culture.cap.ru сӑнӳкерчӗкӗ

Атӑлҫи тата Урал тӑрӑхӗнчи федераци округӗсенчи хӑйсем тӗллӗн вӗреннӗ пултарулӑх коллективӗсен фестиваль-конкурсӗн зонӑри иккӗмӗш тапхӑрӗ пысӑк гала-концертпа вӗҫленнӗ. Пултарулӑх ӑмӑртӑвӗ «Йӑла-йӗрке» номинаципе иртнӗ, унта Раҫҫейӗн 9 регионӗнчи 14 коллектив хутшӑннӑ.

Фестиваль-конкурсра 5 коллектива лауреат ятне панӑ. Сумлӑ ҫав йыша халӑх инструменчӗсен «Эревет» ансамблӗ (Шупашкар) те лекнӗ. Коллектив лауреат ятне тата «Культура» наци проекчӗн грантне тивӗҫнӗ.

culture.cap.ru сӑнӳкерчӗкӗ

Чӑваш Республикин Наци библиотеки централизациленӗ майпа кӑҫал 6 млн тенкӗлӗх 11 пине яхӑн экземпляр кӗнеке туяннӑ, вӗсенче 82 библиотекӑна валеҫсе тухнӑ.

Ҫӗнӗ кӑларӑмсем ялти 50 библиотекӑна, хулари 25 вулавӑша, ҫавӑн пекех Улатӑрти, Канашри, Куславккари, Ҫӗнӗ Шупашкарти, Ҫӗмӗрлери, Шупашкарти тӗп вулавӑшсене тата Чӑваш Енӗн Наци библиотекине лекнӗ.

Вулавӑшсен кӗнеке фончӗ ҫапла майпа тӗрлӗ отрасль литературипе, словарьсемпе тата энциклопедисемпе, илемлӗ литературӑпа пуянланнӑ.

cap.ru сӑнӳкерчӗкӗ

Шупашкарта паянтан нумай хваттерлӗ ҫуртене ӑшӑ парса тӑма пӑрахӗҫ. Кун пирки хула администрацийӗн пуҫлӑхӗ Денис Спирин пӗлтернӗ, ҫавӑн ҫинчен калакан ятарлӑ йышӑнӑва алӑ пусса ҫирӗплетнӗ.

Ӑшӑ пама пӑрахнӑ хыҫҫӑн ӑшӑпа тивӗҫтерекен организацисем черетлӗ сезона хатӗрленме тытӑнӗҫ. Ҫавна май вӗри шыва вӑхӑтлӑха сӳнтерӗҫ.

Вӗри шыва хӑш-пӗр ҫуртра ҫу уйӑхӗн 10-мӗшӗ хыҫҫӑнах сӳнтерӗҫ, ятарлӑ графика хатӗрлесе хунӑ ӗнтӗ.

cap.ru сӑнӳкерчӗкӗ

Тӑвай районӗнчи Турикас Тушкилти ача пахчинче агролаборатори уҫӑлнӑ. Ӑна ял хуҫалӑх производителӗ Сергей Илларионов пулӑшнипе пуҫарнӑ. Усламҫӑ сӗт туса илессипе ӗҫлет.Кунашкал лаборатори республикӑра пӗрремӗш хут уҫӑлнӑ.

Агролабораторире ачасем ял хуҫалӑхӗпе паллашаҫҫӗ.

Палӑртмалла: ку проекта республикӑри мӗнпур районти 150 ытла фермер, аграри хутшӑннӑ.

cap.ru сӑнӳкерчӗкӗ

Паян Шӑмӑршӑ районӗнче вӑрман ҫунма пуҫланӑ. Ҫулӑм алхасма пуҫланине 12 сехет те 46 минутра видеокамерӑсем тӑрӑх асӑрханӑ.

Вырӑна тӳрех пушарнӑйсем ҫитнӗ. 14 сехет тӗлне пушара сӳнтернӗ. Ку ӗҫе 23 ҫын, 5 техника хутшӑннӑ. Ҫулӑм ҫур гектар ҫинче алхаснӑ.

Палӑртмалла: республикӑра пушара хирӗҫ режим пулнине йышӑннӑ.

