gkb15.moscow сӑнӳкерчӗкӗ

Шупашкар хулинчи 1-мӗш клиника пульницин бактериологи лабораторине ӗҫре кирлӗ оборудованипе пуянлатасшӑн.

Паян республикӑн Министрсен Кабинечӗн ларӑвӗ иртмелле. Унӑн кун йӗркине кӗртнӗ 31 ыйту хушшинче ҫавӑ та пур.

2021 ҫулта бактериологи лабораторийӗ валли тӗрлӗ йышши анализатор, ҫав шутра микроорганизмсене уйӑрса илмеллисем, микроскопсем, тӗпчев ирттермелли инструментсем, тӗрлӗ хатӗр, шӑнтмалли камерӑсем, ятарлӑ сӗтел-пукан.

Оборудовани туянма федераци тата республика хыснисенчен пурӗ 98 ытла миллион тенкӗ уйӑрасшӑн.

Ҫурла уйӑхӗн 22-мӗшӗнче Шупашкарти суту-илӳ центрӗнче ӗҫлекен 35 ҫулти хӗрарӑм полицие пырса нуши пирки каласа кӑтартнӑ. Вӑл ултавҫӑ аллине ҫакланнӑ.

Хӗрарӑм каласа кӑтартнӑ тӑрӑх, ӗҫри телефонӗ ҫине ҫамрӑк арҫын шӑнкӑравланӑ, вӑл унӑн ӗҫтешӗ-мӗн. Хайхискер баннерсене, реклама стенчӗсене, светодиодлӑ хатӗрсене илсе ҫитернӗшӗн укҫа куҫарса пама ыйтнӑ. Хӗрарӑм ӑна ӗненсе кассӑран 50 пин тенке илнӗ те лешӗ каланӑ счет ҫине хунӑ.

Ҫав арҫын ӗҫтешӗ мар, ултавҫӑ пулнӑ иккен. Кун тӗлӗшпе пуҫиле ӗҫ пуҫарнӑ.

hab.mk.ru сайтри сӑн

Хӗрлӗ Чутай районӗнчи Пӗрремӗш Липовка ялӗнче пурӑнакан 25 ҫулти арҫын ашшӗне вӗлернӗ тесе шутлаҫҫӗ. Следовательсем ун тӗлӗшпе пуҫиле ӗҫ пуҫарнӑ.

Следстви версийӗ тӑрӑх, ҫурла уйӑхӗн 22-мӗшӗнче каҫхине каччӑ ашшӗпе пӗрле килте эрех ӗҫнӗ. Вӗсем хирӗҫсе кайнӑ. Ывӑлӗ ҫӗҫӗ ярса тытнӑ та ашшӗне чикнӗ. Суранланнӑ арҫын патне васкавлӑ медпулӑшу ҫитнӗ, пульницӑна илсе кайма тухнӑ. Анчах 52 ҫулти арҫын ҫул ҫинче вилнӗ.

Ывӑлне тытса чарнӑ. Следовательсем пуҫиле ӗҫе малалла тӗпчеҫҫӗ.

med.cap.ru сайтри сӑн

Ҫак кунсенче Ҫӗмӗрле районӗнче инек пулнӑ. 1985 ҫулта ҫуралнӑ арҫын сарӑмсӑр вилнӗ.

«Про Город» хаҫата халӑх корреспонденчӗ пӗлтернӗ тӑрӑх, арҫын юхӑнса ларакан сысна комплексне пӑхма кайнӑ. Ҫавӑнта ҫӳренӗ чухне ун ҫине кирпӗчсем йӑтӑнса аннӑ, вӑл айне пулнӑ. Ӑна пульницӑна илсе ҫитернӗ. Анчах, шел те, ҫурла уйӑхӗн 23-мӗшӗнче реанимацире унӑн чӗри тапма чарӑннӑ.

Халӗ йӗрке хуралҫисем ӗҫ-пуҫа уҫӑмлатаҫҫӗ. Ҫав арҫын, 36 ҫултискер, Шупашкарта пурӑннӑ.

panoramapro.ru сайтри сӑн

Чӑваш Енри 9 вӗрентекен 200 пин тенке тивӗҫнӗ. Ҫакна РФ Ҫутӗҫ министерствин хушӑвӗнче палӑртнӑ. Ку укҫана вӗсене кӑҫал педагогикӑра тунӑ ҫитӗнӳсемшӗн панӑ.

Премие Шупашкарти 44-мӗш лицейри хими вӗрентекенӗ Екатерина Александрова, Ҫӗнӗ Шупашкарти 2-мӗш шкулти вырӑс чӗлхипе литературин учителӗ Надежда Алексеева, Вӑрмарти Г.Егоров ячӗллӗ шкулти технологи учителӗ Оксана Васильева, Шупашкарти 1-мӗш гимназири математика вӗрентекенӗ Ксения Коллэ, Ҫӗнӗ Шупашкарти кадет лицейӗнчи истори учителӗ Артем Максимов, Ҫӗрпӳ районӗнчи Сӑнав поселокӗнчи математика вӗрентекенӗ Ольга Маряхичева, Сӗнтӗрвӑрринчи 1-мӗш гиназири истори учителӗ Алена Тимофеева, Шупашкарти 20-мӗш шкулти музыка вӗрентекенӗ Светлана Турбина, Шупашкарти 61-мӗш шкулти пуҫламӑш классен учителӗ Надежда Федотова тивӗҫнӗ.

