Чӑваш наци музейӗн Фейсбукри страницинчен илнӗ сӑнӳкерчӗк

Ҫак кунсенче Хакас Республикинче Наци музейӗсен пӗтӗм Раҫҫейри ассамблейин пухӑвӗ иртнӗ. Унта Чӑваш наци музейӗн директорӗ Ирина Меньшикова хутшӑннӑ.

Форума чӳк уйӑхӗн 1-мӗшӗнче уҫӑлнӑ, чӳк уйӑхӗн 3-мӗшӗнче хупӑннӑ. Мероприяти Л.Р. Кызласов ячӗллӗ наци краеведени музейӗнче пухӑннӑ.

Наци музейӗсен ассамблейин форумӗн пӗрремӗш кунӗнче Ирина Меньшикова Хакас Республикинчи краведени музейӗпе туслӑ ҫыхӑну тытасси ҫинчен калакан килӗшӗве алӑ пуснӑ. Икӗ регион пӗрлехи проектсене пурнӑҫа кӗртме палӑртать, куравсем йӗркелесшӗн.

Форумӑн иккӗмӗш кунӗнче Шупашкарти музей директорӗ «Национальная культура в России как инструмент государственной политики» (чӑв. Раҫҫейри наци культури — патшалӑх политикин инструменчӗ) сессире «Чувашская вышивка – культурный код нации: сохраняем, рассказываем, развиваем» (чӑв. Чӑваш тӗрри — наци культурин вӑрттӑнлӑхӗ: упратпӑр, каласа кӑтартатпӑр, аталантаратпӑр) ятпа доклад тунӑ.

cap.ru сӑнӳкерчӗкӗ

Паян Чӑваш Енри ял хуҫалӑхӗпе тирпейлекен промышленноҫра ӗҫлекенсем професси уявне пуҫтарӑннӑ. Правительство ҫуртӗнче вӗсене республика Элтеперӗ Олег Николаев патшалӑх наградисемпе чысланӑ.

«Кунта паян ял хуҫалӑх отраслӗнче тӑрӑшакан уйрӑмах тӑрӑшуллӑ, хӑйсен витӗмлӗ тӳпине хывнӑ (сирӗн пирки сирӗн ӗҫтешӗрсем тата коллективӑрсем, халӑх ҫапла шухӑшлать) ҫынсем пуҫтарӑннӑ», — ҫапларах палӑртса хӑварнӑ Элтепер.

Ял хуҫалӑхӗнче тата агропромышленноҫра ӗҫлекенсене вӑл уявпа саламланӑ.

Палӑртар: асӑннӑ отрасль ӗҫченӗсен професси кунне юпа уйӑхӗн иккӗмӗш вырсарникунӗнче палӑртаҫҫӗ-ха. Анчах пирӗн патра ӑна уй-хирти ӗҫе вӗҫленӗ хыҫҫӑн пуҫтарӑнаҫҫӗ.

112 сӑнӳкерчӗкӗ

Шупашкартан вӗҫсе кайнӑ ҫӑмӑл моторлӑ самолёт Чӗмпӗрте инкеке лекнӗ.

Паян, чӳк уйӑхӗн 3-мӗшӗнче, «Diamond DA42 M» маркӑллӑ самолёт Чӗмпӗрти аэродрома ирӗксӗртен анса ларнӑ. Ҫавӑн чухне вӑл шассине сиенленӗ, анчах ҫынсем шар курман. Ку хыпара РФ Следстви комитечӗн Транспорт ҫинчи следстви управленийӗнче пӗлтерни тӑрӑх «Ҫыхӑнура» форумра хыпарланӑ.

Самолёт вӗренӳпе тренировка вӗҫевне тухнӑ. Вӑл Шупашкарти аэропортран хускалса кайнӑ. Салонта инструкторпа курсант пулнӑ. Самолёт хуҫи — Чӗмпӗрти граждан авиацийӗн институчӗ.

Пӑтӑрмах сӑлтавне тӗпчевҫӗсем тӗрӗслӗҫ.

