gcheb-kult.cap.ru сӑнӳкерчӗкӗ

Шупашкарта кӑҫал «Сарпике» конкурса пуҫласа ирттерӗҫ. Республика шайӗнчи пултарулӑх ӑмӑртӑвне чӑвашсен пӗрремӗш хӗрарӑм-композиторне Олимпиада Агаковӑна халалланӑ. Конкурс пуш уйӑхӗн 15-мӗшӗнче иртӗ. Пултарулӑх ӑмӑртӑвне Шупашкарти ача-пӑча 3-мӗш музыка шкулӗ йӗркеленӗ.

Олимпиада Яковлевна 1918 ҫулхи утӑ уйӑхӗн 23-мӗшӗнче Етӗрне районӗнчи Ҫуткассинче вӗрентекен ҫемйинче ҫуралса ӳснӗ. Етӗрнери педагогика училищинче, Шупашкарти музыка училищинче вӗреннӗ. Чӑваш патшалӑх юрӑпа ташӑ ансамблӗнче, Григорий Хирпӳ патӗнче радио хорӗнче ӗҫленӗ. 1960-1974 ҫулсенче вӑл Республикӑри культурӑпа ҫутӗҫ училищинче (Ҫӗрпӳ) вӗрентнӗ, пианистка концертсене хастар хутшӑннӑ. Унӑн репертуарӗнче классика оперисенчи арисем, романссем, чӑваш юррисем пулнӑ.

Чӑваш Енре иртнӗ талӑкра икӗ пушар пулнӑ. Вӗсенче икӗ ҫын аманнӑ.

Инкеклӗ лару-тӑру министерстви пӗлтернӗ тӑрӑх, пуш уйӑхӗн 8-мӗшӗнче Шупашкарти Гарин-Михайловский урамӗнче мунча ҫуннӑ. Кил хуҫин 65 ҫулти мӑшӑрӗ тӗтӗмпе наркӑмӑшланнӑ. Ӑна тухтӑрсем пулӑшнӑ. Малтанлӑха пӗлтернӗ тӑрӑх, пашар мунчари кӑмака йӗркеллӗ ӗҫлеменрен тухнӑ.

Пуш уйӑхӗн 8-мӗшӗнче ҫӗрле Сӗнтӗрвӑрри районӗнчи Кукашни ялӗнче пушар ҫурта тӗп тунӑ. 62 ҫулти кил хуҫине ҫӑлавҫӑсем урама илсе тухнӑ. Арҫыннӑн пичӗ тата ҫӳлти сывлав органӗсем пиҫсе кайнӑ.

life.ru сайтри сӑнӳкерчӗк

Раҫҫей Президенчӗ Владимир Путин Пӗтӗм тӗнчери хӗрарӑмсен кунӗпе саламланӑ май 8-16 ҫулсенчи ачасене воспитани паракан ҫемьесене пулӑшасси пирки каланӑ. Ҫак ӳсӗмри шӑпӑрлансемшӗн те пособи парӗҫ. Анчах ӑна сахал тупӑшлӑ ҫемьесем ҫеҫ илейӗҫ.

Ку ака уйӑхӗн 1-мӗшӗнчен пурнӑҫланма тытӑнӗ. Заявленисене вара ҫу уйӑхӗн 1-мӗшӗнчен йышӑнӗҫ. Ӑна Патшалӑх пулӑшӑвӗсен порталӗ урлӑ пама пулать. Пособи парассине ырласан тӳрех икӗ уйӑхшӑн укҫа килӗ.

