Галина Григорьева-Айпикен халӑх тетелӗнчи страницинчен илнӗ сӑнӳкерчӗк

Шупашкар муниципаллӑ округӗнчи «Ясна» этнокомплексра паян Пушкӑртстанри чӑвашсем пулнӑ.

Галина Григорьева-Айпикен халӑх тетелӗнчи хӑйӗн страницинче пӗлтернӗ тӑрӑх, вӗсем парнесемпе килнӗ, музея ҫӗнӗ экспонатсемпе пуянлатнӑ. Аякри йӑхиашӑмӑрсене чӑваш юррипе кӗтсе илнӗ.

«Тваткал пахчи, ҫырла пахчи.

Ҫырли пиҫсен илемлӗ.

Ах, Тор-Тор, панулми.

Татымап, ҫиимап,

Тӑвансӑр пуҫне пурнымастӑп.

Тӑван пӳрчӗ, тваткал пӳрчӗ.

Тӑвансем пухӑнсан илемлӗ.

Ай, Тор-Тор, панулми,

Татымап, ҫиимап,

Тӑвансӑр пуҫне пурнымастӑп...», — шӑрантарнӑ хӑнасене кӗтсе илнӗ май.

Чӑваш Енре медиацентр туса хума палӑртни ҫинчен Чӑваш халӑх сайчӗ пӗлтернӗччӗ-ха. Ӑна ҫурла уйӑхӗн 16-мӗшӗнче йӗркеленӗ. Кун пирки companium.ru сайтра пӗлтернӗ.

Директор пулма «Хыпар» издательство ҫуртӗнче чылай ҫул ӗҫлекен Дмитрий Моисеева ҫирӗплетнӗ. Юлашки вӑхӑтра вӑл издательство ҫурчӗн директорӗн тивӗҫне пурнӑҫласа пынӑ.

Ҫав организацин юридици адресне Шупашкар хули, Ленинла комсомол урамӗ, 1В ҫурт тесе кӑтартнӑ.

Хальхи вӑхӑтра «Хыпар» издательство ҫурчӗн директорӗ — тӗп редакторӗ Виктория Вышинская.

Ирина Диарова страницинчен илнӗ сӑнӳкерчӗк

Чӑваш ачисен «Эткер» сменинче канакан ачасем «Чӑваш керем» этнокомплексра экскурсире пулнӑ.

Ирина Диарова чӑваш чӗлхи вӗрентекенӗ халӑх тетелӗнчи хӑйӗн страницинче пӗлтернӗ тӑрӑх, Сергей Сорокин ачасене музейри кашни япала ҫинчен тӗплӗн каласа панӑ, ыйтусене хуравланӑ. Ачасене почта историйӗ ҫинчен каласа пани уйрӑмах килӗшнӗ-мӗн.

«Чи кӑмӑлли вара парне пулчӗ. Сергей Лазаревич кашнинех кӗнеке парнелерӗ. Сӑн ýкерӗнни те, А.С. Пушкин сӑввисене чӑвашла вулани те ачасен асӗнче нумайлӑха асра юлӗ», — пӗтӗмлетнӗ Ирина Диарова.

"Контактри" сӑн

Етӗрне муниципаллӑ округӗнче Пӗтӗм тӗнчери плэнер иртнӗ. Ӑна Тури Ачак ялӗнче йӗркеленӗ.

Плэнера хутшӑнакан ӳнерҫӗсем хӑмла темипе те ӳкернӗ. Хӑмла ку округа мӗншӗн ҫывӑх пулни паллӑ ӗнтӗ.

Ҫавӑн пекех ӳнерҫӗсем 19-мӗш ӗмӗрти чӑваш хресченӗн чӗрхуҫалӑх музейӗн заведующийӗн Людмила Петровӑн портретне те ӳкернӗ.

Cap.ru сӑнӳкерчӗкӗ

Шупашкарти олимп резервӗн 2-мӗш спорт шкулӗнче фристайл-парк уҫӑлнӑ. Унта аэроминтер тата кантра ҫулӗ уҫӑлнӑ.

Ку проекта спонсорсем пулӑшнипе пурнӑҫа кӗртме пултарнӑ. Ҫакӑн пек пӗлтернӗ Чӑваш Ен Элтеперӗ Олег Николаев.

Асӑннӑ паркра спортсменсем фристайл енӗпе ӑмӑртайӗҫ.

Фристайл-паркри аэроминтер калӑпӑшӗ — 55х25 метр. Унта спортсменсем дисциплинах «слоуп-стайл» тата «биг-эйр» дисциплинӑсенче хӑйсен пултарулӑхне туптаҫҫӗ.