Шупашкарти «Салют» культура керменӗ умӗнчи скверта йывӑҫсем ҫухалма тытӑннине хула ҫыннисем асӑрханӑ. «Тин кӑна «Салют» умӗнче хӑтлӑх кӗртсе пӗтернӗ, тӗмсем лартнӑ, вӗсем вара ҫук та. Кам тата мӗн тӗллевпе вӗсене кӑклать – ӑнланмалла мар. Симӗс тавралӑхсӑр юлас килмест. Вандалсенчен епле хӳтӗленмелле?» - ҫырнӑ ҫынсем.

Шупашкар хула администрацийӗ пӗлтернӗ тӑрӑх, объекта хальлӗхе йышӑнман, ҫавӑнпа подрядчикӑн ревизи туса кӑкланӑ тӗмсем вырӑнне ҫӗннисене лартмалла. Халӗ унта видеокамерӑсем вырнаҫтарнӑ.

Сӑмах май, «Альянсгрупп» организаципе культура ҫурчӗ умне хӑтлӑх кӗртмешкӗн 89 млн тенкӗлӗх килӗшӳ тунӑ.

21.мвд.рф сӑнӳкерчӗкӗ

Шупашкар хулинче пурӑнакан 67 ҫулти хӗрарӑм ют ҫын карттипе усӑ курнӑ. Ҫыннӑн банк карттипе вӑл апат-ҫимӗҫ лавккисенче 10 пине яхӑн тенкӗлӗх тавар туяннӑ.

Банк карттине 44 ҫулти хӗрарӑм ҫухатнӑ. Шупашкарта пурӑнакан ҫав ҫын картта ҫинчен 10 пине яхӑн тенкӗ ҫӗтни пирки смс-ҫыру килсе йӗрке хуралҫисенчен пулӑшу ыйтнӑ.

Лавккара ют ҫын карттипе апат-ҫимӗҫ туяннӑ ватӑ хӗрарӑм видеокамера ҫине лекнӗ. Ӑна шыранине пӗлтерсе массӑллӑ информаци хыпарӗсенче хыпарланӑ. Амӑшне йӗрке хуралҫисем шыранине ватӑ ҫынна хӗрӗ пӗлтернӗ. Ҫавӑн хыҫҫӑн хӗрарӑм йӗрке хуралҫисем патне васканӑ, ҫын карттипе усӑ курнишӗн питех те ӳкӗннине, парӑма ҫывӑх вӑхӑтра татассине пӗлтернӗ.

«Ҫыхӑнура» форумри сӑнӳкерчӗк

Ӗнер Чӑваш Ен Элтеперӗ Олег Николаев кӑшӑлвируспа ҫыхӑннӑ ыйтусемпе тӳрӗ эфир ирттерчӗ. Ҫавӑн вӑхӑтӗнче Шупашкар райнӗн тӗп пульницинче (вӑл Кӳкеҫре вырнаҫнӑ) прививка тумасӑр сертификат параҫҫӗ тесе комментари ҫыракан тупӑннӑ.

Пульницӑн тӗп врачӗ Владимир Викторов Чӑваш Ен Элтеперӗн аккаунтӗнче ҫырнӑ хыпар тӗлӗшпе тӗрӗслев ирттерессине пӗлтернӗ. Вӑл каланӑ тӑрӑх, ку сӑмаха хальлӗхе ҫирӗплетсе паман.

Асӑннӑ хыпара тӗрӗслессине республикӑн вице-премьерӗ – сывлӑх сыхлав министрӗ Владимир Степанов хӑй ҫине илессине пӗлтернӗ. Асӑннӑ хыпара правӑна сыхлакан органсем тӗрӗслӗҫ.

cap.ru сӑнӳкерчӗкӗ

QR-кодсем республикӑра хӑҫанччен пулӗҫ? Ӗнер ЧР Элтеперӗ Инстаграмра ирттернӗ тӳрӗ эфирта пӗлтернӗ тӑрӑх, йӗркене, ахӑртнех, Ҫӗнӗ ҫулччен те пӑрахӑҫламӗҫ.

Чӳк уйӑхӗн 8-мӗшӗнченпе Чӑваш Енре общество вырӑнӗсене вакцинациленнине ӗнентерекен кода кӑтартсен ҫеҫ кӗртеҫҫӗ. QR-кода кӑтартма телефон ҫук тӑк ӑна хут ҫине пичетлеме пулать.

