alki-rt.ru сайтри сӑн

Вӑрмар районӗнчи 45 ҫулти арҫын кӑҫал пуш уйӑхӗнче тӗнче тетелӗнче брокер платформи ҫинче укҫа ӗҫлесе илме май пурри пирки вуласа пӗлнӗ. Хайхискер кредитсем илнӗ те инвестицисемпе ӗҫлеме тытӑннӑ.

Арҫын счет ҫине пӗтӗмпе 2 миллион та 220 пин тенкӗ хунӑ. Анчах кайран пӗр пусне те каялла тавӑрайман. Ултавҫӑсен аллине лекнине ӑнлансан вӑл полицие пулӑшу ыйтма пынӑ.

Халӗ ку тӗслӗх тӗлӗшпе пуҫиле ӗҫ пуҫарасси пирки шутлаҫҫӗ.

srnsk.ru сайтри сӑн

Чӑваш Енре пӗр ҫын сидрпа наркӑмӑшланни пирки пӗлтернӗччӗ. Аса илтерер: вӑл - Улатӑртан, 19 ҫулта.

Телее, химипе токсикологи экспертизи палартнӑ тӑрӑх, каччӑ сидрпа наркӑмӑшланман. Унӑн унчченхи чирӗ йывӑрланнӑ-мӗн. Халӗ ӑна Шупашкара илсе килнӗ, профиль уйрӑма куҫарса сиплеме хатӗрленеҫҫӗ.

Аса илтерер: Чӗмпӗр облаҫӗнче 18 ҫын "Мистр Сидр" ӗҫмепе наркӑмӑшланнӑ. Ун пек тӗслӗхсем Удмурт Республикинче, Чулхула облаҫӗнче те пулнӑ. Сидра Самар облаҫӗнче туса кӑларни паллӑ.

Чӗмпӗр облаҫӗнчи ШӖМ тунӑ сӑн

Чӗмпӗр облаҫӗнче ҫынсем «Мистер Сидр» ӗҫсе наркӑмашланса вилни пирки ӗнер хыпарланӑччӗ.

Хальхи статитистика кӑтартнӑ тӑрӑх, Чӗмпӗр облаҫӗнче 51 ҫын наркӑмӑшланнӑ, вӗсенчен 24-шӗ вилнӗ. Ытти регионта та сидрпа наркӑмашланнӑ тӗслӗхсене шута илнӗ. Чӑваш Енре 1 ҫын хӑйне япӑх туйнӑ. Вӑл – Улатӑр хулинчен, 19 ҫулта. Ӑна медпулӑшу параҫҫӗ.

Самар облаҫӗнче – 7, Удмурт Республикинче 2 ҫын (пӗри 20 ҫулта) вилнӗ. Чулхула облаҫӗнче 2 ҫын наркӑмӑшланса пурнӑҫран уйрӑлнӑ.

"Малалла" хаҫат архивӗнчи сӑн

Ҫӗмӗрлере Пионер организацийӗ йӗркеленнӗренпе 50 ҫул ҫитнине халалланӑ парка хатлӑлатма пуҫланӑ. Ленин палӑкӗллӗ трибунӑна демонтаж тӑваҫҫӗ.

Ҫук, Ленин палӑкне вуҫех илсе пемӗҫ. Ӑна урӑх ҫӗре куҫарӗҫ - хырсен хыҫӗнчи стела ҫывӑхӗнче.

Проектпа килӗшӳллӗн хӑш-пӗр хыра касӗҫ. Ҫапла икӗ лапам пӗрлешӗ: парк тата тӳрем.

Палӑртмалла: 2016 ҫулта трибунӑна ҫӗнетнӗ, Ленин палӑкне сӑрланӑ.

cap.ru сайтри сӑн

Ку эрнере ҫӑлавпа шырав служби республикӑри икӗ ҫынна пӳрнинчен ҫӗрре хывма пулӑшнӑ.

Пӗр хӗрарӑм ятсӑр пӳрнинчен ҫӗрӗ хывайман. Ирӗксӗрех специалистсенчен пулӑшу ыйтма тивнӗ унӑн.

Кун хыҫҫӑн службӑна тепӗр шӑнкӑрав ҫитнӗ: ача пӳрнинчен ҫӗрӗ хываймасть-мӗн. Ҫӑлавҫӑсем ӑна тӳрех пулӑшнӑ: ҫӗрре ятарлӑ хатӗрпе асӑрханса каснӑ. Ачан пӳрни шыҫӑнсах кайнӑ пулнӑ.

