пӑхӑнманни ҫиеле тухсан, унӑн саккуна пӑхӑнса ҫирӗп явап тытма тивӗ», — палӑртнӑ вӑл.

Ҫавӑн пекех Владислав Ховалыг шар курнисем пирки пӗлтернӗ, вӗсене халӗ пулӑшу параҫҫӗ. Сайзан Товуу ача-пӑча омбудсменӗ пӗлтернӗ тӑрӑх, пӑтӑрмаха пула ҫул ҫитмен виҫӗ ача шар курнӑ.

pxhere.com сайтран илнӗ сӑн

Авӑрланма лартнӑ Redmi 6A смартфон сирпӗнсе хӑйӗн хуҫине вӗлернӗ. Пӑтӑрмах Индире пулса иртнӗ.

Хӗрарӑм ҫывӑрма выртнӑ та телефонне авӑрлама минтер ҫине хунӑ, тахӑш самантра вӑл унӑн пуҫӗпе юнашар сирпӗннӗ. Шар курнӑ хӗрарӑм йывӑр сурансене пула вилнӗ, унӑн юнланса пӗтнӗ виллине тӑванӗсем тупнӑ.

Вилнӗскер паллӑ видеоблогерӑн тӑванӗ пулнӑ, пулса иртнӗ пӑтӑрмах пирки лешӗ халӑх тетелӗсенче каласа кӑтартнӑ. Арҫын палӑртнӑ тӑрӑх пӗтӗм айӑп смартфона туса кӑларакан ҫинче.

Компанин вырӑнти уйрӑмӗ пӑтӑрмах пирки хурав панӑ. Ӗҫ-пуҫ мӗне пула сиксе тухнине тишкереҫҫӗ.

ШӖМ тунӑ сӑн

Паян 8 сехет те 45 минутра Ҫӗнӗ Шупашкарти Пионерсен урамӗнче икӗ шурӑ машина ҫапӑннӑ. Аварире 9 ҫулти хӗрача шар курнӑ.

Малтанлӑха пӗлтернӗ тӑрӑх, «Опель» машинӑн рулӗ умӗнче 34 ҫулти хӗрарӑм ларнӑ. Вӑл сулахаялла пӑрӑннӑ чухне «Хендай» машинӑна ҫул паман. Икӗ машина пырса тӑрӑннӑ.

9 ҫулти хӗрача хӗрарӑмпа пӗр машинӑра пулнӑ. Аварире вӑл купарча шӑммине хуҫнӑ. Ӑна пульницӑна илсе ҫитернӗ.

Ултавҫӑсен пӗлтерӗвӗсем

Шупашкарта пурӑнакан 37 ҫулти арҫын хитре телефон номерӗ илес тенӗ те ултавҫӑсене укҫа куҫарса панӑ. Кун пирки ШӖМ пӗлтерет.

Ҫак арҫын халӑх тетелӗнче хитре телефон номерӗ сутнине курнӑ. Ӑна илес тесе вӑл палламан ҫынна 4 пин те 400 тенкӗ куҫарса панӑ. Кун хыҫҫӑн ҫав ҫын ҫыхӑнӑва тухма пӑрахнӑ. Кун хыҫҫӑн тин вӑл ултавҫӑ серепине лекнине ӑнланнӑ, полицие кайса пӗлтернӗ.

Кун тӗлӗшпе пуҫиле ӗҫ пуҫарнӑ.

«Кӗр парни вӑхӑтӗнче». Елчӗк районӗн администрацийӗ тунӑ сӑн

Елчӗкре паян Вокзалҫум урамӗ, 3 ҫурт адреспа «Кӗр парни — 2022» ял хуҫалӑх таварӗсен ярмӑркки ӗҫлеме пуҫланӑ. Кун пирки Елчӗк районӗн администрацийӗ хыпарлать.

«Кӗр парни — 2022» ярмӑркка Елчӗкри пасарта уҫӑлнӑ. Кӗрхи апат-ҫимӗҫ пасарӗ юпа уйӑхӗн 1-мӗшӗччен ӗҫлӗ. Сутуҫӑсем валли вырӑнсене тӳлевсӗр тивӗҫтернӗ. Ҫапла май вӗсем сутӑнакан ҫимӗҫӗн хакне пӗчӗклетме пултарнӑ. Район администрацийӗн шухӑшӗпе вырӑна тӳлевсӗр тивӗҫтерни пахча-ҫимӗҫе ытларах сутма май парать.