Пособин ҫуррине пама йышӑнсан вӑл 526,5 тенкӗпе танлашӗ. Тупӑша кура 75%-не ырласан – 7824,75 тенкӗпе. Пособин 100 проценчӗ – 10433 тенкӗ.

forum.zarulem.ws сӑнӳкерчӗкӗ

Иртсе кайнӑ кунсенче, пуш уйӑхӗн 5-8-мӗшӗсенче, Чӑваш Енри ҫул-йӗр ҫинче ӳсӗр 70 водителе тытса чарнӑ. Ӗҫме арҫынсем ҫеҫ мар, хӗрарӑмсем те кӑмӑллаҫҫӗ. Ҫапла пӗтӗмлетме статистика хистет. Ара, ӳсӗр 70 водительтен 6-шӗ хӗрарӑмсем пулнӑ. Ӳсӗрпе тепӗр хутчен ҫакланнисем те пур. Ун пеккисем — улттӑн.

Водитель прави ҫуккисем те руль умне ларса тухаҫҫӗ иккен. Канмалли кунсенче ун пеккисем 33-ӗн ҫакланнӑ.

Иртсе кайнӑ кунсенче ҫул-йӗр правилине тӗрлӗ майпа пӑснӑ 1668 тӗслӗхе шута илнӗ.

rsnadzor21.rchuv.ru сӑнӳкерчӗкӗ

Ҫӗнӗ Шупашкарти складра бактерирен сыхлакан препаратлӑ кӑлпасси тупса палӑртнӑ. Кун пирки Россельхознадзорӑн Чӑваш Енпе Чӗмпӗр облаҫӗнчи управленийӗнче пӗлтернӗ.

Ҫӗнӗ Шупашкарти курттӑм сутакан складсенчен пӗринче «Юбилейная» пӗҫернӗ кӑлпасси пулнӑ. Ӑна Чулхула облаҫӗнчи Лысковӑри аш-какай комбинатӗнче туса кӑларнӑ.

Кӑлпассире бактерирен аталанасран сыхлакан сульфаметазин препарат пулнӑ. Пӗр килограмм ҫимӗҫре — 7,9 мкг.

Кӑлпасси туса кӑларакана 100 пин тенкӗ штраф хурса хӑварнӑ.

Пирӗн ҫӗршывра сахӑр песукне, кӗрпе-макарона тата ҫӑнӑха виҫсе сутма тытӑнасшӑн. Халӗ ҫавӑн пек тума Роспотребнадзор чарать. Тавар туса кӑларакансем асӑннӑ апат-ҫимӗҫе хутаҫа тултарни хака 10-15 процент ӳстерет тесе калаҫҫӗ-мӗн.

Раҫҫей Ял хуҫалӑх министерствинче пӗлтернӗ тӑрӑх, хальхи вӑхӑтра сахӑр песукне, кӗрпе-макарона тата ҫӑнӑха ваккӑн виҫсе сутма ирӗк парас йӗркене сӳтсе яваҫҫӗ. Асӑннӑ ыйтӑва татса парассишӗн Роспотребнадзор яваплӑ. Ҫӗнӗлӗхе йышӑнсан маларах асӑннӑ апат-ҫимӗҫе предприятисем хутаҫа тултарса та, тултармасӑр та лавккасене ӑсатайӗҫ.

Ҫӑкӑр пӗҫерекенсен союзӗ вара ҫӑкӑра хутаҫа чикмесӗр сутмалла туни хака 5 процент йӳнетме май парассине пӗлтернӗ.

obrazov.cap.ru сӑнӳкерчӗкӗ

Чӑваш Енре пурӑнакан ашшӗ-амӑшӗ хӑйӗн ывӑл-хӗрне ҫулла кантарас ыйтӑва халех уҫӑмлатма пултарӗ. Ҫав тӗллевпе ыран, пуш уйӑхӗн 10-мӗшӗнче, республикӑн Вӗренӳ тата ҫамрӑксен политикин министерстви вӗсем валли онлайн пуху ирттерет.

Ашшӗ-амӑшӗ валли йӗркеленӗ онлайн пухура икӗ ыйтӑва пӑхса тухӗҫ: ачасене пӗрремӗш класа яма заявлени ҫырассине тата ҫуллахи кану кампанине.

