Паян Шупашкар хулинчи сусӑрсен килӗнче прокурорсем пулнӑ. Пӗтӗм ҫын патне ҫитнипе ҫитменнине пӗлместпӗр те, анчах хулари Калинин районӗнчи прокуратура ӗҫченӗсем Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн социаллӑ ӗҫченӗсем пӑхакан сусӑрсем патӗнче пулнӑ.

Роман Лащ прокурорпа унӑн пулӑшуҫисем сусарсен ыйтӑвӗсене хуравланӑ.

«Сусарлӑх — приговор мар, эпир аптӑраса та, пуҫа усса та ларасшӑн мар», — тенӗ Татьяна Арутина инвалид социаллӑ центра тата надзор органӗн ӗҫченӗсене тӗлпулушӑн тав тунӑ май.

culture.cap.ru сӑнӳкерчӗкӗ

Пирӗн республикӑра шкулти театрсен «Асам» фестивалӗ кӑҫалхипе иккӗмӗш хут иртте. Унта хутшӑнакансене республика Элтепере Олег Николаев саламланӑ.

«Чаплӑ ҫак фестиваль иккӗмӗш хут иртет. Ҫак асамлӑха эсир тата сирӗн педагогӑрсемпе аслӑ тусӑрсем, театр ӳнерӗн ӗҫченӗсем тӑваҫҫӗ. Спектакльсене соцсеть урлӑ хаклакан ҫынсен шучӗ икӗ хут ӳснӗ: 58 пинрен пуҫласа 102 пине ҫитнӗ. Професси сцени ҫинчи малтанхи утӑмсем нумай ачашӑн хумхануллӑ самант патне тӑвакан утӑм пуласса шанатӑп», — тенӗ вӑл.

«Пӗчӗк формӑри чи лайӑх спектакль» номинацире Ҫӗмӗрлери 8-меш гимнази хатӗрленӗ ӗс палӑрнӑ. «Чи лайӑх сценографи» тесе Ҫӗрпӳри пӗтӗмӗшле пӗлӳ паракан вӑтам шкулӑн ӗҫне палӑртнӑ, «Режиссерӑн чи лайӑх ӗҫӗ» номинацире Вӑрмарти вӑтам шкулти «Мельпомена» шкул театрӗн ертӳҫи Елена Ларионова мала тухнӑ. Ӗҫсене ытти номинаципе те хакланӑ.

cheb-centr.soc.cap.ru сӑнӳкерчӗкӗ

Паян, раштав уйӑхӗн 3-мӗшӗнче, Пӗтӗм тӗнчери инвалидсен кунӗ. Ҫавна май Шупашкарти Трактор тӑвакансен культура керменӗнче пысӑк мероприяти пулса иртнӗ. Унта тӗрлӗ пултарулӑх лаҫҫисем ӗҫленӗ кӑна мар, сусӑрсене еплерех пулӑшма май пурри ҫинчен каласа кӑтартакан кӗтессем йӗркеленӗ.

Мероприятие тӗрлӗ шайри тӳре-шара, ҫав шутра республикӑн ӗҫ министрӗ Алена Елизарова, культура министрӗ Светлана Каликова, Николай Владимиров сенатор тата ыттисем хутшӑннӑ.

Сусӑр пулсан та тӗлӗнсе каймалла тӗрлӗ енӗпе ӑста ачасемпе аслисен пултарулӑхӗпе те паллашма май килнӗ.

наследиечувашии.рф сайтри сӑн

Пӗрремӗш каналпа телеканалпа Елена Малышева ертсе пыракан «Жить здорово!» кӑларӑмра Ҫӗнӗ ҫулхи сӗтел ҫинче чӑваш апачӗсене те курма май пулӗ.

Чӑваш Ен кӑларӑмри уяв сӗтелӗнче наци колоричӗпе паллаштарӗ. Унта вырӑнти продукци пулӗ: Шупашкарти 2-мӗш ҫӑкӑр савучӗн ҫӑкӑрӗ, шӑрттан, шӳрпе, тултармӑш, хуран кукли, пашалу, чӑкӑт, хуплу… Кӑларӑма чӑвашсен Хӗл Мучийӗ те хутшӑнӗ.

Палӑртмалла, каларӑмра 5 рубрика пур: «Пурнӑҫ пирки», «Апат пирки», «Медицина пирки», «Кил-ҫурт пирки», «Пӗр минутра – сӗнӳ».

"Когнтактри" сӑнӳкерчӗк

Чӑваш Енре «Туризм индустрийӗнче – чи лайӑххи» пӗрремӗш конкурса пӗтемлетнӗ. Вӗсен йышӗнче Вӑрмар округӗнчи Татьяна Миронова та пур.