"Чӑваш Ен" ПТРК сайтӗнчи сӑн

Шупашкарта "Тутлӑ эрнекун" ярмӑрккӑ пӗрремӗш хут иртнӗ. Ҫичӗ фермер савутра ӗҫлекенсене тата хула ҫыннисене хӑйсен продукцийӗпе паллаштарнӑ.

Кунашкал ярмӑрккӑсене ҫулталӑк тӑршшӗпех ирттерме пулать. Анчах хӑҫан иртесси пуҫарупа тухакан предприятирен килет. Ярмӑрккӑ унти лапамра иртет-ха та. Йӗркелӳҫӗ суту-илӳ речӗсене хатӗрлесе фермерсене чӗнет.

moshenik.ru сайтри сӑн

Вӑрнар районӗнче пурӑнакан 53 ҫулти хӗрарӑм, шкулта вӗрентекенре ӗҫлекенскер, палламан ҫынна шанса укҫасӑр юлнӑ.

Ун патне мессенджерта палламан ҫын шӑнкӑравланӑ. Унӑн ячӗпе такам кредит илесшӗн-мӗн. Хайхи арҫын хӗрарӑма дистанци мелӗпе пӑхса тӑма май пур приложени лартма сӗннӗ. Вӗрентекен мӗн каланине пурнӑҫланӑ та телефонпа пӗр хушӑ усӑ курман.

Каҫхине хӗрарӑм кун пирки упӑшкине каласа панӑ. Лешӗ тӳрех ултавҫӑсем пирки шутласа илнӗ. Вӗсем счечӗсене тӗрӗсленӗ. Унтан 230 пин тенкӗ ҫухалнӑ. Ҫитменнине, ултавҫӑсем хӗрарӑм ячӗпе 1700 тенкӗ кредит илнӗ.

lomonosovlo.ru сайтри сӑн

Чӑваш Ен ҫыннисене вӑрмана кӗме чарасшӑн. Вӑхӑтлӑха кӑна.

ЧР Ҫутҫанталӑк министерстви ҫынсене вӑрмана 3 эрнелӗхе кӗме чаракан хушу проектне хатӗрлет. Унпа килӗшӳллӗн, ҫу уйӑхӗн 2-23-мӗшӗсенче вӑрмана кӗме юрамӗ. Ку пушар тухас хӑрушлӑхпа ҫыхӑннӑ.

Вӑрманпа ӗҫлекен ҫынсене кӑна пырса тивмӗ ку чару. Ҫавӑн пекех пурте усӑ куракан ҫулпа ҫӳреме чармӗҫ.

kolodischi.by сайтри сӑн

Ҫулталӑк вӗҫлениччен республикӑра агромаркет уҫма палӑртнӑ. Кун пирки ЧР Элтеперӗ Олег Николаев пӗлтернӗ.

Унта фермерсен продукцине сутӗҫ. Кунашкал лавкка пирӗн патра хальччен пулман. Раҫҫейре те ҫук.

Агромаркетра фермерсем валли вырӑнсем пулӗҫ. Ҫитес вӑхӑтра лавккан дизайн тата суту-илӳ технологийӗн концепцине хатӗрлӗҫ.

Агромаркета хута яма республика хыснинчен 41 миллион тенкӗ уйӑрнӑ.

Кӑҫалхи ака уйӑхӗ типӗ ҫанталӑкпа палӑрса юлӗ ахӑртнех. Синоптиксем пӗлтернӗ тӑрӑх, ака пуҫланнӑранпа Шупашкарта ҫумӑр ӳкмен.

Ҫак кунсенче вырӑнӑн-вырӑнӑн кӑна ҫумӑр ҫӑвӗ. Ака уйӑхӗн 26-мӗшӗнче республикӑна циклон килмелле. Ун чухне ҫур уйӑхри норма ҫумалла.

Тунтикунпа ытларикун 20 градус ӑшӑ пулӗ. Юнкунпа кӗҫнерникун ҫил вӑйланӗ, кӑштах сивӗтӗ.

Эрнекун ӑшӑ таврӑнӗ. Шӑматкун, акан 29-мӗшӗнче, чи ӑшӑ кун пулӗ. Малтанлӑха пӗлтернӗ тӑрӑх, акан 30-мӗшӗнче тата ҫу уйӑхӗн 1-мӗшӗнче 10-12 градус кӑна ӑшӑ пулӗ.