«Хочу в Чувашию» каналтаюи видеоран илнӗ сӑнӳкерчӗк

Шупашкарти аэропорт хитреленнӗҫемӗн хитреленсе пырать. Ҫавна ҫак йӗркесен авторӗ те асӑрхарӗ. Ҫурла уйӑхӗнче аэропорт патне пымалли тротуарсене те сарманччӗ пулсан, халӗ ҫав ӗҫе вӗҫленӗ.

Аэровокзалта пассажирсене самолёт кӗтсе лармалли хӑтлӑ зонӑсем, кафе, касса тата япала упрамалли камерӑсем, багажа автомат мелпе йышӑнмалли тунӑ. Ачаллисем валли уйрӑм пӳлӗм пур.

"Контактри" сӑн

Пӗрремӗш канал Чӑваш Енре «Народный ледниковый» проектӑн ҫӗнӗ сезонӗ валли сюжет ӳкерет. Вӑл – федераци каналӗ валли пӑрлӑ шоу йӗркелекен паллӑ Илья Аврбухпа пӗрле.

Раҫҫейӗн тава тивӗҫлӗ спорт мастерӗ, Олимп вӑййисен призерӗ, Европа тата тӗнче чемпионӗ Илья Авербух Шупашкара килнӗ. Сюжете Шупашкарти «Ҫӗнӗ хула» микрорайонта нумаях пулмасть уҫӑлнӑ «Пӑрлӑ Аренӑра» ӳкерӗҫ.

"Контактри" сӑн

Чӳк уйӑхӗн 17-мӗшӗнче «Россия-Культура» канала яма ан манӑр. 12 сехет те 20 минутра пуҫланакан «Неизведанные маршруты России» кӑларӑма пӑхмалла.

Унта ертӳҫӗ Чӑваш Енпе паллаштарӗ, чей ӗҫмелли йӑла-йӗркене кӑтартӗ, Хӗл мучипе тӗл пулӗ, тракторпа ярӑнӗ. Ҫавӑн пекех хӑйне евӗр процедурӑсем кӗтеҫҫӗ ӑна: йӗппе тирсе сипленни, вакра шыва кӗни…

Чи вӑрттӑнни вара – халӑх хушшинче анлӑ сарӑлнӑ кӗпере кӑтартни.

Татьяна Вашуркина страницинчен илнӗ сӑнӳкерчӗк

Чӑваш Енӗн Наци вулавӑшӗн директорӗ Роза Лизакова тата Республикӑри ача-пӑчапа ҫамрӑксен вулавӑшӗн директорӗ Татьяна Вашуркина Питӗрте иртекен канашлӑва хутшӑнаҫҫӗ. Унта федерацин тата регионсенчи тӗп библиотекӑсен директорӗсен ҫулсерен иртекен канашлӑвне хутшӑнаҫҫӗ.

Вӗсем Хӗллехи керменти иккӗмӗш Николай патшан библиотекинче пулнӑ. Халӗ унта Патшалӑх Эрмитажӗн ӑслӑлӑх вулавӑшӗн вырӑс уйрӑмӗ вырнаҫнӑ.

Канаш хулинче пӗр ҫурт халӗ те ӑшӑсӑр пулнине, ҫавна май хула администрацийӗ тӗлӗшпе пуҫиле ӗҫ пуҫарнине пӗлтернӗччӗ.

Ӗнер Канаш хулин пуҫлӑхӗ Виталий Михайлов отставкӑна кайма заявлени ҫырса панӑ. Ҫакӑ, ахӑртнех, ҫак пӑтӑрмахпа, ҫыхӑннӑ.

Сӑмах май, унччен Канаш хулин администрацийӗ пур ҫурта та ӑшӑ панӑ тесе отчет тунӑ.

"Контактри" сӑн

Норильскра ҫулсерен «Край – наш общий дом» наци культурисен фестивалӗ иртнӗ. Кӑҫал вӑл Зааолярье тӑрӑхӗнчи В.Маяковский ячӗллӗ драма театрӗнче 20-мӗш хут иртнӗ.

Театрта наципе культура организацийӗсем куравсем, ӑсталӑх класӗсем йӗркеленӗ. Уяв концерчӗ вырӑнне спектакль иртнӗ. Унта харпӑр историсем янӑранӑ, паллӑ пулӑмсем пирки каласа кӑтартнӑ, йӑла-йӗркепе, вӑйӑсемпе, юрӑсемпе паллаштарнӑ.

