https://yandex.ru/images/pad/search?pos=17&img_url=https%3A%2F%2Favatars.mds.yandex.net%2Fget-pdb%2F2124041%2Fdb482037-6a26-4e68-ab21-cb3471f2d1db%2Fs1200&text=%D1%81%D0%B0%D0%BC%D0%BE%D0%BB%D0%B5%D1%82+%D0%BD%D0%BE%D1%80%D0%B4+%D0%B2%D0%B8%D0%BD%D0%B4+%D

«Нордвинд» авиакомпанин Шупашкартан Мускава тата каялла вӗҫекен самолётсен расписанине нарӑс уйӑхӗн 10-мӗшӗнчен улӑштарӗ.

«Шупашкар–Мускав–Шупашкар» расписани ылмашасси пиики Шупашкарти аэропортра пӗлтернӗ. Ҫав кун самолет Мускаври Шереметьево аэропортӗнчен 23 сехет те 40 минутра вӗҫсе тухӗ те тепӗр кун ирхине, 1 сехет те 5 минутра, Шупашкара ҫитӗ. Тепӗр кун 737-800 Boeing Шупашкартан ирхи 6 сехет те 15 минутра хускалӗ. Мускава 7 сехет те 40 минутра ҫитӗ. Кӗҫнерникунсерен самолет 5 минут каярах хускалӗ: 06 сехет те 20 минутра тапранӗ, Мускава вӑл 7 сехет 45 минутра ҫитӗ.

Рейссем кашни кунах пулӗҫ. Билетӑн пӗр майлӑ хакӗ ҫапларах:

«Шупашкар–Мускав» маршрутпа — 1 914 тенкӗрен пуҫласа, «Мускав–Шупашкар» — 2 286 тенкӗрен пуҫласа.

Ҫӗнӗ расписани пуш уйӑхӗн 28-мӗшӗччен вӑйра пулӗ.

Хальхи расписани: «Мускав–Шупашкар» маршрутпа —

09:50–11:10, «Шупашкар–Мускав» маршрутпа — 12:10–13:30.

Олег Николаев. «Правда ПФО»-ри сӑнӳкерчӗк.

Чӑваш Енӗн Правительствинче ҫак кунсенче пулса иртекен улшӑнусене паян чылайӑшӗ сӑнаса тӑрать. Министра лартма пултаракан хӑш-пӗр хушамата паян Александр Белов журналист асӑннӑ паян.

Вӑл ҫырнӑ тӑрӑх, премьер-министр тилхепине Чӑваш Ен Элтеперӗн тивӗҫӗсене пурнӑҫлакан Олег Николаев хӑй тытса пырӗ. Иван Моторина вице-премьер — республикӑн экономика министрӗ пулма сӗннӗ имӗш. Республикӑн тариф службине Экономика министерствин йышне илӗҫ.

Элтеперӗн Администрацийӗ республикӑн Правительствипе пӗрлешмелле-мӗн.

Правительство аппаратне Россельхозцентрӑн Чӑваш Енри управленийӗн ертӳҫи Николай Малов ертсе пыма тытӑнмалла имӗш. Финанс министрӗ пулма Михаил Ноздрякова шанмалла. Унӑн ҫумӗ пулма — экономика аталанӑвӗн министрӗн тивӗҫне пурнӑҫлакан Павел Иванова.

«Чӑвашавтодор» ертӳҫи пулнӑ, халӗ Мускавра ӗҫлесе пурӑнакан, Чӑваш Енӗн пӗрремӗш президенчӗпе Николай Федоровпа лайӑх хутшӑнури Владимир Осипов транспорт министрӗн пуканӗ йышӑнӗ тесе шухӑшлаҫҫӗ.

Анатолий Князева ҫӗнӗ командӑна чӗннӗ-мӗн. Вӑл хӑйне манманнишӗн тав тунӑ. Анчах Коми ертӳҫин Сергей Гапликовӑн командинче калӑпӑшлӑ пысӑк инвестици проекчӗсемпе ӗҫленине, ӗҫе ҫурма ҫулта пӑрахас килменнине пӗлтернӗ.

Малалла...

ysia.ru сайтри сӑн

Пӑрачкав районӗн прокуратури тӑхӑр йывӑҫ каснӑ арҫын тӗлӗшпе пуҫиле ӗҫ пуҫарнӑ. 30 ҫулти арҫыннӑн судра явап тытма тивӗ.

Ҫакскер саккуна пӑсса йывӑҫсем каснӑ – 9-шне йӑвантарнӑ. Ҫапла майпа вӑл патшалӑха 41 пин тенкӗлӗх тӑкак кӳнӗ.

Следстви вӑхӑтӗнче арҫын хӑйӗн айӑпне йышӑннӑ, патшалӑха кӳнӗ тӑкака саплаштарнӑ. Ун тӗлӗшпе пуҫарнӑ пуҫиле ӗҫе миравай судьяна пӑхса тухма панӑ.

