Кӑҫал ҫанталӑк мӗнле пулассине, паллах, тӗп-тӗрӗс палӑртма ҫук. Ҫапах синоптиксем мӗн каланине тимлер.

Хӗл мӗн вӗҫлениччен сивӗ ҫанталӑк тӑрӗ. Ҫуркунне вара типӗ те ӑшӑ килмелле. Анчах пуш уйӑхӗнче нӳрӗк нумай пулмалла. Эппин, ҫил-тӑман вӗҫтерӗ, юр ҫӑвӗ.

Ҫулла та сивӗрех кунсем пулӗҫ. Уйрӑмах - утӑ тата ҫурла уйӑхӗсем. Ҫӗртме пуҫламӑшӗнче ҫумӑр ҫӑвӗ, сывлӑш температури те нормӑран пӗчӗкрех пулӗ.

Кӗркунне ӑшӑ та типӗ килмелле. Тепӗр хӗл вара сивӗ, юрсӑр ҫанталӑкран пуҫланӗ.

rf-smi.ru сайтри сӑн

Кӑҫалтан республикӑри ача ҫурчӗсенче воспитани илекен ачасен хӑйсен тӗллӗн тӑкакламалли укҫа-тенкӗ пулӗ. Ку пуҫарӑва ЧР Министрсен Кабинечӗ ырланӑ.

Хальхи вӑхӑтра ача ҫурчеӗсенче 72 шӑпӑрлан пурӑнать. Ку уйӑхран пуҫласа унти ачасем финанс пӗлӗвӗ енӗпе ӑсталӑхне туптама пуҫлӗҫ. Ку вӗсене алӑра укҫа-тенкӗ тытма вӗрентӗ.

Кӑҫалтан ача ҫурчӗсенчи шӑпӑрлансене алла мӗн чухлӗ укҫа парассине пӗлтермен.

2022 ҫулта Чӑваш Енре 639 ҫын ятне, хушаматне е ашшӗн ятне улӑштарнӑ. Ку, виҫӗм ҫулхипе танлаштарсан, 17,2 процент ытларах. Кун пирки ЧР Юстици ӗҫӗсен патшалӑх служби пӗлтерет.

Ятне улӑштарнисен йышӗнче ытларах хӗрарӑмсем. Чылай чухне вӗсем хушаматне улӑштараҫҫӗ: качча кайнӑ чухне хӗр чухнехине хӑварнӑ та халӗ упӑшкинне илнӗ. Пӗлтӗр хушаматне 553 ҫын улӑштарнӑ. 15 ҫын вара ятне, хушаматне тата ашшӗн ятне урӑхла ҫыртарнӑ. 508 хӗрарӑм ятне улӑштарнӑ. Унашкал ятсен йышӗнче - Доминика, Мирра, Альяна, Арослан, Кассиопея, Апрель. Пӗлтӗр 131 арҫын ятне улӑштарнӑ.

vk.com/tsur21 видеовӗнчен илнӗ скриншотпа усӑ курнӑ

Коммуналлӑ хуҫалӑх ӗҫченӗсем ӗҫлесе ҫитерейменни пирки ҫынсем тӗнче тетелӗнче тата Патшалӑх пулӑшӑвӗсен порталӗ урлӑ ҫийӗнчех пӗлтереҫӗ. Унта мӗн ҫырнисене Чӑваш Республикин Регион управленийӗн центрӗ сӑнаса тӑрать. Ҫул-йӗр ҫинчи лару-тӑру пирки Ҫӗнӗ ҫул умӗн 400 ытларах хутчен евитленӗ. Вӗсем пирки хула администрацине ҫийӗнчех пӗлтернӗ.

Шупашкарта пурӑнакан Анастасия С., ав, сӑмахран, Бауман урамӗнчи чарӑнура картлашкана тасатса тӑманнишӗн кӑмӑлсӑрланнӑ. Татьяна М. вара 42-мӗш ача пахчипе 36-мӗш шкул хушшинчи Хевеш урамӗнчи тротурара тасатса тӑманни пирки систернӗ.

Ҫынсем евитленине, Регион управленийӗн центрӗ ура ҫине тӑратнине кура коммуналлӑ хуҫалӑх ӗҫченӗсем ҫак тата ытти кӑлтӑка ҫийӗнчех пӗтернӗ.

t.me/vchuvashii сӑнӳкерчӗкӗ

Паян Шупашкарта общежити ҫуннӑ. Вут-ҫулӑм Шевченко урамӗнчи 29-мӗш ҫуртра тухнӑ.

Инкек кӑнтӑр кунӗнче сиксе тухнӑ. Иккӗмӗш хутра вырнаҫнӑ хваттер хыпса илнӗ.

