Тулӑри Елена Сафиева ӳнерҫӗ Чӑваш патшалӑх художество музейне сивӗ фарфортан хатӗрленӗ керамикӑран хатӗрленӗ чечек ҫыххи парнеленӗ. Сивӗ фарфортан чечексем ӑсталакан керамика флорисчӗн музейра маларах «Диалог цветов» (чӑв. Чечексен пуплевӗ) курав ӗҫленӗ.

Курав хупӑнас умӗн художник Левитан натюрмортне тӗпе хурса хатӗрленӗ чечек ҫыххине парнеленӗ.

Маргарита Красотина журналист Фейсбукра пӗлтернӗ тӑрӑх, музейра ӗҫлекенсем ӗҫе Левитан художникӑн ӳкерчӗкӗпе юнашар вырнаҫтарма шухӑшлаҫҫӗ. Анчах хальлӗхе музейри вырӑс тата ют ҫӗршыв ӳнерӗн пайӗнче реконстуркци пырать.

Юсав ӗҫӗсене вӗҫлесен Елена Сафиеван парни сумлӑ музейра хӑйӗн тивӗҫлӗ вырӑнне тупӗ.

Нумаях пулмасть Елчӗк районӗнчи Тип Тимеш ялӗ ҫывӑхӗнче шкул автобусӗ аварие лекни пирки хыпарланӑччӗ. Аса илтерер: авари аванӑн 9-мӗшӗнче пулнӑ, автобус ҫине «Тойота» кӗрсе кайнӑ. Ҫапӑннӑ хыҫҫӑн шкул автобусӗ кювета чӑмнӑ. Аварире автобус водителӗ тата салонри икӗ ача шар курнӑ, вӗсене пульницӑра пулӑшу панӑ.

Аварире «Тойота» водителӗ, 52 ҫулти арҫын, айӑплӑ тесе палӑртнӑ. Вӑл юраман вырӑнта шкул автобусӗнчен иртсе кайма пуҫланӑ. Прокуратура тӗрӗслев ирттернӗ хыҫҫӑн шкул автобусӗн водителӗ те айӑплӑ пулни палӑрнӑ. Вӑл шкул директорӗ ҫирӗплетнӗ маршрутпа кайман-мӗн. Ҫитменнине, автобусра маршрут программи, ачасен списокӗ, вӗсем ӑҫта пурӑннине кӑтартакан хут, вӗсен саккунлӑ представителӗсен телефон номерӗсем пулман. Ҫавна май шкул автобусӗн водителӗ тӗлӗшпе административлӑ ӗҫ пуҫарнӑ. Шкул директорӗ тата Елчӗк район администрацийӗн пуҫлӑхӗ тӗлӗшпе представлени ҫырнӑ, унта айӑплӑ ҫынсене дисциплинарлӑ майпа явап тыттарас ыйтӑва пӑхса тухма ыйтнӑ.

"ПТРК" тунӑ видео скринӗ

Шупашкара Мускав хирургӗ Евгений Зорин килнӗ. Вӑл хырӑмлӑха резекци тумалли операципе ӑсталӑх класӗ ирттернӗ. Ку операци мӑнтӑр ҫынсене кирлӗ, вӗсем начарланаймаҫҫӗ пулсан вӑл шӑпах пулӑшӗ.

Пирӗн республикӑра ку таранччен кунашкал операци туман-ха. Ку – пӗрремӗш. Пӗр хӗрарӑм мӑнтӑр, ниепле те начарланайман. Тухтӑрсем ӑна кунашкал операци ирттерме сеннӗ, вӑл килӗшнӗ. Евгений Зорин Шупашкар пульницинче кунашкал икӗ операци тунӑ.

Хырӑмлӑха резекци туни мӗн-ха вӑл? Хирург хырӑмлӑхран 1 сантиметр диаметрлӑ ҫӳхе ҫанӑ тӑвать, хырӑмлӑх 10 миллилитр ҫеҫ тӑрса юлать, ыттине касаҫҫӗ. Ҫапла майпа пациент сахалрах ҫиме тытӑнать, начаранать.

cheb.mk.ru сайтри сӑн

Экспертсем Раҫҫей регионӗсен пуҫлӑхӗсем Инстаграмра мӗн чухлӗ «лайк» пуҫтарнине тишкернӗ. РБК пӗлтернӗ тӑрӑх, вӗсем ботсен шучӗ мӗн чухлӗ пулнине те шута илнӗ.

«Лайксем» пухас енӗпе ЧР Элтеперӗ Михаил Игнатьев 34-мӗш вырӑн йышӑннӑ. Вӑтамран унӑн сӑнӳкерчӗкӗсене 1100 ҫын килӗшнине кӑтартса «лайк» пуснӑ. Палӑртса хӑварар: тепчев ирттернӗ чухне Элтепер страницине 21900 яхӑн ҫын пӑхса тӑнӑ. Танлаштарӑмра малти вырӑна Чечня Республикин пуҫлӑхӗ йышӑннӑ, юлашки йӗркере – Архангельск облаҫӗн кӗпӗрнаттӑрӗ.

