Ҫу уйӑхӗ студентсемшӗн питӗ хӗрӳ тапхӑр. Семестр вӗҫленнӗ май зачётсем тытмалла, курс ӗҫӗсем ҫырмалла е тата диплом та хӳтӗлемелле. Акӑ ҫу уйӑхӗн 20-мӗшӗнче Чӑваш патшалӑх университечӗн Чӑваш филологийӗпе культура факультетӗнче кӗскетнӗ программӑпа куҫӑмсӑр 3 ҫул вӗреннӗ студентсем диплом ӗҫӗсем хӳтӗлерӗҫ. Хӳтӗлев комиссийӗ Семышева Н.В., Белянин А.Е., Лапаев Н.Г., Захаров В.Г., Анисимов А.А., Владимиров В.А., Кожукова Л.А. студентсем ҫырнӑ квалификаци ӗҫӗсемпе кӑмӑллӑ пулчӗ.

Диплом ӗҫне тивӗҫлӗ шайра ҫырса хӳтӗленӗ студентсене эпир те чунтан саламлатпӑр, ӑнӑҫусем сунатпӑр.

Юрӑпа савӑнтараҫҫӗ

Ҫӑвӑн 23-мӗшӗнче Куславкка районӗнчи Пакӑшра хӗвел ытти кунсемпе танлаштарсах ӑшшӑнрах пӑхрӗ темелле — кунти халӑх ҫак кун ял кунне уявлама пухӑнчӗ. Йӑлана кӗнӗ йӗркепе ку уява ҫимӗк кунӗнче уявлаҫҫӗ.

Уява Пакӑшри ял клубӗ умӗнчи лапамра ирттерчӗҫ. Чи ҫӳллӗ йывӑҫ ҫине Чӑваш Енпе Раҫҫей Федерацийӗн ялавӗсене ҫакрӗҫ, уяв лаптӑкӗ йӗри-тавра тӗрлӗ тӗслӗ хӑюсем ҫакса тухрӗҫ. Хӗвел тӳпене хӑпарса ҫитнӗ тӗле ятарласа вырнаҫтарнӑ динамиксенчен пӗтӗм таврана юрӑ шӑранма пуҫларӗ.

Уяв ячӗпе пурне те Владимир Иванов саламларӗ. Малалла вара ял кунӗн уявне ертсе пыма Елена Даниловӑна шантарса пачӗҫ. Пакӑш ял клубӗн администраторӗ пухӑннӑ халӑха тӗрлӗ ӑмартусемпе вӑйӑсене явӑҫтарчӗ. Ытларах ӗнтӗ вӑл вӑйӑсене ҫамрӑксемпе ачасем хутшӑнчӗҫ.

Уявра хӑйӗн пултарулӑхне «Любава» професионаллӑ музыка ушкӑнӗ те кӑтартрӗ. Ҫамрӑк солистка Елена Терентьева вара пурин кӑмӑлне те кайрӗ.

Уяв спорт мероприятисемпе вӗҫленчӗ — халӑх футболла вылярӗ, кире пуканне йӑтрӗҫ. Ӑмӑртусемпе вӑйӑсенче мала тухнисене уяв спонсорӗ Александр Иванов (вӑл ку ялта ҫуралнӑ, халӗ ОАО «Оргсинтезра» /Хусан/ ӗҫлет) парнесем пачӗ.

Малалла...

2007 ҫулхи уявра

Раҫҫей Федерацийӗн пӗтӗм чӑвашсен культурӑпа наци автономийӗн оргкомитечӗ йышӑнӑвӗпе килӗшӳллӗн «Акатуй» кӑҫал Мусавра ҫӗртмен 5-мӗшӗнче, шӑматкун, иртӗ. Пуҫламӑшӗ 11 сехетре. Уяв 19 сехетчен тӑсӑлӗ.

Акатуй программинче: чӑваш эстрада юрӑҫисен концерчӗ, «Кӗрешӳ» ӑмӑрту, ӳнер продукцийӗн суту-илӗвӗ. Ҫавӑн пекех «Акатуйсене» яланхи пекех «Акконд», «Букет Чувашии» тата ытти паллӑ фирмӑсен продукцине туянма май пулать.