Инкеклӗ лару-тӑру министерстви тунӑ сӑн

Ҫурла уйӑхӗн 24-мӗшӗнче, паян, пӗлтернӗ тӑрӑх, Мари Элте ҫунакан вӑрмансен лаптӑкӗ чакнӑ. Малтан 54 гектар ҫӗр ҫинче ҫулӑм алхаснӑ пулсан халӗ – 27 гектар ҫинче.

Кӳршӗ регионта инкеклӗ лару-тару режимӗ вӑйра. Ҫунакан вӑрмана сӳнтерес ӗҫ малалла пырать. Пушарпа 1 пин ҫын кӗрешет. Ҫав шутра хӑйирӗкҫӗсем те пур. Ҫавӑн пекех 175 техника пушара сӳнтерет. РФ Инкеклӗ лару-тӑру министерствин Ка-32 тата Ми-8 самолечӗсем сывлӑшран ҫулӑм ҫине шыв тӑкаҫҫӗ. Тепӗр йывӑр 18 техника пушарпа кӗрешет.

Вӑрман ҫывӑхӗнче вырнаҫнӑ ялсем патӗнче ҫулӑм ан куҫтӑр тесе ҫӗре сухаланӑ, ҫынсене эвакуациленӗ.

ШӖМ тунӑ сӑн

Екатеринбургри тата Новороссийскри арҫынсем Чӑваш Енри ҫынсене улталанӑ. Вӗсене тытса чарас тесе Чӑваш Енри полицейскисем ҫав регионсене командировкӑна кайнӑ.

Вӗсен серепине Шупашкарта пурӑнакан 34 ҫулти арҫын лекнӗ. Ҫу уйӑхӗн варринче вӑл тӗнче тетелӗнче видеокарта сутнине курнӑ та хуҫипе калаҫса унӑн счечӗ ҫине 30 пин тенкӗ куҫарнӑ. Анчах тавара хӑй илеймен. Ҫак ӗҫе Екатеринбургри 21 ҫулти каччӑ тунӑ. Вӑл айӑпне йышӑннӑ, тӑкакӑн пӗр пайне саплаштарнӑ.

Новороссийскри арҫын вара судпа темиҫе хутчен те айӑпланнӑ. Вӑл Чӑваш Енри курьерсене телефон номерӗ ҫине укҫа хума ыйтнӑ, тӗл пулсан тавӑрса пама шантарнӑ. Паллах, сӑмахне тытман.

Шупашкар хулинче Сарпи ятлӑ ачана регистрациленӗ. Ӑна республикӑн тӗп хулин Калинин районӗн администрацийӗн ЗАГСӗнче шута илнӗ.

Сарпи ятлӑ хӗрача Дениспа Илемпин ҫемйинче кун ҫути курнӑ. Ҫамрӑк ҫемье йышӗ ҫурла уйӑхӗн 13-мӗшӗнче хушӑннӑ.

ЗАГС ӗҫченӗсене ҫамрӑк мӑшӑр пӗлтернӗ тӑрӑх, пепкен ятне арӑмӗпе упӑшки пӗрле канашласа татса панӑ. Ят хитре та янӑравлӑ пултӑр тесе тӑрӑшнӑ. Тата ятне кура шӑпи тесе те калаҫҫӗ.

Сайра тӗл пулакан, чӑн чӑвашла ят хунӑ ҫемьери ачана ЗАГС ӗҫченӗсем ырлӑхпа-сывлӑх, ҫемьере килӗштерсе пурӑнма суннӑ.

Шупашкар хулинче кӳршӗллӗ Мари Элти хӗрача шар курнӑ. Ҫурла уйӑхӗн 22-мӗшӗнче 6 ҫулхи ача Чӑваш Енре хӑнара пулнӑ. Ҫавӑн чухне вӑл типӗ фонтанӑн решетки ҫине урипе пуснӑ та ури анса кайнӑ. Ачана тухтӑрсен пулӑшӗ кирлӗ пулса тухнӑ.

Урине хытах ыраттарнӑ ачана васкавлӑ пулӑшу машинипе пульницӑна илсе кайнӑ. Ку хыпара «Ҫыхӑнура» форумра «Марийская Правда» пӗлтерни тӑрӑх ҫырнӑ. Асӑннӑ ҫӑлкуҫри хыпара тӗрӗслеме форум журналисчӗсем пирӗн республикӑри васкавлӑ пулӑшу службипе ҫыхӑннӑ, унтисем ҫирӗплетсе панӑ.

Форумра хыпара вуланисем тимлӗрех пулмалла, фонтан ҫине кӗрсе каймалла мар тесе ҫыраҫҫӗ.

Паян ҫӗрле Шупашкарпа Ҫӗнӗ Шупашкарта, асӑннӑ хуласемпе юнашар ытти вырӑнта та ирпе ирех сӗрӗм шӑрши сарӑлнӑ, тӗтӗм йӑсӑрланса тӑнӑ. Ҫакна Кӳкеҫре пурӑнакансем те сисрӗҫ.

Тӗтӗм-сӗрӗм шӑрши пирки хула ҫыннисем вырӑнти хӑй тытӑмлӑх органӗсенчи диспетчер службине пӗлтерме тытӑннӑ. Ҫав вӑхӑтрах яваплӑ органсенче ӗҫлекен специалистсем пӑлханса ӳкме сӗнмен. Тӗтӗм-сӗрӗм тӑнӑ вӑхӑтра чӳречесене хупса хума, урамра маска тӑхӑнма сӗннӗ. Урамри шӑршӑ ҫармӑс вӑрманӗсем ҫуннипе ҫыхӑннӑ. Ҫил пирӗн республика енне вӗрнӗрен унти тӗтӗм-сӗрӗм кунта килнӗ.