cap.ru сӑнӳкерчӗкӗ

Кӑҫал нарӑс уйӑхӗнче 660 грамм таякан, 30 сантиметр тӑршшӗ хӗрача ҫуралнӑ. Вӑл 24-мӗш эрнере ҫут тӗнчене килнӗ. Амӑшӗ ӑна хӑйех ҫуратнӑ. Хӗрарӑм кӑшӑлвируспа чирлени лару-тӑрӑва тата кӑткӑслатнӑ.

Тухтӑрсем унӑн пурнӑҫӗшӗн кӗрешнӗ, пӗчӗкскере 2 операци те тума тивнӗ. Ачана Президент пепкелӗх центрӗнчи тухтӑрсем пӑхнӑ, унӑн пурнӑҫӗшӗн пӗр уйӑх ҫурӑ кӗрешнӗ. Кӑштахран ача хӑй сывлама, ҫиме хӑнӑхнӑ. Кун хыҫҫӑн тин ӑна тин ҫуралнӑ ачасен патологи уйрӑмне куҫарнӑ. Унта ачапа пӗрле амӑшӗ те выртнӑ.

Ачан чӗрипе, куҫӗпе кӑлтӑксем пулнӑран ӑна икӗ операци тунӑ. Кун хыҫҫӑн пепке пульницӑра тепӗр пӗр уйӑх ҫурӑ выртнӑ. Киле кӑларнӑ чухне вӑл 2200 грамм тайнӑ, 46 сантиметр тӑршшӗ пулнӑ.

Сӗнтӗрвӑрри районӗнчи Лапри Чӑрӑшкасси ялӗ ҫывӑхӗнчи уйра ҫу уйӑхӗн пуҫламӑшӗнченех хӗрӳ ӗҫсем пынӑ. Унта студентсем, нимеҫӗсем ӗҫленӗ.

Чӑннипе, ку ӗҫе тума пуҫлани пирки маларах пӗлтернӗччӗ. Сӑмах - Андриян Николаевӑн агропортречӗ пирки. Халӗ ӑна туса пӗтернӗ ӗнтӗ.

Хастарсем малтан портрета йӗрлесе тухнӑ, унтан кӗреҫе тытса ҫӗре чавнӑ. Агропортрет халӗ ҫӳлтен питӗ илемлӗ курӑнать.

Инкелӗ лару-тӑру министерстви тунӑ сӑн

Куславкка районӗнче Атӑлта "Сормовский-3068" ятлӑ йывӑр тиев илсе ҫӳрекен карап ӑшӑха ларнӑ. Кун пирки Инкеклӗ лару-тӑру министерствине паян пӗлтернӗ.

Инкеклӗ лару-тӑру министерствин ӗҫченӗсем вырӑна ҫитнӗ. Пӗтӗмпе 6 ҫын. Кунсӑр пуҫне ведомствӑн техники те пулӑшма килнӗ.

Аса илтерер: Атӑлта карап ӑшӑха ларни ытти ҫулсенче те пулнӑ.

obrazov.cap.ru сӑнӳкерчӗкӗ

Ҫу уйӑхӗн 28-мӗшӗнче ача ҫурчӗсенче Уҫӑ алӑксен кунӗ иртӗ. Ҫавӑн чухне ӑна виҫӗ ҫуртра йӗркелӗҫ: Шупашкарти, Ҫӗмӗрлери тата Пӑрачкаври И.Н. Ульянов ячӗллӗ ача ҫурчӗсенче.

Ют ачана ҫемьене илсе кил ӑшши пама ӗмӗтленекен ҫынсем ача ҫурчӗсене ҫитсе унти воспитанниксен пурнӑҫӗпе паллашма, вӗсен пурнӑҫӗ ҫинчен ыйтса пӗлме, шӑпӑрлансемпе калаҫма пултарӗҫ.

Аслисен специалистсемпе: педагог-психологсемпе, учитель-логопедсемпе тата социаллӑ педагогсемпе — канашлама май килӗ.

Хӑнасем валли спортпа массӑллӑ мероприятисем, ӑмӑртусем, вӑйӑсем ирттерӗҫ. Кайран ачасене каникул вӑхӑтӗнче киле вӑхӑтлӑха хӑнана илсе кайса усрама та пулать.