«Батырево sos» пабликри сӑнӳкерчӗк

Пӑла юханшывӗпе мӗн пулнӑ. Ҫу уйӑхӗн 25-мӗшӗнче «Батырево sos» пабликра сӑнӳкерчӗксем вырнаҫтарнӑ: Пӑла юханшывӗ сӗт тӗслӗ.

Ку – Елчӗк районӗнче. Тӗнче тетелне вырнаҫтарнӑ сӑнӳкерчӗксене прокуратура асӑрханӑ та тӗрӗслев пуҫарнӑ. Кун хыҫҫӑн тивӗҫлӗ йышӑну тӑвӗҫ.

Палӑртмалла: Пӑла юханшывне 2020, 2021, 2022 ҫулсенче таса мар шыв юхнине палӑртнӑ. Кӑҫал та ав ҫав лару-тӑрӑвах.

t.me/pro_cheby каналтан илнӗ сӑнӳкерчӗк

Шыв айӗнчи ҫунатсемлӗ «Валдай45Р» хӑвӑпт ҫӳрекен катерсем кӑҫал та ҫӳрӗҫ. Вӗсем паян Шупашкара килсе ҫитнӗ. Катерсем ыран, ҫӗртме уйӑхӗн 1-мӗшӗнче, ҫула тухӗҫ.

Шупашкартан Хусана ҫитме билет хакӗ 630 тенкӗ тӑрӗ, 6-10 ҫулсенчи ачасемшӗн 315 тенкӗ тӳлемелле.

Катерсем Шупашкартан Хусана кашни кунах ирхи 8 сехетре тата кӑнтӑрла иртни 16 сехетре хускалӗҫ. Хусантан та ҫав вӑхӑтрах тухса килӗҫ.

Катерсем Свияжска та ҫӳрӗҫ.Унта ҫитме те блет хакӗ Хусана кайнӑ чухлех. Анчах ҫула шӑматкунпа вырсарникунсерен тухӗҫ. Шупашкартан 8 сехетре тапранса кайӗ, Свияжскран — 14 сехет те 30 минутра.

Билетсене Шупашкарти юханшыв порчӗн сайтӗнче туянма май пур. Свияжска каяс тесе онлайн илме май килмӗ.

Инкеклӗ лару-тӑру министерстви тунӑ сӑн

Ӗнер, ҫу уйӑхӗн 30-мӗшӗнче, кӑнтӑрла иртсен 14 сехетре Шупашкар районӗнчи Оппукасси ялӗнче икӗ хутлӑ ҫурт ҫунма тытӑннӑ. Ҫав вӑхӑтра кил хуҫи, 67 ҫулти хӗрарӑм, килте пулман, аякка кайнӑ.

Кӳршисен 7 ҫулти мӑнукӗ пӳртре ҫулӑм тухнине пӗрремӗш асӑрханӑ. Вӑл кун пирки аслисене каланӑ. Вӗсем вара тӳрех пушарнӑйсене чӗннӗ.

Ҫӑлавҫӑсем пушара 11 минутра сӳнтернӗ. Ҫулӑм тӗпеле кӑна сиенлетсе ӗлкӗрнӗ.

Инкеклӗ лару-тӑру министерстви тунӑ сӑн

Ӗнер тата виҫӗмкун республикӑра аслатиллӗ ҫумӑр ҫурӗ. Шел те, аҫа-ҫиҫӗм шар кӑтартмасӑр пулман.

Ҫу уйӑхӗн 27-мӗшӗнче каҫхине Йӗпреҫ поселокӗнче Почта урамӗнчи пӗр ҫурт тӑррине аҫа ҫапнӑ. Пушарнӑйсем хӑвӑрт ҫитнӗ, ҫулӑма 3 минутран сӳнтернӗ.

Ҫу уйӑхӗн 28-мӗшӗнче кӑнтӑрла Шупашкарти Гузовски ращинчи йывӑҫа аҫа ҫапнӑ. Ӑна та хӑвӑртах сӳнтернӗ.

ШӖМ архивӗнчи сӑн

Вӑрнарта пурӑнакан 67 ҫулти арҫын вырӑнти пасарта 5 пин тенкӗлӗх шӳтлӗ укҫа тупнӑ та ҫав вӑхӑтрах унпа лавккана кайма шатланӑ.

Арҫын лавккара 8 килограмм какай туяннӑ. 58 ҫулти сутуҫӑ укҫа суя шӳтлӗ пулнине асӑрхаман та - каялла 2700 тенкӗ панӑ. Укҫа суя пулнине вӑл каярахпа кӑна асӑрханӑ, тӳрех полицие пӗлтернӗ.

Арҫынна кӗҫех тытса чарнӑ. Ун тӗлӗшпе пуҫиле ӗҫ пуҫарнӑ.