"Контактри" сӑн

Йӗпреҫ округӗнчи Эконом ялӗнче канмалли питӗ илемлӗ вырӑн пур. Вӑл - «Хӑтлӑ картиш».

Ӑна Валентинӑпа Юрий Русковсем хута янӑ. Кунашкал кану вырӑнӗ пирки вӗсем тахҫанах ӗмӗтленнӗ. Кивӗ фермӑна туянсан ӗмӗтне пурнӑҫлама тытӑннӑ.

Халӗ унта - мунча, икӗ хӑна ҫурчӗ, банкет залӗ тата пулӑ тытмалли пӗве. Русковсем экзотикӑллӑ чӗрчунсен зоопаркне уҫасшӑн. Хальлӗхе уна понисем, чӑхсем, кӑрккасем пур.

"Пуринчен малтан" каналтан илнӗ сӑнӳкерчӗк

Атӑлта паян 63 ҫyлти арҫын виллине тупнӑ. Кун пирки Телеграмри «Пуринчен малтан» каналта пӗлтернӗ.

Арҫын вӗрсе хӑпартнӑ кимме ларса пулӑ тытнӑ иккен. Кимме Шупашкарти юханшыв порчӗ патӗнче асӑрханӑ, хуҫин виллине – Сосновка поселокӗ ҫывӑхӗнче.

Малтанлӑха шухӑшланӑ тӑрӑх, арҫын кимӗрен тухса ӳкнӗ. Ҫапах та инкек сӑлтавне специалистсем палӑртӗҫ.

Лидия Филиппова страницинчен илнӗ сӑнӳкерчӗк

Сӗнтӗрвӑрри тӑрӑхӗнчи Турханкасси ялӗнче «Чӑваш ялӗн илемӗ» округри фестиваль-конкурс иртнӗ.

Лидия Филиппова журналист пӗлтернӗ тӑрӑх, ӑна юпа уйӑхӗнче уявлакан Ял хӗрарӑмӗсен пӗтӗм тӗнчери кунне халалланӑ.

Фестиваль-конкурса 7 хӗрарӑм хутшӑннӑ. Вӗсене хавхалантарма вырӑнти тӳре-шара, ҫав шутра округ пуҫлӑхӗ Владимир Петров та, пынӑ.

Марина Карягина страницинчен илнӗ сӑнӳкерчӗк

Юпа уйӑхӗн 6-мӗшӗнче Мускавра Марина Карягинӑн «Ҫӗн Кун ачи» кӗнекине хакланӑ. Мероприяти унти Литераторсен ҫуртӗнче иртнӗ.

Юра уйӑхӗн 18-мӗшӗнче вара Шупашкарта, Чӑваш Енӗн Наци вулавӑшӗнче, кӗнеке презентацийӗ иртӗ. Унта икӗ кӗнекепе паллаштарӗҫ: «Ачаш ача» тата «Ҫӗн Кун ачи».

Кӗнеке премьерине литераторсем, наука, культура тата ӳнер ӗҫченӗсем, вӗрентӳре тӑрӑшакансем пуҫтарӑнӗҫ. Хӑтлав 16 сехетре пуҫланӗ.

https://vk.com/wall-35906750_220219 страницӑран илнӗ сӑнӳкерчӗк

Шупашкар муниципаллӑ округӗнчи Кӳкеҫ посёлокне 1745 ҫулта йӗркелесе янӑ. Район центрӗ аталанса-илемленсе пырать.

Кӳкеҫре кӑҫал нумай хваттерлӗ икӗ ҫурта чӑваш эрешӗпе илемлетрӗҫ. Посёлок логотипӗллӗ сумкӑсем те кӑларнӑ.

«Контактра» халӑх тетелӗнчи «Кӳкеҫӗн общество канашӗ» пабликра ҫав логотиплӑ сумкӑсемлӗ ҫынсен сӑнӳкерчӗкӗсене вырнаҫтарнӑ. Ун пек сумкӑпа пӗр пике Арменири Ереванта сӑн ӳкерӗннӗ, каччӑ вара — Грузири Батуминче.

Машина Карягина страницинчен илнӗ сӑнӳкерчӗк

Нумаях пулмасть Марина Карягина поэтӑн тата драматургӑн икӗ кӗнеки пичетленсе тухнӑ.

