culture.cap.ru сӑнӳкерчӗкӗ

Раштав уйӑхӗн 24-мӗшӗнче Чӑваш Енӗн Наци вулавӑшӗнче «Ревель Фёдоров. Эпоха великой духовности» (чӑв. Ревель Фёдоров. Аслӑ ӑс-хакӑл тапхӑрӗ) астӑвӑм каҫӗ иртнӗ. Ӑна РСФСР халӑх художникӗ, Раҫҫей ӳнер академийӗн академикӗ, К.В. Иванов ячӗллӗ Чӑваш патшалӑх премийӗн лауреачӗ, Чӑваш Республикин литературӑпа ӳнер премийӗн лауреачӗ, Чӑваш Республикин хисеплӗ ҫынни Ревель Фёдоров (1929-2022) ҫуралнӑранпа 95 ҫул ҫитнине халалланӑ.

Ревель Фёдорович Раҫҫейри ӳнер академийӗн ылтӑн медальне, «Тӑван ҫӗршыв умӗнчи тава тивӗҫлӗ ӗҫсемшӗн» II степеньлӗ орден медальне, «Чӑваш Республики умӗнчи тава тивӗҫлӗ ӗҫсемшӗн» ордена тивӗҫнӗ.

Художника аса илме унӑн пултарулӑхне хаклакансем тата унӑн ывӑлӗ Александр Фёдоров хутшӑннӑ. Вӑл — Чӑваш Республикин тава тивӗҫлӗ художникӗ.

"Контактри" сӑн

Ҫӗнӗ Шупашкарти лицейра 4-мӗш класра вӗренекен Милана Киселева «Little Miss World Russia 2024» илем тата пултарулӑх конкурсӗн ҫӗнтерӳҫи пулса тӑнӑ.

Вӑл Мускавра иртнӗ. Унта Раҫҫейри тӗрлӗ регионти 4-17 ҫулсенчи хӗрачасем хутшӑннӑ. Милана гимнастика енӗпе те номер кӑтартнӑ. Кунсӑр пуҫне хӗрачасем сцена ҫине хитре кӗпесемпе тухнӑ.

cap.ru сӑнӳкерчӗкӗ

Чӑваш Енре рабочи профессине тӳлевсӗрех алла илме пулӑшакан организаци ӗҫлет. «Альма Матер» вӗренӳ центрӗ специалистсене пӗр-пӗр компани ыйтнине кура хатӗрлет.

Кӑҫал центр 200 ытла ҫынна вӗрентсе кӑларнӑ. Ҫав шутран 80-шӗ — электромонтажниксем. Вӗсене «Элекком Логистик» тулли мар яваплӑ общество валли хатӗрленӗ.

«Пирӗн тӗллев – регионти предприятисене кадр дефицитне ҫӗнме пулӑшасси тата ятарлӑ производствӑра кирлӗ специалистсене хатӗрлесси. Эпир куҫӑн тата куҫӑнсӑр мелпе вӗрентетпӗр», – каласа кӑтартнӑ вӗренӳ центрӗн ертӳҫи Максим Алексеев.

Квалификацие ӳстерме ӗмӗтленекенсем «Альма Матерпа» хӑйсем тӗллӗн те ҫыхӑнма пултараҫҫӗ.

ЧР Элтеперӗ Олег Николаев асӑрханма ыйтать: телеграмра унӑн ячӗпе суя страница уҫнӑ.

«Ман ятран ҫырусем килеҫҫӗ. Ку суя. Вӗсене ан хуравлӑр, блокировка тӑвӑр. Ҫырусем мӗнле профильтен килнине тӗрӗслӗр. Асӑрханӑр, ултавҫӑсене ан ӗненӗр», - ҫапла ҫырнӑ Олег Алексеевич. Ун ҫумне суя страницӑран килнӗ ҫыру скринне ҫирӗплетнӗ.

Суя аккаунтра Элтеперӗн чӑн-чӑн страници ҫинчи евӗр сӑнӳкерчӗкех ларать.

cheb-centr.soc.cap.ru сӑнӳкерчӗкӗ

Шупашкарта кӗмӗл волонтёрсем валли ёлка ирттернӗ. Ӑна йӗркелекенни — Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр.

