t.me/nikamran каналтан илнӗ сӑнӳкерчӗк

Шупашкарта «Юрлакан фонтансен хули» конкурс-фестиваль ирттерме хатӗрленеҫҫӗ. Ӑна Хула кунне халалланӑ.

Хитре юрлама пултаракан ҫынсен малтанласа суйлав турне хутшӑнмалла. Вӑл ҫурла уйӑхӗн 5 тата 12-мӗшӗсенче 16 сехетре иртӗ.

Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, суйлав турӗсем «Салют» культура керменӗ ҫумӗнче, Амӑшӗн палӑкӗ ҫумӗнче, Лакрей варманӗнче тата Кадетсен паркӗнче иртӗҫ. Уйрӑмах маттуррисене ӑмӑртӑвӑн 2-мӗш пайне чӗнӗҫ. Чи пултаруллӑ 40 юрӑҫ хӑйӗн пултарулӑхне Хула кунӗнче кӑтартса парӗ.

t.me/pro_cheby каналтан илнӗ сӑнӳкерчӗк

Шупашкар хулинчи Петров урамӗнчи 7-мӗш ҫуртра ҫын виллине тупнӑ.

Асӑннӑ ҫуртри иккӗмӗш подъездра ҫӗрӗк шӑрши кӗнӗрен ҫынсем ятарлӑ службӑсене пӗлтернӗ. Унтисем пырса алӑка ватнӑ. Ҫавӑн чухне вӗсем унта арҫын виллине курнӑ.

Асӑннӑ ҫуртра пурӑнакансем пӗлтернӗ тӑрӑх, асӑннӑ хваттертен халӗ те ырӑ мар шӑршӑ кӗрет. Алӑка хӑй вырӑнне лартса хумантан унта килсӗр ҫынсем кӗрсе ҫӳреме тытӑннӑ имӗш.

Ҫуртра пурӑнакансем подъездра хлор шӗвекӗ сапаҫҫӗ, анчах ырӑ мар шӑрша пӗрех ҫӗнтереймеҫҫӗ.

cap.ru сӑнӳкерчӗкӗ

Ҫурла уйӑхӗн 14-19-мӗшӗсенче Шупашкарта "Раҫҫейӗн симӗс ылтӑнӗ" фестиваль иртет. Унта тӳлевлӗ кӗртеҫҫӗ, билет хакӗ 100 тенкӗрен пуҫласа 350 тенкӗ таран.

Фестиваль юханшыв портӗнче иртӗ. Чӑваш Енрен "Букет Чувашии", Краузе тата Р.Ю.Иванов усламҫӑсем пулӗҫ. Кунсӑр пуҫне ҫӗршыври 7 регионти сӑра савучӗсем килӗҫ. Фестивальте чи паха сӑрасене тутанса курма май пулӗ. Ку кӑна мар, конкурссем те иртӗҫ. Кашни кун фестивальте чӗрӗ кӗвӗ янӑрӗ.

Мероприятие 18 ҫултан аслӑраххисене кӑна кӗртӗҫ. Пӗрле паспорт илме манмалла мар.

yaroslavl.bezformata.com сайтри сӑн

Шупашкарти 59 ҫулти хӗрарӑма ултавҫӑсем хӑратса пӑрахнӑ. Вӗсене ӗненсе вӑл ют счет ҫине 5 миллион ытла куҫарнӑ.

Ун патне хӑйӗнпе йӗрке хуралҫи тесе паллаштарнӑ арҫын шӑнкӑравланӑ. Вӑл пӗлтернӗ тӑрӑх, хӗрарӑмӑн харпӑр даннӑйӗсене ют ҫынсем пӗлнӗ, вӗсем ун ячӗпе кредит илсе укҫана Украинӑна ярасшӑн имӗш. Ҫапла ан пултӑр тесе палламан ҫын хӗрарӑма кредитсем илме, укҫана хӑй каланӑ счет ҫине куҫарма ӳкӗте кӗртнӗ. Ӑна ӗненсе вӑл хӑй пухнӑ 430 пин тенке тата кредит илнӗ 5 миллион та 318 пин тенке куҫарса панӑ.

Хӗрарӑм хӑйне улталанине банкри харпӑр кабинета кӗрсен кӑна ӑнланнӑ. Унта вӑл илнӗ кредитсем хупӑнманни курӑннӑ.

Шупашкарти 43 ҫулти арҫыннӑн ачан банк карттипе усӑ курнӑшӑн явап тытма тивӗ. Ун тӗлӗшпе пуҫарнӑ пуҫиле ӗҫе кӗҫех суд пӑхса тухӗ.

Ку ака уйӑхӗн 26-мӗшӗнче пулнӑ. Арҫын суту-илӳ центрӗ умӗнче банк картти тупнӑ та унпа усӑ курма шутланӑ. Вӑл 7 лавккана ҫитсе тавар туяннӑ. Пӗтӗмпе 5 пин тенке яхӑн тӑкакланӑ хайхискер.

Йӗрке хуралҫисем банк карттипе усӑ курнӑ ҫынна часах тупса палӑртнӑ.

Астӑвӑр: ют ҫыннӑн банк карттипе усӑ курни преступлени шутланать.

polsov.com сайтри сӑн

Шупашкарти 41 ҫулти хӗрарӑм кредитсем илсе тултарса вӗсене ултавҫа куҫарса панӑ. Хӑйне шӑнман пӑр ҫине лартса янине вӑл кайран кӑна ӑнланнӑ.

