Шупашкар хулин халӑхӑн социаллӑ ыйтӑвӗсене тивӗҫтерекен комплекслӑ центрта йывӑр лару-тӑрӑва лекнӗ хӗрарӑмсене те пулӑшаҫҫӗ. Унта упӑшкисемпе уйрӑлма тӑнӑ, анчах ниҫта кайма аптӑракан хӗрарӑмсем те, ҫул ҫитмен амӑшӗсем те пулӑшу ыйтса пыраҫҫӗ.

Центрӑн психологӗ тренингсем ирттерет, ытти енӗпе пулӑшать. Хӗрарӑмсем центрта виҫӗ уйӑх аран пурӑнма пултараҫҫӗ.

Йывӑрлӑхри хӗрарӑмсене пулӑшакан уйрӑм Шупашкарти Хусанкай урамӗнчи 29а ҫуртра вырнаҫнӑ. Унӑн телефон номерӗ +7 (8352) 53-42-94.

skidki-2023.ru сӑнӳкерчӗкӗ

Шупашкарти ача пахчисенчен пӗринпе юнашар пирус туртмалли сутакан лавкка ӗҫленӗ. Хулари Гагарин урамӗнчи 36-мӗш ҫуртра вырнаҫнӑскерпе юнашарах тенӗ пек ача пахчи пур.

Табак таврашне, никотинлӑ япаласене, чӑмламалли табак сутакан точкӑсене ача пахчисемпе шкулсен ҫывӑхӗнче уҫма юрамасть. Асӑннӑ лавкка 74-мӗш ача пахчинчен 39 метрта вырнаҫнӑ. Нормӑпа килӗшӳллӗн 100 метртан ҫывӑхра пулмалла мар.

Усламҫӑ тӗлӗшпе прокуратура административлӑ ӗҫ пуҫарнӑ, ӑна 5 пин тенкӗ штраф тӳлеттернӗ. Ҫывӑх вӑхӑтра лавккана хупасшӑн. Ӗҫе суда ярса панӑ.

"Чебмедиа" архивӗнчи сӑн

Шупашкарта Ҫӗнӗ ҫул ҫывхарни сисӗнет. Республика лапамӗнче тӗп чӑрӑша лартма пуҫланӑ. Пӗлтӗр те ӑна ҫак тапхӑрта вырнаҫтарма тытӑннӑ.

Хальхи вӑхӑтра специалистсем 25 метр ҫӳллӗш каркаса лартаҫҫӗ. Кун хыҫҫӑн турачӗсене вырнаҫтарӗҫ. Вӗсем вара пӗтӗмпе – 3 пин ытла. Юлашкинчен гирляндӑсемпе илемлетӗҫ.

Аса илтерер: Шупашкарти тӗп чӑрӑша 2016 ҫулта 6,6 миллион тенкӗпе туяннӑ. Хак шутне капӑрлатмалли теттесем те кӗнӗ.

foto.cheb.ru сайтри сӑн

Шупашкарти 21-мӗш троллейбуса ларакансем халӗ билетшӑн урӑхла майпа та, ҫӗнӗлле, тӳлеме пултараҫҫӗ. Унта QR-кодпа е NFC-па укҫа хӑвӑрт тӳлеме май пур.

Проекта республика Правительстви тӳлев карттисен наци системипе пӗрле пурнӑҫлама тытӑннӑ. Хальлӗхе транспортра ҫакнашкал тӳлев Чӑваш Енре кӑна пур.

QR-кодпа тӳлесен чек тухать. NFC-па тӳлесен чек СПБэй ятлӑ сарӑма /приложени/ килет. Ӑна упраса хӑварсан лайӑхрах - кондуктора кӑтартмалла.

Хальлӗхе ку - тест режимӗнче. Вӑл йӗркеллӗ ӗҫлесе кайсан ӑна ытти транспортра та пурнӑҫа кӗртесшӗн.

"Чӑваш Ен" ПТРК сайтӗнчи сӑн

Шупашкар Ҫӗнӗ ҫула хатӗрленет. Хулара 100 ытла чӑрӑш капӑрлатма палӑрнӑ. 88-шӗ ҫуртсен картишӗнче пулӗ, ҫул ҫаврӑнӑшӗсенче 39 чӑрӑш лартӗҫ.

Кӗҫех «Салют» культура керменӗ умӗнче, Максим Горький скверӗнче, Ҫӗнтерӳ тӳремӗнче, Константин Иванов скверӗнче, «Амазони» этнокомплексра, Студентсен скверӗнче капӑр чӑрӑшсем ҫуталӗҫ. Шкул бульварӗнче те уяв сӗмӗ кӗрӗ, унта аркӑсем вырнаҫтарӗҫ.

«Овас» скверӗнче, «Шупашкар» суту илӳ комплексӗ умӗнче, Кадетсен скверӗнче ҫутӑ конструкцийӗсене ҫутӗҫ.

Шупашкар хулине раштав уйӑхӗн 15-мӗшӗччен капӑрлатса пӗтерме палӑртнӑ.