«Ҫак кунсенче харӑсах «йӗкӗрешлӗ» пултӑм темелле пуль: икӗ «Ача» кун ҫути курчӗ.

«Ҫӗн Кун ачи» кӗнекере — Ҫеҫпӗл Мишши ячӗллӗ ҫамрӑксен театрӗ лартнӑ пьесӑн тулли варианчӗ, «Эреш-мен» пьеса-юмах тата тӗрлӗ жанрпа ҫырнӑ сӑвӑсем, куҫарусем.

«Ачаш ача» кӗнекере – шкул ҫулне ҫитменнисене тӗрлӗ сасӑсене тӗрӗс калама пулӑшакан сӑнарлӑ сӑвӑсем. Палиндромсем те пур (кӗнекен ячӗ те – палиндром). Пуҫламӑш классенче вӗренекенсем валли – уйрӑм пай», — хыпарланӑ автор «Контактра».

Кама кӑсӑклӑ - ыйтма пултаратӑр.

Ӳнерҫисем - Наталия Андреевӑпа Георгий Фомиряков.

«Кӳкеҫӗн общество канашӗ» пабликран илнӗ сӑнӳкерчӗк

Кӳкеҫри ваттисен ҫуртӗнче пурӑнакан Клеопатра Георгиева юпа уйӑхӗн 10-мӗшӗнче 100 ҫул тултарнӑ.

Ватӑ ҫын — тыл ӗҫченӗ, ӗҫ ветеранӗ. Ӑна юбилейпа саламлама Кӳкеҫ пуҫлӑхӗ Владимир Михайлов пынӑ. Вӑл Раҫҫей Президенчӗн Владимир Путинӑн саламне илсе ҫитернӗ.

Кинемее ҫавӑн пекех посёлокри «Откровение» ансамбль те саламланӑ.

Спорта юратакан мӑшӑр Лев Петров тата Алевтина Судеркина тӗнче шайӗнчи - 2, Раҫҫей шайӗнчи 13 ӑмӑртӑва хутшӑннӑ. Вӗсем иккӗшӗ 37 медаль ҫӗнсе илнӗ.

Нумаях пулмасть вӗсем Адлерта ветерансен хушшинче ҫӑмӑл атлетика енӗпе иртнӗ Раҫҫей Кубокне хутшӑннӑ. Алевтина 55 ҫултан аслӑрах хӗрарӑмсен хушшинче сӑнӑ ывӑтса ылтӑн медальсем ҫӗнсе илнӗ. Кунсӑр пуҫне 5 пин метра хӑвӑрт утса пӑхӑр медаль илнӗ. Лев 65 ҫултан аслӑраххисемпе тупӑшса кӗмӗл медале тивӗҫнӗ.

"Контактри" сӑн

Чӑваш Енри гимнаст Владислав Поляшов ҫемье ҫавӑрнӑ. Вӑл Надежда ятлӑ хӗре мӑшӑр тунӑ.

Владислав - 29 ҫулта. Гимнастикӑпа вӑл мӗн ачаран кӑсӑкланнӑ. 2014 ҫулта Раҫҫей спорт мастерӗ пулса тӑнӑ. 2016 ҫулта вара тӗнче класлӑ спорт мастерӗн ятне тивӗҫнӗ.

Владислав тӗнче шайӗнчи ӑмӑртусене те хутшӑннӑ. Ҫав шутра - Олимп вӑййисене те.

"Контактри" сӑн

Вӑрнар округӗнчи Ҫӗнӗ Мӗлӗш ялӗнче пурӑнакан Николайпа Зоя Степановсене «Юратупа шанчӑклӑхшӑн» орденпа чысланӑ. Вӗсем кӑҫал кервен туя паллӑ тунӑ.

Николай Ивановичпа Зоя Степановна пӗр-пӗрне ачаран пӗлеҫҫӗ, пӗр шкулта вӗреннӗ. Унтан Зоя техникумра ветеринара вӗреннӗ, Николай салтака кайса килнӗ, колхозра ӗҫленӗ. Кайран Зоя та унта ӗҫлеме пынӑ.

Степановсем икӗ ывӑл ҫуратса ӳстернӗ.