Акатуя «Измайловӑри Крамль» ятлӑ культурӑпа кану комплексӗнче ирттерме палӑртнӑ. Адрес: Измайлово ҫулӗ, 73ж. «Измайлово» хӑна комплексӗпе юнашарах.

«Партизанская» метроран 5 минутра, «Черкизовская» метроран 8 минутра ҫитме пулать.

Карповсем: Валентин (Алиней) тата Владимир

Чанкасси ялӗнче пурӑнакан Владимир Иванович Степанов килӗнче «Ҫемье тата йӑх династийӗн музейне» уҫнӑ.

Ятарлӑ темиҫе стенд ҫинче — Карповсен ҫемйисем—– аслашшӗ-асламӑшӗсемпе ашшӗ-амӑшӗсем тата ачисем. 1930-60-мӗш ҫулсенчи сӑнӳкерчӗксем уйрӑмах хаклӑ реликви. Акӑ, йӑх аслашшӗ — Карп, унӑн ывӑлӗ Степан. Степанӑн арӑмӗ Анастасия. Унпа йӗкӗреш Зиновия. Авалхи сӑнӳкерчӗксенче чӑвашлӑх туллин те сӑнарлӑн палӑрать: ҫи-пуҫра, сӑн-питре, самана витӗмне туйма май паракан вак-тӗвек детальсенче, пейзажра. Нацилӗхӗн тури енчи чӑвашсен хӑйне евӗрлӗхне те уҫҫӑнах туйса илетӗн ҫав сӑн-сӑпатсенче. Чӑвашла айванлӑх та, йӑвашлӑх та курӑнмасть, витӗр хӑюллӑ куҫсем, маттур ӑслӑ ҫынсем тинкереҫҫӗ пирӗн ҫине, тапса тӑракан вӑй-хал туйӑнать вӗсен кӗрнеклӗ ӳт-пӗвӗсенче.

Чи курӑнмалли вырӑнта — Тӑван ҫӗршывӑн Аслӑ вӑрҫинче нимӗҫ фашисчӗсене хирӗҫ ҫапӑҫнӑ Карповсем, Степановсем, Григорьевсем. Тепӗр стенчӗ ҫинче — вӑрҫӑра пуҫ хунисем. Саккӑрӑн вӑрҫа тухса кайнӑ та ҫиччӗшӗ каялла таврӑнайман (Николай, Порфирий, Иван, Александр, Алексей, Николай, Евпроксий, сывӑ юлни те — Василий ҫеҫ.

Малалла...

хумханакан кӗпер

Ҫӑвӑн 20-мӗшӗнче Волгоград хулинче ҫӗнӗ кӗпере хупма тивнӗ — те вӑйлӑ ҫиле пула, те расчетсем тунӑ чухне йӑнӑшсене пула кӗпер хумханма тытӑннӑ. «Вести 24» инҫекурав каналӗпе кӑтарнӑ хыпарта хумсен ҫӳллӗшӗ пӗр метра ҫитни курӑнать.

Кӗпер хумханӑвӗ пирки Раҫҫей президенчӗ патне те ҫитернӗ, Дмитрий Медведев кӗпере кам проекланине, мӗнле хӑпартнине тата усӑ курнине тӗрӗслеме хушнӑ.

Кӗпере пӗлтӗр юпа уйӑхӗнче уҫнӑ пулнӑ. Уҫнӑ чухне Раҫҫейри федераллӑ ҫул-йӗр агентсвин пуҫлӑхӗ Сергей Потапов кӗпере пысӑк хак панӑ: «По качеству работ, использованным технологиям, готовности объекта к вводу в эксплуатацию волгоградский мост – лучший из 4-х мостов, которые будут в ближайшее время введены в строй в России. Волгоградский мост выполнен на «отлично» (Хальхи вӑхӑтра хута кӗртме палӑртнӑ Раҫҫейри 4 кӗпере илсен пахалӑхӗпе, усӑ курнӑ технологисемпе, хута кӗртме хатӗрлесе ҫитерни тӗлӗшӗпе Волгоградри кӗпер — чи лайӑххи. Волгоградри кӗпере «чаплӑ» паллӑ пама юрать).