Ботсем пирки калас тӑк, Михаил Игнатьевӑн Инстаграмри страницинче вӗсен шучӗ – 30 процент. Эппин, ку 6570 ҫынпа танлашать. Ку енӗпе ытларах Тува Республикин пуҫлӑхӗ, Мускав мэрӗ, Ҫурҫӗр Осети ертӳҫи «палӑрнӑ».

Чи «таса» аккаунт – Чукотка автономи округӗн кӗпӗрнаттӑрӗн. Унӑн страницине 2 пине яхӑн ҫын пӑхса тӑрать.

Чулхулари канашлу саманчӗ

Ӗнер Чулхулара газ моторӗн топливи енӗпе канашлу иртнӗ. «Газпром» ПАО директорсен канашӗн ертӳҫи Виктор Зубков ертсе пынӑ ларӑва Чӑваш Ен Элтеперӗ Михаил Игнатьев та хутшӑннӑ.

Виктор Зубков ҫӗршывра газпа ӗҫлекен моторсен шучӗ анлӑн сарӑлнине палӑртнӑ. Топливо вырӑнне ҫутҫанталӑк газӗпе усӑ курас текенсен йышӗ ӳссе пырать. Юлашки вӑхӑтра ҫак йыш 2,5 хута яхӑн ӳснӗ.

«Газ тултарма май паракан компрессор станцийӗсем ҫителӗксӗр. Ҫӗнӗ объектсем хута ярсан ҫитес вӑхӑтра республикӑра чылай ыйту татӑлӗ. Транспортра тарифсене чакарма май килӗ. Ҫак ыйту ялсемпе хуласенче пысӑк пӗлтерӗшлӗ. Халӑх кулленех тӗрлӗ транспортпа усӑ курать. Ҫутҫанталӑк газӗ тӑван тавралӑха та сиен кӳмӗ», — тенӗ канашлу хыҫҫӑн Чӑваш Ен пуҫлӑхӗ.

Газ заправкисене ҫӗршывӑн регионӗсенче уҫма 2019 ҫулта федераци хыснинче 3,3 миллиард тенкӗ пӑхса хӑварнӑ. Кӑҫал вӗсене 87, килес ҫул 117 уҫасшӑн.

Ria56.ru сайтри сӑнӳкерчӗксем

Юлашки 5 ҫул хушшинче Чӑваш Енре пушар тухнӑ тӗслӗхсен шучӗ чакнӑ. Шыва путнӑ тӗслӗхсем те сахалланнӑ.

Паян Чӑваш Енӗн Министрсен Кабинечӗн черетлӗ ларӑвӗ иртнӗ. Унта Чӑваш Республикин гражданла оборона тата чрезвычайлӑ лару-тӑру министрӗ Вениамин Петров доклад тунӑ.

Вениамин Петров республикӑра «112» пӗрлехи номер лайӑх ӗҫленине хыпарланӑ. Федераци хыснинчен тата республика бюджетӗнчен ӗҫе йӗркелесе яма 2016-2018-мӗш ҫулсенче 97,3 млн тӑкакланӑ. Чӑваш Енӗн Инкеклӗ ӗҫсен министерствин пурлӑхпа техника базине ҫӗнетме 100,0 млн тӑкакланӑ. Пушарпа кӗрешекен 17 автомашина туянса панӑ. Чӑваш Енӗн хыснинче ведомство учрежденийӗсен пурлӑхпа техника базине ҫӗнетме 2020-2022-мӗш ҫулсенче 567,0 млн пӑхса хӑварнӑ.

kanash-info.ru сайтри сӑнӳкерчӗк

Ӗнер, авӑн уйӑхӗн 24-мӗшӗнче, Шупашкарта Потребительсен правине хӳтӗлес енӗпе ӗҫлекен координаци канашӗн ларӑвӗ иртнӗ. Ӑна Чӑваш Ен Элтеперӗ Михаил Игнатьев ертсе пынӑ. Ҫавӑнта сывлӑх сыхлав учрежденийӗсен ӗҫне те тишкернӗ.

ЧР Сывлӑх сыхлав министерствине пӑхӑнакан учрежденисенче 2018 ҫулта планпа пӑхнӑ 12, планпа пӑхман 123 тӗрӗслев ирттернӗ. Тӗрӗслев хыҫҫӑн 12 акт, 91 асӑрхаттару хучӗ ҫырнӑ. Кӑҫалхи 6 уйӑхра асӑрхаттару хучӗсен шучӗ 46-па танлашнӑ.