"Чеб.ру" сайтри сӑн

Уголовлӑ шырав оперуполномоченнӑйӗ Сергей Ермаков Шупашкарти Болгарстрой урамӗнчи пӗр ҫурта ӗҫпе килнӗ. Вӑл лифтра макӑракан хӗрпе пӗрле хӑпарнӑ. Хӗр юлашки хута кайма пуҫтарӑннӑ. Пакунли унпа темӗн пулнӑ тесе шутланӑ та хӑйӗн ӗҫне пӑрахса хӗр хыҫҫӑн 16-мӗш хута хӑпарнӑ.

Чӑнах та, пике унта балкон перилисем ҫинче тӑнӑ. Сергей Ермаков ӑна унтан анма ӳкӗте кӗртнӗ. Хӗр лӑплансан мӗн пулнине каласа кӑтартнӑ. Вӑл савнийӗпе пӗр ҫул ҫӳренӗ хыҫҫӑн уйрӑлнӑ-мӗн. Хӗр хӑйне ҫӑлнӑшӑн полицейские тав тунӑ.

stylishbag.ru сайтри сӑн

Шупашкарта пурӑнакан 72 ҫулти арҫынна ултавҫӑсем шӑнман пӑр ҫине лартса ярасшӑн пулнӑ. Вӑл вӗсем ыйтнипе «хӑрушсӑр счет» ҫине 150 пин ытла тенкӗ куҫарма тӑнӑ. Укҫине вӑл банкра илнӗ. Шӑпах унта вӑл палламан хӗрарӑмран пулӑшу ыйтнӑ. Лешӗ вара ӑна кусем ултавҫӑсем пулма пултарни пирки каланӑ. Ҫапла вӑл старике укҫине упраса хӑварма пулӑшнӑ.

Шупашкарти тепӗр ватӑ арҫын ултавҫа чутах 1 миллион тенкӗ куҫарса паман. Укҫана куҫарма салона кайнӑ, анчах ӗлкӗреймен – лешӗ хупӑ пулнӑ. Кун хыҫҫӑн вӑл унпа ултавҫӑ калаҫнине ӑнланнӑ, полицие кайса кун пирки пӗлтернӗ.

digitalocean.ru сайтри сӑн

Шупашкарта пурӑнакан 52 ҫулти хӗрарӑм чӳк уйӑхӗн 11-мӗшӗнче ирхине банк карточки ҫинчи 50 пин ытла тенки ҫухалнине асӑрханӑ та тӳрех полицие кайнӑ. Кӑштахран йӑлтах уҫӑмланнӑ: 9 ҫулти мӑнукӗ телефонра вӑйӑ вылянӑ иккен.

Ача вӑйӑ валютине тата суперпӑшал илес тесе палламан ҫын мӗн ҫырнине йӑлтах пурнӑҫланӑ. Ҫапла вӑл 52-ри хӗрарӑмӑн банк карттин реквизичӗсене пӗлтернӗ. Счет ҫинчи укҫа ҫийӗнчех ҫухалнӑ.

Ачан амӑшӗ кун пирки пӗлсен телефонри вӑййа тасатнӑ.

"Про Город" сайтӗнчи сӑн

Паян 12 сехет иртсен Шупашкарти пӗр ҫуртӑн 12-мӗш хутӗнчи чӳречерен банкӑсем, эрех кӗленчисем, ытти ӑпӑр-тапӑр вӗҫме пуҫланӑ. Картишре ларакан темиҫе машина сиенленнӗ. Кун пирки «Про Город» хаҫата халӑх корреспонденчӗ пӗлтернӗ.

Ҫакна тӑваканӗ - арҫын. Вырӑна полицейскисем, васкавлӑ медпулӑшу часах ҫитнӗ. Йӗрке хуралҫисем ҫав арҫынна ҫийӗнчех тытса чарнӑ.

cheb-centr.soc.cap.ru сӑнӳкерчӗкӗ

Паян Шупашкарта пурӑнакан Антонина Савельева 100 ҫул тултарнӑ.

Вӑл Шупашкар районӗнчи (халӗ — муниципаллӑ округ) Тутаркассинче ҫуралнӑ. Анчах унӑн ашшӗпе амӑшӗ часах вилнӗ. Ун хыҫҫӑн вӗсене, шӑллӗпе иккӗшне, Пӑрачкаври тӑванӗсем усрава илнӗ. Антонина шкулта сакӑр класс вӗреннӗ.

1943-1953 ҫулсенче милиционерта ӗҫленӗ. Пулас мӑшӑрӗпе Георгий Григорьевичпа ӗҫре паллашнӑ. Унтан мӗн тивӗҫлӗ канӑва тухичченех Обкомра техничкӑра тӑрӑшнӑ.

Савельевсем, хӗрпе ывӑл ҫуратса ӳстернӗ.

«Пирӗн килте яланах килӗшӳпе ҫураҫу хуҫаланнӑ. Сасӑ хӑпартса калаҫнине эп илтмен», — каласа кӑтартать кинемейпе пӗрле пурӑнакан хӗрӗ Галина Георгиевна.

Паян ватӑ ҫын вырӑнпах выртать. Ӑна хӗрӗ юратса пӑхать.