Нарӑс уйӑхӗн 2-мӗшӗнче 7 сехет те 40 минутра «Энӗш» ҫул ҫинче, Канаш районӗнчи Хучел ялӗ ҫывӑхӗнче, авари пулнӑ. Унта ҫыннӑн пурнӑҫӗ татӑлнӑ. Йӗрке хуралҫисем айӑплине тытса чарнӑ.

Иномарка ҫул пӑрӑнӑшӗнче «Калина» ҫине пырса кӗнӗ. «Калинӑри» 73 ҫулти пассажир, хӗрарӑм, вилнӗ. Руль умӗнче ларнӑ упӑшки суранланнӑ.

Иномаркӑри пассажир та аманнӑ. Вӑл - машина хуҫи. Анчах руль умӗнче вӑл мар, урӑх ҫын ларнӑ. Лешӗ вара, 25 ҫултискер, ӳсӑр пулнӑ, унӑн права та ҫук /руль умне ӳсӗрле ларнӑшӑн туртса илнӗ/. Ҫак арҫын авари вырӑнӗнчен тарса ҫухалнӑ. Анчах йӗрке хуралҫисем ӑна ҫийӗнчех тытса чарнӑ. Ун чухне те вӑл ӳсӗр пулнӑ.

rusdram21.ru сӑнӳкерчӗкӗ

Ӗнер, нарӑс уйӑхӗн 2-мӗшӗнче, Шупашкарти вырӑс драма театрӗнче ҫӗнӗ тӗп режиссёрпа паллаштарнӑ. Тилхепене 50 ҫулти Александр Кладькона тыттарнӑ.

Александр Иванович — театрпа кино актёрӗ тата режиссёрӗ. Вӑл 1971 ҫулта Украинӑри Одесса хулинче ҫуралнӑ. Питӗрти театр ӳнерӗн академийӗнче, каярах унтах режиссура кафедринчи аспирантурӑра вӗреннӗ. Фонтанкӑри Ҫамрӑксеен театрӗнче артистра ӗҫленӗ, Псковри А.С. Пушкин ячӗллӗ академи драма театрӗн тӗп режиссёрӗнче ӗҫленӗ. Вӑл режиссёр пулса лартнӑ ӗҫсем тӗрлӗ конкурсра ҫӗнтернӗ.

Иркутск тӑрӑхӗнчи чӑвашсен Фейсбукри страницинчи сӑнӳкерчӗк

Иркутск тӑрӑхӗнчи чӑвашсем валли «Моя чувашская семья» (чӑв. Манӑн чӑваш ҫемйи) фотоӗҫсен конкурсне ирттернӗ. Кун пирки асӑннӑ тӑрӑхри йӑхташӑмӑрсен «Юлташ» ассоциацийӗн ертӳҫи Вероника Тимофеева Фейсбукра пӗлтернӗ.

«Конкурс йӗркелӳҫисем тӗп ҫӗнтерӳҫӗсене палӑртма тӗллев лартман, паллах. Вӗсем Иркутск тӑрӑхӗнче пурӑнакан чӑвашсен пысӑк ҫемйине кӑтартас тенӗ», — уҫӑмлатнӑ Вероника Тимофеева.

Конкурса 20 ҫемье хутшӑннӑ. Сӑнӳкерчӗк тӑрӑх Афероноксен, Быковсен, Белковсен, Ваняркинсен, Ковалевсен, Машугинсен, Салминсен, Никифоровсен, Тимофеевсен ҫемйисем, сӑмахран, хӑйсем йӑла-йӗркене тытса пынине кӑтартас тенӗ курӑнать.

cap.ru сӑнӳкерчӗкӗ

Шупашкар хулинче ҫул-йӗре юртан тасатма кансӗрлекен машинӑсене эвакуацилессине пӗлтереҫҫӗ.

