Кандинский нейросеть сӑнӳкерчӗкӗ

Ҫӗмӗрлере пурӑнакан 47 ҫулти хӗрарӑм эрнере 2 миллион ытла тенкӗсӗр тӑрса юлнӑ.

Ниҫта та ӗҫлемен хӗрарӑм интернет-лапамсенчен пӗринче реклама курнӑ, унта инвестици хывса укҫа ӗҫлесе илме май пуррине пӗлтернӗ. Кун валли уйрӑм менеджерпа канашлама сӗннӗ, вӑл ӑс-тӑн парассине ӗнентернӗ.

«Консультантпа» калаҫа-калаҫа хӗрарӑм пӗр эрнере тӗрлӗ банкра 2 миллион ытла тенкӗ кредит илсе тултарнӑ, укҫана паллӑ мар счётсем ҫине куҫарса янӑ.

cap.ru сайтри сӑн

Ҫӗртме уйӑхӗн 12-мӗшӗнче Шупашкр муниципаллӑ округӗнчи Пикшик ялӗ ҫывӑхӗнчи пӗвере чарлан тетелте ҫыхланса ларни пирки пӗлтернӗ. Кайӑка ҫӑлавҫӑсен пулӑшма тивнӗ.

Вӗсем шыв айӗнчи тетеле касса чарлана ирӗке кӑларнӑ. Анчах вӑйран кайнӑ кайӑк ирӗке тухсан та часах вӗҫеймен.

Чӑваш Енри ҫӑлавпа шырав служби тетелпе пулӑ тытма юраманни пирки асӑрхаттарать. Сӑлтавсенчен пӗри – шыв-шурта кайӑксем пулӑ тытни, вӗсем вара тетелпе ҫыхланса ларма пултараҫҫӗ.

cap.ru сайтри сӑн

Шупашкарти Калинин районӗн квартал уполномоченнӑйӗ ҫӗртме уйӑхӗн 11-мӗшӗнче чикансен тапӑрӗ пурӑнакан вырӑна тӗрӗсленӗ. Вӑл Алькеш поселокӗнчи Аялти иккӗмӗш тата Пионерсен иккӗмӗш урамӗсенче пулнӑ.

Тӗрӗслев вӑхӑтӗнче ҫакӑ палӑрнӑ: чикансем никамран ирӗк ыйтмасӑр, документсемсӗр ҫурт тума тытӑннӑ. Уполномоченнӑй тапӑрти аслӑ ҫынпа калаҫнӑ, ҫак объекта тума юраманни пирки, пурӑнакан вырӑна ҫӳп-ҫапран тасатмаллине ӑнлантарнӑ.

Уполномоченнӑй ку информацие, ҫырнӑ протокола, полицие панӑ.

cap.ru сайтри сӑн

Шупашкар хулин пуҫлӑхне кӗҫех, ҫӗртме уйӑхӗн 18-мӗшӗнче, суйлӗҫ. Ҫӗртме уйӑхӗн 11-мӗшӗнче комисси суйланӑ 4 кандидат хула аталанӑвӗн планӗпе паллаштарнӑ. Кун хыҫҫӑн пуҫлӑх пуканӗшӗн 2 ҫын кӗрешӗ: халӗ пуҫлӑх тивӗҫӗсене пурнӑҫлакан Владимир Доброхотов тата ЕДДС ертӳҫи Александр Малов.

Сӑмах май, конкурса 5 кандидатран заявка килнӗ. Ҫӗртмен 7-мӗшӗнче комисси вӗсен докуменчӗсене тишкернӗ те чӗрчунсене хӳтӗлекен Яна Николаевӑна конкурса хутшӑнма ирӗк паман.

t.me/chuv_kray каналтан илнӗ сӑнӳкерчӗк

Улатӑрта Раҫҫей кунне халалласа илемлӗ фотосесси ирттернӗ. Хӗрсем триколор тӗслӗ ҫипуҫ тӑхӑнса сӑн ӳкерӗннӗ. Пӗри шурӑ тӗслӗ тӑхӑннӑ, тепри — хӗрлӗ, виҫҫӗмӗшӗ — кӑвак.

Фотосессие вырӑнти «Мираж» халӑх фольклор клубӗ тата «Диалог» бал ташшин ансамблӗ йӗркеленӗ.

Чӑваш чӗлхи кунӗнче те ҫавӑн пекрех тӗрлӗ акци иртет. Ун чухне ҫынсем ӗҫе чӑваш эрешӗллӗ тум тӑхӑнса пыраҫҫӗ.