Шупашкарти аэропорт сӑнӳкерчӗкӗ

Шупашкарти аэропорта юсама пуҫлани виҫӗ ҫул ӗнтӗ. Ҫав вӑхӑтра аэровокзал ӗҫлеме самантлӑха та чарӑнман — тӗрлӗ хулана каякансене тата пирӗн тӑрӑха килекенсене йышӑннӑ.

Чӑваш Енӗн патшалӑх телерадиокомпанийӗ пӗлтернӗ тӑрӑх, отделка ӗҫӗсем пыраҫҫӗ. Строительсем инженери сечӗсене монтаж туса пӗтернӗ.

Юсаса пӗтернӗ хыҫҫӑн ҫурт калӑпӑшӗ виҫӗ хут ытла пысӑкланӗ.

Юсав ӗҫӗ ҫулталӑкӗпех пырӗ.

t.me/newschebru сӑнӳкерчӗкӗ

Шупашкар хулин 555 ҫулхине халалланӑ уява ҫӗршыври паллӑ юрӑҫа Шамана чӗннине Чӑваш халӑх сайчӗ пӗлтернӗччӗ-ха.

Концерта курма халӑх калама ҫук йышлӑн пуҫтарӑннӑччӗ. Анчах ахаль куракансене юрӑҫран вип-зонӑпа уйӑрнӑ. Унта ача-пӑчапа аслисем тата тӳрӗ-шара пурччӗ.

Куракансене ҫакӑн пек икӗ ушкӑна уйӑрни теприсене тӗлӗнтернӗ, вӗсем хула администрацийӗн пуҫлӑхӗ Владимир Доброхотов патне те халӑх тетелӗнче кӑмӑлсӑрланса ҫырнӑ.

Тӳрӗ-шара ӑнлантарнӑ тӑрӑх, фан-зонӑра Уҫӑ хулан хастарӗсем, волонтёрсем, ӗҫлекен ҫамрӑксен канашӗн, республикӑн районӗсен пайташӗсем, уяв мероприятийӗсене хутшӑннӑ артистсем пулнӑ-мӗн.

cap.ru сӑнӳкерчӗкӗ

Авӑн уйӑхӗн 21-мӗшӗнче Чӑваш Енри вӗрентекенсен конференцийӗ иртӗ. Унӑн теми — «Раҫҫейӗн вӗренӳ тытӑмӗн суверенитетне ҫирӗплетессинчи хальхи вӑхӑтри ӗҫсемпе Чӑваш Енри вӗренӳ аталанӑвӗ».

Конференцие федераци тата республика шайӗнчи экспертсем, педагогика ӗҫӗн ветеранӗсем, учительсем, влаҫ органӗсенче ӗҫлекенсем хутшӑнчӗҫ.

Йыхравланӑ лекторсем — Раҫҫейӗн «Пӗлӳ» обществин пайташӗсем Антон тата Виктория Макарскийсем.

«Чӑваш Ен» ПТРК сӑнӳкерчӗкӗ

Шупашкарта «Общественное признание» (чӑв. Халӑх хисепӗ) конкурса пӗтӗмлетнӗ. Ҫӗнтерӳҫӗсене тӗрлӗ номинацире чысланӑ.

«Ҫемье йӑли-йӗрки — Шупашкар историйӗ» номинацире тӗп парнене Николай Семёнов режиссёр ҫемйи тивӗҫнӗ. Алевтина мӑшӑрӗпе вӑл 5 ача ҫитӗнтерет. «Чӑваш Ен» ПТРКра пӗлтернӗ тӑрӑх, хула, республика, ҫӗршыв шайӗнче иртекен конкурссенче Семёновсем пӗрре мар палӑрнӑ. Мускавра «Раҫҫей» куравра «Знатоки Родины» конкурсра ҫӗнтернӗ. Ҫавӑн пекех республика чысне ҫемье форумӗнче тивӗҫлӗ хӳтӗленӗ.

Семёновсем Шупашкар муниципаллӑ округӗнчи Апаш тӑрӑхӗнчен.

runews24.ru сайтри сӑн

Питӗрти Пулково аэропортӗнче Шупашкара вӗҫекен самолет пирки виҫӗ чӗлхепе пӗлтерме тытӑннӑ: вырӑсла, акӑлчанла тата чӑвашла.

Вырӑсла ҫапла янӑраттараҫҫӗ: малтан пассажирсене самолета ларма паспорт тата талон хатӗрлеме ыйтаҫҫӗ, кайран вара чӑвашла Питӗре килнӗшӗн тав туса калаҫҫӗ.

Сӑмах май, Шупашкартан Питӗре «Победа» авиакомпанин самолечӗсем вӗҫеҫҫӗ. Рейссем – тунтикун, юнкун, кӗҫнерникун, эрнекун тата вырсарникун. Шупашкартан самолет 15 сехет те 5 минутра вӗҫет, Питӗртен – 12 сехет те 45 минутра. Икӗ сехетрен пассажирсем вырӑнта пулаҫҫӗ.