culture.cap.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗн тӗп режиссерне Валерий Яковлева Чӑваш Республикин Хисеп грамотипе чыслама йышӑннӑ. Ун пек хушӑва республика Элтеперӗ Олег Николаев юпа уйӑхӗн 15-мӗшӗнче ала пуснӑ, документа влаҫ органӗсен официаллӑ порталӗнче ӗнер вырнаҫтарнӑ.

Валерий Яковлев нумаях пулмасть 85 ҫул тултарчӗ. Чӑваш патшалӑх академи драма театрӗнче вӑл Мускаври театр институтӗнчен вӗренсе тухнӑранпах ӗҫлет.

Вера Иванова сӑнӳкерчӗкӗ

Паян Шупашкарта ватӑсемпе ҫемьесем валли икӗ центр уҫӑлнӑ. Вӗсем хулари халӑхӑн социаллӑ ыйтӑвӗсене тивӗҫтерекен комплекслӑ центрта вырнаҫнӑ.

Пӗри — нумай ӗҫ пурнӑҫлакан ҫемье центрӗ, тепри — «Манӑн ҫемье центрӗ» клуб уҫлӑхӗ.

Асӑннӑ центрсене уҫас тесе нумай ӗҫ туса ирттернӗ: пӳлӗмсене юсаса ҫӗнетнӗ, хӑтлӑлатнӑ, илемлетнӗ, сӗтел-пуканпа пуянлатнӑ. Центр ертӳҫисем ӗнентернӗ тӑрӑх, ӗҫ-пуҫ юсав туса ирттернипех ҫырлахмӗ, асӑннӑ центрсем халӑхпа та урӑхларах, унчченхинчен тата та хӑвӑртрах ӗҫлеме тытӑнӗҫ.

Ҫӗнӗ лапамсене уҫма республикӑн ӗҫ министрӗ Алёна Елизарова, сывлӑх сыхлав министрӗ Владимир Степанов, Чӑваш парламенчӗн председателӗн ҫумӗ Ольга Петрова, Шупашкарти Калинин районӗн управин ертӳҫи Яков Михайлов, президент Торгово-промышленной палаты Чувашии Игорь Суту-илӳпе промышленность палатин президенчӗ Игорь Кустарин хутшӑннӑ.

Ҫак сӑн ӳкерчӗкри пӗчӗк хӗр пӗрчи Назира Сангакова халӗ 23 ҫулта. Вӑл тӑван амӑшне шырать. Ашшӗ Назирӑна Таджикистана илсе кайнӑ. Хӗрача ун чухне пӗчӗк пулнӑ, ҫавӑнпа вӑл амӑшне астумасть те.

Назирӑн упӑшки Саша /Раҫҫейре ӑна ҫак ятпа чӗнеҫҫӗ/ интернетра Шупашкарта пурӑнакан Светлана Черновӑпа ҫыхӑннӑ. «Ашшӗ Назирӑна Раҫҫейрен 2001 е 2003 ҫулта илсе кайнӑ. Таджикистанра вӑл ачана хӑйӗн амӑшӗпе хӑварнӑ, хӑй кайран темиҫе хут та авланнӑ, Раҫҫейрех пурӑннӑ. Назира амӑшне вӑл Раҫҫейре юлнине пӗлнӗренпе шыраса тупма ӗмӗтленет. Ҫулсем иртнӗҫемӗн унӑн тунсӑхӗ ӳссе кӑна пырать. Вӑл ӑна питӗ курасшӑн.

Назирӑпа Саша халӗ Раҫҫейре Новосибирскра пурӑнаҫҫӗ. Саша манпа ҫыхӑнсан Назира амӑшне шырани пирки хамӑн страницӑра пост вырнаҫтартӑм. Ман пата унӑн амӑшӗ пекрех хӗрарӑмсен сӑн ӳкерчӗкӗсене ярса паркаларӗҫ. Анчах вӗсенчен пӗри те вӑл пулманни палӑрчӗ. Тӗнчере пӗр пек 7 ҫын пур теҫҫӗ вӗт. Назира сӑнӗпе амӑшӗ пекех. Унӑн пит ҫӑмарти ҫинче пысӑк тур палли пур. Ахӑртнех, амӑшӗ ҫакна астуса юлнӑ. Ҫак сӑн ӳкерчӗкре пӗчӗк Назира мӗнле тумпа - ахӑртнех, ашшӗ ӑна ҫавӑнпах илсе кайнӑ, ҫуркунне пулнӑ-тӑр.

Малалла...

Марина Карягина ҫӗнӗ кӗнекисене Мускавра хӑтлани пирки, Шупашкарта та хӑтлав пуоасси ҫинчен пӗлтернӗччӗ. Аса илтерер: юпа уйӑхӗн 18-мӗшӗнче поэт, драматург тата прозаик Наци вулавӑшӗнче кӗнекисемпе паллаштарӗ. Ҫакна вӑл хӑйӗн юбилейне халаллӗ.