Чӑваш Енри профессионал писательсен сӑнӳкерчӗкӗ

Чӑваш Енӗн Наци вулавӑшенче «Ачалӑхӑм» кӗнекене хӑтлама пуҫтарӑннӑ. Унӑн авторӗ — Тутарстанри чӑваш журналисчӗ, писателӗ, блогерӗ Константин Малышев.

Ҫӗнӗ кӗнекене хӑтлама культурӑпа ӳнер ӗҫченӗсем, литературоведсем, педагогсем, общество ӗҫченӗсем, вулакансем пуҫтарӑннӑ.

Чӑваш Енри Профессионал писательсен халӑх тетелӗнчи ушкӑнӗнче пӗлтернӗ тӑрӑх, «Ачалӑхӑм» кӗнекене 29 калав кӗнӗ. Вӗсенче автор хӑйӗн ачалӑх ҫулӗсем ҫинчен аса илсе каласа кӑтартнӑ. Кашни хайлава ҫемье архивӗнчи сӑнӳкерчӗксемпе пуянлатнӑ.

Тӗп рольте - Нина Яковлева. chuvdram.ru сӑнӳкерчӗкӗ

Ҫӗртме уӑхӗн 11-мӗшӗнче Чӑваш патшалӑх академи драма театрӗнче Арсений Тарасов пьесипе Валерий Яковлев лартнӑ «Хӗрлӗ кӗпеллӗ телей» спектакле кӑтартассине эпир унччен пӗлтернӗччӗ-ха.

Театрта хыпарланӑ тӑрӑх, ҫӗнӗ ӗҫе курма пӗтӗм республика пуҫтарӑннӑ тейӗн, халӑх лӑк тулли пулнӑ. Асӑннӑ театрта ҫӗнӗ спектакльсене курма халӑх, чӑн та, йышлӑн пуҫтарӑнать.

Пьеса авторӗ каланӑ тӑрӑх, пьесӑна ҫырас шухӑшпа вӑл нумай ҫӳренӗ. Унти истори ытла та хӑйсен тесе вӑл тӑхтаса-аптӑраса тӑнӑ. Спектакльти тӗп сӑнарти карчӑк Арсений Тарасов амӑшӗпе ҫыхӑннӑ иккен, унӑн ашшӗн сӑнарне Ҫирахви упӑшки урлӑ сӑнарланнӑ.

chuvbook.ru сӑнӳкерчӗкӗ

Чӑваш кӗнеке издательствинче Зоя Сывлӑмпи ҫыравҫӑн «Хӑюллӑ пакша. Смелая белка» кӗнеки пичетленсе тухнӑ.

Ҫӗнӗ кӑларӑмӑн редакторӗ – Ольга Иванова, ӳнерҫи – Наталья Васильева. Кӗнеке тиражӗ – 1000 экземпляр.

Ольга Австрийская Чӑваш кӗнеке издательствин сайтӗнче пӗлтернӗ тӑрӑх, кӑларӑма кӗнӗ сӑвӑсене поэт кӗҫӗн ҫулхи ачасем валли ҫырнӑ. Вӗсене чӑвашларан вырӑсла автор хӑй тата Людмила Симонова ҫыравҫӑ куҫарнӑ.

Чӑваш Енри профессионал писательсен ушкӑнӗнчи сӑнӳкерчӗк

Хӗрӳ чунлӑ Ҫеҫпӗл Мишши ҫак тӗнчерен уйрӑлса кайнӑ кун, ҫӗртме уйӑхӗн 15-мӗшӗнче, Шупашкарти унӑн палӑкӗ умӗнче савӑнӑҫлӑ лару-тӑрура пуху иртӗ. Ӑна вилӗмсӗр Ҫеҫпӗлӗмӗре асра тытса йӗркелӗҫ.

Мероприяти 9 сехетре пуҫланӗ.

Аса илтерер: Канаш районӗнчи (халӗ — муниципаллӑ округ) Касаккасси Шӗкӗр (халӗ Ҫеҫпӗл) ялӗнче ҫуралнӑ чӑваш поэчӗ 1922 ҫулхи ҫӗртме уйӑхӗн 15-мӗшӗнче Украинӑри Старогородка салинче вилнӗ.

sport24.ru сайтри сӑн

Синоптиксем паян-ыран республикӑра питӗ шӑрӑх ҫанталӑк пулассине систереҫҫӗ. Кӗҫнерникун тата эрнекун термометр 34 градус таранах ӑшӑ кӑтартӗ.

Шӑрӑхра ҫутӑ тум тӑхӑнма, эрех-сӑра ӗҫесрен, ытлашши ӗҫлесрен пӑрӑнма сӗнеҫҫӗ.

Ҫавӑн пекех республикӑра пушар тухас хӑрушлӑх пысӑк.