Уҫӑ алӑксен кунӗ 10 сехетре пуҫланӗ.

Айӑплава пурнӑҫлакан федераци служби тунӑ сӑн

Куславккари юсанмалли 5-мӗш колонире ларакан хӗрарӑмсем теттесем ҫӗленӗ. Вӗсене Кӳкеҫри интернатра пурӑнакан ачасене парнеленӗ.

Тетте ҫӗлес шухӑш айӑпланнӑ хӗрарӑмсен ҫуралнӑ. Вӗсем пукане театрӗнче усӑ курмалли юмахри сӑнарсене ӑсталанӑ.

Интернатра пурӑнакан, ӑс енчен хавшак ачасем теттесене алла тытсан питӗ савӑннӑ, вӗсен куҫӗ телейпе ҫиҫнӗ. Ку акци шӑпӑрлансене кӑна мар, айӑпланнӑ хӗрарӑмсене хӑйсене те савӑнтарнӑ. Ара, вӗсем ҫапла майпа хӑйсен юратӑвне кӑтартма пултарнӑ.

uniticket.ru сайтри сӑн

Ҫӗртме уйӑхӗн 1-мӗшӗнчен Шупашкартан Сочи хулине самолет вӗҫме тытӑнӗ. "Победа" авиакомпани сайтӗнче пӗлтернӗ тӑрӑх, пӗр енне вӗҫмешкӗн 5199 тенкӗ кирлӗ. Ку багажа шутламасан. Самолет Шупашкартан 19 сехет те 15 минутра ҫула тухӗ. Тепӗр 3 сехет те 25 минутран Сочире пулӗ.

Рейссем тунтикунсерен, юнкунсерен, эрнекунсерен тата вырсарникунсерен пулӗҫ. Самолет Сочие юпа уйӑхӗн вӗҫӗччен вӗҫӗ.

Аса илтерер: тӗнчери лару-тӑрӑва пула кӑнтӑрти хӑш-пӗр хулана самолетсене вӑхӑтлӑха вӗҫме чарнӑ.

Пӗлтӗр Чӑваш Енри министрсенчен пуринчен ытла ӗҫлесе илни — экономика аталанӑвӗн тата пурлӑх хутшӑнӑвӗсен министрӗ Дмитрий Краснов. Ҫулталӑкри унӑн тупӑшӗ малтанхинчен 28 хут ӳссе 32,184 млн тенкӗпе танлашнӑ.

Транспорт министрӗн Владимир Осиповӑн тупӑшӗ 3,88 хут ӳссе унчченхи 2,9 миллионран 11,26 млн тенке ҫитнӗ. Промышленность министрӗн Александр Кондратьевӑн 2021 ҫулхи тупӑшӗ — 8,61 миллион тенкӗ; финанс министрӗн – 7,762 миллион; строительство, архитектура тата ҫурт-йӗрпе коммуналлӑ хуҫалӑх министрӗн Павел Даниловӑн — 6,716 миллион тенкӗ; ӗҫ тата социаллӑ хӳтлӗх министрӗн Алена Елизарован — 3,431 миллион; ял хуҫалӑх министрӗн Сергей Артамоновӑн – 3,226 миллион; цифра аталанӑвӗн министрӗн Кристина Майнинан – 3,07 миллион; сывлӑх сыхлав министрӗн Владимир Степановӑн – 3,063 миллион; спорт мнистрӗн Василий Петровӑн – 2,744 миллион; культура министрӗн Светлана Каликован – 2,627 миллион; ҫутҫанталӑк тата экологи министрӗн Эмир Бедертдиновӑн – 2,31 миллион тенкӗ.

Пӗлтӗр пуринчен сахал ӗҫлесе илни — ведомствӑна 2021 ҫулхи авӑн уйӑхӗн вӗҫӗнчен ертсе пыракан вӗренӳ министрӗ Дмитрий Захаров. Унӑн тупӑшӗ 1,583 миллион тенкӗпе танлашнӑ.

Малалла...

ВКонтакте сӑнӳкерчӗкӗ

Пирӗн республикӑри хӑш-пӗр муниципалитетра ыркӑмӑллӑх центрӗсем ӗҫлеҫҫӗ. Унта ҫынсем хӑйсем унччен тӑхӑннӑ, анчах япӑхса кайман ҫипуҫа илсе пырса параҫҫӗ. Вӗсене хими хатӗрӗсемпе тасатнӑ хыҫҫӑн кирек кам та илсе кайса тӑхӑнма пултарать.