Аса илтерер: юпа уйӑхӗн 11-мӗшӗнченпе республикӑра кӑшӑлвирус вӑйлӑ сарӑлма пуҫланӑран чару мерисем йышӑннӑ.

https://forum.zarulem.ws сайта вырнаҫтарнӑ видеоран илнӗ скриншот

Ҫӗнӗ Шупашкарта ҫуран ҫӳрекен ҫынсенчен пӗри машинӑран тарса ӳкме ӗлкӗрнӗ. Хӑй чӗрӗ те вӑр-вар пулни ҫеҫ ӑна инкекрен ҫӑлса хӑварнӑ.

Пӑтӑрмах чӳк уйӑхӗн 2-мӗшӗнче 16 сехет те 13 минутра пулса иртнӗ. Патшалӑхӑн ҫул-йӗр инспекцийӗнче пӗлтернӗ тӑрӑх, «Поло» водителӗ ҫул ҫине тухнӑ чухне «Ларгус Лада» автомобиле ирттерсе яман.

Икӗ машина ҫапӑннӑ хыҫҫӑн «Ларгус» ҫуран ҫӳрекен ҫын ҫине пырса кӗме тытӑннӑ. Арҫын машинӑран чупса тарма ӗлкӗрнӗ. «Ларгус» водительне вара пулӑшу кирлӗ пулса тухнӑ. Вӑл тухтӑрсем патне кайнӑ.

topobrazovanie.ru сайтри сӑн

Вӑраха тӑсӑлакан канмалли кунсем вӗҫленсен аслӑ шкулсене дистанци мелӗпе вӗрентме ирӗк панӑ. Хушӑва РФ Вӗрентӳпе ӑслӑлӑх министерстви хатӗрленӗ.

Документра палӑртнӑ тӑрӑх, чӳк уйӑхӗн 8-мӗшӗнчен аслӑ шкулсен тата ӑслӑлӑх организацийӗсен дистанци мелӗпе вӗрентмешкӗн ирӗк пур. Анчах вӗренекенсене кун пирки виҫӗ кун маларах пӗлтермелле, методика тӗлӗшпе пулӑшмалла. Ҫав вӑхӑтрах вӗренӳ пахалӑхӗ упранса юлтӑр тесе вӗренекенсем мӗнле ӗлкӗрсе пынине тӗрӗслемелле.

Аса илтерер: Чӑваш Енре канмалли кунсем чӳк уйӑхӗн 7-мӗшӗччен тӑсӑлӗҫ.

Республикӑра ӗҫлемен кунсем пыраҫҫӗ. Кӑшӑлвирус ытлашши ан сарӑлтӑр тесе республикӑра та, ҫӗршывӗпе те чӳкӗн 7-мӗшӗччен предприятисем ӗҫлемеҫҫӗ, лавккасенчен — куллен кирлӗ тавара сутакансене ҫеҫ ӗҫлеме ирӗк панӑ. Апат-ҫимӗҫ лавккисем, калӑпӑр, хупӑнман.

Паян хулана тухса килме тӳр килчӗ. Малтанах наци вулавӑшне ҫитсе килесшӗнччӗ, анчах ковикул (ковидлӑ каникула ҫапла ят панӑ хӑшӗсем…) пынине аса илтӗм те кӗнекесене тавӑрса парассине тепӗр эрнене куҫарас терӗм. Хулана вара машшин запчаҫӗсем сутакан лавккана ҫитес тӗллевпе тухрӑм — вӗсене хупман иккен. Мана вара ку майлӑ пулчӗ. Вӗсен лавккинче шӑп та тахҫанах туянма ӗмӗтленнӗ велоприцеп сутатчӗҫ. Халь каярах пулин те, ҫавах тепӗр ҫула хӑварас мар терӗм, туянма ҫула тухрӑм. Унсӑр пуҫне ӗнер пӗри 5 пинлӗх спонсорла купонсем туянчӗ. Вӑт ҫав укҫана велоприцеп туянма ярас терӗм те. Укҫана тӗллевсӗр тӑкаклатӑп тесе ан вӑрҫӑр: хыпар ҫыракансене уйӑхсерен тӳлемелли укҫана (вӑл 13 пинпе танлашать) тахҫанах уйӑрса хунӑ.

Ковикул пирки пӗлтернӗ хыҫҫӑн ҫынсенчен ыйткаларӑм: эсир ӗҫлетӗр-и, ҫук-и?

Малалла...