www.chgign.ru сайтран илнӗ сӑнӳкерчӗк

Паян, нарӑс уйӑхӗн 8-мӗшӗнче, Чӑваш Енӗн наци вулавӑшӗнче «Хальхи чӑваш лирики» лекци иртӗ. Лекторӗ – Ольга Скворцова, филологи наукисен кандидачӗ, И.Я. Яковлев ячӗллӗ Чӑваш патшалӑх педагогика университечӗн доценчӗ.

Ольга Владимировна хальхи вӑхӑтри паллӑ чӑваш поэчӗсен пултарулӑхӗпе, вӗсем чӑваш литературине епле тӳпе хывнипе паллаштарӗ, XXI ӗмӗрте чӑваш лирики епле аталаннине, унӑн хӑйнеевӗрлӗхне тишкерӗ.

Мероприяти вулавӑшӑн конференц-залӗнче 14:00 сехетре пуҫланӗ. Кӑмӑл пуррисене унта пурне те кӗртӗҫ.

Телегамри t.me/Chuv_today каналтан илнӗ сӑнӳкерчӗксем

Чӑваш наци музейӗнче чӑвашла тумланса сӑн ӳкерӗнме пулать. Кун пирки Телеграмри «Чувашия сегодня» (чӑв. Чӑваш Ен паян) каналта пӗлтернӗ.

Культура учрежденийӗн сайтӗнче пирӗн тӑван халӑхӑмӑрӑн историйӗпе культури тӗлӗнмелле пуяннине аса илтернӗ. Чӑн та, хушпупа тухья кирек епле хӗрарӑмпа хӗре те илем кӳрӗҫ. Арҫын вара чӑваш кӗпипе шупӑр тӑхӑнсан маттурланса кайӗ. Ун пек пӑхаттир чӑваш халапӗсенчи Улӑпӑн курӑнӗ.

Музей ӗҫченӗ вара чӑваш тумӗпе паллаштарӗ, сӑн ӳкерӗнме килӗшӳллӗ ҫипуҫ тупса парӗ.

ШӖМ тунӑ сӑн

Паян Шупашкарта патшалӑх автоинспекцийӗн ӗҫченӗсем Богдан Хмельницкий урамӗнче патрульте пулнӑ. Вӗсем ҫул хӗрринче грузовик ларнине, вӑл ытти машинӑна ҫӳреме чӑрмантарнине асӑрханӑ. Ун патне пынӑ та - водитель тӑнне ҫухатма пуҫланӑ, аран калаҫнӑ.

Инспектрсем васкавлӑ медпулӑшу чӗннӗ. Тухтӑрсем киличчен арҫынна медпулӑшу панӑ, машинине ҫул ҫинчен куҫарнӑ. Кайран арҫыннӑн тӑванӗсемпе ҫыхӑннӑ.

Халӗ водителӗн сывлӑхӗ йӗркеллех.

"Про Город" сайтӗнчи сӑн

Паян Шупашкарта "Солнечный" микрорайонта подъезд умӗнче ҫамрӑк арҫын виллине тупнӑ. Ӑна 16 сехет ҫурӑра асӑрханӑ.

Халӑх корреспонденчӗ "Про Город" хаҫата пӗлтернӗ тӑрӑх, вӑл 12-мӗн хутран ӳксе вилнӗ. Вырӑна полицейскисемпе васкавлӑ медпулӑшу ҫитнӗ.

Инкек Хӗвеллӗ урамри 14-мӗш ҫуртӑн 3-мӗш корпусӗнче пулнӑ.

culture.cap.ru сӑнӳкерчӗкӗ

Нарӑс уйӑхӗн 9-26-мӗшӗсенче пирӗн республикӑра Чӑваш музыкин фестивалӗ иртӗ. Унта тӑван тӑрӑхӑмӑрти 7 коллектив, ҫав шутра — театрпа концерт тата вӗрентӳ учрежденийӗсем — хутшӑнӗҫ.

Нарӑс уйӑхӗн 10-мӗшӗнче, эрнекун, Шупашкарти Яков Ухсай ячӗллӗ культура керменӗнче «Чуна уҫма юрла, тӑван» концерт-лектори иртӗ.

Мероприяти чӑваш композитор шкулӗ темиҫе тапхӑрпа аталаннипе паллаштарӗ. Сцена ҫинче чӑваш музыкине профессионал шайӗнче пуҫарса янӑ Ф. Павловпа С. Максимов, ҫавӑн пекех Ф. Лукин, Г. Хирпӳ, Г. Лебедев тата хальхи вӑхӑтри композиторсен: Ю. Григорьевӑн, А. Васильевӑн, Л. Чекушкинан — хайлавӗсем янӑрӗҫ.

Концерт-лекторире композиторсен пултарулӑхӗпе те тарӑнрах паллашма май килӗ.