Татьяна чи лайӑх экскурсовод ятне тивӗҫнӗ. Вӑл республикӑра кӑсӑклӑ экскурсисем ирттернӗшӗн ҫакна тивӗҫнӗ.

Чи лайӑх туроператор «Каури» тулли мар яваплӑ общество пулнӑ. Вӑл шкул туризмне аталантарать. Чи лайӑх отельер – Лариса Николаева.

ШӖМ архивӗнчи сӑн

Етӗрне округӗнче 2008 ҫулта ҫуралнӑ хӗре шыраҫҫӗ. Галина Александрова раштавӑн 1-мӗшӗнче ирхи 9 сехетре килтен кайнӑ та таврӑнман. Хӗр Етӗрнери ЯМОЗ микрорайонта пурӑнать.

Галина Александрова ҫухални пирки Етӗрне округӗн пуҫлӑхӗ Станислав Трофимов та халӑх тетелӗнчи страницинче пӗлтернӗ. Ҫынсене шырамашкӑн пулӑшма ыйтнӑ.

Ун пирки мӗн те пулин пӗлекенсене Етӗрнери полици уйрӑмне шӑнкӑравласа пӗлтерме ыйтаҫҫӗ: (83547) 2-22-74).

culture.ru сайтри сӑн

Ӗнер Шупашкарта Раҫҫей шоу-бизнес ҫӑлтӑрӗ Игорь Николаев концерт лартнӑ. Вӑл ун чухне хӑйӗн аслашшӗ (е какашшӗ, «дедушка» тенипе пӗлме ҫук) чӑваш пулнине, йӑх-тымарӗпе мӑнаҫланнине пӗлтернӗ.

«Эпӗ манӑн чӑваш тымарӗ пулнине яланах пӗлнӗ, анчах ҫакна питӗ пӗлтерӗшлӗ тесе шутламан. Паян вара ҫакна каласшӑн: манра чӑваш юнӗ чупнӑшӑн мухтанатӑп», – тенӗ Игорь Николаев.

Елчӗк округӗнчи Аслӑ Елчӗк ялӗнчи пушар чаҫӗнче ӗҫлекен Александр Егоркин хӑйӗн канмалли кунӗнче пӗр ҫуртран тӗтӗм тухнине асӑрханӑ. Вӑл унта чупнӑ.

Тӗтӗм верандӑран тухнӑ. Александр пӳртре ҫын пурррне пӗлсе ӑна ҫӑлма кӗнӗ. Чӳречене ҫӗмӗрсе вӑл кил хуҫине урама илсе тухнӑ.

Ҫӑлавҫӑсем вырӑна ҫитиччен Александр ҫулӑмпа хӑй кӗрешнӗ. Паттӑрлӑх кӑтартнӑшӑн ӑна РФ Инкеклӗ лару-тӑру министерствин «Пушарта ҫӑлнӑшӑн» медальпе чысланӑ.

Синоптиксем пӗлиернӗ тӑрӑх, ӑшӑ ҫанталӑк юнкунччен тӑрӗ: термометр 0 градус кӑтартӗ. Ытларикун сивӗ ҫумӑр ҫуса иртӗ. Юнкун каҫхине сивӗтӗ, кӑштах юр ҫӑвӗ.

Кӗҫнерникун антициклон хуҫаланма тытӑнӗ. Ҫил лӑпланӗ, хӗвел тухӗ. Анчах сивӗтӗ.

Канмалли кунсенче 8-13 градус таран сивӗтӗ. Вырсарникун юр ҫӑвӗ.

Анчах ҫитес эрне пуҫламӑшӗнче каллех ӑшӑтӗ – йӗпе юр кӑна мар, ҫумӑр та ҫӑвӗ.

cheb-centr.soc.cap.ru сӑнӳкерчӗкӗ

Шупашкарта пурӑнакан Фаина Сивова паян 95 ҫул тултарнӑ. Ун патне ҫав ятпа ҫӗршыв Президентӗнчен ӑшӑ салам килсе ҫитнӗ.

Фаина Фёдоровна Каҫал тӑрӑхӗнче ҫуралнӑ. 1938 ҫулта вӑл шкулта вӗренме пуҫланӑ. 1944 ҫулта ҫиччӗмӗш класран вӗренсе тухнӑ. Ҫав ҫулах вӑл вырӑнти машинӑпа трактор станцийӗнче ӗҫлеме тытӑннӑ. Малтан счетовод, кайран бухгалтер пулса тӑрӑшнӑ. 1962 ҫулта хӗрарӑм Шупашкарти электроаппаратура заводӗнче ӗҫлеме тытӑннӑ. Тава тивӗҫлӗ канӑва тухсан Культура ҫуртӗнче тӑрӑшнӑ.

Кинемейӗн 1 ывӑл, 1 хӗр, 2 мӑнук, мӑнукӗн ачи пур.