Инкек сиксе тухсан ятарлӑ службӑсем 9 хутлӑ ҫуртран 26 ҫынна, ҫав шутра 10 ачана, эвакуациленӗ. 17 ҫынна тухтӑр пулӑшӑвӗ кирлӗ пулса тухнӑ.

Инкек вырӑнне тӗрлӗ служба ӗҫченӗсем пырса ҫитнӗ, ҫав шутра полиципе прокуратура таранах. Пушар сӑлтавне специалистсем палӑртӗҫ.

t.me/vchuvashii сӑнӳкерчӗкӗ

Чӑваш Ене «6 кадров» (чӑв. 6 кадр) проектӑн ҫӑлтӑрӗсем килӗҫ.

Телеграмри @вчувашиижить каналта хыпарланӑ тӑрӑх, Шупашкарта Эдуард Радзюкевич тата Галина Данилова пултарулӑхне курса киленме май килӗ.

Ыран, кӑрлач уйӑхӗн 6-мӗшӗнче, вӗсем «Опасный холостяк» спектакль кӑтартӗҫ.

Афишӑна ӗненсен, спектакль кулӑшла тата кӗтмен финалпа палӑрса тӑрать.

Спектакле курас тесен Ухсай ячӗллӗ культура керменне (вӑл Шупашкарти Ленинград урамӗнчи 32-мӗш ҫуртра вырнаҫнӑ) 19 сехете каймалла.

Телеграмри @enteshsem каналтан илнӗ сӑнӳкерчӗк

Чӑваш Енри тата тепӗр тӑрӑхра 2023 ҫула чӑвашла ёлкӑпа кӗтсе илнӗ. Телеграмри @enteshsem каналта пӗлтернӗ тӑрӑх, ун пек ёлкӑна Хӗрлӗ Чутайӗнчи шкулта вырнаҫтарнӑ.

Маларах эпир Элӗк районӗнчи «Ҫӑлкуҫ» ача пахчинче ӗҫлекенсем ёлкӑна чӑвашла капӑрлатни пирки хыпарланӑччӗ, унтан тата Шупашкарти «Салют» культура керменӗнче ҫавӑн пек ёлка вырнаҫтарнине пӗлнӗччӗ.

Чӑвашла теттесемпе илемлетнӗ ёлкӑсем ыттисенчен нимпе те кая мар. Унтан та ытларах — илемлӗрех те.

t.me/chuv_prok сӑнӳкерчӗкӗ

Паян, кӑрлач уйӑхӗн 5-мӗшӗнче, ирхи 10 сехет те 15 минутра «Шупашкар–Сӑр» ҫул ҫинче инкек пулса иртнӗ.

«Kia Rio» ҫӑмӑл машина хирӗҫ килекен ҫул ҫине тухса кайса «Ford Transit» микроавтобуспа ҫапӑннӑ. Асӑннӑ транспорт Красноармейскинчен Шупашкара 121-мӗш маршуртпа ҫӳрекенскер пулнӑ. Салонта 10 пассажир пулнӑ.

Ҫӑмӑл машина рульне тытса пынӑ 1990 ҫулта ҫуралнӑ хӗрарӑм вилнӗ, инкеке лекнӗ тепӗр 9 ҫын аманнӑ. Ҫав шутра — ҫӑмӑл машинӑри 3-7 ҫулсенчи виҫӗ ача.

forum.na-svyazi.ru порталтан илнӗ сӑнӳкерчӗк

Ӗнер, кӑрлач уйӑхӗн 4-мӗшӗнче, Патӑрьел районӗнчи тӗп пульницӑра пушар тухнӑ.

Специалистсем малтанласа палӑртнӑ тӑрӑх, пушар сӑлтавӗ — массаж пӳлӗмӗнчи стена ҫине ҫакмалли ӑшӑтмалли хатӗр юсавсӑр пулнинче.

Вут-ҫулӑм ҫынсене шар кӑтартман. Ӑшӑтмалли хатӗр ҫунса кайнӑ тата массаж пӳлӗмӗнчи 1 тӑваткал метр лаптӑк сиенленнӗ.

Пушар тухнӑ вырӑнтан пациентсене тепӗр уйрӑма куҫарнӑ.

"Про Город" сайтӗнчи сӑн

Паян 17 сехет ҫурӑра Шупашкар районӗнче, Кӳкеҫре, авари пулнӑ. Телее, никам та вилмеллех суранланман. Анчах васкавлӑ медпулӑшу тухтӑрӗсем 2 ҫулти ачана пульницӑна илсе кайнӑ.

Авари ҫул ҫаврӑнӑшӗнче пулнӑ. Малтанлӑха пӗлтернӗ тӑрӑх, "Рено Логан" светофор хӗрлӗ ҫутнӑ вӑхӑтра кайнӑ, "Тойота Рав 4" машинӑпа ҫапӑннӑ.