Ку уйӑх пуҫламӑшӗнче ун патне «банкӑн пулӑшу службин ӗҫченӗ» тесе паллаштарнӑ ҫын шӑнкӑравланӑ. Хайхискер пӗлтернӗ тӑрӑх, унӑн счетне ҫӗмӗрнӗ, такамсем ун ячӗпе кредит илесшӗн. Хӗрарӑм счета блокировка тума ыйтнӑ. Лешӗ хирӗҫленӗ, ку пулӑшмассине ӑнлантарса мӗн тумаллине каласа пынӑ. Кайран хӑйсемпе «йӗрке хуралҫи» тесе паллаштарнӑ ҫынсенчен те шӑнкӑравсем килме пуҫланӑ.

Шупашкар хӗрарӑмӗ аферистсем каланипе темиҫе банкра кредит илнӗ. Укҫана вӑл тӗрлӗ счет ҫине куҫарнӑ. Ҫапла вӑл 3 миллион та 450 пин тенкӗ ултавҫӑсене панӑ. Хӑйне улталанине хӗрарӑм укҫа пӗтсен, кредит пама пӑрахсан кӑна ӑнланнӑ.

Николай Емельянов

Йӑлана кӗнӗ тӑрӑх, Шупашкар хулин ҫуралнӑ кунӗ умӗн хисеплӗ ҫынна суйлӗҫ. «Уҫӑ хула» порталта сасӑлав ҫурлан 1-мӗшӗччен пырӗ. Кӑҫал 7 кандидат тупӑшӗ.

1. 2002-2010 ҫулсенче Шупашкар мэрӗ пулнӑ Николай Емельянов.

2. Шупашкарти коопераци институчӗн ветерансен канашӗн председателӗ Миранда Кольцова.

3. Ҫӗнӗ Лапсарти «Акаци» культура ҫурчӗн директорӗ Ольга Курганская.

4. Чӑваш Енри ӳнерҫӗсен пӗрлӗхӗн председателӗ Владимир Нагорнов.

5. Шупашкарти централизациленӗ клуб тытӑмӗн Халӑх академи камера хорӗн ертӳҫи Нина Пирогова.

6. Шупашкарти В.И.Чапаев ячӗллӗ производство пӗрлешӗвӗн тӗп директорӗ Михаил Резников.

7. Шупашкарти С.М.Максимов ячӗллӗ ача-пӑча музыка шкулӗн флейта класӗн преподавателӗ Анжелика Сидорова.

Аса илтерер: пӗлтӗр Шупашкар хулин хисеплӗ ҫыннин ятне Шупашкарти 1-мӗш ҫӑкӑр савучӗн тӗп директорӗ Елена Бадаева тивӗҫнӗ.

t.me/pro_cheby каналтан илнӗ сӑнӳкерчӗк

Шупашкарта такамсем Атӑл хӗрринчи бинокле ватнӑ. Ӑна ватнипех ҫырлахман, унӑн линзине вӑрланӑ. Ҫакӑн пирки эпир Телеграмри каналсенчен пӗринче пӗлтернӗ тӑрӑх хыпарланӑччӗ. Паян асӑннӑ ҫӑлкуҫра урӑхларах пӗлтернӗ.

Бинокльсене пуҫтахсем ватман иккен. Яваплисем линзӑна тасатас тенӗ. Халӗ вӗсене хӑйсен вырӑнне вырнаҫтарса хунӑ. Хула ҫыннисемпе хӑнисем бинокль витӗр пӑхса Атӑл илемӗпе киленме пултараҫҫӗ.

«Творческий город» (чӑв. Пултарулӑх хули) автономи учрежденийӗнче пӗлтернӗ тӑрӑх, кивелнӗ линзӑсене утӑ уйӑхӗн 6-мӗшӗнче сӳтсе кайнӑ. Вӗсене тусантан тасатнӑ хыҫҫӑн утӑ уйӑхӗн 10-мӗшӗнче ҫӗнӗрен вырнаҫтарса хунӑ.

gcheb.cap.ru сӑнӳкерчӗкӗ

Шупашкар хулинче пӗрисем ҫӗре хӑйсем тӗллӗн ярса илнӗ.

Мате Залка урамӗнчи 12/3-мӗш ҫурт патӗнчи территори тавра тимӗр карта тытса ҫавӑрнӑ, шлагбаум вырнаҫтарнӑ. Ют ҫынсем ҫурт патне пырса кӗресрен карта ҫине «Частная территория» (чӑв. Уйрӑм ҫын территорийӗ) тесе ҫырса ҫапнӑ.

Тимӗр картана тытнӑ мӗнпур ҫӗр асӑннӑ ҫурт ҫумӗнчи лаптӑк та шутланмасть иккен. Ҫӗрӗн пӗр пайӗн хуҫи — муниципалитет.

Саккуна пӑсса ярса илнӗ ҫӗр тӗлӗшпе хула администрацийӗ суда ҫитнӗ. Чӑваш Енӗн Арбитраж сучӗн йышӑнӑвӗпе килӗшмесӗр ҫуртӑн управляющи компанийӗ Пӗрремӗш арбитраж аппеляци судне ҫитнӗ. Унтисем те малтанхи йышӑнӑвах вӑйра хӑварнӑ. Ҫывӑх вӑхӑтра управляющи компанин тимӗр картана сӳтме тивӗ.

«Шупашкарти хыпарсем» (выр. «Чебоксарские новости») хаҫата халӗ урӑх ҫын ертсе пырать. Вӑл – 30 ҫулти Елена Леонтьева.

Унччен унта Лариса Буланкина тӗп редактор пулнӑ. Ҫу уйӑхӗнче ӑна тивӗҫлӗ канӑва ӑсатнӑ.

Елена Леонтьева – Мусквран, Леонтьевсен продюсер центрӗнче ӗҫленӗ. Ку эрнекун тухнӑ хаҫатра тӗп редактор хаҫатран хальхи йышши медиацентр тӑвасси пирки пӗлтернӗ.