Шупашкарти ыркӑмӑллӑх центрӗсем ҫак адрессемпе вырнаҫнӑ:

1. 139-мӗш стрелоксен урамӗ, 22 («Байкал» суту-илӳ ҫурчӗ, 1-мӗш хут). Ӗҫ графикӗ: ытларикун-эрнекун – 13:00 сехетрен 19:00 сехетчен; шӑматкун – 11:00 сехетрен 16:00 сехетчен.

2. Декабристсен урамӗ, 18А.

Ӗҫ вӑхӑчӗ: ытларикун-эрнекун – 13:00 сехетрен 19:00 сехетчен; шӑматкун – с 11:00 сехетрен 16:00 сехетчен.

3. Энтузиастсен урамӗ, 34-мӗш ҫурт («Москва» (чӑв. Мускав) суту-илӳ центрӗ, 1-мӗш хут).

Ӗҫ вӑхӑчӗ: тунтикун-эрнекун – 11:00 сехетрен 17:00 сехетчен.

4. Шупашкар, И. Яковлев проспекчӗ, 3-мӗш ҫурт («Универ21Маг» суту-илӳ ҫурчӗ, 2-мӗш).

Ӗҫ вӑхӑчӗ: тунтикун-эрнекун – 15:00 сехетчен 19:00 сехетчен.

5. Трактор тӑвакансен проспекчӗ, 73 («Хӗрлӗ хӗрес» организаци).

Ӗҫ вӑхӑчӗ: 08:00 сехетрен пуҫласа 18:00 сехетчен. Телефон номерӗ 89871230814.

Унсӑр пуҫне ыркӑмӑллӑх центрӗсем Ҫӗнӗ Шупашкарпа Шупашкар районӗнче пур.

Малалла...

forum.zarulem.ws сӑнӳкерчӗкӗ

Чӑваш Енӗн Элтеперӗн Администрацийӗ 6 миллион тенкӗ тӑракан кроссовер туянасшӑн.

«Hyundai Palisade» автомобилӗн пуҫламӑш хакӗ 6,29 млн тенкӗ тӑрать. Ку хакпа тулли приводлӑ хура кроссовер, дизель двигателӗллӗ автомбиль илесшӗн. Тӳре-шара машинӑра 7 вырӑн, 3 рет пултӑр тесе ӗмӗтленет.

«Руль умӗнче» порталта пӗлтернӗ тӑрӑх, ҫулталӑк ҫурӑ каялла Чӑваш Ен Элтеперӗн Администрацийӗн гаражӗ 3,2 миллион тенкӗ парса «Genesis G-80» автомобиль туяннӑ, ӑна полпреда турттарма Мускава ӑсатнӑ. Республика ертӳҫи Олег Николаев хальхи вӑхӑтра «Genesis G-90» машинӑпа ҫӳрет. Ӑна «Ипотека корпорацийӗ» туяннӑ, ӑна вӑл тӳре-шарана усӑ курма арендӑна панӑ.

park72.ru сайтри сӑн

Юрать, банк ӗҫченӗсем сисчӗвленнӗ. Унсӑрӑн 70 ҫулти хӗрарӑм ултавҫӑсене 100 пин тенкӗ куҫарса парӗччӗ.

Ҫу уйӑхӗн 19-мӗшӗнче кӑнтӑрла Вӑрнарти полици уйрӑмне банкран систернӗ: тивӗҫлӗ канури хӗрарӑм такама 100 пин тенкӗ куҫарса парасшӑн-мӗн.

Акӑ мӗн пулнӑ. Ҫак хӗрарӑм «Тик-Токра» Израильти аманнӑ ҫар ҫыннипе паллашнӑ та ӑна пулӑшасшӑн пулнӑ. Ҫавӑнпа вӑл банка укҫа куҫарма кайнӑ. Банк ӗҫченӗ ватӑскере укҫа куҫарса памашкӑн тӑхтама ыйтнӑ. Полицейскисем вара кун тӗлӗшпе тӗрӗслев пуҫарнӑ. «Израильти аманнӑ ҫар ҫыннине» шыраҫҫӗ.