Ыран унта «Ҫӗн Кун ачи» тата «Ача ача» кӑларӑмсен хӑтлавӗ иртӗ. «Ачаш ача» ал ҫырӑвӗ республикӑра ачасемпе ҫамрӑксем валли ҫырнӑ хайлавсен конкурсӗнче ҫӗнтернӗ.

«Ҫӗн Кун ачи» кӗнекене сӑвӑсем, пьесӑсем, юлашки ҫулсенчи куҫарусем, кӗнеке ятлах драма /Ҫеҫпӗл Мишши ҫуралнӑранпа 125 ҫул ҫитнине халалланӑ/ кӗнӗ.

Хӑтлав 119-мӗш пӳлӗмре 16 сехетре пуҫланӗ.

«Сӑрҫи» заповедникри фотокапкӑна упа лекнӗ. Заповедник ӗҫченӗсем ӑна палласа та илнӗ.

Упана фотокапкӑн малтан утӑ уйӑхӗнче ӳкернӗ. Ун чухне унӑн пуҫӗ ҫинче сулахай енче суран пулни палӑрнӑ.

Хальхинче те фотокапкӑна ҫав упах лекнӗ. Пуҫӗ ҫинче суран пулнӑ, вӑл кӑштах пӗчӗкленнӗ. Суран ӳт илме пуҫлани, упа кӑштах самӑрланни палӑрнӑ. Эппин, утаман йӗркеллех хӗл каҫма выртӗ.

"На связи" форумри сӑн

ЧР Ӗҫлев министерстви 2025 ҫулта мигрантсене хӑш-пӗр сферӑра ӗҫлеме чаракан проекта хатӗрлет. Ҫитес ҫул ют ҫӗршыв ҫыннисене ятарлӑ лавккасенче эрех тата пирус сутма, троллейбуспа автобус водителӗнче, таксире ӗҫлеме чарасшӑн. Ҫавӑн пекех мигрантсемшӗн вӗренӳ, культура, спорт тытӑмӗсем хупӑ пулӗҫ.

Юпан 31-мӗшӗччен ку проекта сӳтсе явӗҫ тата коррупципе кӗрешекен экспертиза витӗр кӑларӗҫ.

"Контактри" сӑн

Ҫӑлавҫӑсене тивӗҫлӗ канури ватӑ хӗрарӑм чӗнсе илнӗ. Унӑн кушак ҫурисем картан тимӗр пӑрӑхӗ ӑшне кӗрсе ларнӑ та хӑйсем тӗллӗн тухайман иккен.

Ҫӑлавҫӑсем пӑрӑх ҫинче аялта шӑтӑк туса икӗн кушак ҫурине ирӗке кӑларнӑ. Хуҫи куншӑн питӗ савӑннӑ. Ҫӑлавҫӑсене вӑл чунран тав тунӑ.

Телеграмри «Чӑваш Ен калаҫать» каналтан илнӗ сӑнӳкерчӗк

Хӑнтӑрсен шутне палӑртас тӗллевпе хӑнтӑрсен «ҫыравне» ҫулсерен ирттереҫҫӗ.

Юлашки ҫулсенче Чӑваш Енре хӑнтӑрсем нумайланнӑ. 2022-мӗш ҫулта 2024-шне асӑрхаса шута илнӗ пулсан, пӗлтӗр — 2180.

Хӑнтӑрсем ҫут ҫанталӑка ҫав тери пысӑк усӑ кӳреҫҫӗ. «Хӑнтӑрсем шыв тӑрӑх пӗрене юхтарса плотинасем туни, сӑмахран, кӳлӗсене типесрен сыхлать», — тесе пӗлтернӗ Телеграмри «Чӑваш Ен калаҫать» каналта.

Кандинский нейросеть сӑнӳкерчӗкӗ

Ачасӑррисене налук тӳлеттересшӗн. Ҫак шухӑша РФ Патшалӑх Думин депутачӗ Андрей Гурулев каланӑ. Вӑл шухӑшланӑ тӑрӑх, ҫав укҫапа тӑлӑхсемпе ача ҫурчӗсене пулӑшма май пулать.

Евгений Федоров депутат ача ҫуккисене алимент тӳлекенсемпе пӗр шайра хакламалла, вӗсен тупӑшне кура тытса юлакан налука ӳстерме сӗннӗ.

Раҫҫей Правительствин социаллӑ пурнӑҫ тата экономика тӗпчев институчӗн директорӗ Алексей Зубец вара ашшӗ-амӑшӗ пулайманнисене 30-40 пин таран тӳлеттерме сӗннӗ.

Кристина Макосеева архивӗнчи сӑн

Мускавра иртекен Мода эрнинче Чӑваш Енри ылтӑн алка-эреш брендне, «Виҫӗ хӗвеле», курма пулать. Бренд йӗркелӳҫи - пултаруллӑ дизайнер Кристина Макосеева.

Кристинӑшӑн чӑваш эрешӗллӗ эреш-алка тӑвасси - чун киленӗҫӗ. «Сӗтел хушшинчен темиҫе сехет тӑмасӑр ирттерме пултаратӑп», - тет вӑл.

Кристина алка-эреш кӑна мар, хӑйне евӗр стильлӗ тата меллӗ тумтир те шухӑшласа кӑларать.