news.allcrimea.net сайтри сӑн

Чӑваш Енре юсанмалли колонисенче ларакансем медицина маскисем ҫӗлеме тытӑнасси пирки пӗлтернӗччӗ. Халӗ ку ӗҫ мӗнле пырать-ха?

Айӑплава пурнӑҫлакан федераци службин Чӑваш Енри управленийӗн ертӳҫи Александр Робота пӗлтернӗ тӑрӑх, маскӑсем ҫӗлемелли пусмана ку эрнере илсе килмелле. Вӑл ҫитсенех айӑпланнӑ ҫынсем ӗҫе пикенӗҫ – медицина маскисем ҫӗлеме пуҫлӗҫ.

Антисептиксемпе дезинфекцилемелли хатӗрсене халӗ туянма пулать-и? Унччен аптекӑсенче шыраса тупма ҫукчӗ, ҫынсем туянса пӗтернӗччӗ. Тӗрӗслев кӑтартнӑ тӑрӑх, вӗсем халӗ аптекӑсенче пур. Вӗсем сахалтан та 11,3 тенкӗ тӑраҫҫӗ.

Сӑмах май, унччен пӗлтернӗ тӑрӑх, айӑпланнӑ ҫынсем ҫӗленӗ маскӑсем аптекӑсенче ку эрнере тухмалла пулнӑ.

Шупашкар хулинче Росгварди ӗҫченӗсем ҫынна ҫапса кайнӑ водителе тытса чарнӑ.

Усал хыпар пирки вӗсене, патруле тухнӑскерсене, шӑнкӑравласа систернӗ. Водитель Шупашкарти Кадыков урамӗнче ҫынна ҫапса хӑварнӑ, инкек вырӑнӗнчен хӑй тапса сикнӗ. Ҫапларах пӗлтернӗ вӗсене.

Росгвардин пресс-службинче пӗлтернӗ тӑрӑх, «Перехват» (чӑв. Тытса чарни) план палӑртса хунӑ. Ҫакӑ пуҫтах водителе шыраса тупма тата ӑна тытса чарма кирлӗ пулнӑ.

Ведомствӑн мар хурал пайӗн ӗҫченӗсем машинӑна кӗҫех Федоров академик урамӗнче асӑрхаҫҫӗ.

Водителе тытса чарса ҫул-йӗр хӑрушсӑрлӑхӗн инспекцийӗн ӗҫченӗсене пӗлтернӗ. Ҫул ҫинчи инкеке лексе вырӑнтан тарнӑ ҫынпа ҫыхӑннӑ пӑтӑрмаха яваплисем тӗпчеҫҫӗ, вӗсемех тивӗҫлӗ йышӑну тӑвӗҫ.

Ҫынсем коронавирус сарӑлна чухне килте карантинра ларнӑ май Александр Блинов лингвист чӑвашла вӗрентме шутланӑ. Пуш уйӑхӗн 24-мӗшӗнчен пуҫласа «Полигон» пултарулӑх лапамӗнче чӑваш чӗлхипе экспресс-онлайн-курс ирттерме пуҫлӗҫ. Пӗрремӗш заняти паян иртнӗ ӗнтӗ.

Занятисене Александр Блинов хӑй ертсе пырӗ. 10 занятире лексикӑпа тата грамматикӑпа паллаштарӗҫ, кунсӑр пуҫне чӑвашла ӑнланма тата калаҫма вӗрентӗҫ. Онлайн-курс «Полигон» пултарулӑх лапамӗн «Контактри» ушкӑнӗнче иртӗ. Унта ҫак каҫапа каймалла: https://vk.com/polygon21. Курс тӳлевсӗр.

sochistream.ru сӑнӳкерчӗкӗ

Чӑваш Енре почтальона киле чӗнсе илме пулать. Почта социаллӑ тӳлеве тата пенсие киле ҫитерсе панине пӗлетпӗр-ха.

