"Контактри" сӑн

Новосибирскра наци йӑли-йӗркин «Россия многоликая» фестивал-конкурс иртнӗ. Чӑваш Енрен унта Вӑрнар округӗнчи Культура ҫуртӗнчи «Санар» купӑсҫӑсен ансамблӗ хушӑннӑ.

Пирӗн ентешсем иккӗмӗш вырӑн йышӑннӑ. Вӗсен пултарулӑхӗ нумайӑшне тӗлӗнтернӗ. Илемлӗ купӑс сасси залра ларакансене килӗшнӗ.

culture.cap.ru сӑнӳкерчӗкӗ

Ҫеҫпӗл Мишши ячӗллӗ Чӑваш патшалӑх ҫамрӑксен театрӗ юпа уйӑхӗн 23-мӗшӗнче Вӑрнарта «Евгений Онегин» моноспектакль кӑтартнӑ.

Моноспектакле Александр Пушкинӑн «Евгений Онегин» сӑвӑлла романӗ тӑрӑх Дмитрий Михайлов режиссёр лартнӑ.

Ӗҫе курма зал тулли халӑх пуҫтарӑннӑ. Ҫамрӑксем уйрӑмах йышлӑ пулнӑ: Вӑрнарти ял хуҫалӑх техникумӗн студенчӗсем, шкул ачисем; учительсем, театра юратакан ытти ҫын.

culture.cap.ru сӑнӳкерчӗкӗ

Ыран, юпа уйӑхӗн 24-мӗшӗнче, Чӑваш Енӗн Наци вулавӑшӗнче Людмила Сачкова прозаикӑн, публицистӑн, драматургӑн, Чӑваш Республикин культура тава тивӗҫлӗ ӗҫченӗн пултарулӑхне хаклакансем пуҫтарӑнӗҫ. Автор хӑйӗн икӗ кӗнекепе кун ҫути курнӑ «Сиксе юхать Хула ҫырми» тата «Иртнӗ кунсен куҫҫулӗ» романӗпе паллаштарӗ.

Романӑн пӗрремӗш кӗнекинчи пулӑмсем XI–XIII, XVI тата XIX ӗмӗрсенче чӑваш ялӗнче пулса иртеҫҫӗ. Иккӗмӗшӗнче — Граждан вӑрҫин тапхӑрӗнче.

Мероприяти акт залӗнче 14 сехетре пуҫланӗ.

Сӑвӑҫ юбилейӗ умӗнхи калаҫуран

«Тӑван Атӑл» журналта «Ҫав-ҫав ҫыравҫӑ ман пурнӑҫра» ятлӑ ярӑм уҫас шутпа Арсений Тарасов тӗремен манпа темиҫе хут та калаҫрӗ «Виталий Петрович, эсӗ паллӑ тӗпчевҫӗ, ҫеҫпӗлҫӗ. Ҫавӑнпа санран «Ҫеҫпӗл манӑн пурнӑҫра» ятлӑ эссе журналӑн чӳк кӑларӑмӗ валли ҫырса пама ыйтатӑп», — терӗ. Эпӗ чӗркелесе пӑрахрӑм та, журнала юрӑхлӑ пулаймарӗ. Тен, Чӑваш халӑх сайтне каймӗ-ши тесе ярса паратӑп.

Вталий Станьял. Ку ярӑм, паллах, вырӑнлӑ. Пирӗн ӑстрӑмри нумай ача пурнӑҫӗнче куккӑш-пиччӗш мар, кӗнеке ҫул уҫакан пулчӗ. Мана йывӑр вӑхӑтра тӗрек, чӑтӑмлӑх параканӗсем кӗнеке геройӗсем Виталий Бонивур, Павел Корчагин, Зоя Космодемьянская, Олег Кошевой, Александр Матросов пулчӗҫ. Леонид Агаковӑн вӑрҫӑ ачисене хытӑ мухтаттӑмӑр.

Ҫеҫпӗле ялти шкулта чухне ӑша илеймен. Вӗрентмен те ӑна йӗркеллӗ. Ячӗшӗн ҫеҫ сӑввине вӗренӳ кӗнеки тӑрӑх янраттаркаланӑ.

Арсений Тарасов. Эппин, чӑваш поэтне эсир хӑҫан ҫывӑх туйма пуҫланӑ?

— Аслӑ шкулта Ҫеҫпӗл ман пурнӑҫа тӳррӗн пырса кӗчӗ.

Малалла...

culture.cap.ru сӑнӳкерчӗкӗ

Чӑваш патшалӑх академи драма театрӗ «Уҫӑ театр» проекта хута ярӗ.

Проекта хутшӑнакансем валли режиссёрсемпе, культурӑри тата литературари экспертсемпе тӗлпулусем иртӗҫ. Ӑсталӑх сехечӗсем те йӗркелеме палӑртнӑ.