Туянакансем — ытларах енӗпе район центрӗнче пурӑнакансем. Вӗсем палӑртнӑ тӑрӑх, кунашкал ярмӑрккасем ирттерни сутакансемшӗн те туянакансемшӗн те усӑллӑ. Тата тухӑҫлӑ та: пӗрисем ытларах сутма пултараҫҫӗ, теприсем — йӳнӗрехпе туянма.

Шупашкарти электромеханика колледжӗн студенчӗ Андрей Юманов ҫуллахи каникулта хулари пляжра нимеҫӗ пек ӗҫленӗ. Ҫак тапхӑрта, виҫӗ уйӑхра, вӑл икӗ ҫынна путасран ҫӑлнӑ: 11 ҫулти ачана тата 28-ти арҫынна.

Паттӑрлӑх кӑтартнӑшӑн, хастар пулнӑшӑн Инкеклӗ лару-тӑру министерстви тата Шупашкар хула администрацийӗ Андрей Юманова тав хучӗпе чысланӑ.

Халӗ каччӑ малалла вӗренет. Вӑл - 3-мӗш курсра.

travelask.ru сайтри сӑн

Паян ирхине Шупашкар ҫыннисем каллех хир сысни курнӑ. Хальхинче вӑл Короленко урамӗнче утса ҫӳренӗ.

Пӗччен утакан чӗрчун тротуарпа апат шыранӑ ахӑртнех. Ҫакна ҫынсем видео та ӳкернӗ.

Сӑмах май, юлашки вӑхӑтра хулара хир сысни утнине ҫынсем тӑтӑшах курнӑ. Ҫурла уйӑхӗн вӗҫӗнче Шупашкарти Улма-ҫырла тата Тирек урамӗсенче хир сыснисем ҫӳренине асӑрханӑ.

mchs.cap.ru сайтри сӑн

Арҫын ача строительство хатӗрӗсемпе выляса чутах шар курман. Ӑна Чӑваш Енри ҫӑлавпа шырав службин ӗҫченӗсем пулӑшнӑ.

Ачана пулӑшу кирли пирки авӑн уйӑхӗн 6-мӗшӗнче шӑнкӑравласа пӗлтернӗ. Вӑл капрон лента-хӑмӑта алли ҫине тӑхӑнтарнӑ. Кӑштахран вӑл хӗснипе алли шыҫӑнма пуҫланӑ.

Ҫӑлавҫӑсем вырӑна ҫитсен лентӑна ятарлӑ хатӗрпе татнӑ. Вӗсем ачан аллине амантас мар, ӑна ыраттарас мар тесе питӗ асӑрханса ӗҫленӗ.

«Карчӑк ӑшши» хӑҫан пуҫланать? Синоптиксем савӑнтараҫҫӗ: ҫитес эрне пуҫламӑшӗнче ҫанталӑк ӑшӑтӗ.

Вырсарникун пӗлӗтлӗ пулсан та ҫумӑр ҫумӗ. Тунтикун ҫанталӑк лайӑхланма пуҫлӗ: ҫил лӑпланӗ, ирхине хӗвел тухӗ. Кӑнтӑрла сывлӑш температури 10-15 градус таран ӑшӑнӗ.

Ытларикун ҫанталӑк тата лайӑхланӗ. Эрне варринче ҫил вӑйланӗ, 15-20 градус таран ӑшӑтӗ. Ҫӗрле те 10-12 ӑшӑ тӑрӗ. Чи ӑшӑ кун кӗҫнерникун пулӗ.

Эрнекун кӑштах ҫумӑр ҫӑвӗ, кӑштах сивӗтӗ. Малтанлӑха пӗлтернӗ тӑрӑх, авӑнӑн 17-18-мӗшӗсенче те сивӗ, ҫумӑрлӑ пулӗ.

Ҫитес эрнере Шупашкарта пӗр тӑваткал метр ҫине 40 литр шыв ӳкме пултарӗ.