Кунашкал чи паллӑ пӑтӑрмах 1940 ҫулта Такома-Нэрроуз кӗперпе пулса иртнӗ.

Малалла...

Михаил Игнатьев

Ҫу уйӑхӗн 19-мӗшӗнче Шупашкар районӗнче пӗрлехи информаци кунӗ иртрӗ. ЧР Министрсен Кабинечӗн Председателӗн заместителӗ — ялхуҫалӑх министрӗ Михаил Игнатьев ертсе пыракан ушкӑн Тутаркасси пултарулӑх ҫуртӗнче ял ҫыннисемпе тӗл пулчӗ.

Министр республикӑн бюджет политикипе паллаштарчӗ, паянхи кун экономикӑра ырӑ улшӑнусем пуррине палӑртрӗ, ҫурт-йӗрпе коммуналлӑ хуҫалӑха, агропромышленность комплексне аталантарма палӑртнӑ утӑмсем пирки каларӗ.

Ун хыҫҫӑн Шупашкар районӗн пуҫлӑхӗ Анатолий Князев сӑмах илчӗ:

— Кӑҫал кӗркунне акса хӑварнӑ 5000 гектар тырӑ пӗтрӗ, вӗсене йӑлтах ҫӗнӗрен акмалла. Тӑкак сахал мар пулчӗ. Пӗр ҫуллӑх тата нумай ҫуллӑх курӑксем, кукуруза акатпӑр.

Унтан район пуҫлӑхӗ демографи ыйтӑвӗ лайӑхланса пынине, ҫавна май ача сачӗсем ытларах кирлине палӑртрӗ. Кӳкеҫре 300 ача черетре тӑрать, хӑш-пӗр ялсенче вара вырӑнсем пушӑ, унта ҫӗнӗ ушкӑнсем уҫма палӑртаҫҫӗ. «Ҫӗнӗрен 1 ача сачӗ тума 2 миллиона яхӑн укҫа кирлӗ, хатӗр учрежденире 1 ушкӑн уҫма — 600 пине яхӑн, — терӗ Анатолий Панетелеймонович.

Малалла...

Комисси сайчӗ

Ҫӑвӑн 20-мӗшӗнче Чӑваш Республикин вӗренӳпе ҫамрӑксен политикин министерствинче чӑваш чӗлхин пӗрлехи комиссийӗн черетлӗ ларӑвӗ иртнӗ.

Комисси пайташӗсем пухӑнса ҫак ыйтусене сӳтсе явнӑ:

1. Шупашкарпа Ҫӗнӗ Шупашкарти урам тата обществӑллӑ транспорт чарӑну ячӗсен чӑвашла варианчӗсене ҫиррӗплетесси. Ку ыйтӑва пӗлтӗрех сӳтсе явма пуҫланӑччӗ, анчах та вӑл вӑхӑтра пӗтӗмӗшле лайӑххӑн хатӗрлесе ҫитерейменнине пула тепӗр ларӑва куҫарма шутларӗҫ. Хальхинче вара чӑвашла ятсене йышӑннӑ — вӗсене ҫитес вӑхӑтра комисси сайтӗнче вырнаҫтарӑпӑр. Ыранах ҫуртсенчи тӗрӗс мар вараинтсем ҫухаласси пулмасть — комисси ку ятсене сӗнет йышӑнать кӑна. Ятсене ҫӗнетесси вара ыттисен ӗҫӗ.

2. Чӑваш чӗлхине вӗрентмелли кӗнекисенче усӑ куракан хӑш-пӗр терминсене ҫирӗплетесси. Вӑл терминсене ҫирӗплетнисӗр пуҫне Вӗрентӳ министерствин тулли ятне ҫирӗплетнӗ — малашне ӑна «Чӑваш Республикин вӗренӳпе ҫамрӑксен политики министерстви» ятпа (асӑрхӑр: «политики» сӑмахра «Н» ҫук) ҫырмалла. Терминсене те ҫитес вӑхӑтра сайтра вырнаҫтарӑпӑр.