Палӑртмалла: кунашкал статьяпа айӑпланакансене ирӗксӗр 2 ҫул таран та хӑварма пултараҫҫӗ.

uznayvse.ru сайтри сӑн

Чӑваш Енӗн пӗрремӗш президенчӗ Николай Федоров ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев патне телеграмма янӑ. Аса илтерер: Олег Николаев ку тивӗҫе кӑрлач уйӑхӗн 29-мӗшӗнче, Михаил Игнатьева отставкӑна ярсан, пурнӑҫлама тытӑннӑ.

Николай Васильевич телеграммӑна вырӑсла янӑ ҫавӑнпа текста ҫаплипех илсе кӑтартар: "Искренне желаю Вам успехов в многотрудном служении, призванном помочь нашей родной Чувашии воспрять духом и преодолеть накопившиеся сложности. Надеюсь, что чувство ответственности, деятельная любовь к родному краю, опора на настоящих профессионалов и нравственно здоровые силы помогут Вам достичь поставленных целей, а жителям республики – обрести уверенность в завтрашнем дне. Крепкого здоровья, неиссякаемой созидательной энергии, стойкости и силы духа Вам и Вашим соратникам".

Альбина Юрату архивӗнчи сӑнӳкерчӗк

Куславкка районӗнчи Туканаш ялӗнче ҫуралнӑ Герман Желтухин прозаик тата публицист пурӑннӑ пулсан кӑрлачӑн 25-мӗшӗнче 75 ҫул тултаратчӗ. Вӑл 2016 ҫулхи кӑрлачӑн 5-мӗшӗнче чире пула пурнӑҫран уйрӑлнӑ.

Пурӑннӑ чух та Герман Желтухин ятсӑр-сумсӑр пулман. Ӑна пӗлекенсем халӗ те сума сӑваҫҫӗ. Ӗнер чӑваш литераторӗсем тата ентешӗсем Герман Желтухин ҫуралнӑранпа 75 ҫул тултарнине паллӑ тунӑ...

«ЧР профессионал писательсен союзӗн ертӳҫи Лидия Филиппова йыхравланипе эпӗ те ҫак уявра пулса куртӑм... Герман Николаевича пухӑннисем пурте ӑшӑ сӑмахпа аса илчӗҫ, ун пултарулӑхне хакларӗҫ, чӑваш чӗлхипе литературине упрасси пирки чун-чӗререн пӑшӑрханса калаҫрӗҫ», — тесе ҫырнӑ Альбина Юрату сӑвӑҫ Фейсбукра.

Тинех-тинех-тинех! Яндекс.Переводчикра (чӑв. Яндекс.Тӑлмач) паянтан, 2020-мӗш ҫулхи нарӑс уйӑхӗн 1-мӗшӗнчен, чӑвашларан куҫаракан тытӑма ӗҫлеттерсе янӑ. Чӑвашларан вырӑсла ҫеҫ мар, чӑвашла-тутарла та, чӑвашла-акӑлчанла та, чӑвашла-пӑлхарла та (пӗр сӑмахпа каласан, пур чӗлхепе те) куҫарать вӑл.

Яндекс.Тӑлмач ӗҫлесе кайнинче Чӑваш чӗлхе лабораторийӗн тӳпи пысӑккине кӑмӑлтан палӑртатпӑр. Аса илтерер: иртнӗ ҫулхи раштав вӗҫӗнче чӑваш чунӗллӗ энтузиастсем ҫине тӑнипе тӗнче тетелӗнче машина куҫарӑвне ӗҫлеттерсе янӑччӗ. Вӑл http://translate.chv.su/ сайтра вырнаҫнӑ.

«Яндекс.Тӑлмача эпир 250 пин чӑвашла-вырӑсла пуплевӗшсен мӑшӑрне хатӗрлесе парса. Унтанпа пирӗн пухмач тата та ӳсрӗ. Пирӗн корпусра халь — 270 пин мӑшӑр. Ҫапла май куҫаруҫӑ пахалӑхне тата та лайӑхлатма майсем пур», — тет Чӑваш халӑх сайчӗн редакторӗ Николай Плотников, Чӑваш чӗлхи лабораторийӗн ӗҫне йӗркелекенӗ.

Чӑваш чӗлхи лабораторийӗ хатӗрлекен «Чӑваш чӗлхин икчӗлхеллӗ ҫӳпҫипе» ӗҫлекенсен йышӗ пӗчӗкех мар. Николай Плотниковсӑр пуҫне Чӑваш Енре ҫуралнӑ Александр Антонова — чӑвашла тата вырӑсла текстсене мӑшӑрлакана — асӑнма пулать (вӑл «Яндексри» шырав пайӗн ӗҫченӗ), ҫавӑн пекех сканерланӑ хыҫҫӑн чӑваш тексчӗсене тӳрлетсе пулӑшакансене Светлана Трофимовӑна, Алина Ивановӑна, Эрбина Портновӑна, Оксана Антоновӑна тата ыттисене палӑртмалла.

Малалла...