Хастар ватӑсене социаллӑ учрежденири «Палан» хор тата коллективӑн солисчӗсем Зинаида Никифорова, Галина Осипенко тата Вячеслав Судаков хӑйсен пултарулӑхӗпе савӑнтарнӑ. Центра ташлама ҫӳрекенсем те уява кӑмӑлтан хутшӑннӑ. Эльвира Зеленкова ятлӑ хастар ватӑ «Жизнь» сӑвва вуласа панӑ май юрӑ-кӗвӗ, хавас кӑмӑл тӗрлӗ йывӑрлӑха ҫӗнме пулӑшнине палӑртса кӑтартнӑ.

pravdapfo.ru сайтри сӑн

Ытларикун каҫхине Канашра арҫын пуйӑс айне пулнӑ. Машинист рельссем ҫинче ҫын пулнине асӑрхасан пуйӑса чарма хӑтланнӑ. Анчах ӗлкӗреймен. Арҫын вилмеллех суранланнӑ. Халӗ следстви умӗнхи тӗрӗслев иртет.

Аса илтерер: нумаях пулмасть Ҫӗмӗрле районӗн сучӗ арҫынна ашшӗшӗн компенсаци тӳлеттермелле тунӑ. Унӑн ашшӗ 2023 ҫулхи юпа уйӑхӗнче пуйӑс айне пулса вилнӗ.

cap.ru ҫӑнӳкерчӗкӗ

Информатика учителӗсем Яндекс пулӑшнипе пӗлӗвне анлӑлатнӑ.

Кӑҫалхи авӑн уйӑхӗнче «Яндекспа» Чӑваш Ен Вӗренӳ министерстви килӗшӳ алӑ пуснӑ.

Чӑваш Енри икӗ вӗрентекен Яндекс Учебникӑн предмет хӑнӑхтарӑвӗсен конкурсӗнче ҫӗнтернӗ. Унта пуре 20 ҫын палӑрнӑ-ха. Вӗсенчен иккӗшӗ — Чӑваш Енрен.

Ҫӗнтерӳҫӗсем компанин Мускаври офисӗнче стажировка тухнӑ. Ҫак чыса Улатӑрти 6-мӗш номерлӗ гимназири информатика учителӗ Денис Купцов тата Ҫӗмӗрлери 8-мӗш гимназири информатика учителӗАлександр Димитриев тивӗҫнӗ.

Валентина Яковлева тунӑ сӑн

Патӑрьел округӗнчи Вӑтаел ялӗнче паянтан – карантин. Хушӑва ЧР Элтеперӗ Олег Николаев алӑ пуснӑ. Вӑл ятарлӑ хушу тухиччен вӑйра пулӗ.

Аса илтерер: «Ҫамрӑксен хаҫачӗн» корреспонденчӗ Валентина Яковлева пӗлтернӗ тӑрӑх, Патӑрьел округӗнчи Вӑтаел ялӗнче кӑнтӑр кунӗнчех лавккана кайма тухнӑ хӗрарӑма тилӗ тапӑннӑ. Ялта уткалакан ҫын нумай пулсан та тилӗ хӑраман, хӗрарӑм ҫине сиксе ларса янахӗнчен, хулӗнчен ҫыртнӑ. Хӗрарӑм пулӑшу ыйтса кӑшкӑрнӑ. Кӳршӗ арҫынни пуртӑ йӑтса тухса тилле мӑйӗнчен сӗрнӗ.

Хӗрарӑма пульницӑна илсе кайнӑ.

Элтияр архивӗнчи сӑн

«Пуринчен малтан» телеграм-канал пӗлтернӗ тӑрӑх, Раҫҫейри ӑслӑлӑхсен академийӗн Ҫӗпӗрти уйрӑмӗн филологи институчӗн наука ӗҫченӗ, журналист тата фольклорҫӑ Алексей (Элтияр) Александров кӗнеке кӑларма хатӗрленет. Элтияр вӑл мӗн пири пулнине пӗлтернӗ: вулакансене чӑваш мифологийӗпе паллаштарасшӑн.

Кӗнеке 7 пин экземплярпа ьухӗ. Вӑл Мускаври «МИФ» издательствӑра кун пичетленӗ.

Малтанлӑха пӗлтернӗ тӑрӑх, кӑрлачӑн пӗрремӗш декади климат норминчен 2-3 градус ӑшӑрах пулӗ. Юр ахаль чухнехинчен 20-40 процент ытларах ӳкӗ.

Кӑҫал раштавра юр сахал ҫурӗ. Ку – 2013 ҫулти пекрех. Ун чухне те юр сахал пулнӑ. Синоптиксем пӗлтернӗ тӑрӑх, кӑрлачан 1-мӗшӗнче кӑна юр ҫӑвасса кӗтмелле. Ҫӗнӗ ҫулти каникулӑн иккӗмӗш ҫурринче те юр сахал мар пулӗ. Эппин, йӗлтӗр хатӗрлӗр.