Паян Шупашкарти Эгер бульварӗнчи 22-мӗш ҫуртра пушар пулнине пӗлтернӗччӗ. Аса илтерер: 10 сехет те 15 минутра 8-мӗш хутри хваттерте тӗтӗм тухни пирки пушарнӑйсене пӗлтернӗ. 10 сехет те 58 минутра пушара алхасма чарнӑ.

Пушарнӑйсем ҫитиччен коридорта тӗтӗм сарӑлнӑ. Ҫынсене ятарлӑ пусмапа эвакуциленӗ. Пӗтӗмпе – 10 ҫынна, вӗсен йышӗнче 2-шӗ – ачасем.

Ҫуннӑ хваттерте 1949 ҫулта ҫуралнӑ хӗрарӑм пурӑннӑ. Вӑл вилнӗ. Малтанлӑха пӗлтернӗ тӑрӑх, тӗтӗмпе наркӑмӑшланнӑ. Специалистсем хальлӗхе шутланӑ тӑрӑх, ҫулӑм электропралука пула тухнӑ.

ok.ru сайтри сӑн

Чӑваш Енре вытрезвитель уҫасси пирки тахҫанах калаҫма пуҫланӑччӗ. Хӑҫан пулӗ вӑл?

ЧР Элтеперӗ Олег Николаев ӑна кӑҫалах уҫасси пирки каланӑ. Вӑл куншӑн яваплӑ ведомствӑсене нарӑс уйӑхӗн 17-мӗшӗччен вытрезвитель ӑҫта пулассине палӑртма хушнӑ. «Пуш уйӑхӗн пусламӑшӗччен пирӗн вӑл мӗнле пулассин планне татӑклӑн пӗлмелле», - тенӗ Олег Алексеевич.

Сӑмах май, хӑш-пӗр регионта вытрезвительсем ӗҫлеҫҫӗ. Вӗсем ӳсӗр тата шӑнса кӳтнӗ ҫынсене пулӑшаҫҫӗ.

Паян Шупашкарта общежитире пушар тухнӑ. Хальхинче - Эгер бульварӗнчи 22-мӗш ҫуртра.

Пушар пирки 10 сехет иртсен пӗлтернӗ. 10 сехет 58 минутра пушарнӑйсем ҫулӑма алхасма чарнӑ.

Малтанлӑха пӗлтернӗ тӑрӑх, 8-мӗш хутри хваттер ҫуннӑ. Пушарнӑйсем унта алӑка ҫӗмӗрсе кӗнӗ. Ҫынсене пусмапа эвакуациленӗ: аслӑ ӳсӗмри 8 ҫынна тата 2 ачана ҫапла урама илсе тухнӑ. Шел те, 1 ҫын вилнӗ.

Аса илтерер: ҫулталӑк пуҫламӑшӗнче Илбеков урамӗнчи ҫурт ҫуннӑччӗ. Унта 17-ри хӗр сӗрӗмпе наркӑмӑшланса вилнӗ.

Телеграмри t.me/Chuv_today каналтан илнӗ сӑнӳкерчӗк

Сӗнтӗрвӑрринче ҫуралнӑ спортсмен тӗнче шайӗнче ҫӗнтернӗ.

Дмитрий Геращенко Бразили джиу-джитсувӗ енӗпе тӗнче чемпионатне хутшӑннӑ. Ӑмӑрту Питӗр хулинче иртнӗ. Унта тӗнчери 3300 спортсмен пуҫтарӑннӑ.

Тепӗр майлӑ каласан, Чӑваш Ен каччи Бразилири, Мексикӑри, Америкӑри Пӗрлешӳллӗ Штатсенчи тата ытти нумай ҫӗршыври спортсменпа вӑй виҫнӗ. Вӗсене вӑл хӑйӗн ӑсталӑхӗпе вӑйне кӑтартса панӑ – ҫӗнтерӳҫӗ пулса тӑнӑ.

Элӗк районӗнчи 63 ҫулти арҫынна суд ҫирӗп режимлӑ колоние 13 ҫул ҫурӑлӑха ӑсатма йышӑннӑ. Вӑл ача тӗлӗшпе ясар ӗҫне пурнӑҫланине суд ҫирӗплетнӗ.

Следстви тата суд палӑртнӑ тӑрӑх, пӗлтӗр ҫӗртме уйӑхӗнче Элӗк районӗнчи пӗр ялта ҫак арҫын 6 ҫулти хӗрачана хӑйӗн кил хуҫалӑхне икӗ хутчен илӗртсе кӗнӗ. Унтан вӑл ясар ӗҫне пурнӑҫланӑ.

Арҫын судра хӑйӗн айӑпне йышӑнман. Ҫапах патшалӑх айӑплавҫи ҫӗртме уйӑхӗнче чӑннипех те ҫапла пулнине ӗнентернӗ.