Чӑваш Енӗн Элтеперӗн Администрацийӗн Ертӳҫин тивӗҫӗне вӑхӑтлӑх пурнӑҫлакана палӑртнӑ. Ҫак тилхепене хальлӗхе Николай Каргина, Чӑваш Енӗн Элтеперӗн Администрацийӗн Ертӳҫин пӗрремӗш ҫумне — Шалти политика управленийӗн пуҫлӑхне, тыттарнӑ. Ҫӗнӗ тивӗҫе пурнӑҫланӑшӑн ӑна хушса тӳлесси ҫинчен те йышӑнура палӑртнӑ.

21-мӗш номерлӗ документа Чӑваш Ен Элтеперӗн тивӗҫӗсене пурнӑҫлакан Олег Николаев ӗнер, кӑрлачӑн 31-мӗшӗнче, алӑ пуснӑ. Ӗҫлӗ хута республикӑн влаҫ органӗсен официаллӑ порталӗнчи «Саккунсем» ярӑмра паян, нарӑс уйӑхӗн 1-мӗшӗнче, вырнаҫтарнӑ.

Аса илтерер: Чӑваш Республикин Элтепер Администрацийӗн Ертӳҫин пӗрремӗш ҫумӗ пулма Николай Каргина 2017 ҫулхи пуш уйӑхӗн 24-мӗшӗнче ҫирӗплетнӗччӗ.

Cap.ru сӑнӳкерчӗкӗ

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ЧР Элтеперӗ ҫумӗнче йӗркеленӗ консультаципе канашлу органӗсен тухӑҫлӑхне ӳстересшӗн. Ҫак шухӑша вӑл РФ Патшалӑх Думин Финанс рынокӗ енӗпе ӗҫлекен комитечӗн ертӳҫипе Анатолий Аксаковпа (аса илтерер: Олег Николаев та, Анатолий Аксаков та — «Тӗрӗслӗхшӗн Раҫҫей» парти пайташӗсем) тӗл пулсан каланӑ. Экономика ыйтӑвӗсене сӳтсе явнӑ чух экспертсемпе канашлани пӗлтерӗшлӗ тесе шухӑшлать республикӑн ҫӗнӗ ертӳҫи.

Республика Правительствин, вырӑнти хӑй тытӑмлӑх органӗсен, патшалӑх корпорацийӗсен пайташӗсен, усламҫӑсен, экспертсен хӑватне пӗр ҫӗре пӗрлештермелли пирки те калаҫнӑ ӗнерхи тӗлпулура республикӑн Элтеперӗн тивӗҫӗсене вӑхӑтлӑх пурнӑҫлаканӗпе РФ Патшалӑх Думин депутачӗ.

Cap.ru сӑнӳкерчӗкӗ

Ӗнер, кӑрлачӑн 31-мӗшӗнче, Чӑваш Ен Элтерерӗн тивӗҫӗсене вӑхӑтлӑх пурнӑҫлакан Олег Николаев ИТАР-ТАСС информаци агентствин, «Комсомольская правда – Москва» хаҫатӑн тата «Мир» телерадиокомпанин Шупашкара, ЧР Правительство ҫуртне, килнӗ журналисчӗсен ыйтӑвӗсене хуравланӑ.

МИХсенче ӗҫлекенсене республикӑн ҫӗнӗ ертӳҫи команда йӗркелессипе тата регионта туса ирттерме палӑртнӑ ӗҫсем кӑсӑклантарнӑ.

Олег Николаев Правительствӑн хальхи структурине тӗплӗн тишкерсе хаклама палӑртнине пӗлтернӗ. Ҫак ыйтӑва вӑрах тӑхтамасӑр татса парасшӑн.

Аса илтерер: ӗнер ЧР Правительствине отставкӑна ячӗҫ. Ӗнерех ЧР Элтеперӗн Администрацийӗн Ертӳҫине Юрий Васильева тата Светлана Енилина министра ӗҫрен кӑларнӑ. Хушусенче палӑртнӑ тӑрӑх хакласан, ҫемҫе пукансене вӗсем хӑйсен кӑмӑлӗпе пушатнӑ.

Паян, карлач уйӑхӗн 31-мӗшӗнче, ЧР Элтеперӗн администрацийӗн ертӳҫине – ЧР Министрсен Кабинечӗн Председателӗн ҫумне Юрий Васильева хӑйӗн ирӗкӗпе ӗҫрен яни пирки Чӑваш халӑх сайчӗ тин кӑна пӗлтерчӗ.

Паян ЧР Министрсен Кабинечӗн Председателӗн ҫумне – финанс министрне Светлана Енилинӑна та ӗҫрен кӑларасси пирки хушу тухнӑ. Документра палӑртнӑ тӑрӑх, вӑл та хӑйӗн ирӗкӗпе кайнӑ.

Аса илтерер: РФ Президенчӗ Владимир Путин ЧР Элтеперне Михаил Игнатьева отставкӑна янӑ хыҫҫӑн ку тивӗҫе вӑхӑтлӑха пурнӑҫлама Олег Николаева («Тӗрӗслӗхшӗн Раҫҫей» парти) шаннӑ.