Почтальонсем урлӑ пирӗн республикӑра 100 пин ытла ҫын пенси илсе тӑрать. Вӗсенчен пысӑк пайӗ, 30 пин ҫын, Шупашкарпа Ҫӗнӗ Шупашкар хулисенче пурӑнать. Вӗсенчен хӑшӗсем пенси илме почта уйрӑмӗсене каяҫҫӗ. Халӗ коронавирус пирки текех калаҫҫӗ те, инфекци чирӗ лекесрен почтальонсене киле чӗнсе илме сӗнеҫҫӗ. Почтальон киле пырсан газшӑн, ҫутӑшӑн тата ытти тӳлевшӗн те татӑлма май пур. Посылкӑсене, хаҫат-журнала та вӗсем киле ҫитерсе параяҫҫӗ.

Почтальона киле чӗнсе илес тесен Федерацин почта ҫыхӑнӑвӗн Чӑваш Енри управленине (8 8352) 63-62-12 телефон номерӗпе талӑкӗпех шӑнкӑравлама май пур.

movp.ru сайтри сӑн

Ӗнер Йошкар-Олара тин ҫуралнӑ ачана Пепкелӗх центрӗнчен вӑрлани пирки пӗлтернӗччӗ. Лайӑх хыпар ҫитнӗ: хӗрачана тупнӑ, вӑл чӗрӗ-сывах.

Кӳнтеленсем ҫирӗплетнӗ тӑрӑх, ача ҫуратмалли ҫуртра ют хӗрарӑма асӑрханӑ. Ача ҫухалсан Следстви комитечӗ икӗ пуҫиле ӗҫ пуҫарнӑ: вӑрланӑшӑн тата тухтӑрсем пӑхса ҫитерейменшӗн.

Ачана нимеҫӗсем, полицейскисем шыранӑ. Ӑна ӗнерех тупнӑ. Ачана пӗр хӗрарӑм вӑрланӑ-мӗн. Унӑн хырӑмӗ ӳкнӗ, кун пирки вӑл упӑшкине пӗлтермен, пепке пульницӑра тесе суйнӑ. Хӑй вара ют ҫын ачине вӑрласа тухнӑ та киле ҫитсен ним пулман пекех кравать ҫине хунӑ.

sb.by сйтри сӑн

Иртнӗ эрнере Чӑваш Енре ҫынсем лавккасенче черет тӑрсах сахӑр, хура тул тата туалет хучӗ туянни пирки илтмен ҫын юлмарӗ пулӗ. Ку мӗнпе ҫыххӑннӑ? Татса калама ҫук.

Кун хыҫҫӑн тӳре-шара лавккасене тӗрӗслеме тухнӑ. Ҫынсем кӗпӗрленсех туяннӑ хыҫҫӑн хаксем хӑпарман-и? ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев хушнипе федераци сечӗсем таварсене кашни кун илсе килме тытӑннӑ. Ҫавна май лавккасем халӗ йӗркеллех ӗҫлеме тытӑнмалла, тавар ҫителӗклӗ пулмалла.

Ӗнерхи тӗрӗслев кӑтартнӑ тӑрӑх, халӗ те ҫынсем хура тул кӗрпи нумай туянаҫҫӗ. Эппин, хӑшӗ-пӗри халӗ те саппаслӑх туянать. Тӳре-шара пӑшӑрханмалла маррине пӗлтерет: сентресем туллиех пулӗҫ, тавар ҫителӗклӗ.

Раҫҫейре пурӑнакансенчен чылайӑшӗ Конституцире РФ Федераци Канашӗн тата Патшалӑх Думин полномочийӗсене анлӑлатнине хирӗҫ. Ҫӗршывӑн тӗп саккунне ҫак нормӑна кӗртнине пирӗн ҫӗршыврисенчен 47 проценчӗ ҫеҫ ырлать. Ҫапла пӗтӗмлетме пулать Халӑх шухӑшне ыйтса пӗлекен пӗтӗм Раҫҫейри центр (вырӑсла ӑна ВЦИОМ аббревиатурӑпа палӑртаҫҫӗ) хатӗрленӗ танлаштарӑма тишкерсен. Пӗтӗмлетӗве ВЦИОМ сайтӗнче паян пичетленӗ.

Пӗлтерӗшлӗ пилӗк тӗп улшӑну шутне ҫынсем медицина пулӑшӑвне тӗрӗслесе тӑрассине, ачасене социаллӑ пулӑшу кӳрессине, ҫӗршывӑн ҫутҫанталӑкне упрассине, пенсие тата социаллӑ тӳлеве индексацилессине кӗртнӗ. ВЦИОМ ыйтӑмне хушӑннисенчен маларах эпир асӑннӑ улшӑнусене ырлакансен хисепӗ 90 процентран пысӑкрах.

