"Контактри" сӑн

Раҫҫейри паллӑ блогер Чистомэн Шупашкара килнӗ. Вӑл Ботаника садӗнче 1 сехетре 100 литр кӗрекен 10 михӗ ҫӳп-ҫап пуҫтарнӑ.

Чистомэн кун пирки «Контактра» халӑх тетелӗнчи страницинче ҫырса кӑтартнӑ. Вӑл каланӑ тӑрӑх, парк хитре, анчах тирпейсӗр. Ӑна шывра ҫӳп-ҫап нумай выртни тӗлӗнтернӗ. Унта вӑл 5 ҫул каялла туса кӑларнӑ банка та тупнӑ.

Чистомэн михӗсене контейнера пересшӗн пулнӑ - анчах вӗсем Ботаника садӗнче ҫук. Ҫавӑнпа вӑл шупашкарсене михӗсене ҫӳп-ҫап контейнерӗ патне илсе ҫитермешкӗн пулӑшу ыйтнӑ.

o-krohe.ru сайтри сӑн

Шупашкарта пурӑнакан 39 ҫулти хӗрарӑмӑн харпӑр пурнӑҫӗ ӑнман. Вӑл хӑйне пӑснӑ, тухатланӑ тесе шутланӑ. Ҫавӑнпа тӗнче тетелӗнче астролог номерне тупса унпа канашланӑ.

Лешӗ ӑна чӑнах та пӑснине ҫирӗплетнӗ, пулӑшма шантарнӑ.

Хайхи астролог икӗ эрне темӗнле йӑла-йӗрке ирттернӗ, куншӑн укҫа ыйтсах тӑнӑ. Ҫапла хӗрарӑм ӑна 800 пин тенкӗ куҫарса панӑ. Укҫи пӗтсен тин вӑл кун пирки юлташне каланӑ. Лешӗ ӑна полицие кайса каласа кӑтартма сӗннӗ.

Кун тӗлӗшпе пуҫиле ӗҫ пуҫарнӑ.

Паян Шупашкарти Хӗрлӗ тӳремре 400 яхӑн ҫын тӑрса «Путин» тесе ҫырнӑ, чӗре «ӳкернӗ». Ҫапла Чӑваш Ен РФ Президентне Владимир Путина ҫуралнӑ кунпа саламланӑ.

Мӗнле саламланине видео ӳкернӗ, ӑна ЧР Пуҫлӑхӗ Олег Николаев телеграм-каналӗнче вырнаҫтарнӑ.

Владимир Владимирович паян 71 ҫул тултарнӑ. Вӑл 1952 ҫулхи юпа уйӑхӗн 7-мӗшӗнче Ленинградра ҫуралнӑ.

rusnewshub.ru сайтри сӑн

Юпа уйӑхӗн 2-мӗшӗнче 9 сехет ҫурӑра Шупашкарти аэропорт ҫывӑхӗнче хӗр парашютпа аннӑ чухне самолет вӗҫмелли ҫул ҫине вӗҫсе аннӑ. Вӑл вӑйлӑ ҫиле пула парашюта итлеттереймен-мӗн.

Ҫав вӑхӑтра рейс самолечӗ тӳпенелле вӗҫсе хӑпарма хатӗрленнӗ. Юрать-ха, авиаци хӑрушсӑрлӑхӗн ҫыннисем хӗре вӑхӑтра пулӑшма ӗлкӗрнӗ, ӑна ҫул ҫинчен илсе кайнӑ. Унсӑрӑн вӑл хӑй парашют тыткӑнӗнчен хӑтӑлаймӗччӗ.

Ку пӑтӑрмаха пула рейспа вӗҫекен самолет темиҫе минут каярах ҫула тухнӑ.

Патшалӑх Думин сайтӗнчи сӑн

Шупашкарти пӗр сквера Раҫҫей политикӗн ячӗпе хисеплеме сӗннӗ. Сӑмах Владимир Жириновский пирки пырать.

Ҫакна Шупашкар хулин депутатсен пухӑвӗн ЛДПР депутачӗ Эдаурд Петров ҫӗртме уйӑхӗнче сӗннӗ. Ятарлӑ комисси ҫак ыйтӑва авӑн уйӑхӗн 28-мӗшӗнче пӑхса тухнӑ. Хальлӗхе пӗтӗмлетӳ протоколне пичетлемен.