Пуху пуш уйӑхӗн 10-мӗшӗнче 17 сехетре пуҫланӗ. Пухӑва хутшӑнас тесен ҫак каҫӑпа https://vk.com/video379683201_456239049 иртмелле.

Евгений Краснов. culture.cap.ru сӑнӳкерчӗкӗ

Паян, пуш уйӑхӗн 9-мӗшӗнче, Чӑваш Республикин халӑх артисчӗн, Чӑваш Республикин тава тивӗҫлӗ артисчӗн, Чӑваш патшалӑх оперӑпа балет театрӗн симфони оркестрӗн концертмейстерӗн Евгений Красновӑн сумлӑ юбилейӗ. Театрта пӗлтернӗ тӑрӑх, сцена ӑсти спектакльсемпе концерт программисене ҫур ӗмӗре яхӑн илем кӳрет, музыка илемӗпе куракансен чунӗсене тыткӑнлать.

Евгений Краснов Хусанти Н.Г. Жиганов ячӗллӗ патшалӑх консерваторийӗнче вӗреннӗ. Студент чухне Тутарстанри Муса Джалиль ячӗллӗ патшалӑх оперӑпа балет театрӗнче ӗҫлеме тытӑннӑ. Консерваторирен вӗренсе тухнӑ хыҫҫӑн ӑна Шупашкарти Чӑваш патшалӑх оперӑпа балет театрӗнчи симфони оркестрне пӗрремӗш скрипкӑсен ушкӑнне ӗҫе илнӗ. Евгений Краснов кирек мӗнле музыка жанрне те (опера-м вӑл е балет-и, оперетта-и) пӗр пек илем кӳме ӑста.

cheb.ru сайтри сӑн

Санкцисене пула Шупашкарти тата Ҫӗнӗ Шупашкарти Макдональдссем хупӑнаҫҫӗ. Хӑҫанне палӑртман. Вӗсем паянтанах ӗҫлеме пӑрахма пултараҫҫӗ.

Тӗп директорӗ Крис Кемпчински пӗлтернӗ тӑрӑх, Раҫҫейри пӗтӗм Макдональдс вӑхӑтлӑха хупӑнӗ. Вӗсем пӗтӗмпе - 850. Унта ӗҫлекен 62 пин ҫынна вара ӗҫ укҫине тӳлесех тӑрӗҫ.

Сӑмах май, пӗлтӗр Раҫҫейри тата Украинӑри Макдональдссем ҫулталӑкри тупӑшӗн 9 процентне ӗҫлесе илнӗ. Пӗтӗмпе — 2 миллиард тенкӗ. Халӗ Украинӑри Макдональдссем те хупӑ.

Палӑртмалла: Шупашкарта ҫакнашкал пӗрремӗш кафе 2001 ҫулхи ҫӗртме уйӑхӗн 23-мӗшӗнче уҫӑлнӑ.

Пӗлтӗр Красноармейски тата Ҫӗмӗрле районӗсем муниципалитет округӗсем пулса тӑнӑ. Вӗсем хыҫҫӑн ытти 19 район та ҫулталӑк вӗҫлениччен ҫак статуса илме хатӗррине пӗлтернӗ.

Ҫакна влаҫ органӗсене централизацилес тӗллевпе тӑваҫҫӗ. Ҫак статуса илсен ял тӑрӑхӗсен депутачӗсем пулмӗҫ, муниципалитет шайӗнчисем ҫеҫ юлӗҫ. Тӳре-шара ӗнентернӗ тӑрӑх, халӑхӑн пурнӑҫ шайӗ ӳсӗ. Управлени ӗҫӗсем хӑвӑртланӗҫ, яваплӑх тата финанс ресурсӗсем пӗр алӑра пулӗҫ.

Аса илтерер: республикӑри районсен пуҫлӑхӗсене халӑха суйлаттармалла тӑвасшӑн.