Вырсарникун каҫхине Пӗрремӗш каналпа кӑтартнӑ «Лучше всех» телекӑларӑмра Чӑваш Енри маттур та ӑслӑ йӗкӗрешсемпе паллаштарчӗҫ. 11 ҫулти Адель тата Радель Фаизовсем — Куславккаран. Вӗсем тем те пӗлеҫҫӗ: куҫ мӗншӗн шӑннине те, вулкан сирпӗннин сӑлтавне те. Пӗртӑвансем хӑйсен ӑс-тӑнне тупӑшса тенӗ пек кӑтартрӗҫ.

Пӗрремӗш каналпа Чӑваш Енри ҫемьесем пирки ҫак кунсенче ҫине-ҫинех илтме тивнине эпир маларах пӗлтернӗччӗ. Шел те, ыррипе мар. «Мужское/Женское» кӑларӑмра Ҫӗрпӳ районӗнчи Виҫпӳрт салинчи ӗҫекен хӗрарӑма тата унпа нушаланса пурӑнакан 17-ри хӗре кӑтартнӑччӗ. Ӗнер вара — Етӗрне районӗнчи Тури Ирҫери тепӗр ҫемьене. Унта хӗрарӑм килтен тухса кайнӑ, икӗ ывӑлӗпе пӗр хӗрне ашшӗпе пӑрахса хӑварнӑ терӗҫ. Ик тӗслӗхӗнче те опекӑпа асӑрхав органӗсем ӗҫлесе ҫитерейменни сисӗнчӗ.

Красноярск тӑрӑхӗнчи чӑвашсен автономийӗн ертӳҫи Геннадий Храмов тата вырӑнти «Подснежник» (чӑвашла ку сӑмах «Ҫеҫпӗл» тесе куҫать) вырӑнти телеканал тӗпелӗнче пулнӑ. Ансамбле Татьяна Каримова ертсе пырать. Кун пирки автономи Фейсбукри хӑйӗн страницинче хыпарланӑ.

Аякри йӑхташӑмӑрсем «Прима СТС» телеканал тӗпелӗнче ӗнер, пуш уйӑхӗн 23-мӗшӗнче, пулнӑ.

«Прима» телеканал патшалӑхӑн мар. Вӑл 1991 ҫулхи уйӑхӗн 20-мӗшӗнченпе ӗҫлет. 1999 ҫултанпа «Прима» СТС телеканалӑн программисене самай ретрансляциленӗ. Кӑҫалхи кӑрлач уйӑхӗн 1-мӗшӗнчен вӑл хӑйӗн программисене йӗркелеме тытӑннӑ.

Красноярск тӑрӑхӗнчи чӑвашсен автономийӗн ертӳҫи Геннадий Храмов тата чӑваш ансамблӗ хӑйсен ӗҫӗ-хӗлӗпе паллаштарнӑ.

Инкеклӗ лару-тӑру министерстви тунӑ сӑн

Чӑваш Енре пурӑнакан арҫын гаражра автобусне юсав тунӑ. Кӗтмен ҫӗртен транспорт ҫунма пуҫланӑ. Юрать, арҫын транспорта гаражран тӗксе каларма ӗлкӗрнӗ.

Ку пуш уйӑхӗн 22-мӗшӗнче 18 сехетре Вӑрмар районӗнчи Кавал ялӗнче пулнӑ. Инкеклӗ лару-тӑру министерстви пӗлтернӗ тӑрӑх, микроавтобус юсав ӗҫӗ вӑхӑтӗнче ҫунма пуҫланӑ. Гаражӗ хыпса ан илтӗр тесе хуҫи ӑна урама тӗксе кӑларнӑ.

Вырӑна ҫитнӗ ҫӑлавҫӑсем автобуса ҫӑлса ӗлкӗреймен – вӑл ҫунса кайнӑ. Халӗ транспорт мӗншӗн хыпса илнине тӗпчеҫҫӗ. Малтанлӑха пӗлтернӗ тӑрӑх, вӑл юсавсӑр пулнӑ.