Норильскри чӑвашсен «Хӗвел» общество организацийӗ те айккинче юлман.

Чӳкӗн 13-мешӗнче тунӑ сӑн. "Ҫыхӑнура" порталти сӑн

Чӳк уйӑхӗн 10-мӗшӗ тӗлне Шупашкарти Хӗрлӗ тӳремре Раҫҫейӗн тӗрленӗ карттин музейӗ уҫӑлмаллаччӗ. Ҫапла пӗлтернӗччӗ ЧР Элтеперӗ Олег Николаев. Аукцион та иртнӗ, подрядчике те палӑртнӑ. Анчах мӗн пулса иртет-ха паянхи кун кӳлмекре? «Ҫыхӑнура» портал журналисчӗсем вырӑна тухса сӑн ӳкернӗ.

Чӳк уйӑхӗн 13-мӗшӗнче сӑнӳкерчӗксене пӑхсан ҫакӑ курӑнать: тимӗр карта леш енче никӗс кӑна пур. Монтаж тума тытӑнман та. Музей чӳк уйӑхӗн 26-мӗшӗччен, Чӑваш тӗррин кунӗччен, пулӗ-ши?

cap.ru сайтри сӑн

ЧР Элтеперӗ Олег Николаев каллех «тӳрӗ лини» ирттерме палӑртнӑ. Хальхинче вӑл чӳк уйӑхӗн 28-мӗшӗнче каҫхи 6 сехетре пулӗ.

Ӑна Элтеперӗн телеграм-каналӗнче, «Контактри» унӑн страницинче, «Чӑваш Республики» сообществӑра, Наци телекуравӗпе курма, Наци радиовӗпе тата «Тӑван радиопа» итлеме май пулӗ. Ыйтусене Патшалӑх пулӑшӑвӗсен порталӗ урлӑ яма, пост-анонс айӗнче комментари хӑварма юрать.

Сӑмах май, юлашки хутчен «тӳрӗ лини» ҫурла уйӑхӗн 29-мӗшӗнче иртнӗ.

culture.ru сайтри сӑн

Ҫитес ҫул Тӑван ҫӗршывӑн Аслӑ вӑрҫи пӗтнӗренпе 80 ҫул ҫитнӗ май вӑрҫӑ ачисене укҫан хавхалантарассине ЧР Элтеперӗ Олег Николаев пӗлтернӗччӗ. Халӗ мӗн чухлӗ укҫа парасси паллӑ.

Ҫитес ҫул республикӑри 42 пине яхӑн вӑрҫӑ ачи 2-шер пин тенке тивӗҫӗ. Ҫак тӗллевпе хыснаран 83,7 миллион тенкӗ уйӑрӗҫ.

Сӑмах май, ҫак категорие кӗрекен ҫынсем валли уйрӑм тӳлев ҫук. Республикӑри 818 вӑрҫӑ ачин комманаллӑ тӑкакӗсен 25 процентне саплаштараҫҫӗ.

Чӳк уйӑхӗн 12-мӗшӗнче Чӑваш наци музейӗнче республикӑн Культура, национальноҫсен ӗҫӗсен, архив ӗҫӗн министерствин коллегийӗн ларӑвӗ иртнӗ.

Мероприятие коллеги членӗсем, министерствӑн структура подразделенийӗсен ертӳҫисем, районсемпе хуласен администрацийӗсен культура пайӗсен пуҫлӑхӗсем хутшӑннӑ. Ларӑва культура министрӗ Светлана Каликова уҫнӑ.

Вӑл «Чӑваш Республикин культурӑн тава тивӗҫлӗ ӗҫченӗ» ята тивӗҫнисене саламланӑ. Ҫав йыша — Шупашкар муниципаллӑ округӗн Тӗп культура центрӗн хормейстерӗ Наталия Арсентьева; Шупашкарти «Ҫӗнтерӳ» мемориал комплексӗн «Ветеран» халӑх хорӗн хормейстерӗ Светлана Муллина; Комсомольски округӗнчи тӗп клуб тытӑмӗн халӑх театрӗн режиссёрӗ Марина Шумилкина.