Ҫавӑн пекех комисси пайташӗсем сайтпа паллашрӗҫ: ӑна епле калӑпланипе, сайт урлӑ килнӗ ҫырусемпе.

Малалла...

К. Иванов

Ҫӑвӑн 15-пе 20-мӗш кунӗсенче Чӑваш чӗлхин инҫет вӗренӳ центрӗнче чӑваш литературин классикӗ К.В. Иванов ҫуралнӑранпа 120 ҫул ҫитнине халалланӑ интернет-олимпиада иртрӗ. Шкул ачисен 35 минут хушшинче тӗрлӗ ыйтусем ҫине хуравлама тиврӗ: К.В. Иванов ҫуралнӑ килӗнче мӗнле учреждени вырнаҫни пирки, ун ячӗпе хӑш ҫул укҫа кӑларни пирки, литература ӗҫне хӑш ҫулта пуҫӑнни пирки, «Нарспие» пӑлхарла кам куҫарни пирки, ҫав поэмӑнах поэт хӑш сыпӑкран ҫырма пуҫлани пирки.

Ӑмӑртӑва пурӗ пине яхӑн ача хутшӑннӑ. Пур ыйту ҫине те тӗрӗс хуравлаканнисем те чылай. Ҫӗнтерӳҫӗсене Чӑваш Республикин вӗрунӳпе ҫамрӑксен политикин Министерстви дипломсемпе чыслӗ. Пӗрремӗш 10 вырӑна лекнӗ ачасене ҫавӑн пекех Инҫет вӗрентӳ центрӗ «Интернет-олимпиадӑн лауриат сертификатне» парӗ.

Сиен кӳнӗ фура

Паян ирхине Сарӑту хулинче пысӑк транспорт пӑтӑрмахӗ пулса иртнӗ — Ҫӗнӗ Узенски урамӗпе аннӑ чухне сӑрапа тиенӗ «DAF» машинӑн чаркӑчӗ ӗҫлеме пӑрахнӑ — водителе пӑхӑнма пӑрахнӑ фура 18 ҫӑмӑл машина сиен кӳнӗ. Ытларахӑшӗ кӑшт кӑна ваннӑ, тӑваттӑшӗ вара вӑйлах сиенленнӗ. «ДЭУ Нексия» ҫӑмӑл машин водительне хулан 3-мӗш пульницине леҫме тивнӗ.

Юлашки икӗ эрне хушшинче Сарӑтӑвра йывӑр тиевлӗ машинсемпе пулса иртнӗ транспорт пӑтӑрмахӗсене илсен ку —виҫҫӗмӗш. Ҫӑвӑн 13-мӗшӗнче Ылттӑн туран анакан КамАЗӑн та чаркӑч системи юрӑхсӑра тухнӑ — вӑл ВАЗ-21099 тата «Волга» ҫӑмӑл машинсемпе ҫапӑннӑ. Ку пӑтӑрмахра техника ҫӗмӗрӗлнисӗр пуҫне виҫӗ ҫын пурнӑҫӗ татӑлнӑччӗ.

Республикӑра «Ҫутҫанталӑка епле упратпӑр» экологи конкурсӗ вӗҫленнӗ. Унта Чӑваш Енри 10 районти 36 вӗренекен хутшӑннӑ. Ачасем тӑван тавралӑх темипе ҫыхӑннӑ харпӑр хӑй ҫырнӑ юптарусене тӑратнӑ. Хӗрлӗ Чутай районӗнчен те хутшӑнакансем пучӗҫ. Ӑмӑрту пӗтӗмлетӗвӗпе Хусанушкӑнь шкулӗн вӗренекенӗ Елена Ярандайкина «Ҫӳҫепе йӑмра» (ертӳҫи — С.Яруткина) ятлӑ ӗҫӗпе виҫҫӗмӗш вырӑна тухнӑ.