Ҫул-йӗре тытса тӑракан организацисен ҫил-тӑман хыҫҫӑн ҫеҫ мар, юр самай ҫума тытӑнсанах ҫула тасатмалла. Ку вӑл — хӑйсем пуҫ тӗллӗн хӑтланакан утӑм мар. Вӗсене ҫапла тума ятарлӑ нормативсем хистеҫҫӗ. Анчах ҫул хӗррипе лартса тухнӑ машинӑсем ҫул-йӗр техникине ӗҫлеме чӑрмав кӑларса тӑратаҫҫӗ. Шупашкар хулин Калинин районӗн администрацийӗн сайтӗнче пӗлтернӗ тӑрӑх, ятарлӑ техникӑна ӗҫлеме кансӗрлекен автомобильсене урӑх ҫӗре илсе кайса лартӗҫ.

cap.ru сӑнӳкерчӗкӗ

Чӑваш Енре пурӑнакансенчен пӗр пайне муниципалитетсенче епле ӗҫлени тивӗҫтермест.

Виҫӗ районта тата пӗр хулара: Вӑрнар, Муркаш, Ҫӗрпӳ районӗсенче тата Ҫӗнӗ Шупашкарта — сӑнавлӑ майпа инвестици профилӗсене хатӗрленӗ. Ҫавна май халӑхра ыйтӑм йӗркеленӗ. «Что жители больше всего ценят в своих муниципальных образованиях?» (чӑв. Хӑйсен муниципалитет пӗрлешӗвӗсенче ҫынсем пуринчен ытла мӗне хаклаҫҫӗ) ыйтӑва хуравлакансенчен час-часах тӗл пулакан хурав ҫапларах янӑранӑ: «НИМЕ ТЕ».

«Ку вӑл пире шухӑша ямалли тата хамӑр стратегие юсамалли сӑлтав. Енчен эпир мӗн пуррине хакламастпӑр, ӑнланмастпӑр пулсан, эпир малалла каяймӑпӑр». Ҫапларах шухӑшлать республика Элтеперӗ. Кун пирки Олег Николаев Инвестици тата предпринимательлӗх хастарлӑхне сарассипе ӗҫлекен республикӑри координаци канашӗн ларӑвӗнче палӑртса хӑварнӑ.

investchr.ru сайтран илнӗ скриншот

Чӑваш Енри муниципалитетсенче инвесторсемпе тата усламҫӑсемпе ӗҫлекен ушкӑнсем йӗркелӗҫ. Ун пек команда кирлине Инвестици тата предпринимательлӗх хастарлӑхне сарассипе ӗҫлекен республикӑри координаци канашӗн ларӑвӗнче палӑртса хӑварнӑ. Мероприятие Олег Николаев Элтепер ертсе пынӑ.

Республика ертӳҫи районсемпе хуласене инвестици командисем йӗркелеме хушса каланӑ. Асӑннӑ ушкӑнсене ӗҫлеттерсе ярассишӗн Чӑваш Енӗн Экономика аталанӑвӗн тата пурлӑх хутшӑнӑвӗсен министерстви тата Чӑваш Енри инвестици аталанӑвӗн агентстви яваплӑ пулӗ.

Паян - 956 ҫын. Сӑмах кӑшӑлвируспа чирлекенсем пирки пынине тавҫӑртӑр пуль ӗнтӗ. Ӗнерхинчен 100 яхӑн ҫын нумайрах..

179 ҫынна пульницӑна вырттарнӑ, юлашки талӑкра 406 ҫын сывалнӑ. Вилекенсем малтанхи пекех йышлӑ мар. Стопкоронавирус.рф сайт пӗлтернӗ тӑрӑх, иртнӗ талӑкра 3 ҫын чире парӑнтарайман.

Ку таранччен республикӑра 53579 ҫын инфекциленнӗ. Вӗсенчен 43488-шӗ сывалнӑ. Ку 81,1 процентпа танлашать.