Сӑмах май, Владимир Жириновский 2022 ҫулхи ака уйӑхӗнче пурнӑҫран уйрӑлнӑ.

wp-s.ru сайтри сӑн

Шупашкарта ҫак кунсенче Златан ячӗллӗ арҫын ача ҫурални пирки пӗлтернӗччӗ. Калинин районӗн ЗАГС пайӗнче халӗ Леон ятлӑ ачана регистрациленӗ.

Ку ят мӗнрен пулса кайнин икӗ вариант пур. Вӑл латин чӗлхинчен килнӗ, «лев» /арӑслан/ тенине пӗлтерет. Иккӗмӗш верси: грек чӗлхинчен кӗнӗ, унта та «арӑслан» тенине пӗлтерет.

Палӑртмалла: пирӗн ҫӗршывра арҫын ачасене ытларах Лев ят параҫҫӗ. Европӑра вара Леон тата Лео анлӑ сарӑлнӑ. Леони пирӗн ҫӗршывра сайра хутра тӗл пулать.

Ҫитес уйӑхра, юпа уйӑхӗн 1-мӗшӗнче, Шупашкарта фонтансем ӗҫлеме пӑрахӗҫ. Хула ҫыннисем вӗсемпе киленсе юлма темиҫе кун ҫеҫ юлчӗ.

Фонтансене ҫанталӑк сивӗтес умӗн кашни ҫулах чарса лартаҫҫӗ. Кӑҫал та ҫав вӑхӑт сисӗнмесӗр ҫитрӗ.

Ҫитес уйӑхра, юпа уйӑхӗн 1-мӗшӗнче, Шупашкарта фонтансем ӗҫлеме пӑрахӗҫ. Хула ҫыннисем вӗсемпе киленсе юлма темиҫе кун ҫеҫ юлчӗ.

Фонтансене ҫанталӑк сивӗтес умӗн кашни ҫулах чарса лартаҫҫӗ. Кӑҫал та ҫав вӑхӑт сисӗнмесӗр ҫитрӗ. Эсир вӗсемпе киленсе юлма ӗлкӗртӗр-и?

t.me/mintrud_21 сӑнӳкерчӗкӗ

Шупашкар хулинче социаллӑ патруль ҫула тухнӑ. Рейда Килсӗр-ҫуртсӑр ҫынсене пулӑшас енӗпе ӗҫлекен республикӑри центр ирттернӗ.

Социаллӑ патрульпе тухнисем килсӗр ҫынсене шыраса тупса вӗсемпе калаҫу ирттереҫҫӗ, вӗсене епле пулӑшу кирлипе кӑсӑкланаҫҫӗ. Япӑхса кайнисенчен хӑшӗсене тухтӑр пулӑшӑвӗ кирлӗ — ун пек чухне васкавлӑ пулӑшу машинине чӗнсе илеҫҫӗ.

Черетлӗ рейд вӑхӑтӗнче «Шупашкар» пасар ҫывӑхӗнче пулнӑ. Унта «Народные кормильцы» (чӑв. Халӑха тӑрантаракансем) православи ушкӑнӗ пулӑшу кирлисене кашни ытларикунсерен апатлантарать.

Килсӗр-ҫуртсӑр Сергей ҫӗнӗ пурнӑҫ пуҫлама хирӗҫ маррине пӗлтернӗ. Маларах асӑннӑ центрта ӑна этем ретлӗ пурӑнма вӗрентӗҫ.

kipmu.ru сайтри сӑн

Шупашкарти Калинин районӗн ЗАГС пайӗнче питӗ сайра тӗл пулакан ята регистрациленӗ. Ӑна ашшӗ-амӑшӗ тин ҫуралнӑ ывӑлне панӑ.

Ҫак ят – Златан. Швецире унашкал ятлӑ футболист, ҫак ҫӗршывӑн пӗрлештернӗ командин капитанӗ пулнӑ Златан Ибрагимович пур.

«Златан» славян чӗлхинчен килнӗ, «ылтӑн», «хаклӑ», «ылтӑн ҫӳҫлӗ» тенине пӗлтерет. Вӑл 19-20-мӗш ӗмӗрсенче Балкан ҫӗршывӗсенче анлӑ сарӑлнӑ пулнӑ.