Тӗп ҫитменлӗх медицина ӗҫ-хӗлне, медицина хучӗсене йӗркелессипе, диспансеризаци тӗрӗслевӗ кӑларассипе, медицина пулӑшӑвӗн стандарчӗсене пӑхӑннипе ҫыхӑннӑ. Росздравнадзор управленийӗ те тӗрӗслев ирттернӗ. Вӗсем чылай чухне ҫынсем ҫахавлани тӑрӑх тӗрӗслев йӗркеленӗ. 2018 ҫулта Ҫӗнӗ Шупашкарти хула пульници пирки ытларах евителнӗ пулсан, кӑҫал — Шупашкарти васкавлӑ медицина пулӑшӑвӗн пульници пирки.

Regnum.ru сайтри сӑнӳкерчӗк

Ыран, авӑн уйӑхӗн 26-мӗшӗнче, Раҫҫей Федерацийӗн Президенчӗн Чӑваш Енри йышӑну пӳлӗмӗнче «хӗрӳ лини» телефонӗ ӗҫлӗ. Ӑна тӗрлӗ ведомство пӗр шухӑшлӑ пулса ӗҫлеттерӗҫ. «Хӗрӳ линие» Пӗтӗм тӗнчери ваттисен кунӗ ҫывхарнӑ май йӗркеленӗ.

Ваттисен ыйтӑвӗсене тӗрлӗ социаллӑ ведомство: РФ Пенси фончӗн управленийӗн, Ӗҫлев тата социаллӑ хӳтлӗх министерстви, Медицинӑпа социаллӑ экспертиза тӗп бюровӗн, Медицина обязательнӑй страхованийӗн фончӗн, Социаллӑ страховани фончӗн специалисчӗсем — хуравлӗҫ.

«Хӗрӳ лини» телефон номерӗ — (8352) 39-36-81. Ыйтусене, аса илтерер, ыран, авӑн уйӑхӗн 26-мӗшӗнче, 10 сехетрен пуҫласа 12 сехетчен йышӑнӗҫ. Шӑнкравлӑр, хӑвӑра хумхантаракан ыйтусене специалистсем пулӑшнипе уҫӑмлатӑр.

Шупашкарти коопераци институтӗнче Австри учёнӑйӗн, Хӗвелтухӑҫ Европа специалисчӗн, философи докторӗн Андреас Каппелерӑн «Чуваши. Народ в тени истории» (чӑв. Чӑвашсем. Истори сулхӑнӗнчи халӑх) кӗнеки пичетленнӗ. Кун пирки эпир аслӑ шкулӑн редакципе издательство пайӗн тӗп редакторӗ Эрбина Никитина Фейсбукра хыпарланичнен пӗлтӗмӗр.

«Die Tschuwaschen. Ein Volk im Schatten der Geschichte» монографи виҫӗ ҫул каялла «Böhlau Verlag» (Кёльн–Вена) издательствӑра нимӗҫле пичетленнӗ. Халӗ унӑн вырӑсла версийӗпе паллашма май пур. Монографие нимӗҫлерен Шупашкарти коопераци институчӗн гуманитари дисциплинисен тата ют ҫӗршыв чӗлхисен кафедрин доценчӗ, педагогика ӑслӑлӑхӗсен кандидачӗ Елена Толстова куҫарнӑ.

Андреас Каппелер 2011 ҫулта Чӑваш Ене килсен эпир маларах асӑннӑ институтра пулнӑ. Унти ӑслӑлӑх енӗпе ӗҫлекен Леонид Таймасов проректорпа туслашнӑ. Ҫавӑнтанпа аслӑ шкул Австри ӑсчахӗпе туслӑ ҫыхӑну тытать.

Шупашкар районӗнчи Кӳкеҫри общежити ишӗлсе анма пултарать. Ҫакӑнтан шикленеҫҫӗ иккен асӑннӑ поселокри Первомайски урамӗнчи 20-мӗш ҫуртра пурӑнакансем.

Унта паян Чӑваш Ен Патшалӑх Канашӗн депутачӗ Александр Андреев пулнӑ. Пӗччен мар. Журналистсемпе.

МИХра ӗҫлекенсене «халӑх тарҫи» ҫуртри уйрӑмах япӑх вырӑнсене кӑтартса ҫӳренӗ. Стенасенчен пӗри ҫурӑлнине кура ҫурт ӳлӗмрен ишӗлме пултарӗ. Апла специалистсене чӗнтерсе хаклаттармалла. Депутат ҫурт ҫивитти ҫине хӑпарса пӑхнӑ. Ҫивитти япӑхнине пула шыв анакан вырӑна палӑртнӑ. Нӳхрепри пӑрӑхсем тутӑх, вӗсене ылмаштармалла. Чылай туалет хӑрушӑ.

Депутат ҫурта сантехника чӗннӗ. Эрнекун пыма. Вӑл шыв пӑрӑхӗсене май килнӗ таран йӗркене кӗртӗ.

Ҫурт тӑрӑмӗпе ҫыхӑннӑ ыйтусене Александр Андреев Чӑваш Енӗн Патшалӑхӑн ҫурт-йӗр инспекцине, прокуратурӑна ӑсатнӑ.