Юпа уйӑхӗн 29-мӗшӗнче «Шуйттан чури» мистикӑллӑ драма кӑтартӗҫ. Ухсай Яккӑвӗн хайлавӗ тӑрӑх спектакле епле лартни ҫинчен Наталия Сергеева режиссёр тата тӗп сӑнарсене калӑплакан Алексей Герасимов тата Евгений Урдюков каласа кӑтартӗҫ.

culture.cap.ru сӑнӳкерчӗкӗ

Чӑваш Енӗн Наци вулавӑшӗнчи «Мерчен» хӑна пӳлӗмӗнче Анатолий Печниковӑн «Илӗртӳллӗ манми Чӑваш ен» нота пуххине хаклама пуҫтарӑнӗҫ.

Мероприятие музыкантӑн 70 ҫулхине тата пултарулӑхӗнчи 55 ҫулхине халаллӗҫ.

Кӗнекене пахалама культура, ӳнер тата литература ӗҫченӗсем, ӗҫтешӗсем, ентешӗсем пуҫтарӑнӗҫ. Программӑна «Чун юрлать» кӗнекепе иллюстраци куравӗ, культура ӗҫченӗсен пултарулӑхӗ, автор юррисен «Савнӑ Чӑваш Енӗм!» концерчӗ илем кӳрӗ.

Анатолий Печников Хӗрлӗ Чутай тӑрӑхӗнчи Туктамаш ялӗнче ҫуралнӑ. Педагог, композитор, РФ халӑх вӗрентӗвӗн отличнике, Чӑваш Енри композиторсен ассоциацийӗн членӗ. Шупашкар районӗнчи Иккасинчи культура ҫуртӗнче «Ҫӑлкуҫ» вокал ансамбльне тата «Ҫамрӑк хуткупӑсҫӑ» кружока 35 ҫул ытла ертсе пынӑ.

николай архивӗнчи сӑн

Николай пулӑ тытма юратать. Ку – унӑн чун киленӗҫӗ. «Контактра» халӑх тетелӗнчи страницинче те вал кун пирки нумай ҫырса кӑтартать.

Хальхинче Николай Атӑла пулӑ тытма кайсан ҫӑрттанпа кӗрешнӗ. Ӑна туртса кӑларас тесе унӑн самаях тарлама тивнӗ. Ара, 5 килограмм ытларах таякан пулла туртса кӑларма ансат мар вӗт.

Ҫапах тӑрӑшсан-тӑрӑшсан, кӗрешсен-кӗрешсен опытлӑ пулӑҫ ҫӑрттана туртса кӑларнах.

cheb-centr.soc.cap.ru сӑнӳкерчӗкӗ

Шупашкар хулинче пурӑнакан ватӑсем Пӗтӗм Раҫҫейри финанс чемпионачӗн пӗтӗмлетӳллӗ тапхӑрне хутшӑннӑ. Чемпионат куҫӑнсӑр майпа иртнӗ.

Унта ҫӗршыври 78 команда хутшӑннӑ. Пирӗн респблика чысне регион шайӗнчи ӑмӑртура пӗрремӗш вырӑн йышӑннӑ Надежда Быченкова, иккӗмӗшпе виҫҫӗмӗш вырӑнсене тухнӑ Светлана Чекменева тата Людмила Спиридонова хутшӑннӑ.

Ҫемье архивӗнчи сӑн ӳкерчӗк

Чӑваш Енри нумай ачаллӑ тепӗр ҫемьене РФ Президенчӗ Владимир Путин «Ашшӗ-амӑшӗн мухтавӗ» орден медалӗпе чыслама йышӑннӑ. Ӑна Хӗрлӗ Чутай округӗнчи Макаровсем тивӗҫнӗ.

Владимир Александровичпа Альбина Викторовна тӑватӑ хӗр ӳстереҫҫӗ: Анастасия, Екатерина, Ульяна тата Татьяна. Ҫемье пуҫӗ колхозра водительте ӗҫленӗ, шкул автобусӗпе ачасене илсе ҫӳренӗ, почтальон пулнӑ. Халӗ кил хуҫалӑхне тытса пырать, ватӑ амӑшне пӑхать. Татьяна Викторовна хими, биологи тата географи предмечӗсене вӗрентет.

Россельхознадзор архивӗнчи сӑн

Россельхознадзорӑн Чӑваш Енри тата Чӗмпӗр облаҫӗнчи управленийӗн ӗҫченӗсем Патӑрьел округӗнчи Шӑнкӑртам ялӗ ҫывӑхӗнче свалка тупнӑ. Унта – выльӑх-чӗрлӗх юлашкийӗсем.

Ведомство ӗҫченӗсем ҫав вырӑна Патӑрьел округӗнче пурӑнакан ҫын ҫӑхав янӑ хыҫҫӑн тӗрӗсленӗ. Чӑнах та, Шӑнкӑртам ҫывӑхӗнче 3 пин ытла тӑваткал метр лаптӑк ҫинче выльӑх-чӗрлӗхӗн юлашкийӗсем купаланса выртнӑ.

Ҫакӑ паллӑ: ҫав лаптӑка выльӑх пусакан предприяти тара илет. Рссельхознадзор йӗрке пӑснине пӗтерме ыйтса ун тӗлӗшпе представлени ҫырнӑ.