Паянхи кун тӗлне республикӑра 4210 ҫын кӑшӑлвируспа чирлесе вилнӗ.

komiinform.ru сайтри сӑн

"Ял тухтӑрӗ" программа Чӑваш Енре 2020 ҫултанпа пурнӑҫланать. Унтанпа ялти шкулсене 8 вӗрентекен ӗҫлеме кайнӑ. Кӑҫал 4 ваканси пур, ҫавна май хыснаран 4 миллион тенкӗ уйӑрма палӑртнӑ. Аса илтерер: ялти шкула ӗҫлеме кайнӑ педагогсене 1 миллион тенкӗ параҫҫӗ. 50 пин таран ҫын пурӑнакан пӗчӗк хуласене те ӗҫлеме кайма юрать. Программӑпа килӗшӳллӗн ялти шкула кайнӑ вӗрентекенсен 5 ҫул ӗҫлемелле.

Кӑҫал Куславкка районӗнчи Тӗрлемес шкулне вырӑс чӗлхин учителӗ кирлӗ, Хӗрлӗ Чутай районӗнчи Хусанушкӑнь шкулне вара - ют чӗлхесен учителӗ. Ҫӗмӗрле районӗнчи Ҫӗмӗрле ялӗн шкулӗнче пуҫламӑш классен вӗрентекенӗ ҫимест, Тӑвай шкулӗнче математика вӗрентекенне питӗ кӗтеҫҫӗ.

Программӑна 55 ҫул тултарман педагогсем хутшӑнаяҫҫӗ.

Антонина Андрееван Фейсбукри страницинчен илнӗ сӑнӳкерчӗк

Шупашкарти Ҫеҫпӗл Мишши музейӗн ертӳҫ Антонина Андреева республикӑри тӗрлӗ шкула ҫитсе «Тӑвӑлта ҫуралнӑ Ҫеҫпӗл» ятпа лекцисем ирттерет. Вӑл, сӑмахран, Етӗрне районӗнчи Пушкӑрт шкулӗнче пулнӑ. «Халӗ Пушкин картти пуррине кура Ҫeҫпӗл Мишшин асӑну ҫулталӑкӗ пирки калаҫма шкул ачисемпе тӗл пулма аван!» — тесе хыпарланӑ музей ертӳҫи.

«Пит аван пулчӗ пӗp шухӑшлӑ та пултаруллӑ чӑваш лекторне итлеме... Тавах сире, Антонина Васильевна, ачасене черчен те хастар чӗреллӗ Ҫeҫпӗл Мишшин пурнӑҫӗпе ӗҫӗ-хӗлӗ урлӑ чӑвашлӑха упрама, хисеплеме вӗpeнтсе чӗнсе каланӑшӑн...» — тав туса ҫырнӑ Фейсбукра Шупашкар районӗнче ҫуралнӑ, халӗ Етӗрне районӗнче пурӑнакан чӑваш чунӗллӗ хастар Марина Якимова.

Юрий Шакеевӑн Фейсбукри страницинчен илнӗ скриншот

Ӗнер, нарӑс уйӑхӗн 1-мӗшӗнче, Шупашкарӑн историлле пайӗнче Юрий Шакеев оппозиционерӑн ҫурчӗ вутра кӗлленнӗ. Кун пирки Шакеев Фейсбукра ҫырнӑ. Усал хыпара «В «Замамье» сгорел дом оппозиционера Юрия Шакеева: «Враги сожгли родную хату» ятпа «Pg21.ru» сайтра та пӗлтернӗ.

Юрий Шакеевӑн ҫурчӗ Шупашкарти Амӑш палӑкӗн ҫурчӗ хыҫӗнче, Герцен урамӗнче, вырнаҫнӑ. Асӑннӑ урамри 31-мӗш ҫурт 17 сехет те 15 минут тӗлӗнче ҫунма тытӑннӑ. Унта никам та пурӑнман, ҫуртра ҫутӑ пулман.

Инкек сӑлтавне Шакеев ҫурт вырӑнӗ такамсене строительство валли вырӑн кирлӗ пулнӑ тесе тӗшмӗртет.